Author: albi

Një ditë pas hapjes së fushatës elektorale për zgjedhjet e 30 qershorit 2019, opozita ka nisur protestën e shtatë kombëtare kundër qeverisë, por për herë të dytë Basha nuk është shoqëruar nga kryetarja e LSI, Monika Kryemadhi, ku sipas LSI ndodhet jashtë shtetit, ndërkohë që kreu i PD ka deklaruar se nuk do të pranojë asnjë propozim nga kryeministri Rama.

“Nuk ka zgjedhje pa opozitën është mesazhi kryesor i kësaj proteste. Nuk do të pranojmë asnjë propozim nga Rama”, ka deklaruar lideri demokrat. Sapo Basha ka hipur në podium dhe ka marrë fjalën, protestuesit e opozitës kanë nisur të hedhin flakadanë, tymuese dhe kapsolla në drejtim të policisë. Madje, gjatë fjalës së kryedemokratit, protestuesit kanë tentuar të heqin kangjellat me hekura dhe të thyejnë kordonët e policisë, ku gjatë përplasjes, një punonjës policie ka mbetur pa ndjenja. Po ashtu, një protestues është shembur në tokë teksa ndodhej mes mijëra qytetarëve në bulevardin “Dëshmorët e Kombit”.

Policia gjatë gjithë kohës ka kërkuar ndërhyrjen e koordinatorit të protestës Gazmend Bardhi, ndërkohë që zyrtarë të Partisë Demokratike kanë tentuar të qetësojnë protestuesit. Dhuna e protestuesve ka vijuar derisa vetë kreu i PDu ka bërë thirrje atyre të mos prekin punonjësit e policisë. “Vëllezër e motra mos lëndoni asnjë oficer dhe efektiv policie. Mos prekni asnjë oficer policie. Vëllezër dhe motra, mos i prekni me dorë, sepse hiq dy a tre servilë të inkriminuar. Edhe pse buzët e tyre nuk e thonë dot, mendjet e tyre e mendojnë. Unë i njoh këta burra dhe gra, kam punuar me ta, kemi mundur drogën, kemi hequr vizat. Ata nuk flasin por shpirti i tyre këndon Rama Ik”, tha Basha, duke qetësuar protestuesit.

Më pas, Basha deklaroi se koha për lojërat e Edi Ramës kanë marrë fund dhe nuk do të pranojnë asnjë propozim të tij. “Nuk mund të pranojmë dhe nuk do të pranojmë kurrë errësirën e tiranisë së krimit, nuk mund të pranojmë kurrë monizmin, procesin kriminal që po u ofrohet shqiptarëve në vend të zgjedhjeve të lira e të ndershme. E gjithë beteja jonë bëhet për zgjedhje të lira e të ndershme, e gjithë beteja jonë bëhet për vlera evropiane. Nuk mund të pranojmë Edi Ramën dhe bandën e tij ta mbajnë përherë të mbyllur derën e Evropës, sepse ajo është shpresa jonë, ato janë vlerat tona. Rrugën tonë të Evropës do ta hapim. Rama ik! Kufoma politike që i dridhej dora teksa lexonte plagjiaturën e Albin Kurtit në Lezhë, tregon qartë se pushteti i krimit ka vdekur moralisht, por ai duhet kallur dhe politikisht”, deklaroi Basha.

Basha ka ndërprerë edhe fjalimin e tij, duke mbajtur një minutë heshtje në respekt të besimtarëve myslimanë, siç veproi edhe në protestën pararendëse.

Në përfundim të fjalës së tij, Basha ka kërkuar nga protestuesit ta ndjekin në marshimin drejt Parlamentit. Marshimi ka vijuar pa incidente derisa protestuesit kanë mbërritur para godinës së Kuvendit të Shqipërisë.

Me të mbërritur, protestuesit janë para godinës së parlamentit dhe kanë filluar të hedhin shashka. Por zyrtarët e PD kanë kërkuar që të mos sulmohen punonjësit e policisë. (Vijon)

Protesta e opozitës është përshkallëzuar me dhunë, sapo protestuesit kanë mbërritur para parlamentit. Sapo kanë mbërritur para parlamentit, protestuesit kanë hedhur fishekzjarrë, kapsolla e gurë drejt godinës së parlamentit dhe policisë, duke plagosur shtatë efektivë gjithsej.

Protestuesit dhe kreu i PD kanë marshuar nga bulevardit tek Kryeministria për të shkuar tek rruga para parlamentit. Një numër i madh efektivesh janë rreshtuar para hyrjes së parlamentit. Protestuesit kanë hedhur fishekzjarrë dhe tymuese, ndërkohë që gjatë gjithë kohës në protestë kanë qenë edhe drejtuesit e PD.

Në këtë situatë, policia ka ndërhyrë duke përdorur ujë e gaz lotsjellës, për të zmbrapsur turmën e protestuesve në sheshin para parlamentit. Njëkohësisht kanë vijuar edhe thirrjet e policisë ndaj protestuesve. Gjithashtu policia i kërkon medias të largohet nga ambientet para parlamentit.

