“Kisha me vete pak hashash dhe, meqë jam nën detyrimin e paraqitjes, kur më dhanë sinjalin për të ndaluar, ia mbatha. Nuk doja telashe”, kjo është dëshmia e Genti Berishës, 25-vjeçarit shqiptar që u ndalua nga policia e Milanos për vdekjen e agjentit Francesco Imprezzabile.
Pas një nate kërkimesh intensive, ai u kap në një banesë në Monza, kurse makina e tij u gjet në Pioltello. Bashkë me Berishën, ishte edhe Andrea (mbiemri nuk është publikuar), një 30-vjeçar shqiptar.
Berisha u pranoi menjëherë agjentëve se ai kishte qenë në timonin e Audi-t Q8, të marrë me qira në zonën e Bergamos, dhe që të hënën në mbrëmje ishte larguar nga një postbllok i policisë bashkiake dhe policisë në rrugën Vittorini, në lagjen Ponte Lambro.
Pas tij ishin vënë në ndjekje tri motoçikleta të policisë lokale. Në njërën prej tyre, atë më pranë automjetit, ndodhej Francesco Imprezzabile, polici 39-vjeçar me katër vite në shërbim. Ndjekja zgjati pak më shumë se dy kilometra në rrugë të ngushta dhe mes fushave pranë pistës së aeroportit Linate. Rrethrrotullimi pranë depos së postës, një segment i drejtë rruge, një urë e vogël dhe një seri kthesash me shpejtësi mbi 100 kilometra në orë.
Pastaj ndodhi aksidenti: motoçikleta doli nga rruga dhe u përmbys në fusha. Trupi i policit përfundoi larg mjetit. Pasuan ndihmat e para dhe përpjekjet e dëshpëruara të kolegëve për t’i shpëtuar jetën. Më pas ndërhyri helikopteri i urgjencës dhe ai u transportua me shpejtësi në spitalin Niguarda, por kishte ndërruar jetë.
“Nuk e pashë të rrëzohej, nuk e preka,” deklaroi 25-vjeçari që drejtonte automjetin. Ende nuk është e qartë nëse ka pasur kontakt mes motoçikletës dhe Audi Q8. Verifikimet e para e kanë përjashtuar këtë mundësi, por hetuesit po shqyrtojnë nëse janë kryer manovra të rrezikshme që mund të kenë shkaktuar rrëzimin e policit.
Për këtë arsye, në përfundim të marrjes në pyetje nga prokurorja Francesca Crupi, Berisha u arrestua për arratisje të rrezikshme dhe po hetohet për vrasje rrugore.
Tashmë do të jenë ekspertizat mbi mjetet, të urdhëruara nga prokuroria, që do të sqarojnë dinamikën e aksidentit. I ndihmuar nga avokati Fabrizio Cardinali, ai mohoi se kishte prekur ndonjëherë motoçikletën gjatë arratisjes.
“Nuk e kam prekur, madje as nuk e kuptova që ishte rrëzuar,” tha ai. Më pas u përpoq të justifikohej: “E mora vesh natën, ma thanë sepse lajmi kishte dalë në internet.”
“Kërkoj falje familjes dhe shtetit italian. Pyes veten nëse mund të bëj diçka për të afërmit e tij”, është shprehur i riu.
Megjithatë, hetuesit po verifikojnë versionin e tij. Historia e hashashit në xhep dhe frika nga një kontroll policor që mund të kishte rënduar masën e detyrimit të paraqitjes nuk i bind shumë hetuesit. Po ashtu, ata e konsiderojnë të dyshimtë këmbënguljen e Berishës për të mos zbuluar identitetin e dy miqve të tjerë që ndodheshin në automjet bashkë me 30-vjeçarin.
“Ishim katër persona në makinë, unë po drejtoja, ata nuk kanë lidhje me ngjarjen,” deklaroi ai.
Vitin e kaluar, 25-vjeçari ishte arrestuar në Shqipëri në kuadër të operacionit “Icaro” të prokurorisë së Brescias, që goditi klanin Çela dhe trafikun e tij të kokainës nga Amerika e Jugut drejt Evropës.
Audi Q8 me ngjyrë të errët me të cilin udhëtonte atë mbrëmje dhe që tani po i nënshtrohet ekspertizave të policisë shkencore për kërkimin e gjurmëve dhe ADN-së, ishte marrë me qira. Të hënën pasdite, në orën 19:22, automjeti ishte filmuar nga një kamera në Boltiere, në provincën e Bergamos. Në timon ishte pikërisht Berisha, së bashku me një person tjetër. Më pas, në orën 21:20, ai kaloi pa u ndalur postbllokun, nisi arratisja dhe ndodhi aksidenti.
Kolegët e policit të ndjerë, të drejtuar nga komandanti Gianluca Mirabelli, megjithëse të tronditur, punuan pa ndërprerje për të gjetur autorin e arratisjes.
Francesco Imprezzabile, i cili ishte pjesë e policisë lokale që nga viti 2022 dhe punonte në Komisariatin e Zonës 4, kishte shkruar në rrjetet sociale:
“Të veshësh këtë uniformë nuk është vetëm një punë, është një përgjegjësi.”
“Milano qëndron pranë familjes së tij. Imprezzabile po kryente detyrën e tij. Shpreh ngushëllimet e mia për të gjithë trupën e policisë lokale që çdo ditë punon për të garantuar sigurinë e qytetarëve të Milanos,” deklaroi kryetari i bashkisë, Beppe Sala.
Komuna do të shpallë ditë zie qytetare.
Vdekja e policit ka prekur të gjitha institucionet italiane. Duke filluar nga Presidenti Sergio Mattarella, i cili deklaroi: “Jam thellësisht i pikëlluar dhe shpreh solidaritetin, afërsinë dhe ngushëllimet e mia.”
Ndërsa kryeministrja Giorgia Meloni tha: “Kush vesh një uniformë, vë çdo ditë jetën e vet në shërbim të të tjerëve. Nder për Francescon, shërbëtor i shtetit.”/Corriere