Bar west/ Vladrin Pjetri falënderon Bashën: Pa ty s`do bëhesha kurrë kryetar bashkie

Tashmë që zgjedhjet e 30 qershorit janë duke marrë verdiktin përfundimtar nga gjykatat e shkallëve të para në vend, në rrejtet sociale “shfrenohet” fantazia me memet për politikën. Në fokus këtë fundjavë ka qenë kryetari i Partisë Demokratike, Lulzim Basha. Pas marrjes së mandatit nga Gjykat e Shkodrës, në rrjetet sociale është postuar një foto meme, ku shihet Valdrin Pjetri, kryetari i ri i bashkisë së qytetit verior.

Në foto, ku Pjetri shfaqet duke votuar, “artistët” e memeve, i kanë shtuar mbishkrimin: “Faleminderit Lulzim Basha, pa ndihmën tënde nuk do të isha kurrë kryetar i Bashkisë Shkodër”. Mesazhi është ironik por dhe shumë i vërtetë. Basha, ashtu sikundër kanë shprehur qëndrimin publik shumë prej figurave të së djathtës, ‘i dorëzoi 61 bashkitë e vendit të majtës’ në 30 qershor.

Në këto kushte, humbja e Bashkisë së Shkodrës pa garë, është një dorëzim i një prej bastioneve historike të së djathtës në këto gati tre dekada pluralizëm politik. Por nuk mbetet me kaq, Realstory.al sjell disa nga fotot më pikante të kësaj jave të publikuara nga rrjetet sociale nga artistët e memeve, ku në fokus është kryetari i PD-së Lulzim Basha.

Gjykata u jep mandatin kryetarëve të rinj në Sarandë, Delvinë dhe Finiq

Të enjten Gjykata e Shkallës së Parë në Sarandë, ka konfirmuar ligjshmërinë e mandateve për tre të zgjedhur vendor në zgjedhjet e 30 qershorit. Konkretisht, bashkiaku i ri i bashkisë Finiq Kristo Kiço, Majlinda Qilimi për bashkinë Delvinë dhe Adrian Gurma për bashkinë Sarandë, kanë marrë mandatin edhe nga gjykata.

Në seancën gjyqësore të zhvilluar te enjten, nuk është pranuar kërkesa e palëve të opozitës për të qenë palë të treta në këtë proces.

Ndaj, avokati i opozitës, Robert Harxhi e ka quajtur pengimin e tyre për të marrë pjesë në seancat gjyqësore, si shkelje ligjore.

Vendimi i Gjykatës së Sarandës vjen një ditë pasi Gjykata e Durrësit refuzoi të njihte mandatin e Valbona Sakos. Megjithatë, pritet që të paktën 50 nga 61 të zgjedhur vendor në zgjedhjet e 30 qershorit, të njihen edhe nga gjykatat në vend.

Ndërkohë, në disa rrethe, pritet të ketë bllokim të mandateve të të zgjedhurve vendor nga gjykatat. Refuzimi i njohjes së mandatit të Valbona Sakos nga Gjykata e Durrësit, ishte procesi i parë, që pritet të pasohet edhe në disa gjykata të tjera në vend.

Meta shpjegim me “seks” për shumimin e votave

Presidenti Meta prej kohësh ka filluar të ripostojë postime të të tjerëve në faqen e tij zyrtare duke dhënë mesazhe të ndryshme apo duke goditur procesin zgjedhor apo edhe ndërkombëtarët.

Meta duket se ka gjetur “shpjegimin shkencor” se si numri votave në kuti ishte më i madh se sa pjesëmarrja e qytetarëve në votime. Duke uruar një të diel relaksuese, Meta fton qytetarët që të kuptojnë se kush është arsyeja shkencore dhe logjike e rritjes së numrit të votave duke ripostuar një postim të dikujt tjetër.

“ Të dashur miq! Duke ju uruar një të diele sa më relaksuese e çlodhëse ju ftoj të gjithëve të gjeni një shpjegim shkencor të shumimit të votave mbi numrin e pjesëmarrësve të votimeve të 30 qershorit! “ shkruan Meta

Ndërsa postimi i tij shoqërohet me shkrimin “ Kanë bërë seks votat me njëra tjetrën brenda kutive dhe janë shumuar.”

Të dashur miq! Duke ju uruar një të diele sa më relaksuese e çlodhëse ju ftoj të gjithëve të gjeni një shpjegim shkencor të shumimit të votave mbi numrin e pjesëmarrësve të votimeve të 30 qershorit! 😅
Gepostet von Ilir Meta am Sonntag, 7. Juli 2019

Rama: Po cenuat zgjedhjet nuk kaloni dot në BE, madje as familjarët tuaj

Kryeministri Rama vijon fushatën elektorale për zgjedhjet e 30 qershorit në qytetin e Cërrikut. I shoqëruar nga kreu i grupit parlamentar të PS dhe njëkohësisht drejtuesi politik i qarkut Elbasan, Taulant Basha, ato zhvilluan një takim me qytetarët e Cërrikut, ku kanë prezantuar kandidatin për kreun e Bashkisë, Andi Salla. Gjatë fjalës së tij, Rama tha se të vetmet ndërhyrje që janë bërë në qytet kanë qenë në kohën e programit të rilindjes urbane, por që më pas “ora e zhvillimit” të tij ngeci në mes. Kryeministri përsëriti edhe një herë thirrjen për mos cenimin e zgjedhje duke deklaruar se ndëshkimi do të jetë i madh, jo vetëm me burg, por edhe do t’ju ndalohet hyrja në kufijtë e vendeve të BE, jo vetëm personave që kanë bërë krimin, por dhe familjarëve të tyre.

