Diaspora bavareze letër Bashës: Luftoni në parlament jo në rrugë, të mos i kthehemi ’97-ës

Diaspora bavareze i ka drejtuar kreut të PD, Lulzim Basha një letër u kërkohet distancimi i tyre nga dhuna në protesta, pasi kjo po prish imazhin e vendit dhe dëmton ekonominë, ku shumë turistë kanë tërhequr rezervimet e tyre për të kaluar pushimet.

Në letër cilësohet se opozita e ka detyrim ligjor dhe moral të ndikojë në një imazh pozitiv të Shqipërisë dhe të angazhohen në frymën e Partive Popullore Europiane, familje së cilës i takon edhe Partia Demokratike. “Protestat janë mjeti me demokratik, nëse ato janë paqësore. Protesta e dhunshme ngjajnë më shumë me farkistët ultra-socialist me fytyra të mbështjella, që nuk i takojnë familjeve të PPE.” shkruhet në letër.

Diaspora bavareze thekson se “populli shqiptar nuk duhet të ripërjetojë vitet e ’97-ës, sepse kjo politikë është vetë-izoluese që Shqipëria nuk e meriton. Populli ju ka zgjedhur që të luftoni në Parlament e jo në rrugë’

Gjithashtu në letër bëhet thirrje që qeveria dhe opozita të ulen në tryezën e dialogut për të mirën e Shqipërisë.

Letra e Plotë

Kur shteti rrezikohet duhet të veprojmë mençurisht të gjithë, ndërsa ju si opozitarë keni edhe obligim jo vetëm ligjor por edhe moral të ndikoni pozitivisht që Shqipëria të fitojë në imazh. Ne, bizneset bavareze të mbledhur rreth fondacionit Besa kërkojmë nga ju që në mënyrë imediate të ndikoni tek simpatizantët e juaj të cilët nuk janë të pakët, të angazhoheni në frymën e Partive Popullore Europiane, familje së cilës i takon edhe Partia Demokratike.

Disa nga bizneset tona punojnë me vite te tëra suksesshëm ne dikasterin e turizmit dhe Hotelerisë prandaj kemi arsye të fortë të ju shkruajmë këtë Letër. Disa klientë, të cilët me shumë angazhim janë bindur që të vizitohet Shqipëria, pasi kanë prenotuar plazhin e Dhërmiut, kanë kërkuar të tërhiqen këto prenotime, po deshët do të ju argumentojmë edhe me dokumente.

Protestat janë mjeti me demokratik gjë që praktikohen edhe në Gjermani, mirëpo nëse ato janë paqësore. Protesta e sotme ngjante më shumë me Farkistët ultra-socialist me fytyra të mbështjella.

Këto lloj protestash nuk i takojnë familjeve të partive popullore europiane.

Jemi duke vëzhguar situatën edhe me miq gjerman dhe parlamentar europian. Nuk duam që populli shqiptar të ripërjetojë vitet e ’97-ës, sepse kjo politikë është vetë-izoluese që nuk e meriton Shqipëria.

Shumica e biznesmenëve u takojnë Partive që bëjnë pjesë në Partitë Popullore Evropiane dhe realisht jemi një familje me PD, prandaj si kolegë me të njëjtin drejtim politik ju drejtohemi shumë miqësisht. Njerëzit me fytyra të fshehura që gjuajnë fishekzjarrë nuk mund t’i takojnë familjes së Partive Konservatore.

Trimëri në paqe është forcimi edhe dëgjimi i miqve dhe aleatëve që mbështetën Shqipërinë në rrugën europiane. Trimëri dhe patriotizëm është forcimi i ekonomisë, dhe ofrimi i një alternative konkurruese por në institucione siç është Parlamenti.

Populli ju ka zgjedhur që në Parlament të luftoni e jo në rrugë. Keto janë rregullat e demokracisë për të cilën u sakrifikuan qindra e mijëra shqiptarë, pjesë e së cilës jeni edhe ju. Edhe z. Rama gjithashtu i apelojmë që të uleni me opozitën dhe të merreni vesh për Shqipërinë europiane, gjithçka është e mundur ne qoftë se e doni Shqipërinë. Në diasporë nga Bavaria u jemi në dispozicion vëllazërisht të ju mbështesim pa kushte, vetëm që Shqipëria të përparojë sepse nëse Shqipëria është e fortë është edhe Kosova.

