Dëshmitari: Isha 4 metra larg, Kastrioti vdiq në vend. Gjithë Rrësheni ia di konfliktet

Një dëshmitar në vendngjarje ku është vrarë Kastriot Reçi në qytetin e Rrëshenit ka deklaruar se ka qenë vetëm 4 metra larg tij dhe se Kastrioti ka ndërruar jetë në vend. Ai nuk ka dhënë shumë detaje por ka konfirmuar se vrasja ka ardhur për shkak të konflikteve që ka pasur viktima. Ai ka theksuar se gjithë Rrësheni ia di konfliktet Kastriot Reçit.

“I dimë konfliktet. Jam ndodhur 5 metra larg tij. Ishim 3-4 veta që po kalonim kot rastësisht. Ai ndërroi jetë direkt, gjynah. Moshë e re. Njihet me precedent. I dimë konfliktet”, tha dëshmitari i ngjarjes për News24.

Dëshmitarë në vendin e ngjarjes kur u ekzekutua pronari i televizionit lokal, ngrenë dyshime se ndaj Kastriot Reçit mund të jetë qëlluar me snajper. Fillimisht u tha se ndaj tij u qëllua me breshëri armësh nga një makinë në lëvizje por më pas të tjerë persona thonë se askush nuk ka dëgjuar zhurmë arme, ndërsa në vendin e ngjarjes nuk ka njolla të shumta gjaku. Ndërsa policia në njoftimin paraprak për mediat tha se vrasja ka ndodhur në rrethana të paqarta.

Pranga, tentoi të trafikojë të renë

Një 33-vjeçar, i cili dyshohet se kishte organizuar trafikimin e një vajze në Itali me qëllim shfrytëzimin e saj për prostitucion, është arrestuar nga policia e kryeqytetit. Kapja e tij u bë tre muaj pas zbulimit të organizimit, ku fillimisht ishte arrestuar shoqëruesi i vajzës që do të çohej në Itali, ndërkohë që ishin shpallur në kërkim tre persona, me të cilëve edhe 33-vjeçari i arrestuar të martën.

Policia e Tiranës deklaroi se është vënë në pranga A. Ç., 33 vjeç, pasi akuzohet për ‘trafikim të personave të rritur’. Ky person ishte shpallur në kërkim ndërsa më 01.11.2019, Gjykata e Krimeve të Rënda i ka vendosur masën e sigurisë “Arrest në burg”. “Ky person së bashku me 3 të tjerë, ka detyruar me dhunë një grua 30-vjeçare që të pranonte të shfrytëzohej për prostitucion në Itali, duke e organizuar trafikimin e saj nëpërmjet aeroportit të Rinasit. Më 6 tetor në Rinas u arrestua E. Ç., 40 vjeç, banues në Tiranë i cili shoqëronte gruan që grupi do të shfrytëzonte për prostitucion në Itali. Ndërkohë në kërkim për këtë ngjarje të rëndë janë shpallur në kërkim edhe R. Xh., dhe K. Q”, deklaroi policia.

Gjithçka është zbuluar nga deklaratat e dyshimta që 30-vjeçarja ka dhënë për policinë kufitare, ku ka qenë kontradiktore në ato që ka thënë lidhur me qëllimet e saj për udhëtimin në Itali. Në pranga ka rënë personi që e shoqëronte atë në aeroportin e Rinasit, E. Ç., 40 vjeç, banues në Tiranë. Ky i fundit sapo e kuptoi që ishte zbuluar ia mbathi vrapit, por tentativa e tij për t’u larguar rezultoi e dështuar sepse u arrestua.

Vrasja e pronarit të “Media Plus” nga droga te hakmarrja dhe 3 vrasje në 4 vite

Kastriot Reçi, 47 vjeç, pronar i televizionit lokal “Media Plus” në Lezhë është ekzekutuar të martën në Rrëshen. Biznesmeni është vrarë pranë lokalit të tij, ndërkohë që emri i tij për policinë është skeduar shumë vite më parë, pavarësisht se menjëherë pas krimit, policia tha se ekzekutimi i tij është bërë në rrethana të paqarta. Ai është dyshuar prej disa vitesh, si për trafik droge, ashtu edhe për vrasje, krime nga të cilat dyshohet se ka ardhur edhe vrasja e sotme në qytetin e Rrëshenit.