“ E kemi detyrë të lajmërojmë se për çdo krim nga më i vogli që pengon zgjedhjet apo qytetarët të hedhin votën e tyre, do shkojnë parapa hekurave. Kush cenon zgjedhjet do ta ketë përherë të ndaluar të kalojë kufijtë e Bashkimit Europiane dhe jo vetëm ata që kanë dëmtuar procesin demokratik, por dhe anëtarët e familjes së tyre.”- tha Rama

Rama foli edhe për mos pjesëmarrjen e opozitës në zgjedhje duke thwnë se ato kanë frikë nga humbja e tyre dhe zgjedhin të hedhin kapsolla dhe të ulërijnë në rrugë duke mos u përballuar me popullin. Zgjedhjet nuk do të shtyhen dhe se ato janë legjitime edhe pa opozitën, e cila u vetëpërjashtua.

“Ata kanë frikë nga zgjedhjet, prandaj bërtasin rrugëve kundër zgjedhjeve. Kanë frikë të dalin para popullit, të thonë çfarë kanë bërë dhe të tregojnë se sa të zotë janë për t’i bërë gjërat që thonë. Në vend të dalin para popullit që t’i thonë pse e duan votën, i kërcënojnë se s’do i lënë të votojnë. Nuk kanë idenë, nuk logjikojnë me argumente dhe prandaj kujtojnë se do imponojnë logjikën e kapsollave dhe të molotovit. Por një gjë ta keni të sigurt, ata janë të lirë që të vendosin për veten e tyre, dhe nëse vendosin që të vrasin vete politikisht nuk i pengojmë dot, por nuk vendosin për asgjë tjetër për Shqipërinë. Ka njerëz që me dashamirësi thonë si mund të bëhen zgjedhjet pa ata. Nëse shkaku i mos hyrjes së tyre në zgjedhje nuk do ishin ata vetë, po ne, atëherë zgjedhjet do ishin antidemokratike. Por ata e vendosën vetë, kështu që zgjedhjet pa ata janë demokratike dhe kush mendon se rruga më e urtë do të ishte që meqë ata kanë dalë mendsh ne duhet ecim me parimin “budallait” hapi rrugë, duhet ta imagjinojë se çdo të thotë kjo. Kjo do të thotë që t’i hapësh rrugë një historie që nuk mbaron më…kështu zgjedhjet kthehen në të drejtën e partive për të luajtur me Kushtetutën si top lecke dhe me popullin si ta kenë ata për mbarë. Zgjedhjet do të bëhen në 30 qershor. Imagjinoni ça do të ndodhte sikur ne të pranonin imponinim e logjikës së dhunë, kjo do të thoshte t’i hapim rrugës politikës destructive.’ tha Rama

Kryeministri Rama ka qene edhe në zonën e Belshit ku ka prezantuar kryetarin e kësaj bashkie, Arif Tafanin dhe renditi punët e bëra ndër vite. “Ja ku jemi sot krahasoni Belshin e katër viteve me Belshin që kemi. Askush mos të mendoj që këto mjaftojnë. Askush mos të kujtojë se tani mbaruam punë dhe nuk kemi më punë për të bërë. Sot ka ndodhur e paimagjinueshmja që njerëzit vijnë nga Tirana në Belsh, vijnë dhe të huaj.“

Rama në Kurbin: Akuzat e opozitës më bëhen shëndet, më 1 korrik dalin forca të reja

Nga Laçi ku ishte për prezantimin e kandidates së Partisë Socialiste për bashkinë e Kurbinit, Majlinda Cara, Kryeministri Edi Rama u shpreh se opozita ka frikë nga zgjedhjet. Rama tha se kjo nuk është një betejë pa kundërshtarë, por një betejë politike për të ardhmen e vendit, dhe të shkuarës që nuk pati kurajën për të dalë përballë.

“Kjo betejë që nuk është pa kundërshtarë, por një betejë politike më e qartë për të ardhmen e vendit tonë dhe të shkuar me të cilët nuk patën kurajon që të na dilnin përballë. Është një betejë mes nesh, që bëjmë sa mundemi, jo sa duam për ta çuar vendin përpara. Ata kanë frikë nga zgjedhjet prandaj bërtasin rrugëve kundër tyre, kanë frikë nga drejtësia, nga ballafaqimi demokratik dhe prandaj përbetohen se do na imponojnë një përplasje antidemokratike, vendosën të ikin nga zgjedhje, punë e tyre, por nuk vendosën asgje tjetër përveç kësaj”, tha ndër të tjera Rama.

