Yuri Kim: Jam gati t`i përvishem punës

Ambasdorja e re e Shteteve të Bashkuara të Amerikës në Tiranë, Yuri Kim reagoi për herë të parë, pasi mbërriti në Shqipëri dhe mori detyrën zyrtarisht. Me anë të një mesazhi të shkurtër, publikuar në faqen zyrtare të ambasadës, Yuri Kim shprehet se “është gati t`i përvishet punës”. “Ndihem e nderuar dhe shumë e kënaqur që jam në Shqipëri dhe jam gati t’i përvishem punës”, është mesazhi i Ambasadores Kim.

Ajo mbërriti në vendin tonë të mërkurën në 22 janar, ndryshe nga sa ishte raportuar më herët se do të mbërrinte në Shqipëri në fund të muajit janar. Yuri Kim përcaktoi disa prioritete përpara se të vinte në Tiranë. Zbatimi i reformës në drejtësi, zgjidhja e krizës politike dhe rritja e investimeve amerikane në vendin tonë, janë në krye të axhendës së saj. Megjithatë, gjatë daljes përpara Senatit Amerikan, Yuri Kim foli edhe për sfida të tjera si: influenca e Rusisë apo e Kinës në vendin tonë.

Ambasadorja Yuri Kim, diplomate karriere, ka punuar mbi sfida kyçe të politikës së jashtme dhe sigurisë kombëtare në mbarë Europën, Azinë dhe Lindjen e Mesme. Ajo ka qenë drejtoreshë e Çështjeve të Europës Jugore dhe ka mbuluar Turqinë, Greqinë, Qipron dhe më gjerë rajonin e Mesdheut Lindor; si drejtoreshë e Zyrës së Çështjeve Europiane të Sigurisë dhe ato Politiko-Ushtarake, ka mbuluar NATO-n dhe Organizatën për Siguri dhe Bashkëpunim në Europë (OSBE).

Më parë ka qenë Shefe e Kabinetit e Zëvendës Sekretarit të Shtetit dhe drejtoreshë e Qendrës për Studimin e Administrimit të Diplomacisë. Më herët në karrierën e saj, ka qenë Ndihmëse e Posaçme e Sekretarit të Shtetit Colin Poëell, si dhe Ndihmëse e Posaçme e Ndihmës Sekretarit të Shtetit për Çështjet e Azisë Lindore dhe Paqësorit. Mandatet e saj jashtë SHBA përfshijnë Turqinë, Irakun, Republikën e Koresë, Japoninë dhe Kinën. Yuri Kim ka një diplomë bachelor nga Universiteti i Pensilvanisë dhe një Master në Filozofi nga Universiteti i Kembrixhit.

Ambasadorja gjermane mesazh opozitës: Të punojë për vendin dhe votuesit

Gjermania vazhdon çdo ditë të japë mesazhe për opozitën shqiptare, e cila ka nisur rrugën e protestave të dhunshme. Ambasadorja e Gjermanisë në Tiranë, Susanne Schütz tha sot në fjalën e mbajtur në konferencën për sigurisë në rajonin e Ballkanit, se Shqipëria ka bërë hapa të rëndëishme dhe se opozita duhet të punojë për të mirën e vendit dhe t’i qëndrojë besnike votuesve të saj. Kjo deklaratë e saj vjen në një kohë kur opozita ka vendosur të mos marrë pjesë në zgjedhjet e 30 qershorit.

“Aktorët kërcënues në këtë rajon janë të nënvizuara në axhendën tonë, ekspertët dhe analistët do të flasin për këtë temë ditën e sotme. Shqipëria është kandidate për në BE, aspirante. KE do të prezantojë raportin për progresin e Shqipërisë dhe për të bërë publike reformat.

Parlamenti gjerman do të marrin vendimin e tyre për Shqipërinë për hapat e mëtejshëm. Jam e bindur se Shqipëria ka bërë hapa të rëndësishëm në këtë drejtim. Përgjegjësinë që kanë partitë politike për të punuar në interesin e vendit dhe për të qëndruar besnikë te votuesit e tyre”,- deklaroi Susanne Schütz.

Zyrtarja e Merkelit në Tiranë: Opozita të futet në zgjedhje

Një mesazh të qartë dhe të thjeshtë ka dhënë sot ambasadorja e Gjermanisë në Shqipëri, Susanne Schütz. Ajo i ka bërë thirrje opozitës që të futet në zgjedhjet lokale të 30 qershorit.

“Është me rëndësi thelbësore që zgjedhësit të mund të kenë besim në një zhvillim të rregullt të procesit zgjedhor. Ndaj gëzohem që Gjermania, përmes këtij projekti të AHC-së, do të plotësojë përpjekjet e misioneve të tjera të vëzhgimit.

Masat e parashikuara nga AHC sikundër janë trajnimi i vëzhguesve dhe vëzhgimi real në qendrat e votimit do të kontribuojnë në zhvillimin e procesit zgjedhor sipas standardeve kombëtare e ndërkombëtare. Në të njëjtën kohë u bëj thirrje të gjitha partive të shfrytëzojnë rastin e të marrin pjesë në zgjedhjet lokale”, tha zyrtarja e Merkelit në Tiranë. Këtë deklaratë Susanne Schütz e bëri deklaratën pas takimit me Drejtoreshën Ekzekutive të Komitetit Shqiptar të Helsinkit (AHC), ku kanë rënë dakord për të bashkëpunuar në procesin e vëzhgimit gjatë zgjedhjeve lokale të datës 30 qershor 2019.