Ne emër të bizneseve Kosovaro-Bavareze Besa foundation. Ilir Seferi /Nënkryetar dhe zëdhënës.

Euractiv: Kriza politike kërcënim për vendimin e BE javën tjetër për Shqipërinë

Mediat ndërkombëtare kanë pasqyruar protestën e së dieles të opozitës duke vënë theksin te dhuna dhe te ndikimi që ajo ka në aspiratën e shqiptarëve për t’iu bashkuar BE-së.

Në një artikull për Shqipërinë, euractiv.com shkruan se “kriza politike shihet si kërcënim për ëndrrën e Tiranës që t’i bashkohet BE-së. Vendet anëtare do të vendosin javët e ardhshme nëse do të çelen negociatat me shtetin Ballkanik. Zhvillimet mund të jenë gjithashtu të dëmshme për Maqedoninë e Veriut, pasi procesi i vendimmarrjes ka të bëjë edhe me fqinjët”.

Më tej në artikull shkruhet se në protestën e së dielës të opozitës u plagosën 10 efektivë policie.

“Protestuesit dolën në rrugë duke kërkuar dorëheqjen e kryeministrit Rama që e akuzojnë për lidhje me krimin dhe korrupsionin në vend.

Pavarësisht kërkesave të policisë për të mos sulmuar policinë, protestuesit hodhën fishekzjarre, bomba Molotov dhe gurë në drejtim të policisë dhe institucioneve. Ambasada amerikane dënoi dhunën nga protestuesit duke thënë se përdorimi i mjeteve piroteknike, sidomos në sulm ndaj policisë është e papranueshme dhe jodemokratike”, shkruan ndër të tjera euractiv.com.

Protesta, ambasada e Britanisë: Mbështesim protestën paqësore, jo dhunën

Ambasada e Britanisë në Tiranë, ka qenë ndër të parat seli diplomatike që ka reaguar për protestën e shtatë kombëtare, të mbajtur pasditen e të dielës nga opozita. Ambasada Britanik thekson se mbështet të drejtën për të protestuar paqësisht, por bën apel se nuk ka vend për dhunë dhe mjete shpërthyese në protestë.

“Mbretëria e Bashkuar mbështet të drejtën për të protestuar në mënyrë paqësore. Nuk ka vend për dhunë dhe mjete shpërthyese në protestë paqësore”, shkruhet në deklaratën e ambasadës së Britanisë në Tiranë.

Më tej, tej në deklaratën e publikuar në faqen zyrtare në rrjetet sociale, ambasada e vendit ishullor, i kujton drejtuesëve të opozitës se kanë përgjegjësinë për të zhvilluar protesta të qeta dhe paqësore.

“Liderit e protestës kanë përgjegjësinë të zhvillojnë protestë të qetë dhe të ligjshme, ndërsa policia ka për detyrë të përgjigjet propocionalisht dhe për të ruajtur rendin. Për të mirën e kujtdo, protesta e sigurtë dhe paqësore duhet të jetë prioritet”, përfundon deklarata.

Reporterët pa Kufij apel Shqipërisë të mbrojë gazetarët nga dhuna në protestat e opozitës

Reporterët pa Kufij (RSF) u bëjnë thirrje autoriteteve shqiptare të mbrojnë gazetarët, të cilët kanë qenë vazhdimisht në mesin e viktimave të dhunës së rëndë gjatë katër muajve të fundit të demonstrimeve të opozitës që bën thirrje për largimin e Kryeministrit Edi Rama për shkak të dyshimit për korrupsion.

Çdo javë, gazetarët që mbulojnë protestat kanë marrë plagë të rënda. RSF ka mësuar se së paku katër gazetarë ishin viktima të akteve të agresionit nga demonstruesit gjatë fundjavës së dhunshme të 11-12 majit, kur protestat kishin në shënjestër zyrën e kryeministrit.

