Balaj lë “agjërimin”, gjen golin në Austri

Bekim Balaj gjeti rrjetën të shtunën pasdite në kampionatin austriak të futbollit. Sulmuesi i kombëtares shqiptare shënoi për Shtrum Grac, duke i dhënë fund “thatësirës” prej një muaj të golave. Balaj e nisi titullar takimin që skuadra e tij luajti kundër St.Polten, takim të cilin e fitoi me rezultatin 4-0.

Balaj gjeti rrjetën kur ndeshja ishte 2-0 për ekipin e tij. Ai shënoi nga pika e bardhë e penalltisë, duke trefishuar shifrat për Shtrum Grac. Me fitoren e të shtunës skuadra e Balajt shkon 20 pikë dhe mban vendin e pestë në kampionat, duke shpresuar deri në fund të tij për të arritur një vend në kupat e Europës.

Për Bekim Balaj ky ishte goli i pestë sezonal në 12 ndeshje të luajtura në kampionat. Statistika të mira këto për sulmuesin shkodran, duke pasur parasysh se në Rusi goli ishte diçka me të cilin nuk i pati marrëdhëniet kurrë mirë.

Kurz fiton, por s’formon dot qeverinë

Austriakët hodhën votën e tyre të dielën për zgjedhjen e qeverisë së tyre në zgjedhjet e parakohshme të përgjithshme. Sipas exit poll-ve të para, fitues del partia Konservatore Popullore, e udhëhequr nga ish-kancelari Sebastian Kurz, që parashikohet të marrë 37% të votave.

Edhe pas skandalit që rrëzoi koalicionin qeverisës, Kurz duket se ende gëzonim pëlqimin në popull, por jo aq sa për ta formuar qeverinë i vetëm. Prandaj me shumë mundësi ai do të jetë në kërkim të një koalicioni qeverisës.

Social Demokratët parashikohet të marrin 22.5% me Partinë e Ekstremit të Djathtë të Lirisë me 16.7%. Partitë e tjera, të Gjelbrit parashikohet të marrin 13.1% dhe partia liberale Neos 7.8%.

Vendi shkoi në zgjedhje të parakohshme pas video skandalit ku shfaqej ish-kryetarit të partisë, FPÖ, Heinz-Christian Strache, i cili ishte në koalicion qeverisës me Kurz, ku i ofronte favore mbesës së një oligarku rus në këmbim të mbështetjes dhe financimit nga ana e saj. Fundi jo i lavdishëm i koalicionit të partisë konservatore, ÖVP dhe djathtistëve të FPÖ nuk e ka dëmtuar ish-partnerin konservator. Kurz mendohet të ketë marrë më shumë vota se në zgjedhjet e fundit dhe mund të bëhet me distancë forca kryesore, por sërish do jetë në kërkim të një koalicioni.

Kurz, kërkon të rizgjidhet në Austri

Në zgjedhjet parlamentare të së dielës, ish-kancelari austriak, Sebastian Kurz kryeson sondazhet. Skandali i ish-partnerit të tij, FPÖ nuk e ka dëmtuar Kurz. Por a do të hidhet ai sërish në një shtrat me djathtistët?

Pak ditë para zgjedhjeve të dielën, parlamenti austriak shpalli emergjencën, jo atë politike, por të klimës. Me këtë aksion simbolik të gjitha partitë, përveç FPÖ-së, duan të japin një sinjal në një fushatë zgjedhore zvarritëse. Lufta kundër ngrohjes globlale është në modë tani. Edhe kandidati për kancelar, Sebastian Kurz e ka zbuluar këtë temë. Në fund të fundit, ish-kancelari i rrëzuar, Kurz, 33 vjeçar nuk mund të flasë gjithmonë për pengimin e migracionit në republikën e alpeve. Populistët e djathtë janë të vetmit që e quajnë histeri kufizimin e emetimit të CO2-it. Norbert Hofer, fytyra e re të djathtëve, e quan ndryshimin e klimës si Donald Trump apo kolegët e partisë populistë gjermane, AfD një gënjeshtër të fryrë tej mase.

Skandali “Ibiza” e rrëzoi koalicionin

Skandali i ish-kryetarit të partisë, FPÖ, Heinz-Christian Strache, që i ofroi favore një mbese të një gjoja oligarku rus, nuk luajti rol parësor në fushatë. Videoja e regjistruar në fshehtësi në Ibiza shkaktoi një tronditje të madhe në Austri duke sjellë rrëzimin e koalicionit të konservatorëve me populistët nën Sebastian Kurz. Pas skandalit, Kurz u detyrua të largojë edhe ministrin e Brendshëm të FPÖ, Herbert Kickl. Pas kësaj, FPÖ u hakmorr duke kërkuar një mocion mosbesimi për kancelarin, gjë që solli rrëzimin e tij dhe hapi rrugën për zgjedhje të reja. Partia populiste e djathtë e sheh veten si viktimë të një „bande kriminale”. Lidhur me skandalin e regjistrimit të videos qarkullojnë disa teori konspirative.

