Do vrisnin Thaçin e Veselin, dënohet grupi “Syri i Popullit”

Gjykata Themelore në Prishtinë ka shpallur fajtorë të akuzuarit në rastin e njohuri si “Syri i Popullit”. Të akuzuarit janë shpallur fajtorë për përgatitje të veprave terroriste. Sipas Gjykatës të akuzuarit planifikimin vrasjen e shumë zyrtarëve të lartë në Kosovë, duke përfshirë presidentin Hashim Thaçi dhe ish-kryetarin e Kuvendit Kadri Veseli.

Sadri Ramabaja, është dënuar me 5 vite burgim, Avni Llumnica, me dënim unik prej 12 vjetësh burgim, Ragip Sallova me 4 vjet burgim, Behxhet Luzha me 2 vjet burgim, Halim Halimi me 3 vjet burgim, Bajrush Konjusha me 3 vjet burgim ndërsa i akuzuari tjetër, Rexhep Topllana me 2 vjet burgim. Të dënuarve gjykata ua ka njohur kohën sa kanë qëndruar në paraburgim. Ndërsa, për Murat Jasharin i cili kreu tentim-vrasje ndaj avokatit Azem Vllasi, Gjykata vendosi që ta dërgojë atë në 10 vjet ndalesë në institucione shëndetësore për shkak të gjendjes së tij psikike.

Çfarë është “Syri i Popullit”?

Emri i organizatës “Syri i Popullit” u bë i njohur më 12 mars të vitit 2017, kur në orët e hershme të atij mëngjesi, Murat Jashari një aktivist politik i viteve të 90-ta, trokiti në derën e banesës së avokatit Azem Vllasi në Prishtinë, për ta vrarë atë. Pak sekonda pasi Vallasi hapi derën, Murat Jashari shkrepi armë zjarri duke tentuar që ta vriste Vllasin.

Pas pak kohësh nisën arrestimet e para ku pos Murat Jasharit që kreu tentim-vrasjen u arrestua edhe Avi Llumnica. Këta dy persona u arrestuan nën akuzat se ishin pjesëtarë të organizatës “Syri i Popullit”, e cila mori përgjegjësinë për tentim-vrasjen e Azem Vllasit. Hetuesia zgjeroi hetimet duke arrestuar edhe persona të tjerë si Bajrush Konjusha, Ragip Sallova, Sadri Ramabaja, Rexhep Topllana, Sabit Berisha, Halim Halimi, Bexhet Luzha dhe Lirije Luzha.

Arrestimi më i bujshëm sa i takon pjesëtarëve të kësaj organizate ishte ai i pjesëtarit të Lëvizjes Vetëvendosje, Sadri Ramabaja, arrestimi i të cilit ndodhi më 7 tetor të vitit 2017. Ramabja u arrestua në portin e Durrësit në Shqipëri derisa tentonte që të largohej nga ky vend me pasaportë dhe leje-qëndrimi të falsifikuar franceze, kishin njoftuar autoritetet e Shqipërisë.

Gjatë seancave gjyqësore në këtë proces, Ramabaja ishte i zëshëm në kundërshtimin e akuzave me të cilat ai ngarkohej duke thënë se rasti ishte i montuar politikisht me qëllim të eliminimit të tij nga skena publike. Kush është Azem Vllasi, viktima e parë e organizatës “Syri i Popullit”?

Azem Vllasi ishte ndër politikanët më me ndikim në vitet e 80-ta në Kosovë. Vllasi ishte funksionar i lartë në kohën e ish-Jugosllavisë, derisa drejtoi atë që njihej si Krahina Autonome e Kosovës. Ai u shkarkua nga kjo pozitë në kohën e regjimit të Sllobodan Millosheviqit, kur u hoq autonomia e Kosovës.

Në vitin 1989 Vllasi u arrestua duke u shndërruar në person të burgosur politik. Një vit më vonë Vllasi u lirua nga burgu. Pas përfundimit të luftës së viteve “98-99”, Vllasi sërish mbajti disa pozita në kuadër të institucioneve të Kosovës. Fillimisht ishte këshilltar i ish-kryeministrit Bajram Kosumi, ndërsa më vonë në kuadër të Qeverisë së Kosovës, u emërua këshilltar për bisedimet me Serbinë.