Sipas të dhënave nga policia, Kastriot Reçi ka qenë i skeduar vite më parë për trafik droge jashtë vendi, ndërkohë që në vitin 2016, ai u shpall në kërkim nga policia e Lezhës pas zbulimit të 3 tonëve kanabis në një magazinë në Mirditë që ishte në pronësi të tij. Katër vite më parë, Policia në kuadër të operacionit “Befasia” zbuloi në Mirditë një magazinë droge dhe arrestoi 22 persona. Sipas policisë, pronari i kësaj magazine ku u gjetën 3 ton drogë ishte biznesmeni i njohur i zonës, Kastriot Reçi, banues në Rrëshen, Mirditë. Por, një ditë pas shpalljes në kërkim, vëllai i tij paraqiti në prokurori një kontratë qiraje, ku rezultonte se magazina i ishte lëshuar një shtetasi nga Lazarati. Emri i tij u rikthye në media një vit më vonë, kur në Itali u ekzekutua vëllai i tij, Gaspër Reçi, duke e lidhur këtë krim me dy vrasje të tjera.

Gjithçka mendohet se lidhet me drogën dhe hakmarrjen, por këto kanë mbetur vetëm në kuadrin e dyshimeve të policisë, pasi deri më sot nuk është vërtetuar asnjë akuzë, si për Reçin, ashtu edhe për personat e tjerë të përfshirë në një varg vrasjesh, 4 me ekzekutimin e sotëm të Reçit.

Konkretisht, më 9 shtator 2016 pak kohë pas zbulimit të magazinës me drogë, në Rrëshen u vra Sajmir Jaku, drejtor i OSHEE. Dy persona të armatosur kanë qëlluar për vdekje drejtuesin e linjës së Tensionit të Lartë për veriun në OSHEE Saimir Jakun, ndërkohë që një tjetër person mbeti i plagosur. Jaku është qëlluar me kallashnikov, teksa ka qenë duke pirë kafe në një nga lokalet e zonës më të frekuentuar të qytetit të Rrëshenit bashkë me një shok të tij. Autorët braktisën automjetin tip “Benz-Mercedes” në fshatin Gallatë të Kurbinit ku e kanë djegur dhe më pas u larguan. Policia nuk zbuloi asnjë autor.

Ndërkohë, më 28 prill 2017, një shqiptar është ekzekutuar më 4 plumba në Romë. Ai rezultoi se ishte Gasper Reçi, 43 vjeç nga Rrësheni, vëllai i Kastriot Reçit, i cili u vra në banesën e tij në Via Simeri Crichi, në Tor Vergata. Nga hetimet në atë kohë nuk u arrit të identifikohej asnjë person si i dyshuar për atentatin, pasi në momentin që është vrarë shqiptari nuk ka pasur asnjë person në vendngjarje. Në momentin që është qëlluar në banesën e Reçit ka qenë vetëm vajza e tij. Edhe pse ambulanca ka mbërritur menjëherë në vendngjarje, Gasper Reçi nuk ka mund të shpëtojë, pasi plagët e marra i kanë shkaktuar vdekjen e menjëhershme. Hetuesit italianë bënë të ditur se Gasper Reçi kishte disa precedent penal në të kaluarën për posedim dhe shpërndarje të lëndëve narkotike. Sipashetimeve, Gasper Reçi dyshohet se u ekzekutua për vrasjen e ndodhur në Mirditë, por asnjëherë nuk u dhanë detaje të mëtejshme, ndërsa vrasja e tij u pasua me një tjetër ekzekutim.