Më tej, gjatë fjalës së tij, Kryeministri Edi Rama tha se opozita ka pranuar humbjen, dhe tashmë kërkon që as Shqipëria të mos fitojë. “Opozita pengohet të hyjë në zgjedhje do të ishte antidemokratike, jo kur s’duan ata. Kanë pranuar humbjen, kanë qëllim që të mos lënë Shqipërinë të mos fitojë. Edhe në këto zgjedhje ne nuk po bëjmë fushatë për të mbështetur kandidatëve tanë. Nuk vlen shprehja, “t’i hapim rrugë budallait”, u shpreh Kryeministri.

Kryeministri Edi Rama përsëriti dhe njëherë se kush përpiqet të prishë zgjedhjet më 30 qershor, nuk do të ketë mundësi të shkojë më në Amerikë. “Ata po përiqen të gjejnë njerëz që të shkatërrojnë atë që kemi ndërtuar. Unë nuk e di se kush janë çunat këtu në Laç, që duan të mbyllin rrugën për në Itali. Një njeriu që ka frikë nga zgjedhjet, që e di se populli nuk e zgjedh, si mund t`i shkosh mbrapa?!. Në Amerikë jo vetëm nuk shkon dot vetë, por nuk shkon as familja. Pyeteni plakun për këtë, se e di ai”, tha Rama.

Gjatë fjalës së tij, Rama i bëri thirrje qytetarëve të Lezhës të votojnë kandidaten Majlinda Cara duke u kujtuar atyre një shprehje të ish-Kryeministrse së Anglisë, Margaret Thatcher, ndërsa atyre që nuk duan ta votojnë, u tha të mos guxojnë t`i bien murit me kukë.

“Kush do të votojë për Majlindën ta bëjë, kush do guxojë t`i bjerë murit me kokë, le ta bëjë, dhe të shohim kush do të jetë më i fortë, muri apo koka. Le ta themi, shyqyr që u erdhi mundësia të votoni për një grua, se keni votuar për burra 30 vjet. Me që është mundësia për të votuar për një grua, kujtohuni çfarë thoshte Margaret Thatcher; “nëse do për muhabet gjejë një burrë, nëse do të bësh punë gjejë një grua”. Më vjen shumë mirë që për herë të parë këtu në Kurbin shoh kaq gra dhe vajza. Burrave, si burr, si pjesë e të njëjtit komunitet, i them; burrin e fortë në shqiptarët e bëjmë kur dalim nga shtëpia, por ju e dini shumë mirë kush është kryeministri kur shkoni në shtëpi”, u shpreh Kryeministri.

Më tej, gjatë fjalës së tij, ai u rikthye përsëri te situata politike në vend. Edi Rama tha se opozita shqiptare po i bën vendit atë që se ka bërë kurrë një parti politike ndaj vendit të vet në asnjë shtet të Europës. Rama tha se opozita dërgon letra dhe e-maile në mediat dhe institucionet evropiane kundër Shqipërisë.

“Këto zgjedhje kanë përveç dimensionit politik, kanë dhe dimensionin patriotik. Asnjë vend në Europë nuk e ka parë këtë që po shohin shqiptarët sot. Nuk e kanë parë asnjëherë që një opozitë që kërcënon popullin e vetë. Ka pasur dhe në rajon opozita që kanë bojkotuar zgjedhjet. Por nuk e kanë parë kurrë një opozitë që kërcënon popullin e vetë, ata kanë kaq kohë që e bëjnë Shqipërinë blozë në botë, ata çojnë çdo ditë e-maile, letra në çdo zyrë në Europë. Imagjinonin të ndodhë ajo që ata kanë në kokë, dhe të shohësh se si do të thonë për Shqipërinë”, u shpreh Kryeministri Edi Rama.

Gjithashtu, kreu i Qeverisë, u bëri thirrje protestuesve të opozitës, që sipas tij nuk e duan më atë Kryeministër, të mos mendojnë si huliganë, pasi sipas Ramës, opozita politike nuk ka për t`ia dalë.

“U them atyre që protestojnë, që nuk duan qeveri, që duan që unë të iki një orë e më parë, mendoni si shqiptarë, e mos mendoni si huliganë. Shqipëria nuk mund ta marri këtë detyrë. Ata nuk kanë për t`ia dalë, ata mund të marrin më qafë disa njerëz, ti çojnë pas hekurave, e pastaj përvete shkojnë e flejnë të qetë në shtëpi. Por as të qetë nuk flenë, sepse e dinë që dita e drejtësisë po afron. Demokracia nuk shkatërrohet sepse disa parti të falimentuara nga mendja nuk marrin pjesë në zgjedhje. Ky do të jetë momenti për një ndarje me cfarë mund të bësh dhe çfarë nuk mund të bësh. Aty ku bëhet shtet nuk ka karagjozllëqe. Kur ta marin mësimin tamam, të parët që do çlirohen do jenë demokratët”, tha Rama.

