Për herë të parë u krijua Këshilli Kordinues i Diasporës shqiptare, një institucion që bëri bashkë figura të shquara të mërgimit shqiptar në botë në një takim me drejtuesit politik të shtetit në Tiranë. Brikena Muharremi, anëtare e këtij Këshilli, tregoi në “Real Story” se cili do të jetë qëllimi i krijimit të KKD-s dhe çfarë përfitimesh do të ketë Shqipëria.
“KKD është Këshill shtetëror i bërë me ligj. Është shoqat vullnetare, por baza është ligji për diasporën. Kemi aprovuar rregulloren në bazë të së cilës ne do të veprojmë. Shqipëria është ndër shtetet e para që ka një Këshill të tillë. Kompetencat e Këshillit janë të bazuara në ligj. Ne kemi kompetenca që të jemi ura ndërlidhëse mes diasporës dhe organeve shtetrore në Shqipëri. Kompetencat janë të evidentojmë problemet e diasporës dhe ti propozojmë zgjidhje qeverisë shqiptare”, tha Ajo.
E pyetur nga gazetari Sokol Balla, nëse përfaqësues të diasporës do të kthehen një ditë në Shqipëri për të dhënë kontributine tyre, Muharremi u shpreh se kjo mund të ndodh. Por sipas saj, ky është një vendim individual i gjithësecilit. Megjithatë, për Brikena Muharremin, tashmë është koha që në Shqipëri të krijohen kushtet e favorshme që diaspora të japë kontributin për zhvillimin e vendit.
“Qëllimi i diasporës dhe i kësaj iniciative është të hapim një dritare, të cilën as Kosova dhe as Shqipëria nuk e sheh. Mendojmë që duhet të fillojmë hap pas hapi. Nuk ka asgjë të keqe që dikush të kthehet nga jashtë dhe të synojë një pozitë këtu”.
“Por kjo duhet të jetë vullnet personal. Mendoj që duhet të krijohen kushtet që të hapet një dritare për diasporën. Është e rëndësishme që ne të hapim një rrugë të re. Diaspora e ofron këtë, është diçka e re. Diaspora gjithmonë ka ekzistuar. Por koncepti në aspektin zyrtar është diçka e re. Duhet përqafuar si një mënyrë e re të të punuarit”, tha Muharremi. /Realstory.al/
