Qeveria britanike i kërkon Mbretëreshës të pezullojë Parlamentin pas kthimit në punë të deputetëve në shtator, vetëm pak javë para përfundimit të afatit të Brexit. Redaktorja politike e BBC, Laura Kuenssberg thotë se kjo i hap rrugë administratës së re të realizojë planet e qeverisë deri më 14 tetor. Gjithashtu kjo do të thotë se deputetët nuk do të mund të kalojnë ligje që mund të ndalojnë kryeministrin të nxjerrë Mbretërinë e Bashkuar nga BE pa marrëveshje më 31 tetor.
Kundërshtarët e Johnson e kanë quajtur këtë një “veprim fyes” dhe paralajmërojnë se mund të bëjnë në Parlament një mocion mosbesimi ndaj kryeministrit duke thënë se “kjo qeveri do të rrëzohet”. Ideja e mbylljes së Parlamentit, e njohur si Prorogation (Ndërprerje e punimeve të parlamentit), ka shkaktuar mjaft polemika. Kritikët thonë se kjo do të ndalojë deputetët të luajnë rolin e tyre demokratik në procesin e Brexit.
“Prorogation” është një mekanizëm zyrtar për të përfunduar një seancë parlamenti, që zakonisht zgjat vetëm një kohë të shkurtër derisa procedurat të fillojnë përsëri me fjalimin e Mbretëreshës. Ajo do të thotë se parlamenti është pezulluar dhe përfundon të gjithë legjislacionin aktual në diskutim.
The Guardian shpjegon se kjo procedurë është përdorur dhe më herët. Por sipas The Guardian, këtu mund të luhen një sërë faktorësh shumë të parregullt. Që ky proces të zgjasë më shumë se një muaj nuk është parë kohët e fundit. Për shembull, që nga vitet ’80 “prorogation”, zakonisht ka zgjatur më pak se një javë.
Z. Johnson ka insistuar në mënyrë të përsëritur që Mbretëria e Bashkuar duhet të largohet nga BE më 31 tetor me ose pa një marrëveshje. Shumica e deputetëve janë kundër që Britania të largohet nga blloku pa një marrëveshje.
Jeremy Corbyn i ka shkruar Mbretëreshës Elizabeth për të shprehur shqetësimin e madh për planin e z. Johnson për të pezulluar parlamentin, tha një burim i partisë të mërkurën. Z. Corbyn gjithashtu kërkoi një takim me mbretëreshën.
Johnson ka hedhur poshtë pretendimet që vendimi i tij është marrë për të bllokuar deputetët të marrin në konsideratë mënyrat për të prishur planet e tij të Brexit, pasi ai u akuzua për ngritje të një “grushti” kundër parlamentit. Ai tha që do të kishte “kohë të bollshme” për deputetët për të debatuar në Brexit, në secilën anë të samitit të BE-së, më 17 tetor. Ai thotë se masa do t’i lejojë atij “të sjellë përpara një program të ri ambicioz legjislativ për miratimin e deputetëve”.
Deputetët nuk mund të votojnë kundër këtij vendimi, pavarësisht se disa deputetë janë shprehur se do të votojnë kundër. Parlamenti do të shkojë në një ndërprerje tre-javore në javën e dytë të Shtatorit.