Informaliteti në ndërtim, Denaj: 30 % e punëtorëve të paregjistruar

Lufta kundër informalitetit në ekonomi do të vijojë. Pas aksionit të zhvilluar gjatë muajve të verës në bregdet, inspektimet janë shtrirë edhe në zonat në brendësi të qyteteve. Ministrja e Financave Anila Denaj ka inspektuar punimet në disa kantiere ndërtimi në Tiranë. E shoqëruar nga Drejtori i Inspektoratit të Punës, Denaj pa nga afër inspektimet në disa kantiere ndërtimi në kryeqytet. Në prani të saj është bërë bllokimi i një kantieri ndërtimi në një pallat, pasi është gjetur me parregullsi në sigurinë në punë.

“Sa kemi mbaruar një proces inspektimi në të cilën kemi verifikuar shmangien në ligjin për sigurinë dhe shëndetin në punë, duke bërë pezullimin dhe mbylljen e kantierit të ndërtimit deri në marrjen e masave për normalizimn e të gjithë procesit”, u shpreh ministrja. Më tej ajo shtoi se kontrollet në ligjshmërinë e bizneseve do të shtrihen në të gjithë vendin, për të luftuar punën në të zezë, por dhe për të mos lejuar ndodhjen e aksidenteve gjatë punës. Sipas Denaj, deri më tani është konstatuar se rreth 30% e punonjësve janë të paregjistruar në sektorin e punës, duke kërkuar që këtij informaliteti ti vihet fre.

“Një fokus i veçantë po realizohet edhe nga inspektorati i punës në atë që eliminon aksidentet në punë. 30% e punonjës janë të paregjistruar në sektorin e punës, ne duhet ti vendosim fre këtij informaliteti. Gjobat janë 0-50 fish e rrogës bazë, por ky nuk është objektivi jonë. Procesi do të vijojë i fokusuar muajin shtator te firmat e ndërtimit për të eliminuar sidomos aksidentet në punë. Ne do të intensifikojmë bashkëpunimin me bashkitë të na vendosin në dijeni që t’u paraprijmë masave” tha ajo. Ministrja u ka kërkuar inspektorëve të punës që të jenë më të kujdesshëm me inspektimet, jo vetëm në vlerësimin e zbatimit të kritereve të sigurisë në punë, por edhe të cilësisë së punimeve.

Cilësia e karburantit, qeveria jep lajmin e mirë për të gjithë shoferët

Karburantet do i ushtrohen kontrolleve jo vetëm për deklarimet tatimore, por edhe për cilësinë e hidrokarbureve që tregtojnë. Mungesa e cilësisë së karburantit ka qenë një nga pikat kyçe që qytetarët e kanë renditur si ndër problematikat kryesore duke u shqyrtuar me seriozitet edhe nga qeveria.

Gjatë inspektimeve në zonën e Vorës, Ministrja e Ekonomisë, Anila Denaj tha se gjatë muajit gusht do të ketë një kontroll të rreptë jo vetëm për evazionin fiskal por dhe cilësisë së karburantit që tregtojnë. Ky kontroll tha Denja do të zhvillohet në të gjithë Shqipërinë duke nisur nga tregtarët e mëdhenj deri tek të vegjlit.

“Kërkesa ime është që, ne këtë treg duhet të kontrollojmë të gjithë. Sigurisht duhet të fillojmë nga tregtarët, të cilët kanë sasitë më të mëdha që qarkullojnë në treg e deri te më të vegjlit, por për të garantuar cilësinë e karburantit ne nuk mund të shkojmë vetëm te një grup. Duhet të shkojmë te të gjithë dhe për këtë, Plani Operacional i gushtit është totalisht i fokusuar në këtë sektor, për të siguruar dhe cilësinë e karburantit që tregtohet në treg dhe realizimin e të ardhurave në mënyrë proporcionale me atë që duhet të ndodhë në realitet dhe jo në atë që faktikisht ndodh sot. “ tha Denaj

Informaliteti i hidrokarbureve, Denaj: 420 subjekte me risk, do monitorohen

Plani Operacional për luftën kundër informalitetit në ekonomi, do të fokusohet edhe te bizneset që tregtojnë me pakicë lëndë djegëse dhe hidrokarbure. Gjatë të hënës, Minitrja e Financave dhe Ekonomisë, Anila Denaj ka zhvilluar një inspektim gjatë aksit rrugor Fier-Tiranë, ku është ndaluar në disa pika të tregtimit të karburantit. Gjatë këtij inspektimi të ministres, është kapur në shkelje një biznes, i cili operonte me rigjim manual të tregtimit të karburantit.

Për këtë arsye ndaj këtij biznesi janë marrë masa ligjore. Ndërkohë, pas këtij rasti, Anila Denaj është shprehur se janë 420 subjekte të evidentuara me risk në fushën e karburanteve dhe të produkteve të akcizës, të cilat do të monitorohen dhe verifikohen nga të gjitha strukturat përkatëse.

“Dëshiroj të theksoj se jemi këtu për t’i ardhur në ndihmë konsumatorit. Ne, së bashku me Inspektoriatin Shtetëror Teknik dhe Industrial, Doganën dhe Hetimin Tatimor, do të kemi në fokus të punës sonë cilësinë e karburantit, markimin e tij, pajisjen me kasa fiskale, si dhe evidentimin e rasteve të përdorimit të regjimit manual”, tha ministrja Denaj.

“Gjatë kësaj jave, në fokus do të jenë pikat e karburantit dhe tregtimi i produkteve të tjera të akcizës, si pjesë e planit të hartuar. Grupet në terren, së bashku me koncesionarin e markimit të karburanteve, po ushtrojnë kontrolle që kanë si subjekt verifikimin, nëse pikat e karburanteve janë të fiskalizuara ose jo. Pra, merren mostra si në pompë, ashtu edhe në depozitë, për të parë nëse për këtë produkt janë paguar të gjitha detyrimet ndaj shtetit”, tha Arlind Gjokutaj, Drejtor i Përgjithshëm i Doganave.