Kriza, Astrit Patozi: Kur Meta u bë President mori fund Republika!

Kryetari i Bindjes Demokratike Astrit Patozi e ka cilësuar “fund të Republikës, momentin kur Ilir Meta u zgjodh President”. Patozi ka folur në emisionin “Provokacija” të Mustafa Nanos, ku ka analizuar situatën politike në vend, teksa theksin gjatë intervistës së tij e ka pasur te vendimi i presidentit për të shfuqizuar datën e zgjedhjeve të 30 qershorit.

“Kjo është situatë surreale e cila nuk është e papritur për mua të paktën. Unë kur u zgjodh Ilir Meta President kam bërë një status asokohe që është fundi i Republikës sepse Ilir Metën gati po e çonin me barelë në institucionin më të lartë të shtetit dhe socialistët ishin shumë të mërzitur, ndërsa Ilir Meta ishte më i mërzitur vetë se ata që e kishin zgjedhur. Kjo lojë me Republikën është fundi i sistemit. E kam shkruar atëherë që është fundi i sistemit sepse socialistët e trajtuan atë sikur po e internonin”, shkruan Patozi.

Më tej, Patozi shprehet se tani PS po vuan pasojat e zgjedhjes së Ilir Metës në krye të shtetit, pasi sipas kreut të Bindjes, tashmë Rama e ka pas qafe presidentin.

“Socialistëve iu është bërë shumë mirë që iu është kthyer në kokë ajo shaka që bënë atëherë dhe pavarësisht se Edi Rama thotë sot “se nuk kam asnjë lloj pendese që zgjodha Ilir Metën President se nuk mund ta dija ça do bënte ai”, unë jam shumë i sigurt se ai e ka ditur shumë mirë se kë po çonte në Presidencë. Por e ka çuar si hileqar, e ka çuar si pazarxhi, e ka çuar për ta hequr qafe dhe ndërkohë e ka mbas qafe sot”, tha Patozi.

Patozi vë gishtin në plagë: Thelbi i krizës është Ilir Meta

Astrit Patozi shkruan të mërkurën se shkaku i krizës së sotme politike është zgjedhja e Ilir Metës President, dy vite më parë.

Ai risjell në vëmendje një postim të vetin shkruar më 29 prill të 2017 dhe ku sqaron se pse nuk u nxitua të urojë Metën për zgjedhjen e tij në postin e presidentit të republikës. Sipas tij zgjedhja e Metës në krye të shtetit ishte e sforcuar nga loja e PS-së, ku të gjitha partitë bënë të kundërtën e asaj që donin.

“Kisha dy arsye pse nuk u nxitova dje të “uroj” Presidentin e sapozgjedhur, Ilir Metaj. E para, se prita radhën…Dhe më e rëndësishmja, se nuk doja ta prishja solemnitetin e gëzimit të atyre që e çuan, si duke e mbajtur në barrelë drejt majës së shtetit, por edhe merzinë e atyre që u zhgënjyen nga zgjedhja e tij, pasi kishin pritur diçka tjetër.

I vetmi që kishte një arsye për ta mbështetur dje në parlament ishte Ben Blushi, por pikërisht ai votoi kundër. Dhe arsyeja e vetme ishte se ata të dy kanë qenë shokë gjimnazi.

Të gjithë të tjerët, bënë të kundërtën e asaj që donin. LSI votoi me shpirt ndër dhëmbë, se ua kishte futur Edi Rama. Ndërsa Partia Socialiste votoi me inat sikur po firmoste, jo për zgjedhjen, por për internimin e Ilir Metës.

Ky është presidenti që duam, në Shqipërinë që duam, me policinë që duam, me drejtësinë që shumë shpejt do ta duam…prej “Rilindjes” që aq shumë e deshëm dhe e duam…

Mbetet për t’u konsumuar vetëm akti i fundit, nëse do të kemi apo jo edhe opozitën që duam…”, shkruante Patozi dy vite më parë.

Ndërsa sot apelon që të mos çuditemi me krizën pasi ajo nisi që para dy vitesh me zgjedhjen e Metës president.