Kurz kryeson

Fundi jo i lavdishëm i koalicionit të partisë konservatore, ÖVP dhe djathtistëve të FPÖ nuk e ka dëmtuar ish-partnerin konservator. Sipas sondazheve të fundit, Sebastian Kurz me një ÖVP të prerë si me masë për të, kap vlerat e 33-35 %. Ai me gjasë ka për të marrë më shumë vota se në zgjedhjet e fundit, dhe mund të bëhet me distancë forca kryesore. FPÖ që ende duhet të luftojë me veten, nëse duhet ta nxjerrë jashtë delen e zezë me emrin, Heinz-Christian Strache mund të kapë 21-23%. Asaj i duhet të luftojë me socialdemokratët, që në sondazhe renditen me 25-23%, për të zënë vendin e dytë.

Akuza të reja kundër Strache

Ndërkohë po zhvillohen hetime kundër ish-kryetarit të përfshirë në skandal, FPÖ, Heinz-Christian Strache. Dyshohet, se ai së bashku me gruan, sekretaren dhe truprojën e tij kanë keqpërdorur fonde dhe kanë marrë para nga oligarkë të dyshimtë nga Europa Lindore. Truproja e tij ka pranuar të flasë dhe madje luan rol edhe në aferën e Ibizas. Megjithëse brenda FPÖ-së tani po nxirren në shesh shumë të palara, kryesia mbetet e qetë. „Ne kemi shumë votues tradicionalë që mbeten besnik”, tha një funksionare e lartë së fundmi.

Mes partive të vogla mund të gëzohen Të Gjelbrit. Ata pritet të kapërcejnë këtë herë pengesën e 4% dhe të futen në parlament, në të cilin ishin pjesë deri në vitin 2017. Kjo falë temës qendrore të ndryshimit të klimës, thotë kreu i të Gjelbërve austriakë, Werner Kogler.

Slloganet e fushatës

Duelet televizive gjatë fushatës përgjithësisht ishin paqësore. Kreu i ÖVP-së, Sebastian Kurz i dha vetes imazhin e djalit të thjeshtë nga fshati. Ai nuk harronte të përmendte, se tek gjyshërit në një zonë fshatare me dëshirë ka përkëdhelur dhitë. Dikur ishte e rëndësishme për të, të theksonte, si ishte rritur në një lagje punëtorësh në Vjenë. Por në këtë fushatë bëhet fjalë për vendin, identitetin dhe distancimin populist nga të ashtuquajturat elita. Slogani i fushatës zgjedhore të ÖVP-së ishte „Ne duam sërish kancelarin tonë!” Austria me sa duket do atë që njeh, nuk do eksperimente.

Në një duel të drejtpërdrejë me Sebastian Kurz, kandidatja kryesore e socialdemokratëve, SPÖ, Pamela Rendi-Wagner u tall me ndryshimin e imazhit të Kurz. Ai ia ktheu, se njeriu mund të rritet në dy vende. Kandidatja socialdemokrate megjithëse është larg ÖVP-së me vota, vendos optimizimin si kredo të fushatës. Sllogani i socialdemokratëve : “Yes, we Pam!”

Koaltion mes konservatorëve dhe populistëve të djathtë?

Sebastian Kurz para zgjedhjeve nuk ka bërë asnjë premtim për koalicion. Nga qarqet e tij thuhet, se bashkëpunimi me FPÖ është shumë i vështirë për të, pasi është personalisht i zhgënjyer. Por krijimi i një koalicioni tjetër duhet të jetë po ashtu i vështirë. Një rifreskim të aleancës dhjetëravjeçare ÖVP me SPÖ nuk e do asnjë palë. Për një mazhorancë me Të Gjelbrit, të cilin Sebastian Kurz mund ta përfytyronte, nuk do të mjaftonte. Me ndoshta një rezultat 8% ambientalistët janë shumë të dobët. Kurz madje ka pranuar, se mund të arrihet edhe tek një qeveri e drejtuar nga socialdemokratët, nëse partitë e vogla, Të Gjelbrit, partia liberale Neos, Lista Pilz dhe SPÖ shtojnë votat në këto zgjedhje.

