Fillojnë Lojërat Olimpike, mbahet sot në kryeqytetin e Francës ceremonia hapëse

Le të fillojë festa.

Pritjes i erdhi fundi dhe pikërisht sot nisin zyrtarisht Lojrat Olimpike Paris 2024, ku edhe pse garat kanë filluar, ceremonia hapëse nis në 19:30.

Për herë të parë në histori, ky spektakël mbahet jashtë një stadiumi, me një paradë në qiell të hapur të 160 varkave në Lumin e Senës. Nga këto, 94 varka do të mbajnë atletët dhe do të lundrojnë 6 kilometra nga Lindja drejt Perëndimit, në zemër të Parisit.

Parada përfundon pranë Sheshit Trokadero, i famshëm për kopshtet e lulëzuara dhe monumentet e kulturës, në krahun tjetër të Kullës Eifel. Në këtë shesh do të mbahet pjesa tjetër e ceremonisë.

Për këtë ngjarje madhështore janë në dispozicion rreth 326 000 bileta. Natyrisht, një kulm do të jetë ndezja e pishtarit olimpik në kryeqytetin e Francës, ndonëse emri i njeriut fatlum që do ta realizojë ndezjen, është mbajtur sekret.

Në Lojrat Olimpike do të ketë një spektakël artistik, ku pritet të marrin pjesë Lady Gaga dhe Celine Dion, që është një këngëtare kanadeze franceze, dhe besohet se do të interpretojnë një version të një kënge të njohur të Edith Piaf, “La vie en rose”, në shqip “Jeta në ngjyrë trëndafili”.

Fshati Olimpik, ndërkaq, do të mbajë 10 714 sportistë të ndarë në 32 sporte dhe 329 gara gjithsej, ndërsa në Olimpiadë marrin pjesë 206 shtete.

Në këtë fshat janë 7 000 dhoma për atletët dhe stafin, dhe një zyrë poste Franca pritet të shpenzojë 9 miliardë euro për organzimin, ndërsa gjatë periudhës së garave do të shërbejnë 45 000 vullnetarë të rekrutuar jo vetëm nga vendi, por edhe nga e gjithë bota. /i.m /abcnews.al

Garantimi i një sezoni turistik të sigurt/ Procedohen penalisht 10 persona në qarkun e Shkodrës

Për garantimin e një sezoni turistik të sigurt, policia ka proceduar penalisht 10 persona në qarkun e Shkodër. Mësohet se ata kanë ushtruar në kundërshtim me ligjin, aktivitete të ndryshme, në zona shumë të frekuentuara gjatë sezonit veror.

Tetë prej tyre, u konstatuan duke transportuar me mjete lundruese, nga diga e Komanit drejt lumit të Shalës, ndërsa, dy të tjerë, banues në Velipojë,ushtronin aktivitetin në hotelet e tyre, në Velipojë, pa u pajisur me dokumentacionin përkatës dhe pa u regjistruar në organet tatimore.

Njoftimi i Policisë:

Masa të shtuara nga Policia, në të gjithë qarkun, për garantimin e një sezoni turistik të sigurt. Procedohen penalisht 10 shtetas që ushtronin në kundërshtim me ligjin, aktivitete të ndryshme, në zona shumë të frekuentuara gjatë sezonit veror.

Si rezultat i kontrolleve të shtuara nga shërbimet e DVP Shkodër, për evidentimin dhe goditjen e paligjshmërive, me qëllim garantimin e një sezoni turistik të sigurtë, janë evidentuar raste të aktivitete të ndryshme që kryheshin në kundërshtim me ligjin.

Për këto raste, specialistët e Seksionit për Hetimin e Krimeve Ekonomiko dhe Financiare, kanë referuar materialet në Prokurori ku nisi procedimi në gjendje të lirë për shtetasit:

Tetë persona, pasi u konstatuan duke transportuar me mjete lundruese, nga diga e Komanit drejt lumit të Shalës, vizitorë dhe turistë, pa plotësuar kushtet e nevojshme për sigurinë e tyre, dhe pa u pajisur me dokumentacionin përkatës për ushtrimin e këtij aktiviteti; Dy persona, të dy banues në Velipojë, pasi ushtronin aktivitetin në subjektet (hotelet) e tyre, në Velipojë, pa u pajisur me dokumentacionin përkatës dhe pa u regjistruar në organet tatimore.

