Kurti takohet me Hahn: Bashkëpunim më i madh Kosovë-BE

Albin Kurti, kandidati për kryeministër i ardhshëm të Kosovës, është takuar me Komisionerin për Politika të Fqinjësisë dhe Negociatat për Zgjerim, Johannes Hahn. Gjatë qëndrimit në Bruksel, Kurti tha se ka zhvilluar takime me Hahn, por dhe personalitete të tjera, ku u diskutua në lidhje me afrimin e Kosovës dhe BE-së si dhe perspektivën e dialogut me Serbinë.

“Sot, në Komisionin Evropian në Bruksel, takova Komisionerin për Politika të Fqinjësisë dhe Negociatat për Zgjerim, z. Johannes Hahn. Një takim tjetër pata edhe me Zëvendës Drejtoren Menaxhuese për Evropë perëndimore, Ballkanin perëndimor dhe Turqinë në European External Action Service, znj. Angelina Eichhorst. Biseduam për bashkëpunimin ndërmjet Kosovës dhe BE-së, sfidat e qeverisjes sonë të ardhshme sidomos për drejtësi e punësim, raportet e shteteve në Ballkan si dhe për perspektivën e dialogut me Serbinë” shkruan Kurti.

Vetëvendosja, marshim për bashkim kombëtar apo për pushtet?

Pasi fitoi zgjedhjet në Kosovë, Lëvizja Vetëvendosje në Tiranë ka intensifikuar prezencën e saj edhe në Tiranë, ku duket se po kërkon faktorizim në opinionin publik, duke organizuar aktivitete gjithëpërfshirëse, por duke ngritur të njëjtat teza si opozita shqiptare. Një i tillë është edhe marshimi që ka njoftuar me rastin e shpalljes së pavarësisë më 28 nëntor në Tiranë për bashkim mes Shqipërisë dhe Kosovës, një projekt i hershëm i saj, por që vetë kreu i VV, Albin Kurti deklaroi pasi fitoi zgjedhjet në Kosovë se mbetet në planet e saj, por në një kohë më të vonshme.

Me një status të gjatë në “Facebook”, qendra e Vetëvendosjes në Tiranë thekson se shqiptarët nuk kanë luksin ta shohin 28 nëntorin thjesht si festë, pasi sipas saj, ky është një projekt që nuk është zbatuar siç e kanë ëndërruar dhe dashur heronjtë e kombit shqiptar. Një tjetër plagë që përmendet nga Vetëvendosja është edhe ajo e largimit të shqiptarëve nga vendi. “Shpopullimi mund dhe do të përmbyset nga vetë shqiptarët me vullnet e me sakrifica për një organizim të qëndrueshëm që sjell transformimin e shoqërisë me modele ekonomike që ulin pabarazinë dhe sjellin zhvillim”, thuhet në njoftim.

Lëvizja Vetëvendosje, pavarësisht se në gjykatë, aktualisht nuk është regjistruar si forcë politike, por si një OJF, në njoftimin e saj të gjatë, ka mbajtur qëndrime edhe për çështjet politike të vendit, duke filluar që nga drejtësia, sovraniteti, kriza politike dhe PPP-të, duke nënkuptuar kështu ndoshta fillimin e një aksioni politik me qëllim konkurrimin si alternativë edhe në Shqipëri me objektiv marrjen e pushtetit.

“Privatizimet dhe forma e tyre e modës së fundit, PPP-të, pasi shkatërruan dhe mbyllën shumë industri e sektorë ekonomikë, tashmë po rrënojnë arsimin dhe shëndetësinë, po pengojnë kalimin në akset e rëndësishme rrugore, dhe po prishin lumenjtë e bregdetin, po ndotin ajrin dhe ujin e pijshëm. Pabarazia e skajshme e krijuar në Shqipëri është shoqëruar me papunësi e me rroga të ulëta, duke u mohuar të drejtat bazë punëtorëve, që prej punës pa kushte e siguri mbeten shpesh me probleme të rënda shëndetësore, e jo rrallë humbin dhe jetën e tyre. Tregtia dhe importet kanë fituar përparësi përballë prodhimit vendas, që mbetet i pambrojtur. Fermerët e bujqit janë lënë në mëshirë të fatit, prodhimet e tyre shpesh përfundojnë në kalbje, përballë një konkurrence të pandershme nga mallra të importuara, që subvencionohen haptazi ose fshehurazi në vendet e origjinës”, thuhet ndër të tjera në qëndrimin e Vetëvendosjes, ku duket qartë oponenca e ndërmarrë prej saj, duke ngritur të njëjtat teza si opozita në Tiranë. Realstory.al

