Administrata e Donald Trump i ka propozuar presidentit ukrainas, Volodymyr Zelensky, që Shteteve të Bashkuara t’i jepet 50 për qind e pronësisë së mineraleve të rralla të Ukrainës në këmbim të mbështetjes së saj ushtarake, sipas një raporti nga NBC News.
Zyrtarët amerikanë i thanë NBC News se dorëzimi i gjysmës së mineraleve të saj të vlefshme do të ishte një mënyrë që Ukraina të rimbursonte SHBA-të për miliardat e dollarëve në armë dhe mbështetjen që i ka dhënë Kievit që nga fillimi i pushtimit në shkallë të plotë të presidentit rus, Vladimir Putin në shkurt 2022.
Zyrtarët amerikanë sinjalizuan gjithashtu një hapje për vendosjen e trupave amerikane në Ukrainë për të ruajtur këto minerale, nëse ka një marrëveshje me Rusinë për t’i dhënë fund luftës në Ukrainë.
Zelensky duket se i ka lejuar SHBA-të të zhvillojnë burimet natyrore të vendit të tij si një taktikë për të mbajtur Presidentin e SHBA-ve, Donald Trump, në anën e Kievit.
Trump tha të hënën se ai dëshiron rreth 500 miliardë dollarë pasuri minerale të Ukrainës.
Zelensky paralajmëroi të premten se Ukraina ka të ngjarë të humbasë luftën e saj me Rusinë pa mbështetjen ushtarake të SHBA.
Presidenti ukrainas është në Gjermani këtë fundjavë për t’u takuar me liderë të tjerë globalë në Konferencën e Sigurisë në Mynih.
Parashikimi i tij i zymtë vjen pasi konflikti duket se po hyn në një fazë të re, me Trump dhe Sekretarin e Mbrojtjes të SHBA-ve, Pete Hegseth, duke folur në fillim të kësaj jave për negocimin e përfundimit të konfliktit me kushte të favorshme për Rusinë.