Flamuri shqiptar ngrihet në Preshevë/ Festohet pavarësia, iniciativë e ambasadës shqiptare

Dita e Pavarësisë së Shqipërisë është festuar edhe në Preshevë, me iniciativë të ambasadës shqiptare.

Kryetarja e Komunës së Preshevës, Ardita Sinani ka pritur në një ceremoni pjesëtar të Ambasadës së Shqipërisë në Serbi, me në krye me ambasadorin Bardhyl Canaj.

“Në këtë ditë historike, bashkë me qytetarët e Luginës, nderuam sakrificën dhe vizionin që sollën lirinë dhe Pavarësinë e kombit tonë.”, u shpreh Sinani.

Në mëngjesin e 28 Nëntorit ajo ngriti flamurin e Shqiëprisë në ballkonin e Komunës dhe tha se Presheva dëshmoi sërish se është zemra e Luginës Shqiptare.

Sinani shprehu vendosmërinë për të vazhduar betejën për kërkuar barazi dhe respekt. Ajo tha se diskriminimi dhe përpjekjet për të heshtur popullin shqiptar në Luginë të Preshevës nuk mund të ndalin përpjekjet për të ruajtur gjuhën, kulturën dhe traditën.

“Është fakt i trishtë që vetëm shqiptarëve në Serbi u ndalohet përdorimi i Flamurit Kombëtar, një simbol i shenjtë që përfaqëson identitetin dhe dinjitetin tonë kombëtar. Ky akt është një shprehje e qartë e shtypjes sistematike sistematike që synon të zbehë identitetin dhe të drejtat tona legjitime si popull në këto troje”, tha Sinani.

Festime për 112-vjetorin e pavarësisë janë mbajtur edhe në qytete të tjera të Kosovës./abcnews.al

Bie me 20% numri i emigrantëve në Britani/ Rekordi u shënua në 2023 me 906,000 emigrantë

Numri I emigrantëve në Britaninë e Madhe ka shënuar një rënie krahasuar me pikun e shënuar në vitin 2023. Të dhënat nga Zyra e Statistikave të Kombit, të publikuara të enjten, treguan migrimin neto prej 906,000 për 12 muajt deri në qershor 2023, të rishikuar nga vlerësimi i mëparshëm prej 740,000, në atë që ONS e përshkroi si “nivelin e paprecedentë” që nga viti 2021.

Numrat ranë me 20% nga shifra rekord, duke arritur në 728,000 për 12 muajt e fundit deri në qershor 2024. Shkak i kësaj tkurrjeje është bërë rënia e numrit të familjarëve që vijnë të takojnë ata që kanë viza studimi, pas ndryshimit të rregullave. Shumica e qytetarëve britanikë kanë shprehur shqetësimin se numri i madh i ardhjeve mund të përkeqësojë mungesën e strehimit dhe të shtojë më shumë presion mbi shërbimet publike. Ndryshimet në vizat pas Brexit shkaktuan një rënie të madhe të numrit të emigrantëve nga BE-ja në Mbretërinë e Bashkuar, rregullat e reja të vizave për punë çuan në një rritje të emigracionit nga India, Nigeria dhe Pakistani. Sistemi i shëndetësisë e sheh të nevojshme ardhjen e emigrantëve për të përmbushur kërkesat për shërbim dhe kujdes shëndetësor.

Rritja në një nivel rekord në vitin 2023 ndodhi nën qeverinë e mëparshme Konservatore, e cila kishte premtuar të zvogëlonte migrimin dhe kishte ndërmarrë masa për të kufizuar studentët dhe punonjësit e kujdesit që të sillnin anëtarë të familjes së tyre. Qeveria aktuale Laburiste, e zgjedhur në korrik, gjithashtu ka thënë se do të reduktojë numrat si dhe fajësoi politikën e konservatorëve për rritjet rekord të emigrimit. /abcnews.al

Zbulohet trajtimi i parë i astmës pas 50 vitesh kërkime

Studiuesit thonë se kanë gjetur trajtimin e parë të ri – në 50 vjet – për sulmet e astmës, sipas BBC. Injeksioni zbut një pjesë të sistemit imunitar që mund të kalojë në një mbingarkesë si në shpërthimet e astmës ashtu edhe në një gjendje të mushkërive të quajtur “sëmundje pulmonare obstruktive kronike” (COPD).