Mateo Brahja nga ABC News u sulmua nga protestuesit e zemëruar që i penguan ata të filmonin dhe thyen pajisjet. Ndërsa gazetari Arsen Rusta raportoi se ishte objekt i kërcënimeve serioze.

“Ne dënojmë klimën e tanishme të frikësimit dhe dhunës ndaj gazetarëve dhe u bëjmë thirrje autoriteteve që të marrin masa të menjëhershme në mënyrë që sulmet të ndalen”, tha Pauline Adès-Mével, kryetarja e tryezës së Unionit Evropian të RSF dhe Ballkanit

“Kjo dhunë dhe retorika anti-media e politikanëve të caktuar duhet të dënohen plotësisht për hir të reformave demokratike të Shqipërisë dhe perspektivave të progresit në përpjekjen e saj për t’u bashkuar me Bashkimin Evropian. Duke pasur parasysh situatën aktuale politike dhe zhvillimin e zgjedhjeve lokale më 30 qershor, ne jemi të shqetësuar se incidentet e mëtejshme mund të dëmtojnë imazhin e Shqipërisë dhe procesin e pranimit në BE “.

RSF është shqetësuar për nivelin e dhunës që nga fillimi i protestave. Dy gazetarë, Isa Myzyraj nga Ora News TV dhe Marsela Karapanço nga A2 News CNN Albania, kanë marrë shërbim spitalor më 16 shkurt pas protestës së opozitës.

RSF gjithashtu dënoi plagët e marra nga dy gazetarë, Eliza Gjediku e TV Tema dhe gazetari freelance Arben Dajçi, gjatë demonstratave të opozitës në Tiranë më 13 prill.

Mes kaosit në rritje, niveli i mosbesimit ndaj mediave po arrin nivele të pashembullta dhe disa gazetare kanë raportuar se janë objektiva të sulmeve të pështira.

Gazetarja e TV Klan Ola Xama tha se ajo ishte sulmuar verbalisht dhe fizikisht nga një anëtar i Gardës në parlamentin shqiptar, ndërsa Enkelejda Mema, një gazetare me të njëjtin kanal televiziv, tha se ajo kishte marrë fyerje seksiste nga kryetari i Akademisë së shkencave Skënder Gjinushi më 25 maj.

Shqipëria renditet e 82 nga 180 vende në Indeksin Botëror të Lirisë së Shtypit të RSF në 2019./Shkrim i përkthyer nga Reporterët pa kufij. Shkrimin e plotë e lexoni në linkun më poshtë:

Deklarata e plote e RPK

Opozita në shesh, Ambasada Amerikane: Larg dhunës, ose do mbani përgjegjësi

Ambasada Amerikane u bën thirrje qytetarëve ashtu edhe forcave ligjzbatuese që të përmbahen duke qëndruar larg dhunës gjatë protestës së sotme. Ambasada e SHBA-së i ka quajtur hedhjen e bombave molotov, gurëve dhe përplasje fizike të paligjshme dhe që nuk kanë vend në demokraci. Ambasada e përmbyll deklaratën me thirrjen e palëve që të përfshihen në dialog konstruktiv.

“Shtetet e Bashkuara respektojnë të drejtën demokratike të qytetarëve për të protestuar në mënyrë paqësore. Ju bëjmë thirrje të gjithë pjesëmarrësve në protestën e sotme – si qytetarëve ashtu edhe forcave ligjzbatuese – që të përmbahen duke qëndruar larg dhunës. Nxitja e përplasjeve fizike apo hedhja e mjeteve plasëse, bombave molotov dhe gurëve, është jodemokratike dhe e paligjshme. Ata që përfshihen në akte dhune kryejnë një krim dhe duhen vënë përpara përgjegjësisë. Shtetet e Bashkuara nxisin të gjitha palët të tregojnë vetëpërmbajtje, të refuzojnë dhunën dhe të përfshihen në një dialog konstruktiv.”

