Pas kërkesës ndaj kryeministrit Ramush Haradinaj, edhe ish-kryeparlamentari Jakup Krasniqi është thirrur nga Gjykata Speciale në Hagë për t’u paraqitur pranë këtij organi më 24 korrik.
Lajmi është bërë i ditur nga vetë Krasniqi në
rrjetet sociale, i cili shkruan se pavarësisht se ka qenë kundër krijimit të
kësaj gjykate me presione, do ta respektojë atë duke u paraqitur në Hagë.
“Ndihem i obliguar moralisht t’ju njoftoj se
kam marr ftesë nga Dhomat e Specializuara të Gjykatës Speciale në Hagë të
paraqitem më 24 korrik 2019.
Pavarësisht bindjeve të mia që Gjykata
Speciale e ngritur mbi bazën e raportit të Dick Martit, miratuar nga Këshilli i
Evropës, i cili fund e krye është sajuar në Beograd me shpifje e gënjeshtra dhe
me motiv e qëllim të komprometimit dhe inkriminimit të luftës së drejtë e të
pastër të Ushtrisë Çlirimtare të Kosovës, përkundër qëndrimit tim të hapur
kritik e kundërshtues për krijimin me presion të kësaj gjykate, unë do të
prezantohem në hetuesinë e saj në datën e caktuar në cilëndo cilësi. Me besim
në drejtësinë, i bindur se e vërteta është që gjatë luftës në Kosovë, Serbia ka
kryer gjenocid, kurse konstruktet e saj monstruoze për UÇK-në do të bien
poshtë, unë do të jem atje për të dhënë kontributin tim për ndriçimin e së
vërtetës historike”, shkruan Krasniqi.
Ai shpreh habinë se në vend që me akuzat për krime lufte të përballet Serbia që ka kryer gjenocid, përballen politikanët e Kosovës. Sipas tij drejtësia po vepron bazuar në shpifjet e serbëve.
“Megjithatë është fatkeqësi dhe ironi e llojit
të vet, që në vend se Serbia të përballet me drejtësinë për krimet kundër
njerëzimit dhe gjenocidit, ne duhet të mbrohemi nga akuzat e saj të trilluara,
në vend që të gjykohen argumentet dhe provat e pamohueshme dhe të njohura
botërisht, drejtësia merret me trille dhe shpifje të ulëta të politikës serbe
dhe të shërbimeve të saj sekrete”, shkruan Krasniqi.
Për ish kryetarin e Kuvendit të Kosovës kjo
nuk është hera e parë që del para hetuesve. Ai kujton se ia ka dalë të bëjë
publike krimet serbe në vitet 80.
“Ia kam dalë në proceset e hetuesisë
jugosllave të viteve tetëdhjetë, siç ia kam dalë me përgjegjësi edhe kur jam
ftuar nga Gjykata Penale Ndërkombëtare për ish-Jugosllavi, për rastet e
kurdisura në bazë të dosjeve të dorëzuara nga Serbia kundër Fatmir Limajt,
Ramush Haradinajt dhe bashkëluftëtarëve të tyre.
Në të dy rastet kam dhënë deklarata në
cilësinë e zëdhënësit të UÇK-së, përfaqësuesit të saj politik dhe anëtarit të
Shtabit të Përgjithshëm të UÇK-së gjatë luftës së viteve 1998-1999. Deklaratat
e mia në Gjykatën Penale Ndërkombëtare për ish-Jugosllavi janë publike, siç
është publik edhe verdikti i kësaj gjykate kur i hodhi si të pabaza të gjitha
akuzat kundër Fatmir Limajt dhe Ramush Haradinajt, duke shpallur pafajësinë e
tyre. As kësaj radhe nuk mund të jetë ndryshe”, shkruan Jakup Krasniqi, ish zëdhënës
i UÇK-së.
Të premten të njejtën thirrje nga Haga e mori
edhe kryeministri i Kosovës, Ramush Haradinaj i cili dha dorëheqjen nga posti për
t’u përballur me akuzat të cilat i cilësoi si presion i ndërkombëtareve ndaj
Kosovës për të hequr taksën mbi mallrat serbe.