“Benralizumab” përdoret tashmë në rastet më të rënda, por hulumtimi i fundit sugjeron se mund të përdoret në mënyrë rutinore për rreth dy milionë sulme në BM çdo vit.

Ekipi hulumtues në “King’s College” në Londër tha se ilaçi ishte një “ndryshues i lojës” që mund të “revolucionarizonte” kujdesin ndaj astmës. Sipas studimit, jo të gjitha sulmet e astmës ose COPD janë të njëjta. Në vend të kësaj, pjesë të ndryshme të sistemit imunitar reaguan në masë në pacientë të ndryshëm.

“Tani ne mund të shohim se ka modele të ndryshme të inflamacionit, dhe të ofrohet trajtimi i duhur, për pacientin e duhur, në kohën e duhur”, tha Prof. Mona Bafadhel.

“Benralizumab” synon një lloj të qelizave të bardha të gjakut – të quajtur eozinofil – që mund të shkaktojë inflamacion dhe dëmtim në mushkëri. Eozinofilet janë të përfshira në rreth gjysmën e sulmeve të astmës dhe një të tretëne shpërthimeve të COPD.

Nëse një sulm i tillë – që përfshin vështirësi në frymëmarrje, kollë dhe shtrëngim në gjoks – nuk mund të kontrollohet me inhalatorë të rregullt – atëherë mjekët do të rekomandojnë mjekim me steroid. Studimi, me pjesëmarrjen e 158 personave, monitoroi pacientët për tre muaj.

Rezultatet në “The Lancet Respiratory Medicine” gjetën një shkallë të dështimit të trajtimit prej – 74% kur merrni steroid dhe 45% me terapinë e re. Personat e trajtuar me terapinë e re kishin më pak gjasa të shtroheshin në spital, të kishin nevojë për një raund tjetër trajtimi ose të vdisnin.

Vullnetarët raportuan gjithashtu simptoma të përmirësuara dhe një cilësi më të mirë të jetës me ilaçin e ri. Alison Spooner, e cila është 55 vjeç dhe nga Oxfordshire, ishte një nga personat që mori pjesë në studim. Ajo ka pasur astmë që nga fëmijëria, por u përkeqësua gjatë pesë viteve të fundit dhe ka pasur tre sulme të mëdha. Alison tha se u ndje shumë ndryshe pas injektimit.

“Fatkeqësisht, asnjë ilaç nuk e largon plotësisht astmën, por ky ilac është më i miri. Është një mrekulli në fakt”, shtoi ajo.

“Benralizumab” nuk është gati për përdorim në shkallë të gjerë. Do të duhet ende një provë më e madhe, që do të nisë në vitin 2025 dhe do të zgjasë dy vjet, për të qenë të sigurt për përdorim. Kushdo që tashmë i jepen këto barna duhet të vazhdojë të ndjekë recetën e tij. Ky studim do të duhet gjithashtu të vlerësojë efektivitetin e kostos pasi antitrupat monoklonal, si kjo terapi, janë ilaçe të shtrenjta.

Kosova feston Ditën e Flamurit/ Homazhe në Prekaz, kujtohet “Adem Jashari”

Prekazi ka qenë sot një nga epiqendrat e festimeve dhe nderimeve me rastin e 112-vjetorit të Pavarësisë së Shqipërisë.Zyrtarë të Kosovës kanë kryer homazhe në Kompleksin Memorial “Adem Jashari” në Prekaz.

