Dënimi i ish ministrit Saimir Tahiri me 3.4 vite burg që u konvertua në shërbim prove, nuk ka kënaqur deputetin e CDU në Bundestag, Peter Beyer. Gjatë kohës që Bundestagu për 45 minuta ka diskutuar për hapjen e negociatave të Shqipërisë dhe Maqedonisë së Veriut, Beyer u ndal gjatë fjalës së tij te dënimi i Tahirit. Me një gjuhë të ashpër, Beyer tha se Shqipëria me këtë dënim nuk mund t’i hedhë hi syve Gjermanisë dhe ta përdorë si provë se drejtësia në vend po funksionon.
“Nuk mund të na hidhni dot hi syve me atë dënim”-tha ai.
Përparimi i Shqipërisë me reformat u vlerësua nga deputetë të tjerë që morrin fjalën, por theksuan se vendi ka ende punë për të bërë për luftimin e korrupsioni në nivele të larta si dhe të tregojnë se kanë një gjyqësor funksional dhe të pavarur.
“Po të votojmë për Shqipërinë i japim një shans historik. Kemi vendosur kritere shumë të forta për Shqipërinë, të ndara në dy faza. Hapja e negociatave nuk do të thotë anëtarësim”- tha Florian Hahn, deputet i CDU/CSU
Pas 45 minutave diskutim, Bundestagu vendosi t’i jap dritën jeshile Shqipërisë duke miratuar rezolutën e CDU/CSU pro hapjes së negociatave me 395 vota pro. Ndërkohë që 188 deputetë votuan kundër dhe 16 abstenuan.
