Gjykata e Tiranës caktoi të shtunën masën arrest me burg për një nga të arrestuarit për vrasjen e 26-vjeçarit në rrugën në rrugën “Muhamet Gjollesha”, i cili po punonte me rregullimin e kondicionerëve në një vilë tre-katëshe. Pas caktimit arrest me burg për 27 vjeçarin Lorenc Veliaj, kolegu i Indrit Çelajt që u vra nga vëllezërit Kusi dhe dëshmitar i ngjarjes, prokuroria ka kërkuar masën “arrest me burg” edhe për 4 të arrestuarit e tjerë.
Katër të arrestuarit Edmond Sula, 43 vjeç, Ferdinand Bakalli 41 vjeç, Luan Çaka 36 vjeç, dhe pronari i vilës që po rikonstruktohej, Bujar Kusi, 54 vjeç do të dalin para gjykatës ditën e diel, ndërsa prokuroria ka dorëzuar kërkesën për caktimin e masës e sigurisë “arrest me burg” për ata.
Konkretisht Edmond Sula, 43 vjeç akuzohet për veprat penale “Vrasja me dashje” në bashkëpunim, “Prodhimi dhe mbajtja pa leje e armeve luftarake dhe e municionit” dhe “Përkrahja e autorit të krimit”, Ferdinand Bakalli 41 vjeç dhe Luan Çaka 36 vjeç të cilët akuzohen për “Moskallëzim krimi” dhe “Veprime që pengojnë zbulimin e së vërtetës”. Të tre dyshohet se kanë qenë prezent ne momentin që ka ndodhur ngjarja dhe nuk kanë njoftuar policinë. Arrest me burg është kërkuar edhe për pronarin e vilës, Bujar Kusi, 54 vjeç, babai i dy vëllezërve vrasës, që janë ende në kërkim nga policia.
Indrit Çelaj u vra dy ditë më parë në vilën Kusi, ku po punonte si mekanik për të rregulluar kondicionerin. Ai humbi jetën pasi u qëllua me një plumb pistolete në kokë nga djemtë e pronarit të ndërtesës ku ai po punonte. Dy vëllezërit Griseldo dhe Albano Kusi, 31 dhe 28 vjeç, pasi qëlluan punëtorin në bashkëpunim me njëri-tjetrin, kërcënuan punëtorin Lorenc Veliaj që shoqëronte Indrit Çelën për të marrë përsipër fajin. Veliaj u arrestua, shumë orë pas krimit, ku me dëshminë e tij ka zbardhur gjithçka ndodhi.