Haradinaj: Kurti të ketë kujdes me taksën, e përgëzoj për ministritë

Kryeministri në detyrë Ramush Haradinaj tha se do mbështes çdo vendim të Albin Kurtit në të mirë të Kosovës. Haradinaj tha se është dakord me Kurtin për zvogëlimin e numrit të ministrive dhe shtoi se ai nuk ka pse i trembet Listës Serbe, pasi ajo nuk ka fuqinë ta ndalojnë qeverinë.

“Unë e përshëndes në radhë të parë idenë për 12 ministri. Pra 12 ministri është drejt, duhet ta respektojmë dhe besoj që do të jetë një veprim i mirë dhe i mençur dhe do të mbetet në histori për përgjysmimin e ministrive, realisht është një ngjarje e mirë. Por nuk jam i mendimit që duhet përjashtuar Lista Serbe. Nuk ta bën Qeverinë më pak të Kosovës, ose ma pro serbe një ministër, cilido qoftë ai. S’ka çka të bën ai në qeveri. “ tha Haradinaj, i cili këshilloi Kurtin të ketë kujdes me Serbinë dhe të mos shfuqizojë taksën që ai ka vendosur. Për Haradinaj heqja e saj do të dëmtojë pozicionin e Kosovës përballë Serbisë, ndërsa tha se taksën e reciprocitetit mund ta vendos si masë shtesë bashkë me atë 100% për produktet serbe.

“Te pjesa e veprimeve me Serbinë, dialogu, taksa reciprociteti, e ka të vështirë të ndryshojë diçka nga ato çka kemi bërë ne. Është vështirë të merr kurs të ri në raport me Serbinë, kur është ajo e njëjtë. Nuk i kemi marr për arrogancë ato vendime për mos ndarjen e Kosovës, ose mos shkëmbimin e territoreve, që ka qenë maskim për ndarje. Vendimin për Ushtrinë, për Trepçën, pavarësimin energjetik. Pra s’mundesh tash t’i me ia kthye dikujt pavarësimin energjetik, sepse e ka fituar Kosova këtë pavarësi. Vendimin për taksën nuk duhet me e dëmtua. Sepse dëmtohet pozicioni strategjik i vendit tonë, i qeverisë tënde përballë Serbisë. Nëse reciprociteti është masë shtesë pa e heq taksën, e përgëzoj. Nëse reciprociteti është maska që me i shti mallrat serbe në Kosovë, e me na pushtua Serbia ekonomikisht ende pa na njohur, atëherë këtu shprehu kundërshtim dhe mendoj se Kurti bën gabim të madh dhe nuk mundem t’ia aprovoj këtë”. tha Haradinaj

Kurti takon Osmanin: Qeveria, drejt krijimit

Kryetari i Lëvizjes Vetëvendosje, Albin Kurti takoi të mërkurën përfaqësuesen e LDK-së, Vjosa Osmani, me të cilën diskutoi rreth krijimit të kabinetit të ri qeveritar në Kosovë. Kurti bëri të ditur lajmin e takimit me Osmanin, duke publikuar një foto me të. Ndonëse nuk jep shumë detaje nga takimi, Albin Kurti lë të kuptohet se me Vjosa Osmanin janë vënë pikat mbi ‘i’ për krijimin e qeverisë së re.