Viteve të fundit Vllasi punon si avokat, ndërkohë që në opinion njihet edhe si analist politik. Prokuroria akuzoi “Syrin e Popullit” se planifikonte vrasjen e figurave politike Në një dokument prej më shumë se 70 faqesh, Prokuroria Speciale e Kosovës akuzonte organizatën “Syri i Popullit” se planifikonte veprimtari terroriste në Kosovë. Sipas aktakuzës, pjesëtarët e kësaj organizate po planifikonin shkatërrimin e strukturave themelore politike, kushtetuese, ekonomike apo shoqërore të shtetit të Kosovës.

Prokuroria pretendonte se pjesëtarët e organizatës “Syri i Popullit”, synonin që të arrinin qëllimet e tyre përmes sulmeve dhe me vrasjes së personaliteteve më të larta shtetërore duke u nisur nga ish-funksionarët e lartë të Kosovës që kishin qenë aktiv nga viti 1980 deri më 1991, duke i konsideruar ata si tradhtarë të vendit.

Sipas Prokurorisë Speciale të Kosovës, “Syri i Popullit”, po ashtu planifikonte vrasjen e disa prej funksionarëve që kishin mbajtur dhe mbanin pozita udhëheqëse nga viti 1999 deri në vitin 2016. Në aktakuzë thuhet se në listë për t’u vrarë nga kjo organizatë ishin edhe shumë emra të tjerë, si Hashim Thaçi, Kadri Veseli, Isa Mustafa, Fatmir Limaj, Xhavit Haliti si dhe shumë të tjerë që nga kjo organizatë konsideroheshin tradhtarë që duhej eliminuar.

Prokuroria Speciale: “Syri i Popullit” kishte strukturë dhe planifikim

Aktakuza e Prokurorisë Speciale, shpjegonte se organizata “Syri i Popullit” kishte logon, vulat dhe betimet, të cilat kryheshin para flamurit kombëtar dhe fotografisë së ish-komandantit të Ushtrisë Çlirimtare të Kosovë, Adem Jasharit.

Prokuroria pretendonte se organizata kishte dy grupe të njohura si “Grupi Gueril” dhe “Grupi i Dajakut”. Ndërsa sa i takon financimit, sipas Prokurorisë Speciale të Kosovës, veprimtarët e kësaj organizate do të kishin rroga mujore, derisa financimi do të bëhej nga afaristët vendorë si dhe nga mërgata në kohën sa do të krijoheshin rrethanat.

Thaçi e Veseli: Kurti e Konjufca janë pjesëtarë të organizatës “Syri i Popullit”

Në procesin gjyqësor për rastin “Syri i Popullit dëshmuan edhe presidenti i Kosovës Hashim Thaçi si dhe kryetari i Partisë Demokratike të Kosovës, Kadri Veseli. Gjatë dëshmisë para gjykatës, që të dy, si Thaçi ashtu edhe Veseli, i kishin përmendur dy drejtuesit e Vetëvendosjes, Albin Kurtin e Glauk Konjufcën, se qëndrojnë prapa organizatës “Syri i Popullit”.

Si reagim ndaj deklaratës së Thaçit e Veselit, drejtuesi i Vetëvendosjes Albin Kurti si dhe Glauk Konjucfa dorëzuan kallëzim penal për lajmërim apo kallëzim të rremë. Kurti dhe Konjufca pretendojnë se Thaçi e Veseli, nën betim më datën 28 dhjetor të vitit 2018, në procesin gjyqësor ndaj të ashtuquajturës organizata “Syri i Popullit”, kanë deklaruar se dy anëtarët e Vetëvendosjes, Kurti dhe Konjucfa janë pjesë e kësaj organizate. /REL/

“Ende pa mandat qeverisës”, Kurti pas takimit me Thaçin: Së shpejti i çoj emrin për kryeministër

Takimi mes presidentit Hashim Thaçi dhe liderit të Vetëvendosjes Albin Kurti ka zgjatur pak minuta dhe nuk është shoqëruar me një shtrëngim duarsh mes tyre. Pas takimit vetë Kurti tha se “ishte një takim konsultativ, pa kompetenca juridike dhe për këtë fakt ishte edhe i shkurtër”.