28 Nëntori, veç Pavarësisë, shënon edhe ditëlindjen e komandantit legjendar të Ushtrisë Çlirimtare të Kosovës. Presidentja e Kosovës Vjosa Osmani, kryeministri Albin Kurti, ministra e deputetë kanë nderuar sakrificën e familjes Jashari për lirinë e Kosovës.

“… për t’u betuar edhe një herë para varreve të tyre që do ta mbrojmë në mënyrë të pa kompromis çdo cep të Republikës sonë, do ta mbrojmë në mënyrë të pa kompromis lirinë dhe pavarësinë e Kosovës dhe njëkohësisht do të bëjmë çmos që shqiptarët gjithë andej kudo që jetojnë ata, t’i kenë të drejtat e tyre të garantuara”, tha presidentja Vjosa Osmani.

Në homazhe ishte i pranishëm edhe kryetari i Kuvendit të Kosovës, Glauk Konjufca.

“28 Nëntori është data më përbashkuese e kombit tonë, është ditë e krenarisë kombëtare dhe sinonimi i saj është sakrifica e madhe e Familjes Jashari. Populli ynë dhe përfaqësuesit e tij i përkulen sakrificës dhe historisë së Familjes Jashari”, tha Konjufca.

Veç zyrtarëve, qytetarë të shumtë nga Shqipëria e Maqedonia e Veriut, por edhe vendet të tjera kanë vizituar gjithashtu varrezat e familjes Jashari në Prekaz.

Gjithashtu për herë të parë festa e flamurit u organizua edhe në Luginën e Preshevës në Serbi nga Ambasada Shqiptare./abcnews.al

Renditja e FIFA/ Kombëtarja “kuqezi” e mbyll në vendin e 65-të, “Dardanët” e Kosovës ngjiten në vendin e 99-të

Kombëtarja e Shqipërisë mbyll vitin në vendin e 65-të në renditjen e përgjithshme të FIFA. Në përditësimin e fundit për 2024, skuadra kuqezi nuk ka ndryshuar pozicion në klasifikimin botëror. Në dy ndeshjet e nëntorit, përfaqësuesja shqiptare mori një pikë pas barazimit me Çekinë dhe humbjes me Ukrainën. Po ashtu, më parë kishte konfirmuar vendin në vazon e tretë në shortin e “Botërorit 2026” që do të hidhet në Zyrih më 13 dhjetor. Krejt i ndryshëm është diskutimi për Kosovën.

“Dardanët” janë ngjitur me dy vende në renditjen e FIFA, duke u vendosur një rekord në historinë e tyre në këtë klasifikim. Kosova e mbyll vitin në vendin e 99-të, ndërsa ky është pozicioni më i mirë që nga pranimi në qeverinë botërore të futbollit. Përfaqësuesja kosovare mori një fitore dhe një humbje në sfidat e nëntorit, duke siguruar një vend në play-of për t’u ngjitur në Ligën B të Ligës së Kombeve.

Sa I përket kryesuesëve në renditjen e FIFA, kampionia e Botës, Argjentina vazhdon të mbajë vendin e parë, ndërsa treshja e parë plotësohet me Francën dhe Spanjën. /abcnews.al

Rebelët Houthi: Sulmet ndaj Izraelit do të vazhdojnë

Sulmet ndaj Izraelit do të vazhdojnë në solidaritet me palestinezët, tha sot lideri i rebelëve Houthi të Jemenit, një ditë pas hyrjes në fuqi të armëpushimit në luftën midis Izraelit dhe Hezbollahut në Liban.

Nga fronti i Jemenit, operacionet për të mbështetur popullin palestinez duke lëshuar raketa ose dronë do të vazhdojnë”, tha Abdel Malek al-Houthi në një fjalim të transmetuar nga rrjeti televiziv Al-Masira i kontrolluar nga rebelët.

Huthi, të cilët kontrollojnë pjesë të mëdha të Jemenit, i përkasin asaj që Republika Islamike e Iranit e quan një “bosht rezistence” kundër Izraelit, së bashku me Hamasin palestinez dhe Hezbollahun e Libanit.