“Bashkë me Vjosën biseduam sot për përgatitjet për qeverisjen e re dhe sfidat që na presin. Kosova do të dalë nga kriza dhe do të përparojë. Bashkëpunimi ynë është përkushtimi ynë. Qëllimet e mira dhe punët e mbara janë përgjegjësi e jona ndaj qytetarëve të Republikës dhe institucioneve të shtetit”, shkruan Albin Kurti.

Kanë kaluar tre javë nga përfundimi i zgjedhjeve të parakohshme në Kosovë, ku Vetëvendosje dhe Lidhja Demokratike e Kosovës fituan shumicën e votave, por ende nuk ka asgjë zyrtare për emrat e kabinetit të ri qeveritar. Megjithatë, pas takimit të së mërkurës, duket se dy partitë kanë gjetur gjuhën e përbashkët dhe së shpejti do të krijojnë qeverinë e re.

Partitë serbe, gati të bashkëpunojnë me Kurtin

Partitë serbe në Kosovë shprehen të gatshme të bashkëpunojnë me qeverinë e re që pritet të ndërtojë Albin Kurti. Gjatë një interviste për “Real Story”, Kurti është shprehur se serbët nuk i ka prioritet në formimin e qeverisë dhe nuk i ka të nevojshme votat e tyre për të qeverisur. Ai bëri të ditur se sipas Kushtetutës një ministri i takon komunitetit serb dhe për këtë pret numërimin e plotë të votave nga partitë e tjera serbe, duke mënjanuar idenë se do të bashkëpunonte me “Listën Serbe”. Për Kurtin, ajo e ka vendin në opozitë.

Duket se kjo deklaratë nuk i ka pëlqyer aspak “Listës Serbe”, votat e të cilës në zgjedhjet e kaluar kanë qenë vendimtare në formimin e qeverisë. Igor Simiç, nënkryetar i Listës Serbe tha se subjekti i tij politik ka fituar zgjedhjet në vendet me shumicë serbe dhe propozimi i anëtarëve për në qeveri ja jep Kushtetuta. Ai e cilësoi cinike faktin që Kurti, i cili fitoi 26 % të mbështetjes së popullsisë së tij të vërë në dyshim pozitat e Listës Serbe, e cila ka fituar 96 % të votave në komunitetin serb në Kosovë.

“Synimi për t’ia hequr të drejtat popullit serb dhe në vend të përfaqësuesve legal dhe legjitim në Qeveri, Prishtina të fusë serbë më të pranueshëm, është në kundërshtim me të gjitha aktet ligjore dhe me Kushtetutën, si dhe paraqet gabim të njëjtë, sikur se që e kanë bërë serbët në vitet ‘90, duke marrë në institucione shqiptarë të përshtatshëm. Ajo qeveri do të ishte jokushtetuese, si dhe një sjellje e tillë do të tregonte fytyrën e vërtetë të liderëve politikë. Është cinike që dikush që ka fituar 26 % të votave të bashkësisë së tij, të vë në pikëpyetje pozitën e Listës Serbe, e cila ka marrë 96 % të votave të bashkësisë serbe. As neve nuk na pëlqejnë përkrahësit e idesë shqiptaro-madhe, por ne nuk mund të zgjedhim se kush do t’i përfaqësojë shqiptarët, sepse për ketë vendosin fqinjë tanë shqiptarët”, tha Simiç.

Ndërsa partitë e tjera si “Partia e Pavarur Liberale” apo koalicionit “Liria”, janë shprehur të gatshme të bashkëpunojnë me Kurtin nëse kjo iu kërkohet.

Slobodan Petroviç nga “Partia e Pavarur Liberale”, i preferuari i Kurtit për sa i përket përfaqësuesve të serbëve, tha se është i hapur për çfarëdo lloj bashkëpunimi me qeverinë e ardhshme, e cila do të çonte drejt një jete më cilësore si të komunitetit serb, por edhe të gjithë qytetarëve tjerë të vendit. Ndërsa Nenad Rashiç, i listës së koalicionit “Liria” tha se është fat që qeveria e re po formohet nga dy persona (Kurti dhe Osmani) që janë “plotësisht të panjollosur”, ndërsa nuk kurseu akuzat për “Listën Serbe” se deri më sot ka vepruar për interesa personale dhe jo të komunitetit serb.

