Ismajli: Nuk pendohem që zgjodha Shqipërinë, Kosovës i uroj suksese

Ardian Ismajli ishte përzgjedhur nga mediat kroate si pjesë e formacionit të vitit në Kroaci. Qendërmbrojtësi i kombtares shqiptare, që aktivizohet me Hajduk Splitin, ka bërë një sezon të shkëlqyer, aq sa i vlejti për një ftesë edhe në kombëtaren kuqezi. Nga grumbullimi i kësaj të fundit, ai ka folur këtë të mërkurë në konferencë për shtyp. Ismajli ka komentuar fillimisht lajmin e mediave kroate.

“Jam i kënaqur nga paraqitjet personale në nivel klubi dhe me kombëtaren. Kjo, edhe falë mikpritjes së lojtarëve këtu. Më kanë mbeshtetur shumë, ndaj iu them faleminderit të gjithëve. Shpresoj t’ua kem shpërblyer në fushë, sa herë kam luajtur”.

Më pas, 22-vjeçari ka folur për situatën në kombëtare, duke u shprehur se pavarësisht ndërrimit të trajnerëve, në ekip duhet të ketë harmoni. “Nuk e di, nëse do të ketë ndryshime, por ekipi ka nevojë për harmoni. Megjithatë, gjërat i di më mirë trajneri i ri”, ka thën Ismajli.

Më herët ai ishte pjesë e përfaqësueses U-21 të Kosovës, ndërsa vendosi që të zgjidhte Shqipërinë për të luajtur me kombëtaren e parë. Nuk ka pendesë për këtë lëvizje nga mbrojtësi. “Unë kam luajtur më parë me Kosovën, por kam zgjedhur Shqipërinë Nuk kam asnjë pendesë për këtë lëvizje. Kosova po paraqitet vërtet mirë, ndaj iu uroj suksese shokëve të mi atje. Shqipëria po kalon ngërçet e veta, por do t’i kalojë shumë shpejt ato dhe do të ngjitet ku i takon”.

Në fund ai ka folur dhe për merkaton, duke deklaruar se është duke vlerësuar ofertat, ndërsa për momentin është i fokusuar te kombëtarja, ky synon fitoren me Islandën. “Nëse marrim tri pikë ndaj Islandës, gjithçka mund të ndodhë. Pastaj presim Moldavinë në shtëpi dhe, pa e nënvlerësuar atë, kemi shanse për tri pikë të tjera. Pra, ngjitemi në kuotën e 9 pikëve. Le të mendojmë për Islandën për momentin, si t’i kundërvihemi asaj. Ne shkojmë me optimizëm në këtë transfertë”.

Ismajli e Uzuni përzgjidhen në formacionin e vitit në Kroaci

Media sportive “24sata.hr” në Kroaci ka përzgjedhur 11-të lojtarët më të mirë të sezonit në Kroaci. Dy prej lojtarëve, në 11-shen e përzgjedhur nga media kroate, janë pikërisht dy futbollistët e kombëtares shqiptare të futbollit, Ardian Ismajli dhe Myrto Uzuni. Ismajli është aktivizuar këtë sezon me ekipin e parë të Hajduk Splitit, duke bërë ndeshje të shkëlqyera me klubin, që tashmë siguroi pjesëmarrjen në Europa League sezonin e ardhshëm.

“Ardian Ismajli është në Kroaci që nga viti 2016, por vetëm këtë sezon ka shkëlqyer. Ai është fizikisht i patëmetë, ka formën më të mirë në ligë, është i pakalueshëm në duel, nuk e ka të vështirë në lojën një për një. Ismajli ka luajtur 20 ndeshje me Hajdukun këtë sezon, duke marrë 9 kartonë të verdhë”.

“Kjo është e vetmja e metë që ka. Ai pritet të ketë një rritje të vlerës së kartonit të tij, teksa për Ismajlin gjatë merkatos së dimrit pati një interesim nga Atalanta, por në verë mund të ketë shumë klube të interesuara”, shkruan gazeta kroate për qendërmbrojtësin e kombëtares shqiptare.  