“Për ata, që sot po çuditen shumë me përshkallëzimin e pashembullt të konfliktit të Presidentit të Republikës me shumicën qeverisëse, në pozitat e popullit të lënduar nga papërgjegjësia e kreut të shtetit.

Apo dhe për të tjerë që kanë ndërruar pozicionin, koalicionin apo qoftë edhe vetëm interesin, për shkak të hallit të ri, në krahasim me atë të dy vjetëve të shkuara.

Natyrisht, edhe për ata, që janë gati ta pranojnë si Mesian e tyre, të njëjtin person, të cilin para pak kohësh e konsideronin si shefin e një organizate të rrezikshme kriminale.

Nuk keni pse çirrni faqet dhe mos bëni sikur po përjetoni fundin e botës, se ai nuk ka mbërritur ende dhe nuk ka për të ardhur ndonjëherë në Shqipëri.

Thjesht për t’ju freskuar kujtesën, po ju ftoj që të lexoni diçka të shkurtër, që kam shkruar më 29 prill 2017, me rastin e zgjedhjes së Presidentit të Republikës, Ilir Metaj.

Konsiderojeni këtë si një ndihmesë modeste për të shpjeguar krizën dhe për të njohur më mirë shkaktarët”, shkruan Patozi.

NJË NDIHMESË MODESTE PËR TË SHPJEGUAR KRIZËNPër ata, që sot po çuditen shumë me përshkallëzimin e pashembullt të…
Gepostet von Astrit Patozi am Mittwoch, 12. Juni 2019

Patozi: Vendimi antikushtetues, përgjegjësit e krizës nuk mund të na tregojnë gishtin

Kreu i partisë Bindja Demokratike, Astrit Patozi e ka cilësuar vendimin e Presidentit Meta për çdekretimin e zgjedhjeve të 30 qershorit si jo kushtetues dhe se dekreti i presidentit nuk kishte asnjë arsye pse të shfuqizohej prej atij vetë.

Gjatë një interviste për Report Tv Patozi tha se presidenti nuk duhet të mbajë qëndrime emocionale, por institucionale të bazuara në fakte ligjore. Konsideratat negative të Presidentit për Bindjen Demokratike, Patozi i ka cilësuar si vendosje të gishtit në partinë e gabuar, pasi kjo parti nuk ka asnjë rol në krijimin e krizës së thellë politike në vend.

Intervista e plote:

Z. Patozi, doja t’ju bëja një pyetje në lidhje me dekretin e Presidentit paraditen e sotme, i cili ka kërkuar shfuqizimin e dekretit të mëparshëm për zgjedhjet e 30 qershorit. Cili është opinioni juaj? Pasi përveç Partisë Socialiste, edhe ju jeni pjesë e garës elektorale për zgjedhjet vendore të 30 qershorit.

Astrit Patozi: Së pari, unë dua të sqaroj që BINDJA DEMOKRATIKE që në daljen e parë të saj publike ka theksuar që data për ne nuk është problem. Pra, ne nuk kemi qënë të lidhur me datën, por ne kemi theksuar që ne do të hyjmë në këto zgjedhje, kurdo që ato të mbaheshin. Dhe ne jemi bërë pjesë e fushatës elektorale me datën që kishte dekretuar vetë Presidenti i Republikës, që ishte 30 qershori. Sot kemi një qëndrim tjetër të Presidentit, të cilin ne e konsiderojmë si jo kushtetues, por më shumë emocional. Por, tek e fundit, nuk ka vlerë opinioni që ne kemi për këtë punë, përsa kohë që ne presim që të shprehen institucionet. Në çastin që institucionet do të flasin sigurisht që ne do të marrim qëndrimin tonë dhe ne shpresojmë shumë që data 30 qershor të mos lëvizë, sepse kemi bindjen që dekreti i presidentit nuk kishte asnjë arsye pse të shfuqizohej prej atij vetë.

Në rast se kjo datë ndryshon, ju si BINDJE DEMOKRATIKE çfarë do të bëni?