SERBËT NË QEVERI? KURTI: SI KAM PRIORITET

Kurti: Padrejtësi që s’u hapën negociatat

Albin Kurti e cilësoi padrejtësi mos hapjen e negociatave me Shqipërinë dhe Maqedoninë e Veriut. Kurti ishte në Tiranë për të festuar fitoren e tij në zgjedhjet e Kosovës.

“Padrejtësi që Shqipëria dhe Maqedonia nuk filluan negociatat. Ju takon dhe e kanë merituar.” tha Kurti

Në lidhje me Mini Shengenin Kurti tha se duhet treguar kujdes me raportet me Serbinë duke mos harruar atë që serbët i kanë bërë shqiptarëve.

“Duhet kujdes në raportet me Serbinë, pasi dihet se çfarë u ka bërë shqiptarëve dhe para tre viteve bëri një puç në Maqedoni por dështoi. ‘ tha Kurti, një deklaratë që e bëri edhe gjatë intervistës së tij me gazetarin Sokol Balla në emisionin “Real Story”, ku reagoi për herë të parë në lidhje me Shengenin Ballkanik.

Mini-Shengeni, Rama: Do dëgjoj idetë e Albin Kurtit

Gjatë konferencës së gjatë për mediat, mbajtur fill pas përfundimit të punimeve të Këshillit Europian, Kryeministri Edi Rama foli për marrëdhëniet që do të ketë me Kryeministrin e ri të Kosovës, Albin Kurti. Ai tegoi fillimisht se me Albin Kurtin do të takohet së shpejti në Tiranë. Albin Kurti deklaroi në “Real Story” në intervistën për gazetarin Sokol Balla, se Shqipëria dhe Kosova kanë nevojë për thellimin e bashkëpunimit mes tyre. Kreyministri Edi Rama u shpreh se kishte dëgjuar deklaratat e Kurtit, dhe u shpreh se binte dakord me të për nevojën e forcimit të marrëdhënieve mes dy vendeve. Për këtë arsye, Rama u shpreh se do të propozojë vendosjen e një ministri shteti të përbashkët.

“Përsa i përket Albin Kurtit do të takohemi në ditët në vijim, ka kërkuar të më takojë e pres me kënaqësi, e kam ndjekur në prononcimet e tij, bie dakord me të që ka një nevojë për një shtysë të re në raport me marrëdhënien mes dy qeverive dhe marrëveshjet e bëra duhet të shkojmë përtej dhe me qeverinë e re të plotësojmë boshllëqet që u krijuan me qeverinë e mëparshme, që në këtë fushë nuk arriti të bënte shumë. Kam edhe disa propozime të reja dhe është momenti për të vendosur një ministër shteti për të dy anët, për të pasur një pikë referimi institucionale në çdo pikë për ndjekjen e marrëveshjeve dhe çfarë mendoj se çfarë duhet bërë më tutje. Do të dëgjoj edhe idetë e freskëta të Albinit, tani që shpresoj dhe besoj, se nuk do të ketë ndonjë çudi” tha Rama.

Ndërkohë, kreu i qeverisë foli edhe për mini-Shengenin Ballkanik. Të enjten në emisionin “Real Story” të gazetarit Sokol Balla, lideri i Vetëvendosjes Albin Kurti la të hapur mundësinë për të marrë pjesë në takimin e nëntorit të mini-Shengenit Ballkanik. Ndërkohë, Rama u shpreh se Albini nuk është thjeshtë i mirëpritur, por dhe i ftuar. “Shengeni Ballkanik do të varet nga qeveria në Kosovë kur do të bëhet. Takimi është më 10 nëntor në Ohër, nuk e di nëse do krijohet. Albini ka qenë i qartë që Kosova të jetë në gjitha këto formate e tryeza. Jo thjeshtë të mirëpritur por janë të ftuar. Është bërë vetëm një deklaratë e përbashkët, lirie e njerëzve mallrave dhe shërbimeve e kapitalit. Për këto katër liri në Rajon. Kështu që në këtë aspekt nuk ka diskutim që nisma jo vetëm nuk është ekskluzive por gjithëpërfshirëse”, tha Rama.