Kandidati për kryeministër i Kosovës, Albin Kurti tha se pret që qeveria të krijohet sa më shpejt dhe se një gjë e tillë është kërkuar edhe nga presidenti Thaçi, ndërsa shtoi se zvarritja e Kuvendit është kosto për shtetin.

“Unë dëgjova presidentin në këtë takim prej disa minutash unë dëgjova presidentin që shprehu interesimin për krijimin e qeverisë, por, njëkohësisht edhe tha që e di që ju nevojitet një kohë e caktuar, por, gjithashtu ne do ta bëjmë propozimin. Takimi ishte pak minuta për shkak se ishte konsultativ. Ndoshta do të ketë takime politike institucionale në të ardhmen. Unë do të jem kryeministri i ardhshëm dhe kjo do të jetë kosto për mua, ndërsa zvarritja e Kuvendit është kosto për shtetin. “ tha Kurti, i cili shtoi se vendi nuk mund të kthehej pas duke hedhur poshtë idenë se mund të ketë zgjedhje të reja dhe se po punon për arritjen e një marrëveshje qeverisëse me LDK-në.

“Nuk mund të kthemi pas, ashtu sikur nuk mund të kthehemi para 6 tetorit. Nuk mund të kthehemi pas. Tani kuvendi është konstituuar, nuk kemi pasur zvarritje, kemi kryetarin dhe kryesinë që kanë marrë votat para kamerave dhe tani besoj që duhet të bëjmë hapa përpara. Oferta që unë kam bërë në pasditen e 23 dhjetorit u refuzua, tani duhet të takohemi dhe bisedojmë që të ndajmë përgjegjësitë. Unë nuk kam caktuar asnjë ministër nga LDK-ja, kam lënë vendet për ata sipas negociatave që kemi bërë, kam shprehur vendosmërinë për të ecur përpara. Unë nuk dua të propozoj emrin serb pa pasur ata të LDK-së. Kur të përfundojmë ata të LDK-së dhe të zëvendëskryeministrit do të kalojmë te pakicat dhe zëvendësministrat. Kur do që ata janë gati (LDK) jam gati, unë do të komunikoj sërish që ta shikojmë kur të kemi takimin e radhës. Takimet nuk janë lajme, por është marrëveshja që na pret në të ardhmen” tha Kurti për mediat.

Në lidhje me çështjen e zgjedhjes së presidentit ku LDK kërkon që ta vendos vetë, Kurti tha se kjo çështje le të diskutohet kur të vij momenti, ndërsa shtoi se përveç LDK, Vetëvendosja nuk mund të ketë partner tjetër qeverisës.

“Më mirë do të ishte që çështjen e presidentit ta diskutojmë kur të vijë koha. Edhe atë të mos e përjashtojmë pasi të mbyllim temën e qeverisjes, por oferta ime u refuzua dhe tani duhet të takohemi. Nëse na imponohen zgjedhjet patjetër që marrim pjesë, por e kemi shans unik ta bëjmë qeverinë bashkë duke ecur më shpejt. Kjo punë do të marrë fund shpejt. Në momentin kur ne dërgojmë shkresën te Presidenti dhe ai bën dekretimin atëherë numërojmë mbrapsht nga 15 deri në zero. Tani do të kthehem në kryesi dhe më pas do të përgatisim shkresën me shkrim zyrtare, që presidenti të bëjë dekretimin. LDK-ja është i vetmi partner i mundshëm. Jemi në hapat e fundit të arritjes së marrëveshjes” u shpreh Kurti.