Më 6 Shtator 2017, në Belgjikë u vra Kreshnik Gjini. 31-vjeçari u ekzekutua në komunën Forest të Belgjikës. Ai u qëllua me dy plumba nga dy persona të maskuar dhe të panjohur. E gjithë ngjarja ndodhi para syve të koleges së tij të punës, Liliane.

Kreshnik Gjini punonte kamerier në një lokal në Saint-Denis. Bashkë me kolegen shkuan drejt parkingut, ku shqiptari kishte makinën. Sapo 31-vjeçari u fut në automjet, aty u shfaqën dy persona të maskuar. Ata e qëlluan me dy plumba duke e lënë të vdekur në vend. Dyshohet se vrasja e Gaspër Reçit të jetë bërë si hakmarrje për vrasjen e Saimir Jakut, ndërsa vrasja e Kreshnik Gjinit të jetë bërë në hakmarrje të vrasjes së Gaspër Reçit. Në secilën ngjarje morën pjesë dy autorë, por për asnjërën prej tyre nuk është ndaluar apo arrestuar njeri. /Realstory.al/

Vritet në Rrëshen Kastriot Reçi, pronari i televizionit lokal. Para tre vitesh i vranë vëllanë

Vritet me armë zjarri pronari i televizionit lokal në qytetin e Lezhës “Media plus”. I vdekur ka mbetur Kastriot Reçi, 47 vjeç, i cili është qëlluar me breshëri automatiku nga dy persona nga një makinë në lëvizje, pranë ambienteve të lokalit të tij në Rrëshen.

Ende nuk dihen detajet e ngjarjes ndërkohë që policia ka mbërritur në vendngjarje dhe grupi i punës po heton për zbardhjen e vrasjes dhe për kapjen e autorëve.

Tre vite më parë Kastriot Reçit iu vra i vëllai në Itali. Gasper Reçi u vra në Romë të Italisë, dyshohet për prishje të pazareve të drogës.

Vetë Kastrioti ka shkruar në atë kohë në profilin e tij në Facebook, se të vëllanë ia vranë pas shpine, por pa përmendur ndonjë shkak për këtë ngjarje.

“Vëllai ynë Gasper kishte 20 vite që jetonte në Romë bashkë me gruan dhe dy fëmijët e tij. Gasper Reçi ishte pagëzuar dhe martuar në kishën Katolike Romane. Bashkë me gruan dhe dy femijët e tij shkonin çdo të diel dhe luteshin.

Ai besonte dhe mendonte se Jetën ta dhuron Zoti dhe vetëm Zoti ka të drejtë ta marrë atë… Gasper Reçi u qëllua pas shpine rrugës teksa po kthehej në shtëpi ku po e prisnin bashkëshortja dhe dy fëmijët e tij”, shkruante Kastrioti në një postim në facebook në maj të 2017.

Kaos në Iran, mbi 35 të vdekur në funeralin e gjeneralit

Mbi 35 persona raportohet se kanë humbur jetën në funeralin e gjeneralit Qassem Soleimani ditën e sotme. Sipas mediave të huaja, lamtumira e gjeneralit u shoqërua me kaos, pasi mijëra njerëz nisën të shtynin njëri-tjetrin.

Teksa shumë njerëz ndodhen sot në qytetin e lindjes së komandantit të lartë, Kerman, njerëzit janë shtypur me njëri-tjetrin. BBC shkruan se ky qytet është një ‘qytet shkretëtirë’, i rrethuar nga malet.

Soleimani konsiderohej si njeriu i dytë më i fuqishëm në Iran pas liderit Suprem Khamenei. Vrasja e tij ka ngjallur frikën e një konflikti dhe shpërthimi të një lufte midis SHBA dhe Iranit.

“Vasil Shanto” pa drita, OSHEE: Pallati u ndërtua mbi telat e korrentit

Disa lagje të Tiranës kanë mbetur pa energji elektrike për shkak të avarisë në rrjet. Operatori i Shpërndarjes së Energjisë Elektrike informon se zona e “Vasil Shantos” në drejtim të Selitës është pa energji prej më shumë se 1 ore. Sipas OSHEE, janë stakuar 4 kabina për shkak të një defekti në një pallat, i cili është ndërtuar mbi kabllot elektrike prapa ‘Vasil Shantos’.