Në fund, ai u shpreh se në datë 1 korrik do të nxjerrin mësim të gjithë, ndërsa pas kësaj date do të dalin forca të tjera politike. “Në datat 1 korrik do të nxjerrin mësimin të gjithë se kështu nuk vazhdohet më. Nëse do treten këta do lindin forca të tjera. Ky është një vend ku gdhihet dhe ngryset duke e ngritur e ulur kryeministrin si hajdut”, u shpreh Rama, duke e mbyllur edhe me një batutat për akuzat e opozitës për korrupsion dhe vjedhje, “qysh kur jam futur në politikë kam dëgjuar të gjitha të zezat. Për sa kohë gabimet që mund të bëjë apo dhe dështimet që mund të kemi, nuk janë rezultat i qëllimit për të bërë keq, apo për të futur dorë në xhepin e njerëzve, çfarë thonë ata, mua më bëhet shëndet”, tha Kryeministri.

Zaloshnja: E vërteta e “blerjes” së votave. PS u tkurr, por LSI u shtua me herë

Eduard Zaloshnja

Në thelb të kursit bojkotues të PD-së është pretendimi i saj se PS-ja i bleu votat e saj në zgjedhjet e fundit, kështu që nuk ia vlen të garosh me të, për sa kohë strategu i blerjes vazhdon të jetë kryeministër.

Në fakt, blerja e votave nuk është një fenomen i panjohur në Shqipërinë e tre dekadave të fundit. Dhe indiciet për këtë fenomen janë edhe shkencore.

Pyetje e bërë në një sondazh në vjeshtën e vitit 2017: A ju janë ofruar NDONJËHERË pará apo ndonjë favor, në shkëmbim të votës tuaj në zgjedhje? Kësaj pyetje i janë përgjigjur pozitivisht 20.6% e të anketuarve shqiptarë. Vetëm malazezët kanë një kuotë më të lartë në Ballkan 22.5% (shihni grafikun shoqërues).

Sondazhi i mësipërm u bë në kuadër të një studimi të kryer prej Institutit për Demokraci “Shoqëria Civile”, Shkup, si pjesë e Projektit HORIZON 2012, të financuar nga BE. Projekti HORIZON 2012 zbatohet nga një konsorcium ndërkombëtar i drejtuar nga Shkolla për Studime Sllave dhe Europiano-Lindore pranë Kolegjit Universitar Londër. Ndërsa anketimin në terren në Shqipëri e ka kryer Qendra e Kërkimeve Historike dhe Antropologjike.

Meqënëse në Shqipëri banonin rreth 2.15 milionë zgjedhës në 2017-ën (nga mbi 3.4 milionë që ishin gjithsej në listat e zgjedhësve), mund të ekstrapolohet se rreth 435 mijë zgjedhësve me banim në Shqipëri u janë ofruar pará apo ndonjë favor (në shkëmbim të votës), të paktën në një nga zgjedhjet që ata kanë marrë pjesë në tre dekadat e fundit.

Por ç’ndodhi në zgjedhjet e 2017-ës?

Sipas përgjimeve të publikuara në mediat vendase (madje edhe të huaja, si p.sh. Voice of America, Deutsche Welle, etj.), në qarqet Durrës e Kukës mund të ketë pasur blerje votash. Por sa mund të kenë ndikuar ato në rezultatin përfundimtar?

Në qarkun Kukës, PS-ja nuk arriti të dilte parti e parë, edhe pse iu afrua fare pranë kësaj surprise të jashtëzakonshme. Si rezultat, PD-ja mori 2 mandate dhe PS-ja 1 mandat (sipas parashikimeveve). Ndërsa në qarkun Durrës, ndodhi surpriza e jashtëzakonshme – PD-ja mbeti me vetëm 4 mandate (gjë që s’kishte ndodhur më parë). Mandati që mori papritmas PS-ja në Durrës e çoi atë nga 73 mandate, në 74 gjithsej.

PD-ja e humbi mandatin e saj të pestë në Durrës për vetëm 2 mijë e ca vota. Le të supozojmë për një çast se PD-ja i mori ato vota (pra PS-ja mori vetëm 73 mandate gjithsej), dhe të analizojmë në rang vendi pse PD-ja mori aq pak mandate.

PS-ja, PSD-ja dhe partitë e vogla të majta (pa LSI-në) pësuan tkurrje të numrit të votave në 2017-ën, krahasuar me 2013-ën – nga 815 mijë vota që morën në 2013-ën, zbritën në 780 mijë vota.

Edhe PD-ja, PR-ja dhe partitë e vogla të djathta (pa PDIU-në) pësuan tkurrje – nga 635 mijë vota në 2013-ën, zbritën në 460 mijë vota.

