19 persona të arrestuar dhe 7 të shpallur në kërkim, ishte bilanci i një super aksioni të Policisë së Shtetit, zhvillur në Krujë kundër kultivimit të kanabisit. Mbrëmjen e të enjtes, disa orë pas aksionit, ka reaguar me një postim në Tëitter, Ministri i Brendshëm, Sandër Lleshaj. Ai shkruan se “koha e kanabisit ka mbaruar në Shqipëri”, duke theksuar se e ardhmja jonë “janë vlerat evropiane”.
“Operacioni i madh policor kundër kanabisit sot në Krujë është një tjetër goditje e fortë që shpreh vullnet të palëkundur politik dhe kapacitete të plota operacionale. Për ata që ende s’e kanë kuptuar: ka mbaruar historia e kanabisit në Shqipëri. E ardhmja jonë janë vlerat europiane. Jo kanabisi! Respekt për angazhimin e Policisë së Shtetit”, përfundon Sandër Lleshaj.
Personat e arrestuar, në bashkëpunim me njëri-tjetrin, akuzohen se kanë kultivuar bimë narkotike në zonën e pyllëzuar të fshatrave Shkretë, Mafsheq, Nojë, Qafë Shtamë, Picrragë, Brret, Borizanë të Bashkisë Krujë, ku në periudha të ndryshme, janë gjetur dhe asgjësuar kubikë të kultivuar me fara kanabis dhe fidanë narkotike Canabis Sativa.