Materialet procedurale i kaluan Prokurorisë, për veprime të mëtejshme. Policia e Shkodrës fton qytetarët dhe turistët që për çdo rast nevoje për ndihmë dhe për çdo rast paligjshmërie që konstatojnë, të telefonojnë/denoncojnë në numrin pa pagesë./abcnews.al

Beleri kundërshton 4 Gushtin, avokatja: Cënohet drejtpërdrejt! Presidenca: Padia me të meta

Ka nisur seanca në Gjykatën Administrative për padinë e Dhionisis Belerit dhe të PBDNJ, ku për këtë të fundit është i pranishëm kryetari i saj, Vangjel Dule.

Ndërsa Belerin e përfaqëson avokatja Klodiana Gjyzari, raporton gazetarja Anila Hoxha. Të pranishëm janë gjithashtu edhe juristët e presidencës.

Në seancë pritet të shqyrtohet kërkesa për sigurim padie, mbasi kundërshton dekretimin e datës së zgjedhjeve në 4 gusht.

Avokatja e Belerit: Rezulton se nga ana e Presidentit të Republikës është nxjerrë një dekret për mbajtjen e zgjedhjeve në 4 gusht në Himarë. Kjo gjë kundërshtohet si nga Beleri por edhe nga PBDNJ Belerit ju shpall pavlefshmëri mandati dhe ky vendim nuk është bërë ende i ekzistueshëm. Së pari paditësi Beleri cenohet drejtpërdrejt nga ky dekret dhe po ashtu edhe PBDBJ, që e ka mbështetur si kandidat.

Pala e paditur pretendon se ne nuk legjitinohemi. Klienti im ka ende një mandat të vlefshëm deri në pesë gusht që është afati brenda të cilit Beleri ka të drejtën e ankimit. Deri në ushtrimin e të drejtës për t’u ankuar, mandati i Belerit është i vlefshëm.

Ne kemi kërkuar shfuqizimin e dekretit të Presidentit, pasi Presidenti mund të vendosë për zgjedhje pjesore, në rast se shpallet vakant vendi i kryetarit të Bashkisë. Shpallja e vakancës ndodh me shkarkimin e kryetarit të Bashkisë dhe në vlerësimin tonë presidenti nuk e ka zbatuar drejt ligjin.

Vangjel Dule: Kërkoj që edhe ne të përfaqësohemi nga e njëjta avokate dhe ju qëndroj të thënave të saj.

Përfaqësuesja e Presidencës: Konstatojmë se padia është paraqitur me të meta. Paditësi ka kërkuar shfuqizim të dekretit, por ka referuar dispozitën për shfuqizim akti administrativ. Pala e paditur duhet të dijë çfarë kërkohet nga paditësi. Nuk kërkohet dot edhe shfuqizim akti dhe antikushtetshmëri akti, sepse kjo e fundit është kompetencë e Gjykatë Kushtetuese.

Juristja e Presidencës: Dekreti për caktimin e datës së zgjedhjeve është një akt administrativ kolektiv, ju drejtohet të gjitha partive dhe kandidatëve.

Kuotat gjinore në lista/ OSBE: Shqipëria përparim në përfaqësimin e grave në politikë

Prezenca e OSBE-së në Shqipëri çmon përparimin e jashtëzakonshëm në fushën e barazisë gjinore që ka bërë Shqipëria gjatë viteve të fundit, veçanërisht për pjesëmarrjen dhe përfaqësimin e grave në jetën politike.

Ne mirëpresim përpjekjet aktuale ndërpartiake, të drejtuara nga gratë deputete, dhe shpresojmë që ndryshimet në Kodin Zgjedhor të garantojnë pozitën udhëheqëse të Shqipërisë në rajon e më gjerë në lidhje me përfaqësimin gjinor në parlament.

Ndryshimet në Kod, Gjiknuri: Listat, me formulën e re janë në lojë 40 mandate

Damian Gjiknuri, deputet i PS-së, dhe një nga hartuesit e ndryshimeve në Kodin Zgjedhor, në negociatat e zhvilluara me kolegun e PD-së, Oerd Bylykbashi, gjatë diskutimeve në sallën e Parlamentit, tha se ka një kakofoni sikur formula e përdorur për listat e kandidatëve po mbyll garën.