Po kështu, bëhet me dije se në të gjithë Tiranën ka stakime të energjisë elektrike me intervale kohore për shkak të ngarkesës që kanë transformatorët në NST Qendër, Kashar dhe Selitë. “Sikurse shihet në foto, punonjësit e OSHEE janë duke punuar pranë objektit ku kalon fideri 327 i Nst Selitë. Po ashtu, në të gjithë Tiranën ka stakime nga 10-15 minuta për shkak të ngarkesës që kanë transformatorët në NST Qendër, Kashar dhe Selitë”, deklaroi OSHEE.

Çelik burgoset në Turqi si gylenist, avokati i kërkon policisë: U dëbua apo deportua?

Avokati i shtetasit turk Harun Çelik, i cili pas përfundimit të 5 muajve burg në Shqipëri është nisur në Turqi ku ka përfunduar në burg pasi akuzohet si gylenist, Alban Bengasi i ka bërë një kërkesë Drejtorisë së Kufirit dhe Emigracionit përmes të cilës kërkon informacion nëse klienti i tij është deportuar apo dëbuar nga Shqipëria. Përmes një letre avokati kërkon informacion të hollësishëm për të gjitha procedurat e ndjekura nga shteti shqiptar për nisjen e Harun Çelik drejt Turqisë.

“Dua të di nëse është deportim apo dëbim. Dua të njihem me procedurën. Nuk jam njoftuar për këtë rast dhe është në shkelje të ligjit”, thuhet ndër të tjera në shkresë.

Ndërsa në datën 15 janar do të dalë para gjykatës së Tiranës, Selami Simsek, miku i mësuesit turk, Harun Çelik, i cili u arrestua në po të njëjtën ditë me të në aeroportin Nënë Tereza. Që të dy u kapën me vizë kanadeze të falsifikuar. Ndaj tij rëndon akuza e falsifikimit të dokumenteve, ndërsa do të jetë gjyqtari Ahmet Metalia i cili do të japë verdiktin.

Mësuesi Harun Çelik u arrestua në Tiranë në muajin korrik në aeroportin e Rinasit, pasi iu gjet një vizë kanadeze, e cila pas kontrollit rezultoi se ishte e falsifikuar. Ai u dënua me 5 muaj burg dhe pas përfundimit të burgut u nis drejt Turqisë. Policia shqiptare konfirmoi se deportimi i tij drejt Turqisë është kryer sipas të gjitha procedurave ligjore. Por menjëherë sapo ka shkelur në tokën turke mësuesi Harun Çelik është marrë nga policia dhe ka dalë para gjykatës e cila ka vendosur ndaj tij masën e paraburgimit. Deportimi i tij ngriti dyshimin nëse shteti shqiptar ka vendosur të kthejë në Turqi personat e njohur si pjesëtar të lëvizjes gyleniste që cilësohen si tradhtar nga presidenti Erdogan dhe në Turqi dënohen me burg.

U kallëzuan nga pronarja e një dyqani, kapen dy palestinezë në Tiranë

Dy palestinezë janë arrestuar në Tiranë, ndërsa një i tretë është proceduar penalisht në gjendje të lirë, pasi ata dyshohen për disa vjedhje të kryera në ditët e para të janarit 2020. Kallëzimi për palestinezët, të cilët jetonin në Tiranë është bërë nga pronarja e një dyqani të vjedhur në Rrugën e Durrësit dhe pas një punë disaditore nga komisariati nr. 3 i Tiranës, policia ka mundur të dokumentojë disa vjedhje të këtyre personave.