Astrit Patozi: Së pari njëherë ne nuk kemi pse të marrim qëndrime tani, pasi ngjarjet nuk kanë ndodhur. Ne shpresojmë që institucionet të vendosin ndryshe, por tek e fundit kjo nuk varet prej nesh. Ne kemi qënë që ditën e parë të prirur që të marrim pjesë në këto zgjedhje, kurdo që ato të mbahen, dhe në rast se do të ketë një datë tjetër sigurisht që ne do të marrim pjesë sërish.

Gjatë deklaratës së tij paraditen e sotme, Z. Meta ju ka sulmuar duke ju quajtur ju BINDJEN DEMOKRATIKE farsë e regjistruar në limite të cilat kishin përfunduar. Keni një koment në lidhje me këtë që ka shprehur Presidenti?

Astrit Patozi: Ne kemi pasur një qëndrim publik për këtë çështje dhe e konsiderojmë joracional qëndrimin e presidentit. E vlerësojmë si një ndjesi e tij personale, si një opinion dhe ne mendojmë që Presidenti i Republikës nuk mund të shprehet emocionalisht, por duhet të shprehet në bazë të të dhënave që ka nga institucionet përgjegjëse. Ne jemi një parti e regjistruar në këto zgjedhje, e regjistruar në Gjykatë, pra i kemi kaluar gjithë etapat ligjore në mënyrën më perfekte të mundshme dhe gjykojmë se çdo gjë tjetër që thuhet në adresën tonë, vetëm e nxjerr zbuluar Presidentin. I cili, në rast se do të ishte përfaqësuesi i unitetit të popullit, siç pretendon, sigurisht që nuk mund të shprehte konsiderata negative për njërën nga partitë, që merr pjesë në garën e 30 qershorit, datë të cilën e ka dekretuar vetë.
Por mbi të gjitha, ajo që është më e rëndësishmja në këtë rast, Partia BINDJA DEMOKRATIKE është një forcë e re politike, e cila nuk ka asnjë përgjegjësi politike lidhur me këtë krizë, që ne e shohim, e ndjejmë dhe e prekim çdo ditë nè Shqipëri.
Pra, në rast se Presidenti do të kishte për të shprehur ndonjë konsideratë negative, mund ta kishte për partitë, që e kanë shkaktuar këtë dhe, jo për BINDJEN DEMOKRATIKE. Fakti që ai e bëri është sigurisht problemi i tij, nuk është shqetësimi ynë.

Keni ndonjë koment për sa i përket krizës politike në vend, pasi kemi, siç ka deklaruar Presidenti, protesta nga ana e opozitës, antimitingje nga ana e mazhorancës, të cilat kanë qënë edhe një nga arsyet që Presidenti ka marrë këtë vendim në vetëm pak ditë përpara zgjedhjeve lokale?

Astrit Patozi: Tani, ne kemi një qëndrim shumë të qartë për krizën. Ne e konsiderojmë atë si një korrje të asaj që kanë mbjellë forcat e vjetra politike, të cilat e kanë shkaktuar. Ne mendojmë se sistemi politik është në grahmat e fundit dhe kjo krizë është shprehja më e qartë e deformimit dhe e kalbëzimit të sistemit. Ne mendojmë që sot Shqipëria ka ardhur në këtë pikë për shkak të një pazari të pisët që është bërë para dy vitesh mes Edi Ramës dhe Lulzim Bashës, e cila në vend të prodhonte stabilitet dhe paqe, prodhoi konflikt dhe ashpërsim mes dy kampeve. Dhe ne mendojmë se zgjidhja e vërtetë e krizës për Shqipërinë do të ndodhë pas mbajtjes së këtyre zgjedhjeve, me korrektimin dhe formatimin e rendit kushtetues në Shqipëri që do të ndodhë përmes një marrëveshjeje të madhe, që në radhë të parë të ndryshojë Kushtetutën dhe në radhë të dytë të shpëtojë sistemin nga kryetarokracia, që e ka çuar në këtë pikë.

Ju do te jeni pjesë e kësaj marrëveshjeje, si forca më e re poltike në vend?