Tkurrja e votave të dy kampeve të mëdha mund të shpjegohet pjesërisht me rënien e numrit të pjesëmarrësve në zgjedhje – nga 1.72 milionë vota të vlefshme në 2013-ën, zbritën në 1.59 milionë.

Por ndërsa pjesëmarrja u tkurr (e për pasojë, u tkurrën dhe dy kampet e mëdha), dy parti u rritën ndjeshëm. PDIU-ja pothuaj i dyfishoi votat e saj – nga 45 mijë vota në 2013-ën, u ngjit në kuotën e 75 mijë votave. Ndërsa LSI-ja pati një rritje prej 45 mijë votash – nga 180 mijë vota në 2013-ën, u ngjit në kuotën e 225 mijë votave.

Këto shifra janë përmbledhur në figurën shoqëruese, e cila ilustron grafikisht se ku ikën votat e PD-së…

Taulant Balla: Zgjedhjet nuk shtyhen, PD të reflektojë pas 30 qershorit

Nga Gjykata Penale, ku ishte i pranishëm në gjyqin e hapur nga Shkëlzen Berisha për dosjen “ÇEZ”, Kryetari i Grupit Parlamentar të Partisë Socialiste, Taulant Balla ka konfirmuar edhe njëherë se nuk do të ketë shtyrje të datës së zgjedhjeve lokale. Balla u shpreh se data e zgjedhjeve vendoset nga qytetarët shqiptarë nëpërmjet Kushtetutës.

“Zgjedhjet e 30 qershorit janë një moment i rëndësishëm për funksionimin e shtetit ligjor në Shqipëri. Data e zgjedhjeve është një datë që përcaktohet nga populli përmes Kushtetutës. Më 30 qershor fiton Shqipëria dhe shqiptarët, dhe pas 30 qershorit është një mundësi e artë që PD të reflektojë në funksion të dy aspekteve; kush politikan punon kundër Reformës në Drejtësi, këtë betejë e ka të humbur; dhe kush politikan punon kundër integrimit të Shqipërisë në BE, edhe këtë betejë e ka të humbur, pasi vitit 2019 do të jetë viti i negociatave”, tha ndër të tjera Taulant Balla.

Lidhur me akuzat e “Shpifjes” ngritur ndaj tij nga djali i ish-Kryeministrit Sali Berisha, Taulant Balla u shpreh se dosja “ÇEZ” është një nga aferat që i ka kushtuar rreth 450 milionë euro Shqipërisë. Balla tha se me institucionet e reja, që do të dalin nga Reforma në Drejtësi, do të hetohen të gjitha dosjet e vjetra të korrupsionit, përfshi dhe dosjen në fjalë.

“Asnjë dosje korruptive e gjithë këtyre viteve nuk do të mbetet pa u hetuar. Lufta kundër korrupsionit dhe beteja kundër politikanëve të korruptuar nuk mbaron asnjëherë. Prokuroria e re që po lind nga Reforma në Drejtësi, duhet t`i rimarri një e nga një këto dosje. Dosja “ÇEZ” i ka kushtuar shqiptarëve më shumë se 450 milionë euro”.

“Dua t`ju them, se sot më shumë se kurrë është e qartë se në asnjë rast, politikanët që përpiqen çdo ditë të pengojnë Reformën në Drejtësi, ta kenë të qartë se ajo është në rrugë pa kthim. Shkëlzen Berisha është rasti kur njerëzit në pushtet janë pastruar”, tha ndër të tjera Balla.

Ndërkohë, lidhur me gjyqin e hapur nga Shkëlzen Berisha kundër Taulant Ballës, në datën 12 qershor pritet që Prokuroria të dalë me një vendim. Gjatë seancës së sotme gjyqësore, Taulant Balla ka kërkuar pafajësi për akuzat e ngritura nga Shkëlzen Berisha.

Rama i numëron ditët Bashës

Kryeministri i vendit Edi Rama i ka dërguar letrën e gjashtë publike kreut të PD Lulzim Basha, ku i bën thirrje sërish për dialog. Edi Rama i ka përsëritur dhe njëherë Lulzim Bashës qëndrimin e tij për të mos lëshuar pe, duke i thënë se kjo është tentativa e fundit për dialog. Gjithashtu në letrën publike, Kryeministri shprehet se zgjedhjet e 30 qershorit do të mbahen në datën e përcaktuar.

Kreu i qeverisë e fton në dialog kreun e opzoitës, duke i kujtuar se Shqipëria duhet të hap negociatat me BE këtë vit, ndërsa, sipas Ramës, opozita po bën çmos për t`i penguar ato.

LETER E GJASHTE PUBLIKE LULZIM BASHES

Zoti kryetar,

letrave të mia po i vjen fundi. E fundit për të tentuar Dialogun është edhe kjo javë, e cila mbyllet me çeljen zyrtarisht të fushatës së 30 qershorit.

S’ka mbetur nga ana ime ndonjë gjë e rëndësishme pa shkruar në këto letra dhe çka mbetet ende ndoshta, është detyrimi për të përmbledhur disa nga gjërat kryesore që janë thënë e shkruar.

