Denaj paralajmëron ndryshime në ligjin e tatimeve, apel bizneseve: Nuk shpëtoni me marifete

Bizneset nuk do t’u shpëtojnë ndëshkimeve nëse u shmangen detyrimeve tatimore.

Ministrja e Financave, Anila Denaj paralajmëroi të hënën se do të ketë ndryshime në Kodin e procedurave Tatimore, në mënyrë që asnjë subjekt të mos i shpëtojë masave ndëshkuese.

Në kuadër të aksionit anti-informalitet, ministrja ka deklaruar se ndryshimet në Kod do të synojnë që të parandalojnë subjektet që t’i shpëtojnë masave ndëshkuese me anë të vendimeve të gjykatave, apo të “marifeteve” të tjera, siç i quajti ministrja.

Gjithashtu ajo u ndal edhe te platforma “Booking”, ndërsa u shpreh se janë në komunikim me të, në mënyrë që bizneset e regjistruara të mos shpëtojnë nga pagesa e tatimeve.

“Në hoteleri turizëm janë inspektuar 2000 subjekte, ku në 1400 subjekte 38% prej tyre kanë pasur probleme në sigurimin e punonjësve. ‘Booking’ nuk kanë përfaqësues për të formalizuar procedurat e deklarimeve të subjekteve në Shqipëri. Ka raste që subjektet mund t’i kenë shpëtuar masave ndëshkuese, me vendim gjykate ose ‘marifete të tjera’ duke na bërë që të marrim masa në ndryshimin e kodin e procedurave tatimore”, tha Denaj.

Përsa u përket kontrollit në pikat e karburanteve Denaj tha se “janë kontrolluar 231 pika të karburanteve. Në 1200 subjekte do vendosen plumbçet në të gjitha njësitë”.

Ndërsa për cigaret dhe pijet alkoolike, ministrja tha se veç faturave tatimore, njëherësh inspektimet po bëhen edhe për ndalimin e cigareve në ambientet e mbyllura, për të cilat ministrja tha se nuk do të ketë asnjë tolerancë.

Taivani u mbyll.. për 35 euro

Pas lajmit se tatimorët i kanë vënë drynin kompleksit të Taivanit në Tiranë, Realstory ka zbuluar akt vendimin e inspektorëve të tatimeve, ku rezulton se kompleksi është mbyllur vetëm për 35 euro.

Nëse shikohet aktvendimi i inspektorëve të Tatimeve duket qartë se bëhet fjalë vetëm për 4.300 mijë lekë të reja, ose 35 euro.

Në akt vendim shkruhet: “Grupi i punës u paraqit dhe ushtroi kontroll në subjektin me adresën e sipërcituar dhe konstatoi se: subjekti rezulton i regjistruar në organin tatimor; subjekti ka të instaluar pajisjen fiskale të cilën e mban në gjendje pune dhe në momentin e kontrollit nuk kishte lëshuar kupon tatimor i konstatuar në një të tavolinë ku ka të shërbyer produktet: ujë 2 shishe 400 lekë, kafe 1 copë 100 lekë, krem karamel 1 copë, 250 lekë, sallatë 1 copë 150 lekë, supe perimesh 1 copë 350 lekë, pene 4 djathërat, 1 copë 550 lekë, karkaleca 1 copë 800 lekë, fileto viçi me vere të kuqe 1 copë 1300 lekë; vlera totale e tavolinës 4300 lekë. Shkelje kjo referuar nenit 122, pika 1 gërma B, rasti (ii). Pasi u regjistrua në sistem, nga grupi i punës u mor masa me bllokim me shirita për 30 ditë kalendarike me logon: Bllokuar-Hetimi Tatimor”, shkruhet në vendimin e inspektorëve të Tatimeve.

Pronarët e kompleksit kanë sqaruar se edhe ky kupon nuk është lëshuar vetëm për neglizhencë të kamerierit që ishte në turn.

Pra kompleksit të Taivanit i është vënë shiriti dhe është bllokuar nga Tatimet për një vlerë 35 eurosh ndërkohë që ky biznes ka mbi 200 punonjës të punësuar.

Ndërkohë pronarët e kompleksit gjithashtu bëjnë të ditur se çështja do të shkojë në gjykatë. /Realstory.al

Anti-informaliteti, gjatë gushtit në sitë karburantet. Ibrahimaj: Do ketë bllokime e arrestime

Drejtoresha e Përgjithshme e Tatimeve, Delina Ibrahimaj njoftoi të enjten se aksioni anti informalitet gjatë muajit gusht do të përqëndrohet tek kontrolli ndaj pikave të karburanteve.