Astrit Patozi: Pa diskutim që po. Ne jemi të gatshëm që të japim kontributin tonë në çdo tavolinë ku diskutohet riformatimi i sistemit, pra shpëtimi i Shqipërisë nga kryetarokracia që e ka çuar këtu ku po flasim.

Deri në një përgjigje të institucioneve të tjera, ju do të vijoni normalisht fushatën tuaj elektorale?

Astrit Patozi: Pa asnjë dyshim, ne nuk kemi asnjë arsye për të mos vazhduar. Në rast se të gjithë të tjerët janë në fushatë, ne nuk mund të jemi si delja e zezë që të marrim një vendim të njëanshëm, pra që të tjerët të jenë në fushatë dhe ne të dalim nga loja. Ne sigurisht që jemi pjesë e fushatës, për sa kohë që institucionet nuk kanë vendosur ndryshe. Ne çastin që institucionet do të vendosin dikur, ne sigurisht që do të marrim një qëndrim tjetër.

“Parti jashtë afateve Ligjore”, Patozi-Metës: Je produkt i pazareve të pista!

Ilir Meta firmosi mëngjesin e kësaj të hëne dekretin për anulimin e zgjedhjeve lokale të 30 qershorit. Gjatë fjalës së tij të gjatë, ku dha argumentat, që sipas tij ishin kushtetues dhe moral, Ilir Meta u shpreh ndër të tjera se partia Bindja Demokratike u krijuar për të legjitimuar zgjedhjet.

Menjëherë pas fjalës së Metës, ka ardhur reagimi i Partisë Bindja Demokratike, Astrit Patozi, i cil është shprehur se fjalët e metës në adresë të partisë së tij, janë një fushatë pozitive për BD. “Ndërsa për konsideratat e tij politike dhe jo insistucionale nuk shqetësohemi fare, madje i vlerësojmë ato si një kontribut pozitiv për fushatën e Bindjes Demokratike në këto zgjedhje”, thotë Patozi.

Më tej, Astrit Patozi vijon duke u shprehur se Bindja Demokratike nuk është fajtore në krizën politike në të cilën ndodhet vendi, kreu i kësaj partie thotë se “ndërkohë që vetë Presidenti i Republikës, si funksion dhe si personazh politik, është produkti më sinjifikativ i pazareve të pista midis tyre”.

Astrit Patozi i kërkon Ilir Metës të heshtë kur bëhet fjalë për Bindjen Demokratike, ashtu sikundër ka bërë dhe LSI, parti, të cilën, sipas Patozit, Ilir Meta ia la trashëgim bashkëshortes së vetë.

“Por edhe në këtë kontekst, është më mirë që të pranojë heshtjen, me të cilën e ka përcjellë krijimin e Bindjes Demokratike, partia që ia la trashëgim bashkëshortes së vet, se sa të marrë si aksioma thashethemet që dëgjon nga një forcë tjetër politike, që nuk e ka fshehur mërzinë dhe shqetësimin për futjen tonë në garën e 30 qershorit”, thuhet ndër të tjera në deklaratën e Patozit.

Fjalët e Metës për Bindjen Demokratike gjatë konferencës për shtyp:

Kjo situatë bëhet edhe më absurde, referuar faktit që për këto zgjedhje në më shumë se në gjysmën e njësive të qeverisjes vendore konkuron vetëm një kandidat për t’u zgjedhur si Kryetar Bashkie, ndërkohë që për pjesën tjetër konkurohet me kandidatë të propozuar nga një forcë politike e regjistruar në minutat e fundit në sistemin gjyqësor, dhe e regjistruar pranë KQZ përtej afateve ligjore.

Kjo gjë tregon qartë së ky proces zgjedhor është fiktiv dhe është një element shtesë që provon faktin që standardet demokratike të kërkuara për plotësim jo vetëm që nuk mund të përmbushën, por po shkelen në mënyrë flagrante.

