As emrat, as protestat; prioritet i qeverisë dhe PS-së janë qytetari dhe besa.
Në mbledhjen post-Pogradec, në Vilën e Kuqe në Tiranë, kryeministri Edi Rama u bëri të qartë ministrave dhe drejtuesve politikë se platforma e re “Pasqyra Albania” duhet të jetë ligj për gjithsecilin.
Edhe pse “Pasqyra Albania” do të funksionojë si një platformë dixhitale për të afruar qytetarin me zgjidhjen e problemeve, Rama nuk e lë me kaq.
Kryeministri u parashtroi drejtuesve të qeverisë dhe të PS-së skemën e re se si do të shkohet fizikisht te problemet dhe te qytetari.
Drejtuesit politikë të PS-së në qarqe, të shoqëruar nga deputetët, do të kenë detyrën të mbledhin fizikisht në terren hallet e qytetarëve, duke i mbajtur shënim.
Kryeministri Rama ka bërë të qartë se nuk është i interesuar për videot apo postimet në rrjetet sociale, pasi të paktën një herë në muaj do të bëhet vlerësimi i performancës së gjithsecilit.
Më pas, të gjitha problemet që duhen zgjidhur, drejtuesit politikë dhe deputetët do t’ua adresojnë ministrave përkatës.
Ministrat kanë për detyrë të zgjidhin problemet, ngarkesën e të cilave do ta shpërndajnë te zëvendësministrat e tyre.
Me këtë skemë të re, qeveria dhe PS-ja dalin të gjithë në terren, duke treguar se kryeministri Rama e ka marrë seriozisht raportin e ri me qytetarin, duke lënë në plan të dytë protestën e bulevardit dhe politikën e Tiranës.