Vetëplagoset me armë, vdes në spital 52-vjeçari në Klos

Një ngjarje e rëndë ka ndodhur pasditen e të hënës në Klos, ku një 52-vjeçar është vetëplagosur me armë zjarri dhe më pas ka gjetur vdekjen në spital. Pasditen e të hënës, u raportua për një plagosje me armë zjarri.

Ngjarja u raportua se kishte ndodhur në fshatin Kurdari të bashkisë së Klosti. Menjëherë pas marrje së njoftimit në vendin e ngjarjes. Pas verifikimeve të kryera në terren, policia ka dalë me një njoftim paraprak ku shprehet se;

“Rreth orës 15.15, është vetëplagosur me armë zjarri në banesë shtetasi M.N, rreth 52 vjeç, banues në Klos, i cili ka humbur jetën në spital. Grupi hetimor vijon hetimet në vendngjarje për zbardhjen e shkaqeve të kësaj ngjarjeje”.

Atentat në Elbasan, ndërron jetë vëllai i objektivit

Një atentat me armë zjarri ka ndodhur ndaj një personi në orët e para të mëngjesit të së hënës, në aksin rrugor Peqin-Elbasan. Policia ka njoftuar se në afërsi të fshatit të quajtur Broshkë, një person ka hapur zjarr ndaj një makine, në të cilën udhëtonin dy vëllezër.

Mësohet se nga atentati, ka mbetur i plagosur një person, identiteti i të cilit jepet vetëm me inicialet, S.B. Ky person ka qenë duke udhëtuar bashkë me vëllain në mjetin e tij me targat AA 333 UZ, në momentin kur një tjetër person ka qëlluar në drejtim të tyre.

Nga atentati, mësohet se njëri prej personave, vëllai i objektivit, shtetasi me inicialet K.B, ka ndërruar jetë. Mësohet se ky shtetas ka mbërritur pa shenja jete në Spitalin e Elbasanit.

30 vjeçari me inicialet S.B, i cili mësohet paraprakisht se ka qenë objektivi i atentatit, ka marrë tre plumba, ndërsa pas ngjarjes ky shtetas është dërguar në spitalin e Elbasanit, ku mësohet se ndodhet nën kujdesin e mjekëve. Ende nuk dihen rrethanat e ngjarjes, ndërsa policia ka njoftuar se ka ngritur postblloqe për të kapur autorin.

Tmerron banorët me breshëri automatiku në gjendje të dehur, arrestohet 49 vjeçari në Lezhë

Në Lezhë është bërë arrestimi i një tjetër personi në flagrancë, po për armë mbajtje pa leje. Sipas Policisë së Shtetasit, në pranga është vënë një shteas, emri i të cilit nuk bëhet i ditur, vetëm inicialet A.P., 49 vjeç. Ky shtetas, në gjendje të dehur në fshatin Rraboshtë në Lezhë, mbrëmjen e të hënës ka qëlluar në ajër me armë zjarri në oborrin e banesës së tij.

Të tmerruar nga breshëritë e plumbave, banorë të fshatit kanë lajmëruar policinë e shtetit, e cila ka shkuar në vendngjarje duke bërë arrestimin në flagrancë të personit që kishte qëlluar me armë. Gjatë kontrolleve në banesë, këtij shtetasi i janë sekuestruar 2 armë zjarri automatike (automatik model MP-40 dhe Pushkë model 63), si dhe një granatë dore ofensive.

Materialet procedurale i kaluan Prokurorisë së Rrethit Gjyqësor Lezhë, për veprime të mëtejshme për veprat penale “Prodhimi dhe mbajtja pa leje e armëve luftarake dhe municionit” dhe “Prishja e qetësisë publike”. parashikuar nga neni 278 dhe 274 të Kodit Penal.

Policia e Shkodrës ka arrestuar në flagrancë një person që qarkullonte në rrugë me armë zjarri pa leje. Sipas një njoftimi zyrtar nga Policia e Shtetit, këtë të martë është bërë arrestimi i një personi 25 vjeç, emri i të cilit nuk jepet, vetëm me inicialet L.M., banues në Shkodër, i cili është kapur teksa qarkullonte në rrugë me armë zjarri pa pasur leje. Kanë qenë forcat “Shqiponja” ato që kanë bërë zbulimin dhe më pas arrestimin e këtij personi, pas informacioneve të marra në rrugë operacionale. Arrestimi i këtij shtetasi u bë gjatë kohës që udhëtonte me motorr.

Forcat “Shqiponja” e kanë ndaluar dhe gjatë kontrollit i është gjetur dhe sekuestruar një pistoletë e tipit “TT”. Materialet iu referuan Prokurorisë së Rrethit Gjyqësor Shkodër për veprën penale “Mbajtja pa leje dhe prodhimi i armëve, armëve shpërthyese dhe i municionit” parashikuar nga neni 278 i Kodit Penal.

Lushnje, konflikti degjeneron në përdorimin e armëve, dy persona në kërkim

Një sherr verbal mes dy të rinjve ka përfunduar në përdorimin e armëve të zjarrit në qytetin e Lushnjës. Sipas policisë dy të rinjtë, kanë qëlluar me armë zjarri në shëtitoren e qytetit, një zonë mjaft e frekuentuar.

Fatmirësisht nga shtënat me armë nuk ka të plagosur, ndërsa plumbat kanë prekur dy makina të parkuara në zonë. Dy të rinjtë janë larguar me shpejtësi, ndërsa policia ka nisur hetimet për identifikimin dhe arrestimin e tyre. Nga të dhënat e para dyshohet se përplasja mes të rinjve ka ndodhur për prishjen e pazareve të drogës.

Vlorë: Qëllohet me armë një mjet në lëvizje, s’ka viktima!

Vlora ka qenë sërish në qendër të kronikës pasidten e kësaj të diele, pasi në vendin e quajtur “Ura e Mifolit”, është qëlluar me armë në drejtim të një mjeti.

Sipas informacionit paraprak, i shpërndarë nga Policia e Vlorës, nuk ka pasur të lënduar nga të shtënat me armë, por drejtuesi i mjetit, shtetasi me inicialet R.A 33 vjeç, ka humbur kontrollin e mjetit duke dalë nga rruga e për pasojë ka marrë lëndime të lehta.

“Në vendin e quajtur “Ura e Mifolit” Novoselë, në rrethana ende të paqarta është qëlluar me armë zjarri në drejtim të automjetit që drejtohej nga shtetasi R.A., 33 vjeç, banues në Vlorë, i cili ka humbur kontrollin e mjetit dhe ka dalë nga rruga duke pësuar lëndime të lehta”.

“Nuk ka të lënduar me armë zjarri. Grupi hetimor ndodhet në vendin e ngjarjes dhe po kryen hetimet në lidhje me zbardhjen dhe sqarimin e rrethanave”

“Po punohet nëpërmjet kontrollit të territorit dhe veprimeve të tjera hetimore për identifikimin dhe kapjen e autorit/ëve”, thuhet në njoftimin e Policisë Vlorë.