🇦🇱️ | Shtetet e Bashkuara respektojnë të drejtën demokratike të qytetarëve për të protestuar në mënyrë paqësore. Ju…
Gepostet von U.S. Embassy-Tirana am Samstag, 25. Mai 2019

Kryemadhi ndryshon qëndrim 24 orë para protestës: Distancohemi nga dhuna

“Protestat tona paqësore janë protestat që do sjellin ndryshimin. Ju bëj thirrje të distancoheni nga dhuna edhe pse njerëzve ju ka ardhur aty ku nuk mban më.” – ka thënë Kryemadhi gjatë një takimi me strukturat e LSI-së në njësinë bashkiake nr. 11.

Një ditë para protestës Kryemadhi ka zbutur tonet duke i kërkuar qytetarëve të shmangin dhunë dhe të mblidhen ditën e shtunë të protestojnë për të sjellë ndryshimin që kërkojnë. Detyra jonë është të rrëzojmë sistemin dhe jo të merremi me godinat.

“Nesër t’i themi boll regjimit diktatorial. Është një nga protestat më të mëdha. Edhe pse është muaji i Ramazanit dhe shumë shqiptarët agjërojnë ua bëftë dritë dhe të na i falë mëkatet. Do tregojmë çdo gjë që ka të bëjë me të ardhmen e fëmijëve tanë, do jemi në ballë të çdo proteste. Beteja jonë është e ardhmja e fëmijëve shqiptarë, që të hapim negociatat me BE. Nesër mos ndaloni, i bëj thirrje gjithë Shqipërisë, protestat tona paqësore janë protestat që do sjellin ndryshimin. Ju bëj thirrje të distancoheni nga dhuna edhe pse njerëzve ju ka ardhur aty ku nuk mban më. Detyra jonë është të rrëzojmë sistemin, jo të sulmojmë godinat.” – tha Kryemadhi

Ambasada Amerikane paralajmëron qytetarët: Kujdes, në protestën e kaluar ka pasur dhunë

Ambasada Amerikane ka paralajmëruar qytetarët e saj në lidhje me protestën që opozita do të mbajë më 25 maj.

Ambasada cilëson në lajmërim se protesta do të nis në orën 19:00 por nuk dihet se sa do të zgjasë. Duke pasur parasysh dhunën e përdorur në protestën e kaluar, njoftojmë qytetarët që të tregojnë kujdes.

“Një demonstratë pritet të zhvillohet para Kryeministrisë. Grupi i demonstruesve mund të protestojnë në disa pika. Nuk dihet orari i përfundimit të demonstratës. Në demonstratat e mëparshme ka pasur dhunë. ‘Policia ka përdorur ujë dhe gaz lotsjellës për të zmbrapsur turmën”, shkruan Ambasada.

“Nuk thyem asnjë xham”, Lëvizja Studentore distancohet nga protesta

Lëvizja studentore ka reaguar në lidhje me protestën e sotme të studentëve duke u distancuar nga dhuna që u përdor. Në deklaratën e saj, Lëvizja Studentore thekson se protesta e dhjetorit ishte krijimtari konstruktive, pa qenë nevoja të thyhej asnjë xham dhe të përdorej dhunë e verbër.

“Protesta e studentëve në dhjetor 2018 ishte një ngjarje historike për Shqipërinë.

Protesta e studentëve në dhjetor 2018 ishte preludi i bojkotit mbarëuniversitar në janar që i ndau studentët dhe pedagogët në dysh; nga njëra anë subjekte emancipues dhe nga tjetra shërbëtorë të pushtetit.

Protesta e studentëve në dhjetor 2018 ishte krijimtari konstruktive, jo dhunë e verbër dhe vulgare; ishte thyerje e hegjemonisë shurdh-memece të pushtetit pa qenë nevoja të thyhej asnjë xham.

Protesta e studentëve në dhjetor 2018 ishte refuzim i katërҫiptë i llumit tre-partiak të politikës nëpërmjet kërkesave thellësisht politike.

Protesta e studentëve në dhjetor 2018 ishte anti-sistemore përmes kerkesave brenda-universitare, sepse ky sistem politik nuk mund të bashkëjetojë me arsimin publik cilësor dhe falas për të gjithë.

