Hapja e Shkollës Kombëtare të Fluturimit shënon një kapitull të ri dhe premtues për rininë në Forcat e Armatosura, si dhe një pikë kthese për sigurinë rajonale.
Kryeministri Edi Rama deklaroi se përkushtimi i treguar ka shtuar ndjeshëm interesin e të rinjve, duke e bërë gjithnjë e më të vështirë përzgjedhjen mes kandidaturave të shumta cilësore.
Ky institucion i ri modern nuk do t’u shërbejë vetëm pilotëve vendas, por do të jetë i hapur për stërvitjen dhe certifikimin e të rinjve nga vendet e rajonit, përfshirë Kosovën dhe dy shtetet fqinje anëtare të NATO-s.
“Falë përkushtimit, jemi duke përjetuar një kapitull të ri në raport me rininë në forcat e armatosura. Sot është gjithnjë e më e vështirë të zgjedhësh mes kandidaturave që vijnë. Kemi një numër të konsiderueshëm. Shkolla jonë është e hapur për të stërvitur dhe për të certifikuar të rinj edhe nga vendet e rajonit, duke filluar edhe nga Kosova, të njëjtën gjë edhe për dy vendet e tjera fqinje që janë anëtare të NATO-s”, tha Rama.