Përplaset për vdekje 14-vjeçari në Fier, autori largohet nga vendngjarja

Një 14-vjeçar ka humbur jetën, si pasojë e një aksidenti në Fier. Ngjarja e rëndë ka ndodhur në vendin e quajtur “Fermë Çlirim”, ku adoleshenti ishte duke ecur në këmbë anës rrugës së bashku me nënën e tij, ndërkohë që makina ka ardhur dhe i ka marrë para.

Aksidenti i ka shkaktuar 14-vjeçarit vdekjen e menjëhershme, ndërsa ka lënë të plagosur nënë e tij M.B 36-vjeç, e cila është dërguar në spital.

Drejtuesi i mjetit tip ‘Volkswagen’ që ka shkaktuar këtë aksident të rëndë është 20-vjeçar R.S banues në Dërmenas, i cili është larguar menjëherë nga vendi i ngjarjes. Pas hetimeve policia bëri të mundur kapjen e tij dhe po punon për zbardhjen e plotë të ngjarjes.

Era e rëndë i çon policinë te dera, gjendet i vdekur i moshuari në Fier

Një 89-vjeçar nga Fieri, është gjetur i vdekur në banesën e tij. Shtetasi Bajram Brataj, 89 vjeç, është gjetur pa shenja jete nga policia, e cila u lajmërua nga banorët e pallatit, pasi prej banesës së tij vinte një erë shumë e rëndë.

Viktima dyshohet se ka humbur jetën prej disa ditësh, ndërsa u zbulua vetëm ditën e shtunë, pasi trupi i tij kishte filluar të dekompozohej dhe të lëshonte erë.

Sipas hetimeve paraprake dyshohet se 89-vjeçari ka humbur jetën për shkaqe natyrale, pasi nuk ka shenja dhune në trup.

Ngjarja e rëndë ka ndodhur në lagjen “Apollonia” të Fierit, në katin e tretë të një pallati ku i moshuari jetonte i vetëm. Trupi i pajetë është gjetur nga shërbimet zjarrfikëse, të cilët kanë mundur të hyjnë nga dritaret e banesës, pasi dera qëndronte e mbyllur.

Përplas për vdekje motoristin, largohet nga vendngjarja shoferi i Benzit

Një aksident me pasojë vdekje ka ndodhur mesditën e së shtunës në autostradë Levan- Tepelenë, në afërsi të fshatit Çerven. Një makinë e tipit Benz ka përplasur për vdekje drejtuesin e motorit.

Një automjet tip “Mercedes” me traga FR 0790P është përplasur me një motor me targa greke, ku ka humbur jetën drejtuesi i këtij të fundit. “Mercedezi” ka përfunduar në kanal, ndërsa drejtuesi i tij është larguar nga vendi i ngjarjes

Policia e ka identifikuar shtetasin me inicialet K.Z dhe është vënë në kërkim të tij. Ndërsa grupi hetimor po punon të zbuluar identitetin e viktimës.

Shkelën sigurinë ushqimore, AKU u vë kyçin tre restoranteve në Fier e Durrës

Autoriteti Kombëtar i Ushqimit ka goditur disa raste të tjera, të bizneseve që vepronin në kushte të jashtëligjshme dhe në shkelje të kushteve hijeno-sanitare. Sipas një njoftimi publik, AKU njofton se ka gjobitur dhe bllokuar aktivitetin e disa subjekteve, pasi janë kapur në shkelje të rënda ligjore. Kështu, sipas AKU, në Lushnje është gjobitur një biznes, “Magazinë ushqimore me shumicë”, e cila ushtronte aktivitetin pa licencën përkatëse, dhe për më tepër, në këtë magazinë janë gjetur produkte të skaduara, si: çajra, kotej, biskota, akullore, amareta etj.

Ndaj këtij subjekti është vendosur një gjobë me vlerë 2.6 milion lekë, ndërsa është ndërprerë aktiviteti deri në plotësimin e kushteve. Në qytetin e Fierit, sipas AKU, i është ndërprerë aktiviteti subjektit “Dorjan Gjoka”, që kishte një restorant pa pasur liçencën përkatëase. Veç ndalimit të aktivitetit, ndaj këtij subjekti është vendosur dhe një gjobë prej 1.5 milion lekësh.