Që nga fillimi i luftës që shpërtheu pas sulmit të paprecedentë të Hamasit në tokën izraelite më 7 tetor 2023, Huthi kanë kryer disa sulme kundër Izraelit si dhe anijeve në brigjet e Jemenit, duke deklaruar se veprimi i tyre është një shenjë e solidariteti me palestinezët.

“Shpresoj që të gjithë ne në ushtri dhe në mesin e njerëzve të jemi të vetëdijshëm për përgjegjësitë tona dhe ne duhet me ndihmën e Zotit të vazhdojmë të bëjmë më shumë dhe më të fortë kundër Izraelit,” shtoi lideri rebel.

“Ne po bëjmë gjithçka në Jemen për të mbështetur popullin palestinez”, theksoi ai./abcnews.al

Broja, takohemi të dielën/ Mediat angleze shkruajnë për shanset e shqiptarit, Everton e pret sulmuesin “kuqezi” që këtë fundjavë

Takimi ndoshta është lënë për të dielën. Këtë 1 dhjetor, Evertoni do të luajë në “Old Trafford” ndaj Manchester United dhe trajneri Sean Dyche besohet se do të grubullojë në ekipin e parë edhe Armando Brojën.

Sulmuesi i kombëtares shqiptare bëri kthimin e shumëpritur në fushë për Shpresat e klubit liverpulas, duke luajtur 45 minutat e para, e duke dhënë përshtypje mjaft të mirë.

Mediat londineze, që janë pranë tifozëve, shkruajnë se Broja cilësohet në formën e duhur fizikisht, dhe se janë të gjitha shanset që ai të jetë i grumbulluar në ekip për sfidën në stadiumin që mbiquhet “Teatri i Ëndrrave”.

Vetë trajneri Dyche ka thënë se do ta ndjekë gjendjen e 23-vjeçarit hap pas hapi përpara sesa të vendosë, ndërsa vetë futbollisti thotë se mezi pret që të ndihmojë ekipin.

Everton ka shumë nevojë për gola pasi ndodhet në vendin e 15-të në Premier League me 20 skuadra, dhe është ekipi që shënon më pak me përjashtim të Southampton, vetëm 10 gola në 12 javë kampionat. /abcnews.al

Ronaldo “shtyn” Asanin / Ylli i Shqipërisë flet për rivalitetin me portugezin: Dua që të jem shënuesi më i mirë në Champions

Nuk e humbi rastin që të tregonte sërish veten. Jasir Asani dëshiron të bëjë diçka që askush nuk e ka arritur më parë ndër lojtarët shqiptar, të fitojë Këpucën e Artë të Championsit të Azisë.

Me rrjetën e realizuar për ekipin e tij koreanojugor, Kuangju, shqiptari nga Shkupi arriti në kuotën e 7 golave, ndërsa ndihmoi të vetët që të fitonin 1-0 sfidën kundër ekipit kinez, Shenhua.

Në konferencën për shtyp, Asani u ngacmua për rivalitetin me Kristiano Ronaldon që ka 4 gola deri tani në Champions.

“Unë I pashë disa ndeshje të Championsit një ditë më parë, dhe pashë se lojtari më I mirë I botës, Ronaldo, shënoi dy gola. Unë u ndjeva më I detyruar që të shënoja për vete sepse dua që të jep golshënuesi më I mirë në Champions. E vërteta është se ai është lojtari më I miri I botës dhe më motivon shumë, por edhe më nxit që të jem shënuesi më I mirë. Unë dua të jap gjithçka për ekipin sepse e meritojmë të kemi një sezon të madh. Dua që të fitojmë edhe për trajnerin, sepse ai po punon shumë mirë dhe kurrë nuk dëshiron të humbasë. Është hera e parë që jemi në Champions, por shpresoj që të jemi në krye të kampionatit dhe çdo vit të luajmë në Champions”.

