Kajmaku fiton tenderin publik, PD kërkon anulim

Në një kohë kur Agim Kajmaku figuron në arrati i akuzuar për 3 vepra penale, Ministria e Brendshme i ka dhënë një tender kompanisë së gruas së tij, konkretisht më 30 dhjetor 2019 për mirëmbajtjen e sipërfaqeve të gjelbërta për Qendrën Spitalore Universitare “Nënë Tereza”. Kompania figuron në emër të bashkëshortes Merita Kajmaku, ku pas zgjedhjes në krye të Bashkisë Vorë, Agim Kajmaku i ka kaluar pronësinë gruas së tij.

Kajmaku ka figuruar si pronar i firmës deri më 17 korrik, më pas i ka kaluar pronësinë Merita Kajmakut, e cila ka fituar në fund të vitit të kaluar një tender me vlerë 50 milionë lekë të vjetra nga drejtoria e blerjeve të përqendruara në Ministrinë e Brendshme. Në garë ishin katër kompani, njëra është shkualifikuar, ndërsa nga tre të tjerat ka fituar firma ‘Kajmaku’.

Në lidhje me rastin ka reaguar edhe Partia Demokratike duke thënë se ky rast dëshmon se e vetmja gjë që Edi Rama di të bëjë është të plaçkisë paratë e shqiptarëve me ca kriminelë duke i dhënë gruas së Agim Kajmakut një tender, në një kohë kur ish- kryebashkiaku i Vorës është në arrati dhe akuzohet për falsifikim formularësh vula e stampa, ushtrim kompetencash përtej afatit dhe falsifikim dokumentesh kryer në bashkëpunim. Sekretari i Përgjithshëm i PD, Gazment Bardhi bëri thirrje për anulim të tenderit kriminal dhe paratë e shqiptarëve nuk mund t’i marrë dikush që e ka vendin në burg.

“Agim Kajmaku është rasti më flagrant i plaçkitjes së buxhetit nën mbrojtjen e Edi Ramës.

Faktet janë të pakundërshtueshme:

1. PD publikoi në Gusht 2019 dokumente se Agim Kajmaku i Vorës rezulton i dënuar në Greqi, por Edi Rama e mbrojti.

2. Denoncimi i Partisë Demokratike u faktua i vërtetë, por Edi Rama nuk e shkarkoi.

3. Drejtësia kërkoi arrestimin, por Agim Kajmaku u lajmërua më parë dhe u lejua të arratiset.

4. Agim Kajmaku u arratis në nëntor 2019, por Edi Rama i dha në janar 2020 tender 57 milionë lekë.

Duke i dhënë miliona lekë një personi në arrati, që ai e emëroi kryebashkiak të Vorës dhe nuk guxoi ta shkarkonte, Edi Rama dëshmon, në mënyrë të përsëritur, se e vetmja gjë që di të bëjë është të plaçkisë paratë e shqiptarëve me ca kriminelë, oligarkë dhe të korruptuar.

Ky tender kriminal duhet anuluar! Paratë e shqiptarëve nuk mund t’i marrë një i arratisur që e ka vendin në burg!”, shkruan Bardhi.

Investimi 2 milionë USD, shembet Komisariati i përuruar në janar 2019

Pa kaluar as 5 muaj nga përurimi i komisariatit nr. 6 në Tiranë, një investim rreth 2 milionë dollarë i qeverisë shqiptare, janë pikasur shenjat e para të punimeve të dobëta, pasi ka pasur shembje të vogla të hyrjes kryesore të godinës. Incidenti ka ndodhur dje, por fatmirësisht nuk ka pasur njerëz të lënduar. Megjithatë, shembja e hyrjes së komisariatit ngre shumë pikëpyetje për faktin se tenderi për realizimin e ndërtimit të ri është fituar nga kompania Fusha shpk dhe nënkontraktor i punimeve ka qenë kompania “Eco Construction & Partners”, e cila në atë kohë drejtohej nga Orest Sota, personi që u arrestua me 800 mijë euro, (sot është në gjendje të lirë), dhe dy patentat e ish-ministrit të brendshëm në atë kohë, Saimir Tahiri. Por edhe kompania Fusha shpk ka qenë disa herë në qendër të vëmendjes, pasi është një nga kompanitë lider për fitimin e tenderave sidomos në Bashkinë e Tiranës, ku mund të përmenden rasti i Teatrit Kombëtar dhe parku pas stadiumit “Qemal Stafa”.

Punimet për ndërtimin e komisariatit nr. 6 në Tiranë nisën që në vitin 2017 dhe konkretisht kapnin vlerën 219 milionë e 483 mijë lekë të reja.

Sipas kontratës së lidhur mes kompanisë që fitoi tenderin dhe Drejtorisë së Përgjithshme të Policisë së Shtetit, afati i punimeve ishte 15 muaj, ku do të rikonstruktohej godina dhe do të ndërtoheshin edhe parking nëntokësor. U ndryshuan dy ministra, Tahiri e Xhafaj dhe një drejtor i përgjithshëm policie, derisa përfunduan punimet. Në janar të këtij viti, ministri i Brendshëm, Sandër Lleshaj dhe kreu i policisë, Ardi Veliu, përuruan ambientet e komisariatit të ri. Por, ende pa kaluar koha e garancisë së punimeve, ku minimumi është 6 muaj, ndodhi incidenti i djeshëm, duke u shembur hyrja e komisariatit. Për këtë arsye, menjëherë kanë nisur verifikimi i kontratës me kompaninë nga Drejtoria e Përgjithshme e Policisë së Shtetit,. Sipas burimeve pranë policisë, autoriteti kontraktues i ka kërkuar kompanisë që të marrë masa për riparimin e dëmit të shkaktuar. Që sot janë vendosur skelat dhe po punohet për rikonstruksionin e pjesës hyrëse ku ndodhi dhe incidenti.

640 mijë dollarë për një mur, prokuroria merr në pyetje Rektorin e Kamzës

Prokuroria e Tiranës ka marrë sot në pyetje Rektorin e Universitetit Bujqësor të Kamzës, Bahri Musabelliu i cili është nën hetim për veprën penale të “Shpërdorimit të detyres”.

Ai akuzohet se ka shpërdoruar 640 mijë dollarë për të ndërtuar një mur rrethues të Universitetit si dhe një portë.

Po kështu nën hetim janë edhe dy zv/rektorët e këtij universiteti Sulejman Sulçe dhe Remzi Keco, ndërsa në pyetje do të merren edhe përfaqësues të kompanive pjesëmarrëse në tender.

Agjencia e Prokurimit Publik njofton se tenderi për ndërtimin e murit rrethues të UBT është zhvilluar në 21 qershor të vitit të kaluar. Në tender kanë marrë pjesë gjithsej 8 kompani, por universiteti nuk ka zgjedhur ofertën e parë më të ulët, por ofertën e 6, dhe megjithëse kanë kaluar kaq muaj, në realitet ky mur nuk ekziston.