Reforma zgjedhore, Greminger: Ndihmë për dialogun, por nuk marrim vendime

Sekretari i Përgjithshëm i OSBE Thomas Greminger i bëri të qartë të gjitha palëve politike se OSBE mund të ndihmojë në lehtësimin e dialogut mes tyre, por nuk mund të marrë vendime politike. Greminger deklaroi se OSBE mund të jap ndihmën e saj në ekspertizë teknike, lehtësim dialogu apo angazhimet që kanë shtete pjesëmarrëse në këtë organizatë, por nuk mundet kurrsesi të marrë vendime politike apo të vendosë se cili sistem zgjedhor i duhet Shqipërisë. Greminger tha se këtë gjë e ka theksuar edhe në takimet që ka mbajtur me përfaqësuesit politikë.

“OSBE mund të lehtësojë dialogun mes palëve, por nuk mund të marrë vendime politike. U kam thënë të gjitha bashkëbiseduesve të mi se çfarë OSBE mund dhe nuk mund të bëjë. OSBE në thelb mund të bëjë tre gjëra. Ne mund të sjellim ekspertizë teknike, së dyti t’u kujtojmë shteteve anëtare të OSBE angazhimet që kanë shtetet pjesëmarrëse dhe së treti të lehtësojmë dialogun. Këtë mund të bëjmë. Ajo që nuk mund të bëjmë është të marrim vendime politike. Shpresojmë që rekomandimet e ODIHR po merren seriozisht. Ajo që nuk mund të bëjmë është të zgjedhim sistemin që ky vend dëshiron, por mund të sjellim ekspertizë e të lehtësojmë dialogun. Po sigurisht jam i vetëdijshëm që ka dy aspekte. Ajo që konsiderohet si reformë elektorale, ka kundërshti sa i përket rekomandimeve se si duhen implementuar, ka diskutime mbi sistemin elektoral, nuk është në dorën tonë, kjo është në dorën e aktorëve politikë të këtij vendi për të mbështetur procese të tilla”, tha Greminger.

Këto deklarata u bënë gjatë një konference të përbashkët që Greminger mbajti me ministrin e Jashtëm në Detyrë Gent Cakaj. Ministri Cakaj gjatë fjalës së tij nënvizoi se siguria e Europës dhe Mesdheut janë të pandashme dhe se bashkëpunimi me partnerët e Mesdheut dhe OSBE-së duhet të ketë një hapësirë më të madhe dhe më të rëndësishme.

Greminger mbajti më herët edhe një takim edhe me kreun e PD-së Lulzim Basha, i cili i kërkoi OSBE-së rolin e ndërmjetësuesit në dialogun politik me Ramën jashtë parlamentit.

Cakaj: Heqja e pasaportave diplomatike për Kombëtaren, gënjeshtër

Ministri i Jashtëm në detyre, Gent Cakaj ka hedhur poshtë lajmet se futbollistëve të ekipit kombëtar i është hequr pasaporta diplomatike. Cakaj përmes një twitteri ka deklaruar se këto lajme janë një gënjeshtër e madh dhe një lajm i shpërndarë në hava.

“Duke i uruar Kombëtares së Shqipërisë një mbrëmje të suksesshme sonte, informoj se lajmi i shpërndarë në hava, lidhur me heqjen e pasaportave diplomatike të kuqezinjve është fund e krye i gënjeshtërt”- shkruan Cakaj në twitter.

Me një vendim të 12 qershorit 2019, Këshilli i Ministrave miratoi kritere të reja për dhënien dhe mbajtjen e pasaportave diplomatike. Vendimi i ndërmarrë me nismën e ministrit Cakaj, ndryshon kategoritë e personave që kanë të drejtë të pajisen dhe të mbajnë pasaportë diplomatike. Nga lista e re që ka hyrë në fuqi janë hequr edhe kryetarët e partive politike apo ish ministrat, por duket se lajmi nuk është i vërtet për futbollistët e kombëtares.

Cakaj: PD-LSI po pengojnë integrimin, sjellje vandale para zgjedhjeve

Ministri i Jashtëm në detyrë, Gent Cakaj ka akuzuar dy partitë opozitare PD dhe LSI se kanë bërë përpjekje për të penguar integrimin e Shqipërisë në BE. Në një konferencë për mediat, teksa ka komentuar raportin e OSBE/ODIHR për zgjedhjet e 30 qershorit, ministri në detyrë tha se ky raport faktoi se PD dhe LSI patën një sjellje vandale në prag të zgjedhjeve. Cakaj ftoi Bashën ta lexojë drejt raportin dhe të shikojë se ai më së shumti është kritik ndaj opozitës dhe legjitimon 30 qershorin.