Pas hedhjes së gazit lotsjellës dhe ujit, protestuesit janë shpërndarë, ndërkohë që kryedemokrati i drejtuar drejt selisë së PD, ku ka mbajtur dhe fjalën përmbyllëse.

Kreu i PD-së ditën e djeshme nga zona e Astirit ka deklaruar se protesta e 2 qershorit do të jetë paralajmërimi i fundit për kryeministrin Rama. Kjo është protesta e 7 kombëtare e thirrur nga partitë opozitare dhe sipas krerëve të PD-së dhe LSI-së do të ketë një pjesëmarrje të madhe në tubim.

Një skenografi krejt ndryshe duket se ka përzgjedhur opozita e bashkuar për protestën e shtatë kombëtare, e cila pritet të nis pas pak minutash.

Një grup të rinj, të bërë rreth, ndërsa në mënyrë simbolike mbajnë në duar yje në ngjyrë të verdhë ndërsa vetë kanë të veshur mushama në ngjyrë blu, ngjyrat simbol të flamurit të Bashkimit Europian.

Gjithashtu opozita pritet të lëshojë drejt qiellit edhe tullumbace ngjyrë të bardhë, ku shkruhet “IK”, kërkesë kjo e opozitës së bashkuar për largimin e qeverisë Rama dhe krijimin e një qeverie tranzitore që do të çojë vendin në zgjedhje të lira.

Basha ka paralajmëruar se protesta do të jetë paqësore, por protestuesit e opozitës teksa po marshonin drejt Kryeministrisë kanë filluar të ndezin flakadanë e tymuese.

Në një kohë kur opozita joparlamentare do të jetë në protestën e shtatë kombëtare të thirrur prej tyre, Partia Socialiste dhe kryeministri Rama çelën fushatën elektorale në Lezhë me kandidatin e këtij qarku, Pjerin Ndreu.

Tubimi në Lezhë është hapur nga Pjerin Ndreu, i cili u foli për qytetarëve të Lezhës teksa u prezantua si kandidat i PS për zgjedhjet lokale të 30 qershorit. “Lezha është qyteti më i bukur, por i mungon një gjë, i mungojnë njerëzit për ta nxjerrë nga atje ku ka rënë sot. Kurrë më parë Lezha nuk ka pasur pushtet lokal më të dobët se sot, që keqpërdor fondet, kurrë nuk ka pasur kaq pak investime. Ndaj jemi këtu sot, të besëlidhemi për Lezhën. Fitorja jonë është e padiskutueshme. Në 30 qershor do betohemi por jo për kishën e Laçit. Ai është një vend ku pastrohet shpirti. Në 30 qershor ne do transformojmë Lezhën. Do matemi me Fierin dhe Tiranën. Kryegjumashi bëri një vrimë në ujë dhe me 30 qershor do ta bëjmë bashkë me ata që mbajnë peng Lezhën. Lezha nuk ka nevojë jo vetëm për një kryetar bashkie por për mbështetjen e qeverisë që ju ia keni dhënë me investimet e bëra, me projektin e rrugës Milot-Balldren”, deklaroi Ndreu.

Më pas, fjalën e ka marrë kryeministri Rama, i cili nuk i kurseu akuzat ndaj opozitës dhe kreut të PD, Lulzim Basha. “Duket si një betejë pa një kundërshtar, por është betejë mes të shkuarës dhe të ardhmes. Ata kanë frikë nga zgjedhjet, kanë frikë të vijnë përpara popullit, nga ballafaqimi me ne ndaj dhe përbetohen rrugëve se do na imponojnë një përplasje antidemokratike të dënueshme nga ligjet e këtij vendi”, tha Rama.

Më tej, kreu i PS deklaroi se zgjedhjet pa opozitën janë antidemokratike kur ajo pendohet të hyjë në zgjedhje. “Imagjinoni çfarë rrumpalle do bëhej ky vend nëse zgjedhjet do shtyheshin sa herë do një parti”, deklaroi Rama. Madje, ai nuk kurseu as ironinë kur iu drejtua të pranishmëve: “E keni parë filmin Beni ecën vetë kur Beni bërtet në pyll me zë të lartë. Ashtu janë dhe ata, të alarmuar nga reforma në drejtësi”.

Ndërsa për kërcënimet se nuk do të lejohen zgjedhjet e 30 qershorit, Rama tha se opozita mund të thyejnë kokën e tyre dhe ndonjë xham se Shqipërisë nuk kanë ç’t’i bëjnë.

Rama nuk kurseu as batutat për Pjerin Ndreun. “Pjerin Ndreu është shumë kokëfortë, i shkon gjërave deri në fund. Kur erdhi tek unë i thashë provo të bëhesh deputet, nëse të zgjedhin kandido për kryetar bashkie. Ju vetë e propzouat si kandidatin e vetëm për Lezhën. Shpresoj që era e detit të mos ia marrë kokën si ato balonat që ngre Luli para kryeministrisë. Unë do ta mbështes me çdo mundësi”, tha Rama.

Në përfundim kryeministri Rama paralajmëroi sërish protestuesit: Mos bëni burg se do opozita! “Me 30 qershor ndahet e shkuara nga e ardhmja”, përfundoi ai.