Albin Kurti: S`na duhen gjykata “speciale”, por gjykata normale

Albin Kurti u pyet nga gazetari Sokol Balla në “Real Story”, se çfarë do të ndodhë me Gjykatën Speciale, tashmë që ai do të jetë Kryeministër i Kosovës. Më herët, Albin Kurti është shprehur kundër ngritjes së kësaj gjykate. Megjithatë, Kurti u shpreh se nuk mundet aktualisht shfuqizimi i kësaj gjykate, pasi duhen 2/3 e votave në Kuvend. “Gjykata speciale nuk zhbëhet dot pa 2/3 sepse me 2/3 është amanduar, Kushtetuta jonë me amandamentin e famshëm 24 me të cilën është hapur shtegu i themelimit të kësaj ngrehine, të cilën unë nuk e di sesi mund ta zhbëjmë kur nuk është bërë”, tha Kurti.

Më tej, Albin Kurti u shpreh se Kosovës nuk i nevojiten më gjykata “speciale” por gjykata normale. “Ne kemi nevojë për gjykata normale jo vetëm për një gjykatë speciale. Kishim gjykatën speciale të Unmikut, gjykatën speciale të EULEXIT. Mjaft më me këso specialesh, kjo është gjykatë me spec. Edhe unë mendoj që kemi nevojë për gjykata normale që gjykojnë edhe krimet e luftës edhe krimet e paqes, pavarësisht kush i ka bërë. Por dihet që më së shumti ka bërë shteti i Serbisë. Edhe kemi nevojë për prokurorë të guximshëm, edhe gjithashtu edhe për një prokurori të çliruar nga ekzekutivi, gjë që nuk e kemi parë deri më sot”, tha Kurti.

Sipas Albin Kurtit, Gjykatës Speciale i frikësohen ata që kanë bërë korrupsion, dhe jo ata që kanë luftuar për çlirimin e Kosovës. “Unë besoj që Gjykatës Speciale i friksohen ata që kanë më shumë raste të korrupsionit sesa ata të cilët kanë luftuar. Se mos harroni 20 mijë veteranëve të vërtetë që i ka Kosova, as 1 % nuk janë në pushtet. Ne duhet t`i çlirojmë çlirimtarët nga pushtetarët veteranë të cilët në emër të luftës sundojnë me paqen me resurset me lirinë edhe na e kanë pamundësuar progresin, pra vetëm 1 % e veteranëve të luftëtarëve janë në pushtet. 99% edhe aty është i shtypur. Por gjykata speciale për 4 vjet mos me ngrit asnjë aktakuzë për mua është një dështim kolosal”, tha Kurti.

Sipas Albin Kurtit, Gjykata Speciale u krijua për shkak të raportit të Dik Martit për trafikimin e organeve. Ndërsa shtoi se autoritetet dështuan me mbrojtjen e dëshmitarëve. “Arsyeja pse është insistuar për këtë gjykatë nga faktorët ndërkombëtarë formalisht është raporti i Dik Martit, po kur se beson atë, ajo shtëpia e verdhë e trafikimi i organeve ato janë për të bërë filma horror. Ama unë besoj se ka të bëjë me diçka tjetër që është më e rëndësishme, e kjo është se faktorët ndërkombëtarë besojnë, jo pa të drejtë, që kanë dështuar në mbrojtjen e dëshmitarëve”, tha Kurti.

Albin Kurti foli për rastin e Astrit Deharit, një aktivist i Vetëvendosjes i cili vdiq në burg, ndërsa u tha se ai u vetëvra. Por Lëvizja Vetëvendosja ngriti akuza për rastin në fjalë, duke u shprehur se aktivisti i tyre u vra. “Unë besoj që aktivistin tonë Astrit Deharin e kanë mbytyr në burg. Ai ka vdekur në duart e shtetit dhe i pari i cili dha lajmin për vetëvrasje nuk ishte askush nga burgu por komandanti i stacionit së policisë në Prizren. Kjo është shumë e çuditshme, ai nuk ka qenë në duar të policisë, ai ka qenë në duar të drejtësisë. Shërbimi korrektues i Kosovës nuk shkon me Ministrinë e Punëve të Brendshme sikurse policia por shkon me Ministrinë e Drejtësisë”, tha ndër të tjera Kurti.