Gjiknuri tha se në 2021 vetëm 3 kandidatë thyhen herësin, ndërsa me formulën e propozuar janë rreth 40 mandate në lojë.

“Edhe sikur të kemi listat 100%, e dini sa mandate do të ndryshonin në renditje, referuar rezultatit të 2021? Vetëm 34 mandate dhe nuk do kishim garanci për kuotat gjinore. Me sistemin e hapur në lojë, duke respektuar kuotat gjinore, do të ishin në lojë 22 mandate. Ndërsa sot kemi në lojë 40 mandate. Pra miti i mbylljes së konkurencës rrëzohet me shifra”, tha Gjiknuri.

Në vijim deputeti socialist tha se në rastin e votës së Diasporës, ata që do të regjistrohen, do të fshihen nga qendrat ku ata figurojnë sot, dhe në këtë mënyrë do të mundësohet që ata të votojnë përmes procedurave që do të përcaktohen nga KQZ.

Gjiknuri tha se Kushtetuta jonë parashikon se votuesi ka dy vota: një për partinë dhe një për konkurrimin preferencial. “Kjo është mundësia e zgjedhësit për të korrigjuar listën e partisë. Në çdo sistem konkurojnë partitë dhe jo një grupe njerëzish që duan të dalin deputetë”, tha Gjiknuri.

Ai tha se nuk ka asnjë pazar Rama-Berisha, sikundër po tentohet të cilësohet drafti i dakordësuar. Gjiknuri tha se për dy vjet u bënë përpjekje për një kompromis sa më të madh politik, ndërsa hodhi dyshime se përgjatë kësaj kohe është tentuar nga përfaqësues të opozitës, që të miratoheshin propozime në kurriz të një pale tjetër po në opozitë.

Situata e zjarreve, Balla në Kuvend: Duhet vullnetarizëm, mbështesni forcat zjarrfikëse

Ministri i Brendshëm, Taulant Balla, nga salla e Kuvendit iu drejtua komuniteteve dhe publikut për një bashkëpunim më të madh në rastet e zjarrvënieve.

Balla tha se nga qytetarët duhet të sinjalizohen menjëherë shërbimi zjarrfikës për të vënë nën kontroll jo vetëm vatrat e zjarrit, por për të çuar para drejtësisë edhe zjarrvënësit.

“Kam patur një takim me gjykatat javën e kaluar, duhen dënime ekzemplare ndaj zjarrvënësve. Forcat zjarrfikëse kanë shpëtuar deri më tani banesat e qytetarëve, por përsa i takon pemëtarive të mbjella nga fermerët, kullotat e pyjet, dëmet janë shumë të mëdha”, tha Balla.

Ai kërkoi një reflektim nga i gjithë publiku dhe komunitetet, si dhe një bashkëpunim nga të gjithë qytetarët, kërkohet edhe vullnetarizëm.“Isha mbrëmë në Kavajë, ku forcat zjarrfikëse mungonin me flakët, por mungonte angazhimi vullnetar. Ndaj i kam kërkuar Bashkive që të vendosin në mbështetje të ekipeve zjarrfikëse edhe punonjës të strukturave të bashkive. Është e pamundur që 1300 zjarrfikës në shkallë vendi të përballojnë situatat e zjarreve. Duhet një solidarizim me forcat zjarrfikëse”, tha Balla.

Kodi i ri Zgjedhor, Mediu kundër PD-PS: Pazar okult

Deputeti Fatmir Mediu është shprehur kundër ndryshimeve për Kodin e ri Zgjedhor. Në fjalën e tij në Foltoren e Kuvendit, Mediu tha se po bëhet për pazare të fshehta që nuk i shërbejnë interesave të shqiptarëve. Për këtë arsye, ai ka kërkuar që të shtyhet diskutimi për Kodin Zgjedhor

“Për pazare okulte të kalojnë ndryshme të Kodit Zgjedhor ku shqiptarët kanë pritur më ndryshe. Do të ishte absurde që ne të ndryshojmë për gjëra që nuk kanë të bëjnë aspak me cilësinë e votës. Pas një pune të një komisioni të ngritur tërësisht jo funksional, dhe pa transparencë është në nevojë të çdo qytetari shqiptar që të di se çfarë po bëhet. Të shtyhet diskutimi për kodin Zgjedhor, se është i padrejtë”, Tha Mediu.