I gjithë sistemi i qeverisjes lokale që do të funksiononte si rezultat i këtyre zgjedhjeve pa garë dhe konkurentë, nuk do të bazohej në një sistem zgjedhjesh, siç parashikon neni 1, pika 3 dhe neni 109 i Kushtetutës, por në një sistem emërimi të drejtpërdrejtë të organeve përfaqësuese dhe ekzekutive të njësive të qeverisjes vendore, i cili do të cenonte strukturën e demokracisë nga poshtë lart dhe pjesëmarrësve e zgjedhësve në qeverisjen vendore.

Patozi sulmon Metën

Për kryetarin e partisë Bindja Demokratike, Astrit Patozi, vendimi i Presidentit të Republikës Ilir Meta për anulimin e zgjedhjeve të 30 qershorit, është një akt i pastër politik, por i nxitur nga deklaratat e Zëvendës-Ndihmës Sekretarit të Shtetit z.Palmer.

“Dje në Tiranë nuk kishte asgjë të re nga palët ndërluftuese të politikës sonë të vjetër. Edi Rama ishte në fushatë, ndërsa Lulzim Basha dhe Monika Kryemadhi, në protestë. E vetmja e re dje për politikën në Shqipëri ishte intervista e zotit Palmer nga Uashingtoni, e cila me sa duket prishi qetësinë dhe zgjoi reagimin radikal të Presidentit”, shkruan Patozi, duke u shprehur më tej se kjo është një arsye më shumë që shqiptarët të shkojnë në zgjedhje dhe të votojnë më 30 qershor.

AKTI I PRESIDENTIT NUK KA LIDHJE ME KUSHTETUTËN. REAGIMI ERDHI PAS INTERVISTËS SË METTHEW PALMER(Në përgjigje të…
Gepostet von Astrit Patozi am Sonntag, 9. Juni 2019

Astrit Patozi ka bindjen se shfuqizimi i dekretit për datën e zgjedhjeve nuk është një debat kushtetues, pasi sipas tij, këtë gjë Meta do e kishte ezauruar më herët. “Si njëra nga forcat politike pjesmarrëse në garën e 30 qershorit, ne mendojmë se këtu nuk kemi të bëjmë fare me një debat kushtetues. Po të kishte pasur të tillë, Presidenti i Republikës, me shumë gjasa, do ta kishte ezauruar atë përpara se të binte gongu i fushatës dhe jo tani që jemi gati në mesin e saj”, shkruan kreu i BD.

Dekreti i Metës. Çfarë është presidenti për ju?

Në këtë linjë, Astrit Patozi shprehet se anulimi i zgjedhjeve në një moment të tillë, kur fushata ka nisur dhe shqiptarët presin 30 qershorin, do të ishte shumë i rëndë për vendin dhe kundër Kushtetutës.

“Ti nuk mund t’u thuash sot miliona shqiptarëve, që janë përfshirë në këto zgjedhje, qoftë edhe duke parë në televizor fushatat e partive garuese, se loja duhet të anullohet. Sepse, kjo do të ishte shumë e rëndë. Unë besoj se një gjë e tillë shkon kundër kushtetutës, kundër precedentit, por edhe kundër logjikës më minimale”, thuhet ndër të tjera në deklaratën e Patozit.

Patozi i kujton Ramës: Skrapari garë vetëm, PS presion kandidatit tonë

Nga Astrit Patozi

Po shoh që lideri suprem paska qenë për fushatë në Çorovodë sot dhe paska thënë ato gjërat e mërzitshme, që përsërit kudo, për çlirimin e dytë që po i bën Shqipërisë “Rilindja”.
Por nuk ka thënë asnjë gjysëm fjale se përse në atë bashki nuk ka sot garë, por do të ketë vetëm një kandidat. Në fakt, do të kishte qenë e vetmja përgjigje që kanë pritur qytetarët dhe banorët e Skraparit sot prej tij.
Sepse nuk ia ka berë zemra ta thotë që në Çorovodë kandidati i BINDJES DEMOKRATIKE u tërhoq papritur, pasi njerëzit e Edi Ramës në Skrapar, nuk donin që atje të kishte zgjedhje, por thjesht votime. Ai u detyrua të largohej nga gara pas një presioni të fortë të tipit mafioz të përfaqësuesve të “Rilindjes” në atë bashki.
Dhe ne po e lemë timonierin t’i gëzohet fitores së tij në tavolinë për Bashkinë e Skraparit dhe sidomos faktit që po ia shkëput këtë nga thonjtë rivales së vet të egër brenda së majtës, LSI-së.
Por jemi të sigurt, se kjo do të jetë një fitore si e Pirros, që nuk vlen vetëm për Skraparin.
Rënia e sigurt e Edi Ramës ka nisur dhe atë nuk e shpëton dot rezultati i 30 Qershorit.