“Zgjedhjet e 30 qershorit 2019 nuk kanë qenë vetëm zgjedhje demokratike, por në fakt edhe vendosje e një shembulli të pakthyeshëm historik se duke dëshmuar se qëndrueshmëria institucioneve është me e lartë sesa shuma e interesave partiake. Zgjedhjet e tejkaluan sjelljen e dhunshme. Raporti i OHDIR e cilëson sjelljen e PD dhe LSI, në raport me godinën e Kryeministrisë, si të dhunshme.

Një ditë pas zgjedhjeve më me rëndësi sesa emrat e rinj që janë legjitimuar në këtë proces, ka qenë dëshmia se braktisja e parlamentit nuk mund të përkthehet në avancim institucional. Kësaj radhe kemi pasur shumë më shumë sesa bojkoti nga opozita. Jemi ekspozuar nga një dhunë vandaliste para dhe pas procesit zgjedhor. Këtë e thotë edhe raporti. Madje kemi pasur tentativa për bllokim të procesit të integrimit të Shqipërisë në BE. Tashmë me publikimin e raportit, ekziston një opinion se procesi zgjedhor ka qenë i rregullt”, tha ai.

Më tej, ministri Cakaj iu përgjigj edhe kreut të Partisë Demokratike, Lulzim Basha, i cili tha mbrëmjen e kaluar se raporti i OSBE/ODIHR dëshmoi rrëzimin e shtetit. Cakaj tha se është e rëndësishme që raporti të lexohet në mënyrë të përgjegjshme.

“Mbrëmë dëgjova Bashën që tha se ky raport dëshmoi rrëzimin e shtetit. Është e rëndësishme që leximi i raportit të bëhet në mënyrë kompetente dhe të përgjegjshme .

Gjatë këtyre ditëve është diskutuar mbi përmbajtjen e raportit. Ka ekzistuar një përpjekje për të keqinterpretuar referencat e jashtme. Po shfrytëzohet një raport ndërkombëtar për të legjitimuar një proces të rregullt zgjedhor.

Nuk mund të identifikohet shuma e problemeve jashtë shkaktarëve të tyre. Ky raport është më shumë kritik për opozitën, se sa delegjitimim i procesit zgjedhor. Më duhet të zbërthej disa nga gjetjet kryesore të raportit.

Së pari, raporti sqaron se në Shqipëri më 30 qershor zgjedhjet janë zhvilluar pa një mundësi kuptimplotë të zgjedhjeve midis grupaksioneve. Nuk ka prag minimal për numërimin e votave. Qeveria nuk merr përgjegjësi për garantimin e pjesëmarrjes së opozitës në zgjedhje.

Raporti thekson se klima ka qenë e polarizuar dhe nuk i ka kushtuar vëmendje programeve. Kjo është rrjedhojë e atyre që kanë bojkotuar procesin”, tha Cakaj.

OSBE/ODIHR bëri publik të mërkurën në mbrëmje raportin përfundimtar për zgjedhjet e 30 qershorit ku vërejti se në 95% të qëndrave të votimit, procesi i votimit ishte i rregullt, ndërsa rekomandoi që qeveria dhe opozita të nisin punën për realizimin e reformës zgjedhore./realstory.al

Rekord veprimesh konsullore shqiptare, Cakaj: Është përmirësuar shërbimi

Përmirësimi i shërbimit dhe punimi me kapacitet të plotë të shërbimeve konsullore të Shqipërisë në botë ka dyfishuar numrin e tyre. Ka qenë vetë ministri i jashtëm në detyrë Gent Cakaj, i cili ka bërë një krahasim të shifrave me një vit më parë. Cakaj shkruan se ka ende shumë punë për të bërë, por gjithsesi këto shifra flasin për vullnetin e mirë që kjo ministri po tregon në shërbim të qytetarëve shqiptarë në botë.

“Përgjatë periudhës 1 janar – 21 gusht 2018 në Ministrinë për Evropën dhe Punët e Jashtme janë kryer 246186 shërbime konsullore. Kjo shifër është dyfishuar për të njëjtin hark kohor për 2019 duke ofruar 442054 shërbime konsullore nga Drejtoria e Çështjeve Konsullore. Po ashtu, shërbimi konsullor i Përfaqësive, gjatë periudhës 1 janar – 21 gusht 2018 ka kryer 51 635 dhe gjatë 2019 janë kryer 89 691 janë kryer shërbime konsullore.

Për shkak të vëmendjes së shtuar në përmirësimin e cilësisë të shërbimeve ndaj qytetarëve, puna e MEPJ përgjatë vitit 2019 ka shënuar një shifër rekord në ofrim të shërbimeve konsullore. Kjo shifër përfshin: dhënie vizash, vërtetime në rast humbje dokumentesh, vërtetime identiteti, prokura të posaçme e deklarata noteriale, certifikata familjare e lindje, regjistrime fëmijësh, karta ID dhe pasaporta, mes të tjerash!” shprehet Cakaj në postimin e tij.