Protesta e studentëve në dhjetor 2018 ishte ndërhyrje demokratike në sferën universitare dhe sociale. Anulimi i ligjit në arsim ngelet parakushti për një proces demokratik reformimi të universitetit, jo preteksi për rotacion pushtetor shterp.

Protesta e studentëve në dhjetor 2018 është frymëzimi për organizim dhe koordinim edhe më të fuqishëm në të ardhmen, përmes njohjes së problematikave studentore dhe gjithëpërfshirjes universitare në përpjekjet që do të vijnë.

Për Universitetin, Për Shoqërinë!”, thuhet në reagimin e Lëvizjes Studentore.

Bosch mesazh opozitës: Punoni për Shqipërinë, jo për veten

“Ju lutem, punoni për Shqipërinë, jo për veten tuaj” ka deklaruar ish-ambasadori i OSBE në Shqipëri, Robert Bosch.

Në një kërkesë drejtuar opozitës, por edhe politikanëve shqiptarë, Bosch ka kërkuar që të fokusohen më shumë në integrimin e vendit dhe interesat e popullit dhe jo për interesat e tyre personal.

“Ka diçka që dua t’ia them të gjithë politikanëve apo liderëve shqiptarë. Ju lutem, punoni për Shqipërinë, jo për veten tuaj. Mos punoni për partinë tuaj, por punoni për Shqipërinë dhe për shqiptarët. Kujdesuni për vendin dhe jo për veten tuaj apo për interesat e partisë suaj. Vetëm nëse partia ka qëllim interesat e popullit ecni përpara në integrimin evropian. Kjo bëhet duke punuar së bashku dhe jo kundër njëri-tjetrit. – tha Bosch

Këto deklarata Bosch i bëri pas një takimi që zhvilloi me kreun e Kuvendit Gramoz Ruçi dhe kreun e grupit parlamentar Taulant Balla.

Gjithashtu ai tha se Holanda duhet të njoh hapjen e negociatave për Shqipërinë, por protestat e dhunshme po sjellin sinjale negative.

Basha për BBC Wolrd: PD dënon dhunën, por ajo tregon zemërimin e popullit

Kryetari i Partisë Demokratike, Lulzim Basha ka zhvilluar një intervistë për BBC World, gjatë vizitës së tij në Londër.

Basha tha se PD ka bërë gjithmonë thirrje për protesta jo të dhunshme dhe është distancuar nga ajo, por dhuna e përdorur në protesta tregon zemërimin në rritje të popullit gjatë qeverisë. Basha tha se qeveria është kapur në dy përgjime ku akuzohet për shit-blerje votash në 2017 dhe askush nuk është dënuar. Protestat janë pasojë e kësaj krize politike në vend.

Lexoni intervistën e plotë të Bashës për BBC World:

BBC WORLD: Gjatë 3 muajve të fundit në Shqipëri janë zhvilluar protesta antiqeveritare, me protestues që bëjnë thirrje për dorëheqjen e qeverisë dhe për mbajtjen e zgjedhjeve të parakohshme. Ka patur edhe dhunë fundjavën e shkuar, ku mijëra protestues, që mbështesin PD në opozitë, dolën në rrugët e kryeqytetit shqiptar, Tiranës. Zyrat e kryeministrit u goditën me bomba benzine, duke nxitur thirrjet për qetësi të disa vendeve të BE-së dhe SHBA. Në krye të këtyre protestave është lideri i Partisë Demokratike në opozitë, Lulzim Basha, i cili ka shërbyer si Ministër i Jashtëm dhe Ministër i Brendshëm në qeveritë e mëparshme të drejtuara nga PD. Unë e nisa bisedën me të duke e pyetur, nëse e dënon dhunën e ndodhur.

LULZIM BASHA: Absolutisht. PD ka bërë gjithmonë thirrje për protesta jo të dhunshme. Është distancuar dhe do të distancohet gjithmonë nga dhuna. Megjithatë, duhet kuptuar se dhuna e izoluar që, falë Zotit, nuk shkaktoi viktima – asnjë person i vetëm nuk u plagos, asnjë polic nuk u lëndua – është shprehje e zemërimit në rritje. Këto protesta janë pasojë e një krize që ka shpërthyer me të gjithë fuqinë gjatë 4 muajve të fundit: krizë kushtetuese, krizë politike dhe pasojat e saj ekonomike e sociale.