Takimi mes Kurtit dhe Thaçit u realizua pas tre refuzimesh nga kreu i Vetëvendosjes. Takimi i 6 janarit 2020 u propozua nga vetë Kurti për presidentin Thaçi, i cili u shpreh i gatshëm ta takojë atë në orën 15:00.

Thaçi: Kosova dëshmoi pjekuri politike

Presidenti i Kosovës, Hashim Thaçi i cilësoi zgjedhjet shembullore që shfaqën një pjekuri të lartë politike si nga ana e qytetarëve dhe partive politike. Thaçi tha se kjo pjekuri të shfaqet edhe në formimin e qeverisë së re, që do krijohet përmes koalicioneve paszgjedhore.

“I uroj qytetarët e Republikës së Kosovës dhe partitë politike për zgjedhjet shembullore, për votimin e dinjitetshëm, të lirë dhe demokratik. Kosova dëshmoi edhe një herë pjekuri të lartë politike dhe demokratike. Tash të njëjtën pjekuri politike duhet ta tregojmë edhe në formimin e qeverisë së re, sa më parë dhe në përballje me sfidat e menjëhershme që e presin Kosovën”, ka shkruar Thaçi.

Kosova zhvilloi të dielën më 6 tetor zgjedhjet e parakohshme parlamentare, ndërsa një ditë më pas nxori rezultatin e tyre, ku nxori fitues Lëvizjen Vetëvendosje. Albin Kurti edhe pse me numrin më të lartë të votave, nuk mund ta krijojë dot i vetëm qeverinë dhe për këtë pritet të krijojë një koalicion pazgjedhur. Mbrëmjen e fitores, Kurti tha se do i dërgojë ftesë për koalicion LDK-së, megjithatë gjithçka pritet të shihet në vijimësi.

Thaçi dekreton datën e zgjedhjeve, Kosova voton në 6 tetor

Kosova do t`i drejtohet kutive të votimit më 6 tetor, për të zgjedhur mazhorancën dhe kryeministrin e ri të vendit. Pas dorëheqjes së Ramush Haradinajt, një muaj më parë, dhe shpërndarjes së Parlamentit disa ditë më parë, Hashim Thaçi në cilësinë e Presidentit të Kosovës, këtë të hënë ka marrë dy vendime. Së pari ai dekretoi shpërndarjen e Kuvendit, ndërsa pasditen e të hënës ka miratuar datën e re të zgjedhjeve. 6 tetori është vendosur si dita kur qytetarët e Kosovës do të zgjedhin qeverinë e re për vendin. Mediat kosovare citojnë dekretin e firmosur nga Thaçi për mbajtjen e zgjedhjeve të reja.

“Duke u bazuar nё pёrgjegjёsitё kushtetuese dhe ligjore, presidenti Thaçi ka marrё vendim që zgjedhjet e parakohshme për Kuvendin e Republikës sё Kosovës tё mbahen mё 06 tetor 2019. Udhëzohet Komisioni Qendror i Zgjedhjeve i Republikës sё Kosovës t’i ndërmerr tё gjitha veprimet e nevojshme për organizimin dhe mbajtjen e zgjedhjeve për Kuvendin e Republikës sё Kosovës, nё përputhje me kёtё vendim dhe legjislacionin nё fuqi”, thuhet nё mё tej nё vendimin, tё cilin e ka nënshkruar presidenti Thaçi, njofton zyra e tij.

Prej një muaji Kosova ishte pa qeveri, pasi kryeministri Ramush Haradinaj deklaroi dorëheqjen, pasi u thirr për të dëshmuar në Gjykatën e Hagës për kimet e luftës. Në fakt, Haradinaj, më shumë se sa për hagën, dorëheqja ishte si pasojë e presionit të shtuar ndërkombëtar, për të hequr taksën për importet me Serbinë, si kush që Haradinaj ka vendosur për njohjen e Kosovës. Këtë gjë ish-kryeministri e pranoi gjatë daljes për shtyp ditën që deklaroi dorëheqjen, si dhe në letrën drejtuar qytetarëve, ku i bënte thirrje komunitetit ndërkombëtar që të mos bënte presion ndaj Kosovës për heqjen e taksës ndaj mallrave serbe dhe atyre boshnjake.