Albin Kurti u shpreh se ai do të synojë reformimin e sistemit të drejtësisë, duke kryer një proces Vettingu, ashtu siç ndodhi në Shqipëri. “Padyshim, sepse nuk kemi drejtësi të pavarur e të pa anshme. Këto tri shtylla të pushtetit në Republikën tonë janë vetëm dy. E nuk ka karrige me dy këmbë, minimalisht tri duhet ti kesh. Pra Ekzekutive, Legjislative dhe Gjyqësore. Gjyqësori nuk është pushteti i tretë në Kosovë, nuk është drejtësia pushteti i tretë në Kosovë dhe për ta bërë këtë duhet ta çlirojmë nga ekzekutimi. Kemi nevojë për proçes vettingu edhe ne në Kosovë, për një panel të tillë edhe me ndërkombëtarë të cilët i angazhojmë në mënyrë që njerëzit më profesionistë e më të ndershëm e më të guximshëm ti kemi prokurorë e gjykatës.”, tha Albin Kurti. /Realstory.al/.

“Do ja japësh dorën Vuçiç?” flet Albin Kurti

Albin Kurti ishte i ftuar në emisionin “Real Story” të gazetarit Sokol Balla në News 24, ku u provokuar nga një pyetje e tij pas një deklarate të Kurit se duhet pasur shumë kujdes nga presidenti serb Vuçiç

Pra ju do të keni kujdes që në takime ndërkombëtare mos t’ja jepni dorën Zotit Vuçiç?

“Po nuk e di unë këtë a do t’ja jap dorën, ndoshta ja jap ndoshta edhe nuk ja jap dorën por thelbi nuk është këtu, thelbi është aty që në këto takime duhet të dihet kush është kush.” tha Kurti / Real Story

Mini Shengen, Kurti: Duhet patur kujdes nga Vuçiç

Në lidhje me Mini Shengenin Ballkanik, Kurti tha se duhet pasur shumë kujdes nga Vuçiç. “Kjo nisëm mund të ketë sukses, ose jo,” tha Kurti “por si Rama dhe Zaev duhet të tregojnë shumë kujdes nga Vuçiç”, që sipas tij gjithmonë përpiqet të duket normal dhe të hiqet si lider i Ballkanit.

Në lidhje me një ftesë të Kosovës më 10 nëntor për të marrë pjesë në takimin e ardhshëm, Kurti tha se do marrë pjesë në çdo konferencë rajonale si kryeministër i Kosovës.

“Padyshim, që në të gjitha këto takimet rajonale unë do të marr pjesë si Kryeministër i Republikës së Kosovës. Unë e kuptoj frustrimin që ekziston në shtetin shqiptar me vonesat e Bashkimit Europian, mirëpo duhet ta kuptoni edhe një gjë tjetër se fakti që të bëhet një padrejtësi edhe fakti që mund të jesh shumë i pezmatuar, jo çdo metodë është e suksesshme pastaj. Ndoshta ka sukses ky Mini-Shengen-i si një lloj mënyre për të fituar atë që na takon. Theksi im si kryeministër i Kosovës është se nuk duhet lejuar Vuçiç t’i keqpërdorë këto takime. Dhe ai të duket normal sepse dihet çfarë u ka bërë Serbia shqiptarëve dhe dihet çfarë u ka bërë Serbia Zaevit. Vuçiç dëshiron me çdo kusht që të duket normal duke u takuar me liderët e popujve edhe shoqërive viktima të Serbisë, e këtu duhet të bëjmë kujdes, Zaev edhe Rama duhet të bëjnë kujdes. “ – tha Kurti / Real Story