Plagoset 25-vjeçari në Tiranë pas një sherri me thika

Një ngjarje e rëndë ka ndodhur të premten në mesditë në rrugën Frosina Plaku në Tiranë ku pas një sherri me thika ka mbetur i plagosur një i ri 25 vjeç.

Mësohet se konflikti të ndodhur mes dy personave ku E.K ka nxjerrë thikën dhe ka qëlluar personin S.GJ.

Ky i fundit është dërguar me urgjencë në spitalin e Traumës në Tiranë dhe ndodhet jashtë rrezikut për jetën. Ndërkohë policia ka shkuar në vendin e ngjarjes dhe po heton për rrethanat e plagosjes si dhe kapjen e autorit E.K.

Mogherini me Cakaj: Shqipëria meriton hapjen e negociatave në qershor

Ministri në Detyrë për Evropën dhe Punët e Jashtme Gent Cakaj, zhvilloi në Bruksel një takim me Përfaqësuesen e Lartë të Bashkimit Evropian Federica Mogherini, ku u diskutua mbi avancimin e procesit të integrimit të vendit tonë pas rekomandimit të Komisionit Evropian për hapjen e bisedimeve për anëtarësim.

Përfaqësuesja e Lartë Mogherini përgëzoi Ministrin Cakaj për përsëritjen e rekomandimit të qartë të Komisionit, duke theksuar se ky është një vlerësim i merituar dhe rezultat i reformave gjithëpërfshirëse të ndërmarra nga vendi ynë, duke veçuar arritjet e prekshme në reformën e drejtësisë dhe luftën kundër korrupsionit dhe krimit të organizuar.

Bashkëbiseduesit ndanë vlerësimin se Shqipëria është e gatshme dhe ka bërë të gjitha detyrat e kërkuara për të hapur negociatat me BE dhe është e nevojshme që Këshilli Evropian të reagojë pozitivisht, në linjë me rekomandimin e Komisionit.

Cakaj takon Jagland: Kemi bërë reforma për integrimin

Ministri në Detyrë për Evropën dhe Punët e Jashtme, Gent Cakaj, zhvilloi një takim me Sekretarin e Përgjithshëm të KiE, Thorbjorn Jagland, në ministerialin e Këshillit të Evropës.

Në këtë takim Cakaj tha se Shqipëria ka bërë një sërë reformash për të merituar integrimin evropian të vendit, ndërsa ka marrë vlerësime nga bashkëbiseduesi.

Me tej të dy bashkëbiseduesit ndanë mendimin se për forcimin e karakterit pan-Evropian të kësaj organizate, për tejkalimin e problematikave institucionale, politike dhe financiare, nevojitet kontributi i përbashkët i të gjitha vendeve anëtare.

Ministri në Detyrë Gent Cakaj i bëri me dije Sekretarit të Përgjithshëm të KiE përfshirjen e Shqipërisë në reforma të brendshme të thella e të rëndësishme në kuadër të forcimit të institucioneve demokratike, sundimit të ligjit, mbrojtjes dhe respektimit të të drejtave të njeriut, për çka ka pasur edhe ndihmën dhe mbështetjen e Këshillit të Evropës.

Gjithashtu Ministri në Detyrë Cakaj e informoi mbi punën që po bëhet nga qeveria shqiptare për realizimin e disa objektivave dhe prioriteteve të politikës së jashtme siç janë integrimi evropian, kryesia e OSBE-së 2020 dhe marrja e një vendi jo permanent në Këshillin e Sigurimit.

Duke iu referuar kontributit që Këshilli i Evropës jep në rajonin e Ballkanit, ku Sekretari i Përgjithshëm Jagland ka pasur një rol të veçantë, Ministri në Detyrë Gent Cakaj i bëri me dije bashkëbiseduesit të tij se anëtarësimi i Kosovës në këtë organizatë i shërben mbrojtjes së vlerave të organizatës, zhvillimit të standardeve lidhur me të drejtat themelore dhe përbën një vlerë të shtuar për organizatën në terësi.

Sekretari i Përgjithshëm i Këshillit të Evropës, Jagland, mbyll mandatin e tij të dytë në vjeshtën e këtij viti, për çka Ministri në Detyrë Cakaj e falënderoi për kontributin e dhënë në drejtimin e organizatës dhe tejkalimin e problematikave dhe sfidave me të cilat ajo përballet nëpërmjet politikave reformuese.

Sekretari i Përgjithshëm e falënderoi Ministrin në Detyrë Cakaj për rolin pozitiv që vendi ynë ka luajtur, vlerësimet mbi raportin e tij rreth sfidave të ardhshme të Këshillit si dhe e përgëzoi për reformat e ndërmarra nga vendi ynë.