Ndërkohë, pas dorëheqjes së tij, Kosova mbeti pa qeveri dhe në një kaos vendimmarrjeje, gjë për të cilën Haradinaj iu drejtua Gjykatës Kushtetuese. Por deri në momentin e shpalljes së dekretit të ri për datën e zgjedhjeve, nga Gjykata Kushtetuese nuk pati asnjë vendim. Megjithatë, në 45 ditët e mbetura, Kosova do të përfshihet nga një garë e ashpër elektorale, ku partitë e vjetra do të duhet të bindin qytetarët për të fituar votën e tyre, ndërsa tema më delikate, sipas analistëve, gjatë fushatës do të jetë ajo e qëndrimit që subjektet politike do të mbajnë për çështjen e dialogut me serbinë.

Thaçi kërkon kandidatin e ri për ngritjen e qeverisë së Kosovës

Presidenti i Kosovës i kërkoi të premten koalicionit fitues të zgjedhjeve të vitit 2017, që të propozojë kandidatin e ri për themelimin e qeverisë, pas dorëheqjes së dy javëve më parë të kryeministrit të Kosovës, Ramush Haradinaj.

Në letrën drejtuar kryetarit të Partisë Demokratike të Kosovës, Kadri Veseli që ishte bartës i listës së koalicionit me Aleancën për Ardhmërinë e Kosovës, Nismën Socialdemokrate dhe një grup partish më të vogla, presidenti Thaçi shkruan se në bazë të Kushtetutës koalicioni ka të drejtë të propozojë kandidatin duke i kërkuar që ta bëjë një gjë të tillë.

Letra e së premtes, pasoi fillimin e këshillimeve të tij me partitë politike për zgjidhjen e situatës së krijuar pas dorëheqjes së zotit Haradinaj. Gjatë javës, presidenti Thaçi takoi partitë e komuniteteve pakicë dhe kryetaren e Komisionit Qendror të Zgjedhjeve për të diskutuar zhvillimet politike në vend.

Nuk pati ndonjë reagim të menjëhershëm të partitë politike ndaj kësaj letre e cila, mund të jetë një veprim për të përmbushur detyrimin kushtetues të presidentit i cili ose kërkon mandatar të ri ose në këshillim me partitë politike cakton datën e zgjedhjeve të parakohshme.

Gjatë javës ai tha se është i gatshëm t’i shpallë zgjedhjet e reja nëse nuk gjendet ndonjë zgjidhje tjetër për situatën e krijuar.

Partitë politike deri tash kanë hedhur poshtë çdo mundësi tjetër përveç zgjedhjeve të reja, ndërsa një pjesë e tyre ka kërkuar nga presidenti i vendit që të veprohet më shpejt në të kundërtën do të hedhin nismën për shpërndarjen e parlamentit përmes votimit që kërkon dy të tretat e votave të parlamentit 120 vendesh.

Kosova po përballet me një krizë të re politike pas dorëheqjes së kryeministrit Ramush Haradinaj, i cili u thirr javën e kaluar për t’u marrë në pyetje nga prokuroria e posaçme në Hagë. /VOA

Zgjedhjet në Kosovë, Thaçi nis konsultimin me partitë politike

Presidenti i Kosovës, Hashim Thaçi, filloi të martën këshillimet me partitë politike për hapat e mëtjeshëm pas dorëheqjes së kryeministrit Ramush Haradinaj dhe siç thuhet në një njoftim të zyrës së tij, mbetjes së Kosovës pa qeveri. Sipas njoftimit gjatë ditës presidenti Thaçi ka takuar përfaqësuesit e dy partive të komuniteteve jo shumicë.