1. Dy vjet më parë Ju bëtë fiks të njëjtën gjë dhe fiks për të njëjtat arsye: Paniku nga zgjedhjet dhe frika nga drejtësia. Asokohe kishit ikur nga Kuvendi dhe ishit mbledhur në Çadrën e Republikës së Re, për të mbrojtur drejtësinë e vjetër duke refuzuar të votoni Vetingun. Dihet si shkuan gjërat, s’po zgjatem.

2. Sivjet Ju i jeni rikthyer po atij avazi, por nga një nivel i ri papërgjegjshmërie, me mandate të djegura, bojkot zgjedhjesh dhe kërcënime për të ndaluar forcërisht popullin të zgjedhë në 30 qershor. Përsëri frika nga zgjedhjet dhe paniku nga drejtësia, Ju kanë qorruar e shurdhuar dhe shtyrë në rrugën e një lufte imagjinare çlirimtare nga tirania! Të cilën duhet ta bëni me veten ne fakt, për të përmbysur tiraninë e frikës brenda Jush, sepse Shqipëria s’është në duart e asnjë tiranie, po në duart e një shumice të zgjedhur demokratikisht, për të qeverisur deri në vitin 2021.

3. Siç e shihni dhe vetë, mbështetja Juaj në aventurën pa rrugëdalje vjen duke rënë, e sado t’i tërhiqni e t’i shtriqni trupat e ndjekësve si çamçakiz në bulevard, për të krijuar efekte fotografike e televizive masiviteti, nuk bëni tjetër veçse gënjeni veten Tuaj dhe ata që duan të gënjehen me idenë, se disa mijëra punonjësit e bashkive blu dhe masa modeste e militantëve bashkëngjitur tyre, janë populli i Shqipërisë në protestë kundër qeverisë! Kjo gënjeshtër mund t’Ju mbajë me gajret edhe për ca kohë, Juve e lidershipin politik të grupimit Tuaj. Por besomëni që zgjimi nga ëndrra me sy hapur e largimit të qeverisë pa zgjedhje apo e moslejimit të zgjedhjeve, do të jetë shumë i dhimbshëm për atë grupim e për Ju si udhëheqësi i saj, nëse do të vijoni shurdhërisht në rrugën pa dalje, ku po marshoni verbërisht.

4. Unë Ju ftoj përsëri që sa pa u djegur çdo afat kohor, të nisim Dialogun pa kushte dhe të fillojmë të shkruajmë bashkarisht, një faqe të re bashkëpunimi politik duke mos humbur më tej kohë, energji, mundësi zgjidhjeje, me këtë avaz të padobishëm për vendin, për njerëzit e për opozitën po se po!

5. Jini i sigurtë zoti Lulzim se zgjedhjet do të mbahen në 30 qershor. Kjo shumicë qeverisë do të vazhdojë të ushtrojë përgjegjësinë e saj edhe për të paktën dy vjet të tjera, kur i mbaron mandati i saj legjitim. Vetingu dhe Reforma në Drejtësi do të vijojnë pa asnjë lëkundje, asnjë ndalesë dhe asnjë rishikim, për sa kohë koha nuk do të sjellë nevojën për ndërhyrje të mundshme në korpusin ligjor të drejtësisë dhe vetëm me konsensusin e partnerëve tanë ndërkombëtarë.

Kujtesë: Shqipëria duhet të hapë negociatat për anëtarësim patjetër këtë vit dhe fatkeqësisht, Ju po bëni çmos t’i pengoni ato. Por jini po ashtu të sigurtë se populli shqiptar, përfshirë edhe çdo demokrat të arsyeshëm, që kurrë s’ka votuar e mbase s’do votojë ndonjëherë për Partinë Socialiste, nuk ka për t’Jua falur një paudhësi të tillë.

Shqiptarët janë shumë më të mençur se sa për fat të keq, shumë gabimisht, politikanë e parti të ndryshme i kanë kujtuar në momente të ndryshme të historisë së zhvillimeve demokratike. Mos e nënvleftësoni forcën e gjykimit dhe fuqinë e ndëshkimit të tyre, sepse çfarë keni parë e provuar në zgjedhje të shkuara, do t’Ju duket lule në krahasim me mësimin që do merrni kur t’Ju kërkoni përsëri votën një ditë, nëse s’do të ktheni rrugë sot përpara se sa nesër të jetë shumë vonë.

Me shëndet,

Edi Rama

Vasili: Pushteti i lig ka vdekur, ne do ndërtojmë pushtetin e mirë

Ish-kreu i Grupit Parlamentar të LSI-së, Petrit Vasili ka zgjedhur një gjuhë letrare për të komentuar protestën e djeshme dhe për të vijuar me akuzat ndaj mazhorancës aktuale.