Burimet policore thanë se kapja e palestinezëve u bë gjatë operacionit “Start one” dhe konkretisht në pranga përfunduan Y. L., 26 vjeç, dhe O. E., 24 vjeç, ndërsa u procedua në gjendje të lirë A. B., 18 vjeç, të gjithë lindur në Palestinë dhe banues në Tiranë. Në bazë të hetimeve dhe të provave materiale (pamjeve filmike dhe dëshmi) rezulton se këta shtetas janë autorë të katër vjedhjeve të ndodhura gjatë ditëve të para të muajit janar 2020 dhe konkretisht 1 vjedhje më 2 janar dhe tre vjedhje më 6 janar. Vijon puna për zbardhjen e vjedhjeve të tjera, të cilat dyshohet se janë kryer nga këta shtetas. Materialet procedurale do t’i referohen prokurorisë, për veprime të mëtejshme, për veprën penale “Vjedhja” më shumë se një herë , në ngarkim Y. L. dhe O. E.

Evropianët në grackën e Trump

Barbara Wesel

Ishte një fillim dramatik për një vit që kërcënon të bëhet një udhëtim i ashpër me zigzage. Evropianët, që u tronditën në paqen e tyre të pushimeve nga lajmi për vrasjen e papritur të njeriut të dytë më të fuqishëm të Iranit, tani duhet të paguajnë pasojat. Të painformuar dhe të pafuqishëm si zakonisht, ata përballen sërish me pasojat e vendimeve të njëanshme spontane të Presidentit të SHBA. Ata ndodhen të kapur në kurthin e Trumpit dhe nuk mund ta çlirojnë veten prej saj.

Asnjë iluzion

Të gjitha iluzionet se me qeverinë në Uashington mund të ketë një bashkëpunim të arsyeshëm racional në politikën e jashtme janë zhdukur prej kohësh. Thëniet cinike të ministrit të Jashtëm të SHBA Mike Pompeo, i cili i akuzon evropianët për mungesë mbështetjeje në Lindjen e Mesme, theksojnë pafuqinë e tyre. Mund të pyesësh veten se ku i vete mendja atij pas vdekjes së Soleimanit – për trupa për një luftë të udhëhequr nga SHBA në Lindjen e Mesme? Është porcioni i marrëzisë në deklaratat e tij dhe të Presidentit Trump që e bën situatën e rrezikshme edhe më shqetësuese.

Tani presidenti amerikan në të vërtetë kishte premtuar se do t’u jepte fund luftërave të pafundme në Lindjen e Mesme dhe do t’i sillte ushtarët amerikanë në shtëpi. Edhe vëzhgues me përvojë të politikës amerikane në Lindjen e Mesme nuk mund të shpjegojnë se si përshtatet kjo me goditjen kundër Soleimanit. Frika është se thjesht mungon një strategji e mëtejshme pas aksionit dhe sulmit me dron në Aeroportin e Bagdadit.

Kjo nuk ka të bëjë as me “America First”, me qëllimin e deklaruar të Trumpit, kur bëhet fjalë për marrëdhëniet ekonomike.

Përsa i përket politikës së jashtme, evropianët e gjejnë veten të bllokuar në një politikë amerikane të formuar nga turbullimet emocionale të një presidenti të paparashikueshëm dhe mbështetësve të tij neokonë të dehur nga pushteti, që janë rikthyer në pushtet në Uashington. Në thelb, shpjegimi i vetëm për vrasjen e Suleimanit në këtë pikë është: “Because we can – sepse jemi në gjëndje ta bëjmë”.

Evropës i mbetet vetëm diplomacia

Padyshim: evropianët duken të dobët dhe të pafuqishëm, kur kërkojnë në deklaratat e tyre të përbashkëta deeskalim, pasi partneri i tyre i dyshuar SHBA ka bërë gjithçka për të përkeqësuar situatën.

Por mund të ketë një dritare për përpjekjet diplomatike për të parandaluar të ndodhin gjëra më të këqija. E qartë është se Teherani po planifikon një kundërsulm; detajet do të vendosin, nëse do të ketë një përshkallëzim të mëtejshëm apo jo. Vendimi mund të jetë ende i hapur. Shefi i diplomacisë së BE-së Borell ishte i pari që kërkoi kontakt me ministrin e Jashtëm iranian dhe dëshiron të ndikojë ndaj tij në një takim krize të evropianëve.