Njoftimi, citon presidentin Thaçi të ketë thënë se “tani shtrohet nevoja për hapa konkretë në përputhje me Kushtetutën dhe ligjet e Kosovës për të pasur në vend sa më shpejtë një qeveri funksionale e efektive. Kjo qeveri duhet të reflektojë vullnetin e partive politike për një solucion të ri qeverisës apo atë të një procesi elektoral të ri dhe të bëjë të mundur që Kosova të bëhet sa më shpejtë me qeveri”,thuhet në njoftimin e zyrës së presidentit në të cilin paralajmërohen takimet e radhës me partitë tjera politike dhe përfaqësues të Komisionit të zgjedhjeve gjatë ditëve në vazhdim.

Presidenti i Kosovës tashmë i ka dy mundësi për mënyrën se si të vazhdohet më tutje; njëra që të shkohet në zgjedhje të parakohshme, 45 ditë pas shpërndarjes së parlamentit, apo caktimit të një mandatari të ri për kryeministër nga koalicioni i deritashëm qeverisës. Por, partitë politike deri tash kanë hedhur poshtë çdo mundësi tjetër përveç zgjedhjeve të reja.

Kryeministri në dorëheqje i Kosovës, Ramush Haradinaj, ftoi për të martën pasdite një takim me partnerët e koalicionit për të diskutuar lidhur me situatën e krijuar politike. Në takim morën pjesë kryetari i Nismës Socialdemokrate Fatmir Limaj dhe kryetari i Alencës Kosova e Re, Behgjet Pacolli, por jo edhe përfaqësuesit e Partisë Demokratike të Kosovës.

Kryetari i Partisë Demokratike, Kadri Veseli që më parë kishte refuzuar pjesëmarrjen në takim ndërsa e kishte cilësuar dorëheqjen e kryeministrit si të paramenduar dhe me kalkulime partiake. Zoti Limaj tha pas takimit se takimi ishte këshillues dhe bëri thirrje që partitë politike të veprojnë menjëherë.

“Janë takime normale konsultative e pimë nga një kafe, më herët me kolegë biseduam për zhvillime si të ecim përpara besoj që është e qartë që vendi është në prag të zgjedhjeve dhe duhet sa më shpejtë t’i jepet epilog kësaj çështjeje”,tha zoti Limaj.

Zoti Haradinaj paraqiti dorëheqjen e pakthyeshme pasi që u thirr për t’u marrë në pyetje nga prokuroria e posaçme në Hagë. Zoti Haradinaj ka qenë ditëve të fundit më i zëshmi për të shkuar sa më shpejt në zgjedhje ndërsa është përballur me kritika të shumta për mbajtjen e takimeve dhe mbledhjes së qeverisë edhe pas dorëheqjes. Për këtë çështje, zoti Haradinaj i dërgoi një kërkesë Gjykatës Kushtetuese për të sqaruar situatën e krijuar pas dorëheqjes së tij sa i përket qeverisjes.

Dorëheqja e zotit Haradinaj i dha fund koalicionit ndërmjet Partisë Demokratike, Aleancës për Ardhmërinë e Kosovës dhe Nismës Socialdemokrate që garuan së bashku ne zgjedhjet e përgjithshme të 11 qershorit të vitit 2017. Ngritja e qeverisë Haradinaj u bë në fillim të shtatorit të atij viti dhe përgjatë tërë kësaj kohe u përball me vështirësi në kalimin e ligjeve në parlament për shkak të votave të pakta.

Pak ditë para dorëheqjes së zotit Haradinaj dolën sheshazi më shumë se kurrë edhe përplasjet e brendshme ndërmjet drejtuesve të koalicionit qeverisës që lidheshin më shumë me qasjen ndaj tarifave të Kosovës ndaj mallrave serbe dhe bisedimeve me Serbinë./VOA/

SHBA: Kosova dhe Serbia të njohin njëra-tjetrën, ulni tonet ekstremiste

Amerika i kërkon Kosovës dhe Serbisë që të lënë mënjanë retorikën ekstremiste, dhe të ulen për të arritur një marrëveshje, që do të finalizohej me njohjen e ndërsjelltë mes tyre. Zëdhënësi i Shtëpisë së Bardhë, Judd Deere, në një deklaratë me rastin e 20 vjetorit të përfundimit të operacionit të NATO-s, që i dha fund spastrimit etnik të Kosovës nga Serbia, është shprehur:

“Prishtina dhe Beogradi duhet të dyfishojnë përpjekjet për të punuar drejt një marrëveshjeje gjithëpërfshirëse të përqendruar në njohjen reciproke dhe të heqin menjëherë pengesat ndaj përparimit.”