Bindja Demokratike prezanton kandidatët, Patozi: Jemi alternativë serioze përballë Rilindjes

Partia Bindja Demokratike e drejtuar nga Astrit Patozi, ka publikuar një video, ku kandidatët e kësaj partie që do të garojnë në zgjedhjet lokale të 30 qershorit, prezantojnë veten dhe u bëjnë thirrje qytetarëve për të votuar partinë më të re shqiptare.

Video hapet me kandidatin për kryetar të Bashkisë së Tiranës, Arben Skënderi, i cili u bën thirrje qytetarëve të votojnë Bindjen Demokratike, si një alternativë për më shumë dinjitet dhe shërbim ndaj qytetarëve.

Kryetari i BD, Astrit Patozi mbyll videon duke u bërë thirrje qytetarëve shqiptarë të votojnë Bindjen, që sipas tij, është një alternativë serioze përballë “Rilindjes” së konsumuar.

“Për ne të gjithë Shqipëria është e para. Bindja Demokratike është sot në shërbim të dashurisë dhe respektit për Shqipërinë dhe qytetin. Në këto zgjedhje ne kemi kandidatë për kryetar dhe këshilltar bashkie nga Tropoja në Sarandë dhe nga Korça në Durrës”.

“Edhe pse forcë e re politike, Bindja vjen si një ofertë serioze për 30 qershorin në kontrastë të fortë ndaj “Rilindjes” së konsumuar që kemi përballë, dhe atyre që kanë ikur nga procesi”, thotë Patozi ndër të tjera në mesazhin drejtuar qytetarëve.

Patozi: Po na kërcënojnë dhe po na marrin peng. Por ua dimë emrat

Kryetari i Bindjes Demokratike, Astrit Patozi, ka hedhur akuza se anëtarë të partisë së tij po merren peng dhe po kërcënohen. Patozi nuk jep detaje dhe nuk tregon se kush po i bën presion anëtarëve të Bindjes Demokratike, por shkruan se “nuk ia vlen të merremi me inkuizitorët, ndonëse i njohim me emra”. Reagimi i Patozit erdhi pasi 3 kandidatë për kryetarë bashkie të Bindjes Demokratike u tërhoqën nga gara për zgjedhjet e 31 qershorit.

Postimi i plotë i Astrit Patozit:

“Nuk na ndalin dot, ndaj janë tërbuar nga dëshpërimi. Krenarë për atë që kemi bërë në kaq pak ditë dhe mirënjohës për gjithkënd që mbështeti dhe besoi tek BINDJA DEMOKRATIKE. Sot jemi realisht shumë më tepër dhe shumë më të fortë se në ditën e parë. Asnjë peng për ata që u ndanë prej nesh për shkak se u kapën për fyti dhe u lidhën prej këmbësh nga të dëshpëruarit e sistemit, të cilët ndjehen tmerrësisht të kërcënuar nga era e BINDJES DEMOKRATIKE.

Shikojeni vetë si janë shpërfytyruar, sa kanë nisur me tërbim një fushatë të egër kundër nesh, që të kujton gjuetinë e nazistëve ndaj ebrenjve, para dhe gjatë Luftës së Dytë Botërore. Kurrë më parë nuk ka ndodhur që një partie politike, ndonëse fare e re, t’i sulmohen, përgjohen dhe merren peng, që nga firmëtarët e deri tek kandidatët e saj për zgjedhjet e 30 qershorit. Është e pashmbullt kjo që po ndodh, por ajo konfirmon gjithashtu se ne kemi bërë gjënë e duhur në kohën e duhur.