Vërtet që Teherani ndërkohë ka njoftuar fundin e detyrimeve të tij për të ndaluar pasurimin e uraniumit sipas marrëveshjes bërthamore, të cilën Britania e Madhe, Franca dhe Gjermania luftuan ta mbanin gjallë vitin e kaluar. Por, edhe kjo derë nuk është e mbyllur përgjithmonë, për sa kohë që inspektorët lejohen ende të qëndrojnë në vend. Ende ekzistojnë disa sinjale që qeveria iraniane mund të bisedojë me evropianët.

E qartë është se askush në Evropë nuk po derdh ndonjë lot për Ghassem Soleimanin. Ai ishte përgjegjës për qindra e mijëra vdekje, veçanërisht në Siri dhe Jemen, dhe ishte mbrojtësi i atyre luftërave me prokurë dhe i milicëve që synojnë të çimentojnë supremacinë e Iranit në rajon. Shtypja e përgjakshme e gjithë rezistencës ishte pjesë e programit. Megjithatë, vrasja e tij e papritur shkaktoi një valë shoku.

Në fillim të vitit vështrimi në humnerë

Evropianët tani duhet të përdorin kontaktet e tyre ekzistuese me qeverinë iraniane dhe t’i bëjnë thirrje vullnetit të regjimit për të mbijetuar. Teherani e di se do ta humbiste një konfrontim të drejtpërdrejtë ushtarak me Shtetet e Bashkuara. Dhe situata ekonomike në vend është tashmë e tensionuar, siç tregon vala e fundit e protestave.

A ka akoma vend për një zgjidhje politike? Negociatorët evropianë nuk kanë asnjë shans, por duhet ta përdorin atë. Kërcënimi i luftës së hapur mund t’i intensifikojë përpjekjet diplomatike. Nga ana tjetër, viti i ri do të tregojë shpejt se sa e fortë është tendenca e vetëvrasjes te të gjithë ata që janë përfshirë. Ky vështrim në humnerën politike mund të na ishte kursyer edhe për disa muaj. DW

Vdekja e 36-vjeçarit në punë, lirohen përgjegjësi teknik dhe manovratori

Katër ditë pas aksidentit të rënë në Korçë, ku vinçi i mori jetën një 36-vjeçari, gjykata ka lënë të lirë dy personat e ndaluar.

Gjykata e Korçës ka vendosur sot të pranojë kërkesën e prokurorisë për përgjegjësin teknik dhe manovratorin e vinçit. Prokuroria ka kërkuar për shtetasi Flamur Palla dhe Aurel Zyma masën e sigurisë ‘detyrim paraqitje’, kërkesë që është pranuar nga gjykata.

Prokuroria është në pritje të konkluzioneve të ekspertëve për të përcaktuar shkakun e vdekjes së 36-vjeçarit Elvis Josifi dhe plagosjen e kolegut të tij në 3 janar.

Avokati i përgjegjësit teknik, Esmerald Xhafa e konsideron të padrejtë këtë masë sigurie pasi sipas tij nuk ka asnjë lloj prove që të bëjnë fajtorë Pallan dhe Zumën. Ai thotë se përgjegjësi teknik dhe manovratori i vinçit do të rrinë në këtë masë sigurie deri në daljen e aktit të ekspertimit më pas do të vendoset se çdo të ndodh me ta. “Masa është detyrim paraqitje dhe janë në masë sigurie. Ata janë nën efektin e kësaj masa. Sot nuk u paraqit asnjë provë përveç dyshimit të arsyeshëm. Por çdo dyshim duhet të jetë i bazuar në prova. Ne kërkuam që të mos caktohet asnjë masë, por gjykata pranoi kërkesën e prokurorisë. Detyrim Paraqitje do të jetë masa e sigurisë deri në përfundimin e hetimeve”, tha avokati.