Nëpërmjet një postimi në Facebook, ai e ka cilësuar protestën e djeshme si fundi i një pushteti të lig dhe analfabetik, ku shprehet se shqiptarët janë ngritur në shesh për të “ç’helmuar këtë vend nga kjo ligësi qeveritare pa fund”. Sipas tij, Shqipëria ka një pushtet, që rrënimin e vet e mban në këmbë me qeveritarë të rrënuar, që korrupsionin e lufton me një korrupsion edhe më të madh që të harrohet i pari, që problemin do ta zgjidhe me demagogji dhe jo me veprim të vërtetë e rrënjësor, që krimin nuk e lufton, por e ul në sofrën e pushtetit e që votën nuk e fiton, por e vjedh me kriminelë.

Madje, ai pretendon se pushteti nuk po bën asnjë hap pas për zgjidhjen e krizës. “Nuk ka një hap e veprim të këtij pushteti të ligë të rilindjes, që të tregojë sinqeritet. Çdo veprim i këtij pushteti të ligë është vetëm mashtrimi i radhës për të fituar minutat e ditët e radhës e për të shtyrë ditët e tij të pushtetit”, shprehet Vasili.

Megjithatë, ai shton se “shqiptarët janë në rrugë e sheshe për të ç’helmuar këtë vend nga kjo ligësi qeveritare pa fund”. “Ndarja nga ky pushtet i ligë është njëherazi vendosja e standardeve të reja të mëdha, parimore dhe të paprekshme nga askush. Është koha të rindërtojmë pushtetin e mirë që e ngrenë qytetarët dhe e kontrollojnë e vlerësojnë vetëm ata. Koha e pushtetit që i vë vetë notën vetes ka vdekur. Ka vdekur së bashku me analfabetin politik në krye të tij”, deklaron Vasili në postimin e tij.

Letra e pestë e Ramës: Lul hajde sa nuk është vonë. Pas 30 qershorit do të hanë të tutë

Kryeministri Edi Rama i është drejtuar sërish me një tjetër letër të pestë kundërshtarit politik, Lulzim Basha, duke e ftuar për dialog, por nuk kanë munguar edhe notat e ironisë, teksa përmend njoftimin për protestën e radhës të opozitës. Kryeministri i vë në dukje Bashës se kanë mbetur shumë pak ditë në dispozicion për dialogun, ndërkohë që sipas tij, “karvani i fitores imagjinare të opozitës po firon pak e nga pak”.

“Nëse nuk ulemi në Tryezën e Dialogut edhe këto pak ditë që kanë mbetur, ju mund të vazhdoni të lëshoni balona e të ndizni dritat e celularëve të shpresës se qielli do më përpijë mua, njësoj balonat dhe nga qielli bum, do bjerë dhuratë për ju fitorja që me votë meazallah se e arrini dot. “, deklaron Rama.

Po ashtu, ai vë sërish në dukje se zgjedhjet e 30 qershorit nuk i shtyn dot askush dhe as i pengon dot askush “Kushtetuta e Republikës sonë nuk lejon askënd t’i shtyjë, kurse ligji dënon rëndë këdo që prek qoftë edhe një kuti votimi”, deklaron Rama.

LETER E PESTE PUBLIKE E EDI RAMES, DREJTUAR LULZIM BASHES

Zoti Kryetar, në radhë të parë sinqerisht përgëzime për mbrëmë, sepse pavarësisht bojëhedhjes mbi mure që e keni cen fiziologjik si parti, kalimi nga kapsollat e molotovët, tek balonat dhe dritat e celularëve ishte një hap domethënës mbrapa!

Por siç edhe me siguri e vutë re vetë, karvani i fitores Suaj imagjinare po firon pak e nga pak, çdo herë që sos në Tiranë dhe siç e kuptoni, njëkohësisht po firojnë edhe shanset e Dialogut mes nesh. Koha e mbetur drejt ditënisjes zyrtare të fushatës së 30 qershorit po tretet me shpejtësi, e bashkë me të po jep shpirt të them të drejtën edhe shpresa ime e vobektë, se në dyllin e veshëve Tuaj mund të hapet një vrimë.

Sidoqoftë shpresa vdes e fundit dhe ja ku jam, unë përsëri, në kërkim të Dialogut me Ju për të bërë timen deri në fund kundër kësaj historie të pakuptimtë, të shëmtuar e dëmtore për vendin tonë të përbashkët. U bënë muaj që vini vërdallë, bashkë me punonjësit e bashkive blu e me ca katranë me bojë, duke goditur Shqipërinë ndërkombëtarisht dhe ngritur pikëpyetje të madhe tek miqtë europianë, lidhur me çeljen e negociatave me Bashkimin Europian; duke cënuar veprimtarinë ekonomike të vendit dhe turizmin në veçanti; duke trazuar një popull të tërë me hallin absurd se çfarë do të ndodhë e çfarë do të digjet kur të sosni në Tiranë herën tjetër…

Përveç këtyre sukseseve, që mund t’i thelloni më tutje nëse e vijoni këtë avaz dhe rënies së mëtejshme të mbështetjes së grupimit Tuaj politik, çfarë keni arritur ose mund të arrini tjetër apo le të dalë ku të dalë?