Ajo u shpreh se janë 1200 pika karburanti dhe 3200 pompa që do të kalojnë në sitë përsa i përket regjimit manual apo automatik, ndërsa paralajmëroi marrjen e masve të rrepta ku përveç bllokim të biznesit do të ketë edhe ndjekje penale e arrestime.

“Aksioni anti-informalitet në vijim të planit të masave që ka nisur në muajin gusht do të përqendrohet te karburantet. Pa kupon nuk ka karburant. Nga më të mëdhenjtë te të vegjlit, synohet formalizimi i ekonomisë. Me urdhër të ministres së Ekonomisë dhe Financave nga sot drejtoria e Tatimeve dhe drejtoria e Meteorologjisë do të nisin inspektime të përbashkëta për certifikimin e regjistrit. Inspektimi do të bëhet në të gjithë vendin për pompat. Certifikimi teknik dhe plumçosja do të bëhet nga drejtoria e Meteorologjisë.

Ligji nuk lejon që karburantet të sheshin në regjim manual, nëse kanë probleme me pompën duhet të ndërpresin shitjen dhe të raportojnë te tatimet apo kompanitë e kasave. Gjatë muajve të fundit në shumë karburante ka rezultuar se bëhen ndërhyrje të pompave duke i kaluar nga automatik në manual, do i identifikojmë, certifikojmë në regjim. Nëse gjenden me regjim manual do të bllokohen. Kur janë automatik do të certifikohen. Nëse do të ketë raste të përsëritura inspektorët do të verifikojnë regjimin. Janë 1200 subjekte dhe 3200 pompa që do të kontrollohen”, deklaroi Delina Ibrahimaj.

Drejtoresha e Përgjithshme e Tatimeve gjatë konferencës bëri edhe bilancin për muajin korrik gjatë aksionit anti-informalitet. Delina Ibrahimaj u shpreh se janë kryer 1933 kontrolle në vijën bregdetare, nga ku 803 rezultuan me shkelje për regjistrimin, deklarimin e punonjësve, etj. Për 108 subjekte që rezultuan pa regjistruar dhe është kryer bllokimi.

195 janë kapur me shkelje për mos lëshim kuponi, 92 me punonjës të padeklaruar, 42 shkelje në pajisjet fiskale, 26 nuk i mbanin në gjendje pune, 82 subjekte mallra pa dokumente. Nga kontrollet 30 raste, përfshirë edhe zyrtarë të qeverisjes lokale dhe inspektorë janë kallëzuar në prokurori.

Deshi luftë, Qeveria ja jep: i mbyll hotelin Bylykbashit

Pas kritikave të ashpra që kryeministri Rama u bëri tatimorëve në mbledhjen e së hënës, ku kërkoi luftë kundër informalitetit, kanë nisur masat e para. Vetë kryeministri ka publikuar fotot e bllokimit të një hoteli nga Tatimet që mesa duket nuk ishte në rregull me pagesat. Kryeministri shkruan se nuk do të lejohen shkelësit e ligjit, ndaj të gjithë të bëjnë llogaritë.

Report Tv raporton se hoteli në fjalë është në pronësi të ish deputetit demokrat Aurel Bylykbashi dhe ndodhet në zonën e llixhave të Elbasanit. Kujtojmë se Bylykbashi para zgjedhjeve të 30 qershorit bëri thirrje për vëlla vrasje vetëm që të pengohej procesi zgjedhor. Për këtë arsye ai u shoqërua në polici.

“Stop informalitetit. A i’a vlen humbja që sjell bllokimi ligjor për përfitimet nga shkelja e ligjit?! Kushdo që shkel ende ligjin le t’i bjerë lapsit. Numërimi mbrapsht ka nisur dhe humbja do të jetë e rëndë për çdo shkelës”, shkruan Rama në një postim në Facebook.

Të hënën, kreu i qeverisë, Edi Rama paralajmëroi “furtunë” te Drejtoria e Përgjithshme e Tatimeve, pas shkarkimit të drejtorit Enton Duro. Në prezantimin e drejtoreshës së re të Tatimeve, Delina Ibrahimaj, Rama theksoi se rezultati do të jetë bazik për çdo drejtor e punonjës të administratës shtetërore. Duke iu drejtuar të gjithë bizneseve në vend ai u bëri thirrje që të lëshojnë rregullisht faturat, pasi në të kundërt pasojat do të jenë të rënda.

#STOPINFORMALITETIT✋A i’a vlen humbja që sjell bllokimi ligjor për përfitimet nga shkelja e ligjit?! Kushdo që shkel…
Gepostet von Edi Rama am Dienstag, 16. Juli 2019