E kanë kot. Sepse nuk na ndalin dot, ndaj edhe janë kaq të acaruar. Nuk ia vlen të merreni me inkuizitorët, ndonëse i njohim me emra, ua dimë edhe zyrat ku i kanë thirrur të penduarit, në prani të dëshmitarëve mediatikë. Sepse koha e tyre po skadon me shpejtësi. Është koha e BINDJES DEMOKRATIKE”.

Koka: Sot jam i lirë të mbështes çdo parti që i shërben vendit

Pas shumë akuzash në lidhje me legjitimitetin e partisë së re Bindja Demokratike, ka reaguar për herë të parë deputeti Lefter Koka.

Koka ka sqaruar se ai është i lirë të mbështes çdo parti apo kryetar partie apo individ që gjykon se japin një garanci më shumë për të ardhmen e sigurt të vendit.

“Fatmirësisht sot jam i lirë të mbështes çdo parti, Kryetar partie apo individ që unë gjykoj se japin një garanci më shumë për të ardhmen e sigurt të vendit. Më duhet të ndaj mbështetjen për individin pasi sot fatkeqësisht shohim se individët shpesh kanë rol më të rëndësishëm se zëri i partisë”- shkruan Koka në Facebook

Koka sqaron se për shkak të ndryshimeve kushtetuese të Berishës në 2008, ai mbështeti kontribuesin në PD.

“Në Shqipërinë e çudirave ndodh gjithçka. Ndryshimet kushtetuese të Berishës në 2008-ën, me qëllimin e vetëm, eliminimin e çdo kundërshtari, sot kthehen në një pengesë serioze për kandidimin në zgjedhjet lokale, të ish bashkëpunëtorit të Berishës dhe kontribuesit të PD-së z. Astrit Patozi. Kujtoj këtu liderin e opozitës, që në një fushatë të pamëshirshme Maj – Qershor 2017 përqendroi gjithë forcat e tij kundër LSI dhe jo vetëm kaq, por e etiketoi këtë forcë politike si të keqen e shqiptarëve. Shohim qartë sot njerëz që për pushtet e për të shpëtuar veten janë të gatshëm të bëjnë pakt edhe me djallin. Kuadri ligjor dhe vullneti i popullit për një rrugë të shpejtë të vendit drejt integrimit evropian ja jep Bindjes Demokratike këtë legjitimitet, ndaj me vullnet e bindje të plotë unë mora vendimin të mbështes me firmën time z. Patozi në rrugën e tij dhe mbështetësve të tij, duke vazhduar të besoj dhe aderoj në bindjet e mia të majta. Unë besoj se një klasë e re politike opozitare është domosdoshmëri për Shqipërinë demokratike e pluraliste.” – shkruan Koka

Patozi: E vërteta e firmës së Lefter Kokës për BD

Koordinatori i Bindjes Demokratike, Astrit Patozi ka sqaruar njëherë e mirë firmën e hedhur nga deputeti Lefter Koka dhe paligjshmërinë për të cilat akuzohet nga PD.

Patozi tha se firmat e Lefter Kokës është për siguri pas asaj të Andi Përmeti duke dhënë mbështetjen e tij për krijimin e partisë Bindja Demokratike. Këtë mund ta bënte kushdo dhe një socialist ka thënë Patozi për Top Talk.

“E kam marrën zotin Koka, për siguri. Sepse e dija që gjuetia e shtrigave ndaj Bindjes Demokratike do të vazhdonte dhe do të përdorej si një argument për të rrëzuar pjesëmarrjen e saj në zgjedhje. E kam marrë për rezervë. E falenderoj që pranoi. Firma e zotit Koka për BD, nuk do të thotë se ai u bë me demokrat dhe unë u bëra i majtë. Ai vetëm ka dhënë një akses politik që kjo parti lejohet të garojë. Këtë mund ta bënte edhe një socialist e nuk do të kishte asgjë të keqe.” – tha Patozi