Tërmeti, Xhaçka në Bubq: Nisim së shpejti rindërtimin

Ministrja e Mbrojtjes Olta Xhaçka zhvilloi një vizitë në fshatin Bubq të Krujës, një nga zonat më të prekura nga tërmeti. Gjatë takimit me banorët, Xhaçka u shpreh se së shpejti do të nisë dhe rindërtimi i banesave për familjet e prekura nga tërmeti. Ajo tha se prioritet do të jenë familjet me fëmijë të vegjël.

“Shumë shpejt do të nisë edhe faza më e rëndësishme, ajo e rindërtimit, në qarqet Durrës, Tiranë e Lezhë. Do bëjmë çmos që, prioritet të kenë familjet me fëmijë të vegjël e që nuk mund të jetojnë në këto kushte. Kuptoj të gjitha vështirësitë dhe ne po punojmë në garë me kohën që rindërtimi i shtëpive të nisë sa më shpejt”, tha ministrja Xhaçka gjatë bashkëbisedimit me banorët e Bubqit dhe Mazhës së Madhe.

Sipas të dhënave paraprake, të cilat përditësohen çdo ditë gjatë verifikimit të ekspertëve shqiptarë dhe të huaj në terren, deri më sot në qarqet e prekura janë inspektuar rreth 15 mijë objekte, nga të cilat 2 300 banesa të dëmtuara rëndë, ndërsa 292 pallate deri më tani janë të pabanueshme përkohësisht.

Pas mbylljes së fazës së dytë, verifikimit të dëmeve, do të nisë puna për rindërtimin masiv të banesave të dëmtuara me angazhimin edhe të firmave të ndërtimit për riparimin e pallateve që ato kanë ndërtuar si dhe ndërtimin e lagjeve të reja dhe banesave ekologjike (në zonat rurale) në Tiranë, Durrës, Thumanë, Kurbin dhe Laç për të strehuar banorët, shtëpitë e të cilëve u shkatërruan plotësisht nga tërmeti.

Gjatë vizitës në Bubq dhe Mazhë e Madhe, Ministrja e Mbrojtjes Olta Xhaçka u shoqërua nga nxënës të shkollës 9-vjeçare “Edit Durham”, të cilët kishin përgatitur pako me dhurata për 120 fëmijë të këtyre zonave.

Xhaçka falenderon FA dhe premton fuqizimin e Emergjencave Civile

Forcat e Armatosur vijojnë të qëndrojnë në terren për të ndihmuar familjet e prekura nga tërmeti i 26 nëntorit. Pesë ditë pas lëkundjeve të fuqishme që shkaktuan 51 viktima e qindra të plagosur, Forcat e Armatosura kanë përqëndruar punën e tyre në mbështetjen logjistike. Ato po transportojnë ushqime, veshmbathje e detergjentë për njerëzit e mbetur të pastrehë si pasojë e tërmetit të datës 26 nëntor. Ministrja e Mbrojtjes e shoqëruar nga shefi takoi nga afër trupat e dislokuar në mjediset e stadiumit “Niko Dovana” të Durrësit, të cilët i falënderoi për përkushtimin e treguar këto ditë gjatë operacioneve të kërkim – shpëtimit.

Në bisedën e zhvilluar me ushtarakët e angazhuar, ministrja Xhaçka premtoi mbështetje më të madhe me pajisje e mjete për strukturat ku ata bëjnë pjesë, për të përmirësuar punën e tyre në rastet e çdo lloj emergjence civile. “Jo vetëm ju por edhe kolegët tuaj, ata në uniformë dhe ata pa uniformë që i janë gjendur pranë të gjithë qytetarëve të prekur nga kjo tragjedi e madhe kombëtare, faleminderit nga zemra gjithsecilit. Bravo ju qoftë! Jeni krenari! Dhe nuk janë vetëm fjalë sa për t’u artikuluar në të tilla raste, por po ju flas me zemër. Unë e kuptoj që sprova si kjo që kemi kaluar janë edhe mësime të nxjerra, për të përmirësuar shumë nga puna që bëjmë edhe për të fuqizuar shumë më tepër strukturat tona”, tha ndër të tjera ministrja.

Ajo gjithashtu u shpreh se pas kësaj situate është e nevojshme që Shqipëria të forcojë strukturat e saj të emergjencave civile. “Edhe ato të kërkim – shpëtimit edhe ato të cilat duhet të jenë të dedikuara për emergjencat civile. Pastaj edhe për teknikën dhe mjetet, pajisjet, aparaturat që ju duhen për ta bërë punën tuaj më mirë. Patjetër që sakrifica dhe përkushtimi e profesionalizmi juaj janë të jashtëzakonshme, por duhet t’ju mbështesim më tepër që puna juaj të jetë sa më e mirë, dhe për këtë kemi nisur që tani bashkë me partnerët, jo vetëm siç u thashë të modernizojmë kapacitetet tona me teknikë të re, por edhe të ridimensionojmë të gjithë mënyrën se si kemi organizuar Forcën tonë të Armatosur, për të pasur ekipe të specializuara, të mirëtrajnuara edhe me mjetet e duhura jo vetëm të kërkim – shpëtimit por edhe të të gjitha fatkeqësive natyrore apo emergjencave civile me të cilat mund të na duhet të përballemi nga tani e tutje. Edhe një herë faleminderit, faleminderit nga zemra. Bravo ju qoftë! Shpresoj shumë që familjet tuaja ta kenë kaluar atë panikun e madh edhe për faktin që s’ju kanë pasur pranë sepse jeni detyruar që t’i shërbeni atyre që kanë pasur më shumë nevojë në këto zonat më të prekura.”- u shpreh ministrja Xhaçka.

“Luftë me flakët”, 324 zjarre shkrumbuan 1900 ha pyje në dy muaj

Në vetëm dy muaj, korrik dhe gusht, në vendin tonë janë shënuar 324 vatra zjarri që ka djegur një sipërfaqe prej 1900 hektarësh. Me anë të një informacioni të publikuar në faqen e saj zyrtare në rrjetet sociale, Ministrja e Mbrojtjes Olta Xhaçka sqaron se 99% e zjarreve të rënë gjatë verës, kanë qenë të qëllimshëm, ndërsa shton se për personat përgjegjës do të veprojë ligji.

“Pavarësisht punës së jashtëzakonshme të Emergjencave Civile, Forcave te Armatosura, zjarrfikësve dhe ndihmës së qytetarëve të shumtë që na u bashkuan si vullnetarë, korriku dhe gushti shënuan një numër të pazakontë zjarresh. 324 vatra zjarri në mbarë territorin e vendit, 1900 ha pyje, toka bujqësore, kullota, nga zjarre që në 99% të rasteve kanë ardhur jo nga temperaturat e larta, por nga zjarrvënia e qëllimshme! Vazhdojmë të jemi në krye të detyrës për të mbrojtur pronën publike e private, e mbi të gjitha jetën e qytetarëve. Ligji do të veprojë me ashpërsinë më të madhe ndaj autorëve të këtyre akteve që rrezikojnë të mirën tonë të përbashkët”, shkruan Xhaçka.

Dy muajtë e nxehtë të verës kanë qenë dramatik sa i përket situatës së zjarreve. Sipërfaqe të konsiderueshme me pyje por dhe pemë frutore u shkrumbuan në zona të ndryshme të vendit për shkak të zjarreve. Flakët nuk kanë pushuar as në ditët e para të muajit shtator, ku së fundi një sipërfaqe e konsiderueshme pyjore në Cakran të Fierit u shkrumbua nga flakët.