Mirëpo, nënkryetarja e Kuvendit, Ermonela Felaj e refuzoi si kërkesë.

“Janë trajtuar me korrektësi të plotë. Sot janë regjistruar disa kolegë deputetë për të diskutuar mbi këtë pikë të rendit të ditës” – tha Felaj.

Sot pritet një seancë maratonë në Kuvend, ku pritet të miratohen ndryshimet në Kodin Zgjedhor.

Kaos për Lojërat Olimpike / Sabotime në rrjetin e trenave në Francë, anulohen udhëtimet

Ndërsa Franca është shumë pak orë përpara ceremonisë së hapjes së Lojërave Olimpike, disa zjarrvënës kanë kryer sulme në rrjetin e trenave të shpejtësisë së lartë të Francës duke shkaktuar kështu ndërprerje të mëdha të udhëtimit apo dhe anulimin e disa prej tyre.

Operatori shtetëror hekurudhor SNCF tha se zjarret ishin vënë në instalimet përgjatë linjave që lidhin kryeqytetin me qytete të tilla si Lille në veri, Bordeaux në perëndim dhe Strasburg në lindje. Si pasojë oraret do të ndikoheshin rëndë gjatë fundjavës dhe u ka kërkuar të gjithë udhëtarëve që të shtyjnë udhëtimet e tyre.

Anulime dhe vonesa ka edhe në linjat e Eurostar-it mes Parisit dhe Londrës.

Ministrja e Sporteve Amelie Oudea-Castera dënoi vandalizmin, të cilin ajo e quajti si një lloj sabotimi i koordinuar.

“Është krejtësisht e tmerrshme. Të synosh ndeshjet është të synosh Francën. Do të prishë këtë ditë dhe ndoshta edhe këtë fundjavë”, tha ajo.

Ministri i Transportit Patrice Vergriete tha në një postim në X se ai i dënon me vendosmëri këto incidente kriminale dhe se SNCF po punon për të rivendosur shërbimet.

“1 në 3 nga fituesit në listë, grua”, firmosin 26 deputetë, mes tyre Gjiknuri e Bardhi

Sot mbahet seanca plenare ku pritet të miratohen ndryshimet e Reformës Zgjedhore. Ndërkohë, në nisje të seancës së fundit në Kuvend janë reflektuar edhe ndryshimet, në mënyrë që të ruhet kuota gjinore në lista dhe Parlament. Që do të thotë se “1 në 3 nga kandidatët fitues nga lista e hapur duhet të jetë grua”.

“Në rastet kur nga rirenditja nuk rezulton që duke filluar nga kreu i listës, një në tre emra të saj t’i përkasin gjinisë më pak të përfaqësuar, atëherë kandidatja e trete në këtë listë dhe në vijim nëj në çdo tre emra të saj i përkasin gjinisë më pak të përfaqësuar sipas numrit të votave që këto të fundit kanë marrë. Mbi bazën e këtij kriteri hartohet lista përfundimtare që i nënshtrohet votimit parapëlqyes e rirenditur, e cila përdoret për zbatimin e nenit 164 të këtij Kodi”, thuhet në nenin 8, pika 2.

Ky amendamenti është firmosur 26 deputetë, mes tyre edhe dy krerët e grupeve parlamentare Bled Çuçi dhe Gazment Bardhi.Një ditë më parë, Damian Gjiknuri sqaroi se lista e dytë e hapur do të përbëhet nga dy nënlista, një listë grash që garojnë mes tyre dhe një listë burrash që garojnë ndër vete.

Dhunoi motrën, dyshohet se abuzoi edhe seksualisht, kapet 36-vjeçari në Elbasan

Policia e Elbasanit ka vënë në pranga një 36-vjeçar.

Sipas policisë dyshohet se 36-vjeçari ka ushtruar dhunë ndaj motrës së tij dhe dyshohet se ka abuzuar seksualisht me të.

“Komisariati i Policisë Gramsh arrestoi në flagrancë shtetasin 36 vjeç, banues në Gramsh, pasi ka ushtruar dhunë ndaj motrës së tij dhe dyshohet se ka abuzuar seksualisht me të”, thuhet në njoftimin e policisë.

Sakaq materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.