Parlamentin e keni ndaluar dot të funksionojë normalisht?

Jo, madje në seancat e të enjtes ka më shumë prezencë në anën e djathtë të sallës, se sa ç’kishte deri kur Ju e braktisët.

Qeverinë e keni ndaluar dot të vazhdojë punën normalisht?

Jo, madje e vërteta është se edhe të enjten, që na e kishit imponuar si ditë për lojë luftash, kur duhet të merreshim me baltën, çizmet, bojën, glasat e vezët Tuaja në Kuvend, e kemi ditë kuvendore normale.

A mos vallë më keni larguar mua dot?

Po, kjo po, më keni larguar mbrëmë me balonat që merrnin me vete në qiell parrullën e lodhur “Rama ik”, nën tingujt ëngjëllorë të vuvuzelëve të paqes, teksa pllaka e gramafonit Tuaj rilajmëronte fundin e afërt të tiranisë me përkrahjen mbarëbotërore për largimin tim drejt qiellit, kurse fallxhorja Juaj i rrëfente popullit se në një filxhan amerikan ishte iluminuar mbi dhunën, që Zoti e dënon si shembëlltyrë të Djallit!

Gjithësesi, pa u zgjatur me çka Ju kam stërshpjeguar nga ana ime në katër letrat e mëparshme, shoh të udhës të nënvizoj si vijon:

E para, nëse nuk ulemi në Tryezën e Dialogut edhe këto pak ditë që kanë mbetur, Ju mund të vazhdoni të lëshoni balona e të ndizni dritat e celularëve të shpresës se qielli do më përpijë mua, njësoj balonat dhe nga qielli bum, do bjerë dhuratë për Ju fitorja që me votë meazallah se e arrini dot. Vazhdoni po deshët deri në qershor 2021, me këtë ritual grotesk të fushatë – protestave seriale kundër zgjedhjeve, me frikën nga drejtësia si karikues për bateritë tuaja. Ndërsa ne, thjesht do të nisim e do të zhvillojmë fushatën e zgjedhjeve vendore, do t’i marrim bashkitë e braktisura prej jush se meqë i latë ju, s’mund t’i lemë edhe ne rrugëve dhe do të vazhdojmë të qeverisim, me të gjitha bateritë e karikuara për katër vjet, deri në qershorin 2021.

E dyta, zgjedhjet e 30 qershorit nuk i shtyn dot askush ndër ne dhe as i pengon dot askush mbi këtë dhe! Sepse Kushtetuta e Republikës sonë nuk lejon askënd t’i shtyjë, kurse ligji dënon rëndë këdo që prek qoftë edhe një kuti votimi. E meqë ra fjala, ata miqtë gjermanë të Shqipërisë në partinë Tuaj simotër, bëni mirë t’i dëgjoni kur Ju sugjerojnë dialog pa kushte, e jo të abuzoni publikisht për të çoroditur dynjanë, duke spekulluar me opinionet e tyre krejt miqësore! Se jo për gjë po ja, erdhi dita kur 61 kandidatët e mijëra këshilltarët e Partisë Socialiste do të jenë në Tiranë, për t’i rënë gongut të vrapimit drejt 30 qershorit dhe pastaj s’mbetet asnjë mik në botë, që të harxhojë më kohë as për opinione miqësore.

E treta dhe e fundit, mos mendoni Ju lutem për asnjë moment se 30 qershori nuk do të vijë apo do të kalojë pa zgjedhje. Një dritëshkurtësi e tillë mund t’i lejohet udhëheqësit Tuaj të currufjasur, i cili zhubravitet papushim nga mllefi i patretshëm qysh prej ikjes nga pushteti me 1 milionë shpulla dhe sfilitet përditë, nga tmerri i pangushëllueshëm i trokitjes së drejtësisë në derë. Po kjo s’ka si t’ju falet Juve që të nesërmen e 30 qershorit, do të gjykoheni nga ndjekësit Tuaj për se si ka mundësi, që i dorëzuat pa betejë elektorale tërë bashkitë e Shqipërisë! E aty pastaj kam frikë se edhe tërë pasojat e xhindosjes së atij marroqit dixhital ndaj meje e Partisë Socialiste, do t’i hani Ju si fajtori i madh i një disfate katastrofike.

Mos gënjeni veten më tutje i dashur Lulzim, koha po mbaron dhe mbytja e anijes Suaj sapo ka filluar. Ka ende një mundësi të vogël për Dialog përpara se sa vetë ndjekësit Tuaj, t’Ju flakin të parin në ujrat thithës ku e keni futur qorrazi atë anije.

Post Scriptum: Meqë lajmëruat grumbullimin e radhës në 31 maj, shtabi ynë elektoral vendosi ta spostojë në 1 qershor mitingun e çeljes zyrtare të fushatës – kollaj, nuk ishte një datë si ajo zgjedhjeve që s’e kemi ne në dorë.