Agjencia Europian e Barnave po përshpejton punimet për të miratuar një vaksinë ndaj COVID-19 duke thirrur takimin për shqyrtimin e prodhimit të Pfizer/BioNTech para Krishtlindjeve, ose javën që vjen.
Takimi ishte lënë paraprakisht për më 29 dhjetor, duke shuar shpresat për një vaksinë para përfundimit të 2020, por duket se nisja e vaksinimit në Britani, SHBA apo Rusi e Kanada ka bërë që edhe BE të nxitojë.
Ursula von der Leyen shprehet se lajmi i EMA është shumë i mirëpritur dhe duket se europianët e parë do të vaksinohen para fundit të 2020. Sipas Presidentes së KE qëllimi është që BE të sigurojë 1 miliardë doza të vaksinës për vendet me të ardhura totale të ulëta ose të mesme.
‘’Çdo ditë ka rëndësi – ne po punojmë me shpejtësi të plotë për të autorizuar vaksina COVID19 që janë të sigurta dhe efektive.
E mirëpres lajmin nga EMA duke afruar takimin e saj për të diskutuar vaksinën Pfizer/ BioNTech, përpara Krishtlindjeve. Ka të ngjarë që evropianët e parë do të vaksinohen para fundit të vitit 2020!’’- tha Von der Leyen.