Nga ana përmbajtësore, Sebastian Kurz nuk do kishte shumë rezerva të bënte koalicion me populistët e djathtë. Në çështjen e migracionit të dyja partitë janë të një mendimi: Bëhet fjalë për dashurinë për vendin, për identitetin austriak. Këto fjalë nuk janë të huaja për Sebastian Kurz. Por ai sheh disa pjesë të FPÖ-së si shumë të afërt me grupime ekstremiste të djathta, si lëvizja identitare. Kreu i FPÖ-së i mohon lidhje të tilla dhe i relativizon ato. Po ashtu për Sebastian Kurz është një halë në sy edhe ish-ministri i Brendshëm, Herbert Kickl. Ai është nr 2 tek populistët dhe në një parlament të ri mund të bëhet kryetar i grupit parlamentar. Kurz duhet pastaj të bashkëpunonte me të. „A do të bënit koalicion me blutë (simboli i partisë FPÖ, shën.red.), nëse Kickl nuk do të ishte”, e pyeti një moderatore e televizionit Puls, ish-kancelarin. Përgjigja e tij ishte: „Në fillim votohet, pastaj të shohim.”/DW/

Piloti shqiptar merr pikët e para në Formula 3, drejt realizimit të ëndrrës…F1

Talenti shqiptar, Lirim Zendeli, që është duke jetuar ëndrrën në botën e motorëve, duke garuar me makinat e shpejta, ka arritur suksesin e parë sezonal në Formula 3 me ekipin e Sauber Motorsport. Zendeli zuri vendin e tetë në garën e parë të për Çmimin e Madh të Austrisë në pistën e Spielberg (ku njëkohësisht është duke u zhvilluar edhe gara e Formula 1). Piloti i ri me orgjinë shqiptare nga Maqedonia, mposhti temperaturat e larta në Austri, duke arritur që pas 24 xhirosh të mbante vendin e tetë në pistën e Spielberg.

Falë kësaj fitoreje të së shtunës, Lirim Zendeli do të ketë mundësi, që ditën e dielë në garën e dytë, të niset nga vendet e kreut. Ky ishte suksesi i parë në FIA Formula 3 edhe për ekipin e Sauber Junior Team, që është pjesë e ekipit të Alafa Romeo, që këtë sezon është rikthyer edhe në garat e Formula 1. Pas garës, Lirim Zendeli është shprehur i kënaqur për suksesin në Austri.

“Kjo ishte e mahnitshme! E dija që gomat e mia ishin më të mira se të rivalëve të mi. Është mirë të mendosh se kemi mundësi për të vazhduar përpara. Mund të kishim bërë dhe më mirë, por gabova në kthesën e parë, pastaj përmirësova në kthesën e tretë, dhe mu dha mundësi për të parakaluar. Fakti që nesër do të nisem nga P1, më vë në presion, por kjo është ajo që duam. Jam në kërkim të fitores së parë”, është shprehur Zendeli.

Kancelari i Austrisë shkarkohet nga parlamenti

Kancelari i Austrisë, Sebastian Kurz dhe qeveria e tij kanë humbur votëbesimin e parlamentit. Konservatori Kurz u shkarkua sot nga një votim i partive kryesore opozitare, 10 ditë pas skandalit “Ibizagate”, ku zv/kancelari, i cili ishte edhe kreu i partisë në koalicion u përfshi në një skandal korrupsioni. Kjo shpërbeu koalicionin e tij me ekstremin e djathtë.

Ky votim i paprecedentë në historinë e republikës së Austrisë u arrit kryesisht me votat e partisë socialdemokrate dhe të partisë nacionaliste FPO, shefi i të cilës u detyrua të dorëhiqet nga posti i tij si zëvendëskancelar pas këtij skandali.

Rezultatet u shpallën nga zëvendëspresidentja e Parlamentit, Doris Bures, që nuk ka dhënë asnjë shifër mbi këtë votim.

Presidenti i Austrisë tani duhet të vendosë se kush do të jetë kancelari i ri. Ky lider do të kryesojë një qeveri kujdestare përpara zgjedhjeve, të parashikuara në shtator.

Kurz, 32 vjeç, u bë lider i parë austriak në më shumë se shtatë dekada që u hoq nga pushteti nga ligjvënësit e tjerë.

Video skandali, zëvendëskancelari austriak jep dorëheqjen

Zëvendëskancelari austriak Heinz Christian Strache ka dhënë dorëheqjen një ditë pas publikimit të videos, ku ai përfshihet në një skandal korrupsioni.

Në video, Strache shfaqet duke diskutuar kontrata qeveritare me një investitore të dyshuar ruse në këmbim të mbështetjes në fushatë. Video u publikua nga gazetat gjermane der Spiegel dhe Süddeutsche Zeitung dhe shfaqet Strache dhe Johann Gudenus, politikan i Partisë së Lirisë duke biseduar me një grua e cila prezantohet si mbesa e një oligarku rus. Gruaja ofron të blejë 50 % të gazetës austriake Kronen-Zeitung që të mbështesë Partinë e Lirisë.

Zëvendës kancelari Strache tha se po largohet për të mos dëmtuar më qeverinë, por është viktimë e një sulmi politik.

“Po largohem për të shmangur dëmtimin e mëtejshëm te qeverisë. Jam viktimë e një sulmi politik. Takimi në Ibiza është i vërtetë. Video është regjistruar ilegalisht, por unë nuk kam pranuar asnjëherë donacione nga investitorja ruse apo t’i kem dhënë asaj ndonjë biznes.”- tha Strache