“E vetmja rrugë për një të ardhme më të mirë është një dialog midis fqinjësh që të synojë normalizimin e marrëdhënieve dhe t’i hapë rrugën Serbisë dhe Kosovës të kenë vendin e tyre të ligjshëm brenda komunitetit euroatlantik,” tha zëdhënësi.

“Shtetet e Bashkuara janë të gatshme të ndihmojnë gjatë gjithë këtij procesi, por i takon Kosovës dhe Serbisë që të ndërmarrin hapat e ardhshëm,” thuhet në deklaratën e Shtëpisë së Bardhë, e cila u bën thirrje Prishtinës dhe Beogradit të veprojnë tani e të mos ua lënë punën brezave të ardhshëm.

Mustafa godet Thaçin për kufirin, por nuk e quan tradhëtar

Kreu i LDK-së, Isa Mustafa është përfshirë në diskutimin për çështjen e Presidentin e Kosovës, Hashim Thaçi, i cili së fundi është akuzuar se po bashkëpunon me Presidentin serb, Aleksandar Vuçiç. Përmes një shkrimi në Facebook, Mustafa ka thënë se do të fitonte ndonjë duartrokitje nëse do ta cilësonte presidentin Thaçi si bashkëpunëtor të presidentit serb, Aleksandar Vuçiç. “Do të fitoja, ndoshta, ndonjë aplauzë nga një numër i njerëzve në Kosovë nëse Presidentin Thaçi e cilësoj si bashkëpunëtor të Vuçiçit dhe si njeri që po e shet Kosovën. Unë nuk e kam njohur si të tillë, prandaj nuk mund t’i them, veçse e do pazari. Nuk jemi në Pazar të plaçkave, por në një moment shumë delikat që po kalon vendi ynë. Kështu që cilësimet nuk janë çështje personale, por ato u adresohen institucioneve që përfaqësojnë individët”, ka thënë Mustafa. Ndërsa për korrigjimin e kufijve, ka thënë se Thaçi është duke vepruar në mënyrë të gabuar. “Presidentit Thaçi ia kam thënë edhe personalisht dhe e ka thënë gati tërë Kosova, publikisht, se diskursi i tij politik për korrigjim të kufijve është i shumë i gabueshëm dhe i papranueshëm. Ai duhet të korrigjohet. Nëse jo do ta ketë veten në qafë, jo të tjerët”, ka shkruar në fund Mustafa.

Kufijtë e Kosovës, Meta thumbon keq Ramën dhe Thaçin: Delirantë!

Presidenti Ilir Meta ka thumbuar keq sot Ramën dhe Thaçin teksa ka folur për idenë e ndryshimit të kufijve mes Kosovës dhe Serbisë. Ai i ka quajtur delirantë ata politikanë që flasin për bashkimin e të gjithë shqiptarëve. Madje, këto ide Meta thotë se hidhen për të shmangur problemet brenda vendit. Ai gjithashtu ka komentuar edhe deklaratën që bën shpesh Rama, që Kosova dhe Serbia të bëjnë një marrëveshje ashtu siç bëri pas Luftës, Franca dhe Gjermania.

“Nuk ka komb në Ballkan që ka përfituar më shumë nga rënia e perdes së hekurt. Ne atë kohë ishim si Korea e Veriut. Dëgjojmë pse mos bashkohen të gjithë shqiptarët? Por pse të mos bashkohen të gjithë serbët, kroatët, boshnjakët dhe këto delirime gjoja patriotike më shumë sesa folklorizëm janë diabolizëm i gjallë.

