Majlinda Bregu i ka cilësuar kambana alarmi të dhënat e studimeve të kryera me popullsinë e rajonit për atë që mendojnë të rinjtë që jetojnë në këto vende. Duke folur në Konferencën e Komisioneve Parlamentare, Bregu tha se ajo që do dëgjoni janë kambana e alarmit e asaj që perceptojnë vetë qytetarët në rajon.
“Jemi në presion të jashtëzakonshëm të zhvendosjes së popullsisë nga rajoni i Ballkanit. Deri tani 1/3 është larguar. Por nuk është dukuri që vjen duke rënë. 23% e të rinjve në rajon për momentin s’janë as në punë, as në shkollë dhe as duke u trajnuar. Një shifër e konsiderueshme po të mendosh për atë çfarë do të ndodhë për pak vite duke marrë parasysh mbushjen e administratës publike”, u shpreh Bregu.
Sipas saj, problem mbetet dhe perceptimi mbi integrimin, ku vihet re se pjesa dërmuese e të rinjve duan integrimin europian, ose ndryshe deklarojnë se do të largohen nga vendet e tyre.
“Alarmante janë shifra të tjera ku të rinjtë në rajon në mënyrë të çuditshme bashkojnë bashkë dy shifra që për ne ishin gati surprizë me një saktësi matematikore të çuditshme. 61% e të rinjve në rajon janë pro integrimit evropian dhe shpresojnë se do i ndryshojë jetën. Por 61% e tyre janë gati të largohen nga vendi i tyre nëse kjo gjë nuk ndodh. Është analogji për të kuptuar se sa lart pritshmëria për integrimin dhe për të ndryshuar vendet tona dhe si qëndron ajo në raport për tu larguar nga vendet nëse ky ndryshim nuk ndodh”, tha Bregu.