Elidon Kotorri është një emër jo pak i dëgjuar për policinë dhe mediat shqiptare në vitet 2000. Ai u akuzua për vrasjen e tre personave, duke u dënuar me burgim të përjetshëm. Por ai ka lënë qelinë në burgun e Peqinit, pas përfundimit të dënimit me rreth 20 vite heqje lirie.
Por si ndodhi ngjarja? Elidon Kotorri u dënua për vrasjen e trefishtë të Andi Hasanit, Sokol Alushit dhe Gazmend Zenelit, ndërsa u plagos shtetasi Grigor Stefani. Kotorri e kreu vrasjen për hakmarrje, pasi viktima Andi Hasani në vitin 1998 kishte vrarë mikun e tij, Elton Zajmi.
Dosja e Kotorrit i ka kaluar të gjitha proceset e gjyqësorit në Shqipëri duke e dënuar atë me burgim të përjetshëm. Pas këtij vendimi autori e dërgoi dosjen në Strasburg, ku kjo gjykatë gjeti shkelje në proces duke e rikthyer për gjykim.
Në rigjykim, shkalla e parë në Tiranë pranoi gjykimin e shkurtuar dhe e dënoi me 25 vite, nga të cilat Kotorri ka kryer rreth 20, ndërsa ka përfituar edhe ulje. Ai ka lënë të enjten qelinë e burgut të Peqinit me mbarimin e dënimit të tij.