Departamenti Amerikan i Shtetit ka njoftuar një politikë të re kufizimi vizash ndaj anëtarëve të grupeve terroriste të ekstremit të majtë dhe organizatave të lidhura me to, të cilët dyshohen se kanë mbështetur ose nxitur akte dhune dhe terrorizmi.
Sipas njoftimit zyrtar, masa vjen në kuadër të Memorandumit Presidencial të Sigurisë Kombëtare nr. 7 dhe përpjekjeve të qeverisë amerikane për të parandaluar përshkallëzimin e dhunës politike përpara se ajo të shndërrohet në veprimtari kriminale.
Departamenti i Shtetit deklaron se grupet terroriste të ekstremit të majtë përdorin rrjete të organizuara për të realizuar dhunë si instrument politik, me qëllim ndikimin mbi proceset demokratike përmes frikësimit, sabotimit dhe fushatave të koordinuara.
Sipas politikës së re, kufizimet do të zbatohen ndaj individëve që kanë mbështetur ose nxitur akte terroriste, kanë marrë pjesë në aktivitete të dhunshme kriminale, kanë financuar ose rekrutuar persona për veprime të dhunshme, kanë ofruar mbështetje logjistike apo kanë ndihmuar në koordinimin e rrjeteve të tilla.
Departamenti Amerikan i Shtetit thekson se synimi i kësaj politike është mbrojtja e sigurisë kombëtare duke ndaluar hyrjen në SHBA të shtetasve të huaj që financojnë, nxisin ose lehtësojnë veprimtarinë e rrjeteve terroriste dhe kriminale.
Autoritetet amerikane deklarojnë se masat e reja do të pengojnë përdorimin e rrugëve të vizave nga individë ose organizata që, sipas tyre, mund të kërcënojnë sigurinë e qytetarëve amerikanë, stabilitetin ekonomik dhe rendin publik në Shtetet e Bashkuara.