Asani ka qenë I jashtëzakonshëm këtë sezon në Ligën e Kampionëve të Azisë, duke shënuar tri herë ndaj japonezëve të shquar të Jokohamës në fitoren 7-3, duke realizuar dy rrjeta në suksesin 3-1 kundër kundërshtarit Johor nga Malajzia, si dhe nga një herë në fushën e japonezëve të Kavasakit, në fitoren 1-0, si dhe në suksesin e fundit ndaj Shenhuasë. /abcnews.al

Gjykata urdhëron rinumërimin e votave në raundin e parë të zgjedhjeve në Rumani

Gjykata Kushtetuese e Rumanisë ka urdhëruar rinumërimin e votave të rundit të parë të zgjedhjeve presidenciale në vend, të cilin e fitoi befasisht kandidati i ekstremit të djathtë. Kushtetuesja tha në një komunikatë më 28 nëntor se ka “urdhëruar njëzëri rishikimin dhe rinumërimin e votave për zgjedhjet presidenciale të 24 nëntorit”.

Gjykata në Bukuresht tha se vendimi i saj është përfundimtar. Komisioni Qendror Zgjedhore do të takohet më vonë gjatë ditës për të diskutuar për vendimin e gjykatës.

Calin Georgescu, kandidati i pavarur dhe prorus i ekstremit të djathtë, shënoi fitore befasuese në rundin e parë të zgjedhjeve, duke i marrë afro 23 për qind të votave.

Georgescu pritet të përballet me Elena Lasconin, kandidaten e qendrës së djathtë dhe mbështetësen e fuqishme të integrimit euro-atlantik, në balotazhin e 8 dhjetorit, pasi që të dy morën më shumë vota se kryeministri majtist dhe favoriti, Marcel Ciolacu.

Pa përkrahjen e asnjë partie politike, fushata e Georgescut u mbështet kryesisht në platformën sociale TikTok, ku llogaria e tij kishte 1.6 milionë pëlqime. Përveçse shprehte pikëpamjet e tij politike, Georgescu e përdorte gjithashtu TikTok-un për të postuar video ku shihej duke shkuar në kishë, duke bërë xhudo dhe duke vrapuar në pistë.

Presidenti i Rumanisë ka kompetenca të rëndësishme vendimmarrëse, përfshirë per çështjet e sigurisë kombëtare dhe politikës së jashtme. I zgjedhur për një mandat pesëvjeçar, presidenti gjithashtu ka pushtet të mos i pranojë kandidaturat partiake për kryeministër dhe emërimet qeveritare për poste gjyqësore./REL

Operacion ndërkombëtar kundër drogës, Kolumbia sekuestron më shumë se 1,400 tonë metrikë kokainë

Gjashtë të ashtuquajturat “narco subs” të mbushura me kokainë u kapën në një operacion ndërkombëtar kundër drogës të udhëhequr nga Kolumbia, kanë njoftuar autoritetet në kombin e Amerikës Latine.

Misioni, që përfshin 62 vende, sekuestroi më shumë se 1,400 tonë metrikë droge – kryesisht marihuanë – midis 1 tetorit dhe 14 nëntorit, sipas Orlando Enrique Grisales, shefi i shtabit të operacioneve detare për Marinën Kolumbiane.

Midis ngarkesave ishin 225 tonë metrikë kokainë, 5 tonë nga të cilat u gjetën në bordin e një anijeje që kalonte në një rrugë trafiku detar nga Kolumbia në Australi, shkruan CNN.

“Anija, e kapur në ujërat e Paqësorit me karburant të mjaftueshëm për të arritur në Australi, është e treta e tillë e kapur”, tha Grisales.

“E para u zbulua në ujërat kolumbiane dhe falë hartave që mbante, ne identifikuam rrugën. Pikërisht atëherë filluam të punojmë me autoritetet australiane”, shtoi ai.