Për Myrto Uzunin, mesfushorin trekuartist që kaloi verën e kaluar nga Laçi te Lokomotiva e Zagrebit, “24sata.hr”, shkruan se ai tregoi se ishte një goditje në merkato. “Për sulmuesin, Lokomotiva ka paguar rreth 350 mijë euro. Ai erdhi nga kampionati shqiptar, Laçi, dhe Besnik Prenga doli garant për të”.

“Ai provoi se ishte një goditje në merkato, duke funksionuar në mënyrë ideale me Dejan Radonjiqin. Ndeshjet fantastike me Lokomotivën, bën që Uzunit t`i vinte ftesa nga kombëtarja e Shqipërisë, ekip me të cilin deri tani ka luajtur pesë ndeshje. Me Lokomotivën ai ka luajtur 29 ndeshje dhe ka shënuar shtatë gola dhe asistuar tetë të tjerë”.

Reja nis punën, vëzhgon Tahirajn dhe Ismajlin në Kroaci!

Edy Reja nuk ka kohë për të humbur, teksa i kanë mbetur dhe pak ditë kohë për të përzgjedhur lojtarët që do të jenë nën urdhrat e tij për dy ndeshjet zyrtare të muajit qershor.

Tekniku italian i kombëtares, ndryshe nga parardhësi i tij, Christian Panucci, që mjaftohej me statistikat e lojtarëve virtualisht, Edy Reja ka zgjedhur t’i vëzhgojë nga afër lojtarët.

Kështu, pas Italisë, ku ka parë disa prej legjionarëve që aktivizohen në klubet përtej Adriatikut, Reja ka nisur një tur në Ballkan. RealStory.al ka mësuar se një javë më parë, 73-vjeçari ka qenë në Kroaci për të ndjekur disa nga lojtarët që aktivizohen atje.

Ai ka ndjekur nga afër ndeshjen mes Hajduk Splitit dhe Goricës, e cila përfundoi me humbjen e ekipit të tre shqiptarëve, Ardian Ismajli, Francesco Tahiraj dhe Emir Sahiti. Në atë takim u aktivizua titullar Ismajli ndërsa Tahiraj, që pret ende një ftesë nga kombëtarja, luajti si zëvendësues.

Sakaq, Edy Reja ka shkuar dhe në Greqi për të ndjekur nga afër disa lojtarë të tjerë të Kombëtares, Enea Mihaj dhe Ergys Kaçe. Duke filluar nga data 15 maj, stafi i ekipit kombëtar duhet të dërgojë zyrtarisht ftesat për lojtarët që do të grumbullohen në ekip përfaqësues.

Sot luhet derbi i shqiptarëve në Kroaci, katër lojtarë kuqezi në fushë

Sonte në mbrëmje do të ketë një derbi shqiptarësh në Kroaci, pasi do të përballet Lokomotiva e Zagrebit me Hajduk Splitin, ku luajnë katër futbollistë të ekipit kombëtar të Shqipërisë.

Myrto Uzuni dhe Lokomotiva e tij presin në shtëpi Ardian Ismajlin, Francesco Tahirajn dhe Emir Sahitin me Hajdukun, në një ndeshje që do të jetë shumë e rëndësishme për pjesëmarrjen në Europa League vitin e ardhshëm.

Aktualisht të dyja ekipet ndajnë vendin e katërt në renditje me pikë të barabarta, mirëpo Lokomotiva është favorizuar për shkak të golavarazhit më të mirë se Hajduku.

Trajneri i Hajdukut, gjatë konferencës së zakonshme për mediat, ka deklaruar se nga Lokomotiva do të donte të kishte në ekip Myrto Uzunin, duke e vlerësuar maksimalisht futbollistin e Kombëtares shqiptare.

Pritet që Uzuni dhe Ismajli ta nisin titullar për ekipet përkatëse, ndërsa Tahiraj dhe Sahiti mund të hidhen në fushën e lojës si zëvendësues. Pavarësisht gjithçkaje, kjo ndeshje duhet të ketë interes për trajnerin aktual të Kombëtares, Ervin Bulku, për të ndjekur nga afër lojën e katër legjionarëve kuqezi.

Skip to toolbar