Po në qytetin e Fierit, për të njëjtat arsye si personit subjektit të mësipërm, i është ndërprerë aktiviteti dhe gjobitur me 1.5 milion lekë gjobë, shtetasit Artur Bocova. Ndërkohë, në qytetin e Durrësit, shtetasit Shpëtim Turku, AKU i ka bllokuar aktivitetin e restorantit të tij, pasi nuk përmbushte kushtet hijeno-sanitare. Ndaj këtij subjekti është vendosur edhe një gjobë prej 600 mijë lekësh. Sipas AKU, këto mjasa kanë ardhur në kuadër të rritjes së sigurisë ushqimore gjatë sezonit turistik në vend.

I bllokoi rrugën autobusi, gjuan në ajër me armë, policia e shpall në kërkim

Një person ka gjuajtur me armë zjarri në ajër në fshatin Topojë të Fierit, pas një debati verbal që ka pasur me një shofer autobusi. Mësohet se ngjarja ka ndodhur pasditen e të martës rreth orës 18:30, kur një autobus ka qëndruar në rrugë.

Shoferi i një mjeti tjetër i ka kërkuar drejtuesit të autobusit të hap rrugën, duke zhvilluar një debat për disa çaste me të. Pas debatit, shoferi i mjetit privat, ka hyrë në makinë ka marrë një armë zjarri dhe ka qëlluar në ajër.

Fatmirësisht nga ngjarja nuk ka pasur të plagosur, ndërkohë që është lajmëruar policia. Sipas informacionit paraprak shpërndarë për mediat, policia e Fierit ka identifikuar autorin dhe e ka shpallur në kërkim. Grupi hetimor, sipas uniformave Blu po vijon punën për zbardhjen dhe sqarimin e rrethanave të ngjarjes.

U gjet i vrarë në kanal, 23 vjeçari i arrestuar më parë për vjedhje makine

Detaje të reja janë zbardhur në lidhje me vrasjen e 23 vjeçarit Florian Selimaj i cili u gjet në një kanal në vendin e quajtur “Kthesa e Hamilit” në fshatin Sulaj të Fierit.

Policia njoftoi më herët se i riu ka ndërruar jetë si pasojë e plagës së marrë me thikë gjatë një konflikti me persona ende të paidentifikuar.

Në vendin ku është gjetur trupi i tij i pajetë është gjetur edhe një makinë me kofano të hapur edhe goma të hequra. Dyshohet se i riu ka qenë duke rregulluar makinën që kishte pësuar defekte dhe është sulmuar me thika nga persona ende të paidentifikuar. Pasi është plagosur me thikë trupi i tij është hedhur në një kanal aty pranë.

Policia njofton se 23 vjeçari është arrestuar në vitin 2015 për vjedhjen e një makine, të cilën me pas e ka djegur në rrethana të paqarta.

Ende nuk dihet nëse vrasja e tij të hënën lidhet me ngjarjen e arrestimit të tij nga policia katër vite më parë.

VRITET ME THIKË DHE HIDHET NË KANAL, 23-VJEÇARI NË FIER

Vritet me thikë dhe hidhet në kanal, 23-vjeçari në Fier

Një ngjarje e rëndë ka ndodhur mëngjesin e së hënës në vendin e quajtur “Kthesa e Hamilit”, ku policia e Fierit ka gjetur të hedhur në kanal trupin e pajetë të një 23-vjeçari.

Nga këqyrja paraprake duket se 23 vjeçari ka shenja plagësh në trup të shkaktuara nga goditja me thikë.

Ai është gjendur i vdekur rreth orës 07:00 të mëngjesit të së hënës.

“Shtetasi F.S, (Florian Selimi) 23 vjeç dyshohet se ka ndërruar jetë si pasojë e plagës së marrë nga goditja me një mjet të mprehtë (thikë), dyshohet gjatë një konflikti”- njofton policia.

Pranë vendit të ngjarjes është gjetur një makinë me kofano të hapur dhe më njërën nga gomat të hequr. Ende nuk dihet se kujt i përket makina, ndërkohë që grupi hetimor po punon për zbardhjen dhe dokumentimin e kësaj ngjarje.