Çfarë duhet të ndodhë me ata që janë përgjegjës për dhunën?
Siç e thashë, falë Zotit, asnjë polic i vetëm nuk u lëndua. Por numri 3 i PD-së u dhunua brutalisht dhe dhunshëm nga policia. Media ishte në gjendje ta filmonte këtë episod dhe ta transmetonte live. Në vend që këta policë të përballen me përgjegjësitë e tyre, sipas ligjit, ata janë marrë personalisht nën mbrojtje nga kryeministri.

Qeveria i mohon akuzat tuaja, por në një këndvështrim më të gjerë, ju keni qenë vetë në qeveri dhe tani jeni në opozitë. Ju e dini se akuzat për korrupsion bëhen sa nga njëra palë dhe nga pala tjetër. Akuzat nga opozita, kushdo qoftë ajo, mohohen nga qeveria kushdo qoftë ajo. Kjo është pjesë e politikës në vendin tuaj, apo jo?
Ky nuk është rasti tani.

Pse është ndryshe tani?
Dy raste të hetimit nga prokurorët antimafia kanë zbuluar mijëra orë përgjime, që tregojnë se kryeministri dhe zyrtarë të lartë të qeverisë bashkëpunojnë me bosët e krimit të organizuar për vjedhjen e zgjedhjeve të vitit 2017. Disa nga këto përgjime janë publikuar nga Zëri i Amerikës dhe dy ditë më parë nga gazeta më e madhe gjermane Bild. Nuk ka absolutisht asnjë veprim në lidhje me këto akuza. Asnjë politikan nuk është thirrur për t’u marrë në pyetje dhe politikanët e përfshirë jo vetëm nuk janë ndëshkuar, por janë promovuar dhe janë mbrojtur nga kryeministri.

Ta shohim në një panoramë më të gjerë. Këtë qershor Shqipëria pret një përgjigje nga BE, nëse do të nisin negociatat për anëtarësim. Sa dëm mund t’i shkaktojë procesit e gjithë kjo?
Protestat janë pasojë e krizës së thellë politike në vend. Kështu që, pavarësisht, raporteve të sheqerosura…

Çfarë do të thotë të sheqerosura?
Shumë larg realitetit.

Për çfarë arsye?
Shqipëria duhet t’i bashkohet Bashkimit Europian, Shqipëria duhet të hapë negociatat e anëtarësimit. Kjo është ajo për të cilën ne po luftojmë, për vlerat europiane, por Shqipëria nuk mund t’i bashkohet BE-së me gënjeshtra, me fabrikime, me zgjedhje të vjedhura, me bashkëpunim me krimin e organizuar, me korrupsionin në nivelet më të larta të këtyre 29 viteve, me pandëshkueshmërinë e njerëzve me pushtet.

Pra, çfarë duhet të thotë dhe të bëjë BE në takimin e qershorit sipas jush?
Mendoj se në këtë pikë gjërat janë shumë të qarta. Bashkimi Europian është ekstremisht i shqetësuar se realiteti në terren është shumë larg nga përshkrimet e burokratëve në Bruksel. Kjo duhet të jetë edhe një kambanë alarmi për vetë institucionet e Bashkimit Europian, që t’i japin fund gjuhës së drunjtë se “shumë është bërë, por nevojitet dhe shumë për të bërë” dhe të përqendrohen nē problemet e vërteta, me të cilat përballet vendi.

Por kjo mund të çonte në një shtyrje të asaj çfarë planifikon BE. A nuk do të sillte shtyrja një dëm të madh për vendin?
Për fat të keq, shtyrja, pak a shumë është vendosur. Vende anëtare kanë dalë në përfundimin se progresi i Shqipërisë drejt përmbushjes së kushteve për hapjen e negociatave të anëtarësimit është i pamjaftueshëm. Pyetja shtrohet: çfarë vjen pas kësaj? Problemi më i madh është sesi të kapërcehet kjo krizë e thellë, e cila tani po shpërthen me zemërim nëpër rrugë dhe sheshe.