Është përpjekje e politikanëve autoritarë për t’u shmangur nga llogaria e brendshme për të larguar vëmendjen e opinionit. E bëjnë si në volejboll, njëri pason dhe tjetri zhyt dhe cfarë ndodh? Ikin të rinjtë. Dëgjojmë që serbët dhe shqiptarët janë popujt kryesorë të rajonit, është tjetër të thuash atë që bëri Franca me Gjermaninë që pas luftës nxorën mësime dhe është tjetër të thuash këtë të Ballkanit, pasi në Ballkan çdo popull është më i madhi, askush nuk pranon.

Nuk rivizatohen kufijtë aq kollaj. Ne e dimë sa marrëdhënie të mira janë mes Malit të Zi dhe Kosovës, por për një marrëveshje demarkacioni e dimë mirë se çfarë ndodhi. Një pakicë e vogël e bllokoi dhe bëhet fjalë për disa pyje që as qentë nuk jetojnë në dimër dhe jo ku jetojnë njerëz dhe ku ka varre, kisha dhe xhami e amanete. Dua të bëj të qartë, ne i kemi të gjitha mundësitë sikur e kemi treguar që të jemi faktor stabilizues. Kush thotë se do të kufizojmë me Tiranën për serbët na fton të shikojmë atë filmin që e kemi parë në Ballkan”, është shprehur Meta.

Këtë deklaratë Meta e bëri në konferencën e organizuar nga Shoqata George C. Marshall dhe Ambasada Amerikane në Tiranë me temë “Sfidat e Sigurisë në Ballkan dhe roli i aktorëve të jashtëm në kohën e tranzicionit euroatlantik”.

Dekarata në fjalë vjen vetëm një ditë pas takimit kokë më kokë mes Thaçit dhe Ramës në Tiranë.

Kosova e ndarë në Tiranë

Tre krerët më të lartë të Kosovës ishin dje në Tiranë, por më të ndarë se kurrë. Thaçi, Haradinaj dhe Limaj zgjodhën të njejtën ditë për të qenë të pranishëm në kryeqytetin shqiptar, por secili zhvilloi takime private, apo të ndara, që treguan dhe njëherë hendekun e qëndrimeve mes palëve.

Kështu kryeministri i Kosovës Ramush Haradinaj zhvilloi një takim informal me presidentin e Shqipërisë, Ilir Meta. Që të dy postuan një foto ku dukej se takimi ishte zhvilluar në ambientet e një lokali. Por Haradinaj në postimin e tij shkruan se kanë ndarë “qëndrime unike me presidentin Meta për tema me rëndësi për Shqipërinë dhe Kosovën”. Kujtojmë se marrëdhëniet e Haradinajt me Ramën janë ftohur prej kohësh, që në samitin e Berlinit, ku Haradinaj akuzoi kryeministrin shqiptar se kishte ushtruar presion për heqjen e taksës për mallrat serbe. Deklaratë kjo që u hodh poshtë nga kryeministri Rama.

Sakaq, Rama sot ka pritur në zyrë presidentin e Kosovës Hashim Thaçi, i cili njihet për qëndrime krejt ndryshe nga Haradinaj përsa i përket si çështjes së kufijve, ashtu edhe taksës për mallrat serbe. Thaçi postoi në facebook një mesazh ku njoftonte takimin kokë më kokë me Ramën me të cilin bisedoi për situatën në Shqipëri, Kosovë dhe Rajon, por pa dhënë më shumë detaje.

Ndërsa Fatmir Limaj ishte që dje në Tiranë ku sëbashku me zëvendës kryeministrin Erjon Braçe kryesuan takimin koordinues mes Qeverisë së Shqipërisë dhe Qeverisë së Kosovës, lidhur me implementimin e marrëveshjeve të nënshkruara në nëntor të vitit 2018.

Ndërsa në një intervistë që dha mbrëmë në Real Story të Sokol Ballës në Vizion Plus, i pyetur për çështjen e kufijve, Limaj tha se askush në Kosovë nuk ka mandatin për të diskutuar çështje që janë në shkelje të Kushtetuës.

Duket se politikanët, si ata të Kosovës, ashtu edhe ata të Shqipërisë nuk arrijnë të gjejnë gjuhën e përbashkët edhe për çështje të rëndësishme.