Policia ka shoqëruar disa persona dhe po vijon puna për identifikimin dhe kapjen e autorit.

Fier, zbulohen dy raste kultivimi lënde narkotike, një i arrestuar

Policia e Fierit në vijim të aksionit të saj për të goditur trafikun e drogës, ka zbuluar dy raste dhe ka vënë në pranga një person. Gjatë kontrollit në fshatin Libofshë, policia arrestoi shtetasin me iniciale E.M., 43 vjeç, pasi në banesën e tij kishte kultivuar fidanë kanabis sativa, të cilat u asgjësuan nga efektivët blu. Një tjetër rast kultivimi lëndë narkotike u zbulua edhe në fshatin Cakran, ndërsa po punohet për të zbuluar autorin e tyre.

Materialet i kaluan Prokurorisë pranë Gjykatës së Shkallës së Parë Fier për veprën penale “Kultivimi i bimëve narkotike” dhe po punohet për dokumentimin ligjor të veprës penale.

U kap duke vjedhur në një qendër tregtare, i dalin në shesh vepra të tjera penale

Një person është arrestuar pasi u kap duke vjedhur në një qendër tregtare në Fier. Mirëpo arrestimi i tij i ka zbardhur edhe disa vjedhje të tjera të kryera më herët.

Në pranga ka rënë shtetasi me iniciale F.G., 31 vjeç, i cili u arrestuar në flagrancë nga policia e Fierit duke vjedhur rroba në një qendër tregtare. Pas hetimeve të policisë në fakt rezultoi se ky person kërkohej edhe për kryerjen e të paktën 3 vjedhjeve të tjera kohët e fundit.

31-vjeçari riu është autor i dyshuar edhe i disa vjedhjeve të tjera, konkretisht:

-Në datë 04.07.2019 dyshohet se ka vjedhur disa metra kabëll elektrik në lagjen “Kryengritja”.

-Në datë 07.07.2019 dyshohet se ka vjedhur disa metra kabëll elektrik në lagjen “8 Shkurti”.

-Në datë 09.07.2019 dyshohet se ka vjedhur disa metra kabëll elektrik në qytetin e Fierit.

Materialet i kaluan Prokurorisë pranë Gjykatës Shkallës së Parë Fier për veprime të mëtejshme proceduriale.

Betohet Subashi në Fier, Gramoz Ruçi i pranishëm në mbledhjen e Këshillit Bashkiak

Armando Subashi është betuar në nisje të një mandati të dytë në drejtimin e bashkisë së Fierit, ndërsa mëngjesin e së hënës ka zhvilluar mbledhjen e parë Këshilli i ri bashkiak i dalë nga zgjedhjet e 30 qershorit, ku përballë kandidatit socialist nuk pati asnjë rival tjetër. I pranishëm në këtë mbledhje ka qenë kryetari i Kuvendit, Gramoz Ruçi, në rolin e deputetit të PS-së të zgjedhor në qarkun e Fierit por edhe si koordinator i kësaj partie në këtë zonë.

Në mbledhjen e parë të këshillit bashkiak të Foerot kanë marrë mandatet 51 këshilltarë, nga të cilët 48 i përkasin PS-së, 2 anëtarë Demokracisë Sociale dhe një këshilltar nga Partia Social Demokrate.

Këshilli i Bashkisë nis legjislaturën e re me një shtesë të numrit të anëtarëve të këshillit me gati 10 anëtarë më shumë. Nga 41 anëtarë që kishte më parë këshilli i Bashkisë Fier sot ka 51 anëtarë.

Mbledhja e Këshillit të ri bashkiak në Fier u zhvillua në mënyrë të qetë dhe krejt ndryshe nga situata në Devoll, ku militantët e PD-së krijon tension dhe kundërshtuan marrjen e detyrës nga kryebashkiaku i ri.

Ish kryebashkiaku demokrat në Devoll, i cili nuk mori pjesë në zgjedhjet e 30 qershorit vazhdon të deklarojë se zyra e kryetarit të bashkisë i përket atij, ndërkohë që KQZ certifikojë të shtunën rezultatin përfundimtar të zgjedhjeve, të cilat janë njohur zyrtarisht si nga SHBA ashtu edhe nga BE.