“Kushtet” e Metës për një tryezë ku se ka ftuar askush

Nga Mero Baze

Tani paketës së kushteve të Lulzim Bashës, të cilës nuk i ka mbetur më asnjë arsye për t’u përfillur, i janë shtuar dhe kushtet e Ilir Metës. Ndërkohë që Lulzim Basha humbi gjithçka, me shpresë se do fitonte gjithçka duke kushtëzuar uljen në bisedime me kushte me Edi Ramën, Ilir Meta ka filluar e përsërit me njerëz të rastësishëm që takon, paketën e zgjidhjes së krizës prej tij.

Ja ka thënë këtë presidentit të Maqedonisë, i cili kushedi sa është lodhur të kuptojë përse bëhet fjalë, ua ka thënë ca hebrenjve të SHBA, që këtu vetëm për politikë nuk vijnë, dhe ndoshta ja ka përsëritur dhe njerëzve që i kanë dalë para rrugëve të Bosnjës.

Në fakt, kriza në Shqipëri ka shmangur elementin më të rëndësishëm të saj, krizën institucionale. Zhvillimi i zgjedhjeve më 30 qershor, vendimi i Kolegjit Zgjedhor që zhbën dekretet dhe ç’dekretet e presidentit, aftësia e qeverisë për të kontrolluar situatën, dhe përfundimi i zgjedhjeve, i kanë dhënë fund kaosit institucional.

Shqipëria ka çmontuar disa elementë të rëndësishëm të krizës, që kishin të bënin me mbajtjen e zgjedhjeve dhe vendimarrjen për legjitimitetin e tyre.

Ajo që mbetet për t’u zgjidhur, është rifutja e Partisë Demokratike në sistemin tonë politik, nëse ka ndërmend të futet. Rikthimi i PD në sistem, natyrisht që do të ketë kosto të mëdha politike për të, për Bashën, por dhe për qeverinë.

Partia Demokratike është tani një parti që u ka hequr të drejtën demokratëve shqiptarë të përfaqësohen në pushtet, në Parlament, në Bashki, në Këshilla Bashkiake dhe çdo vend tjetër, përveç “Avokatit të Popullit”.

Për t’u rikthyer PD në sistem, natyrisht që duhen bisedime, duhet konsensus, por dhe një vullnet politik për të marrë përgjegjësinë e asaj që ka bërë lidershipi i PD.

Propozimet e Ilir Metës, të cilat përsëriten rrugëve sikur nuk ka ndodhur asgjë, janë më të këqija se kushtet e Lulzim Bashës, pasi ato në vend që të pastrojnë fazën e fundit të krizës, që tashmë është vetëm politike, synojnë të rikthejnë krizën institucionale, kërkojnë të delegjitimojnë zgjedhjet dhe ta kalojnë çelësin e destabilitetit në duar të Ilir Metës, i cili e çoi Shqipërinë drejt vëllavrasjes më 30 qershor, me lehtësinë me të cilën premtoi se do të çonte atë qenin boshnjak tek macja e tij me emër rus në Tiranë.

Tashmë kur kriza institucionale është zhdukur, kur shteti funksionon dhe kur pritet të ngrihet Gjykata Kushtetuese, për të mos pasur më përpjekje destabilizuese në mungesë të saj, presidenti kërkon ta rikthejë krizën në pikën zero, duke anulluar zgjedhjet dhe duke shpallur zgjedhje të reja presidenciale, të cilat nuk na i parashikon as Kushtetuta, pasi presidentin këtu e zgjedh Parlamenti.

Pra, nëse deri më sot kaluam një krizë të fortë institucionale për shkak të kushtëzimeve për dialog që kishte Lulzim Basha, tani kemi një përpjekje për të rikthyer krizën institucionale, për shkak të kushtëzimeve që vendos Ilir Meta.

Nuk di sa të rakorduar janë Meta e Berisha në këto qëndrime, por ata duhet të kuptojnë se nuk ja dolën dot të fusin shqiptarët në vëllavrasje, në kulmin e krizës, dhe as që kanë shanse të rikthejnë krizën në kulmin e vapës.

Koha për të biseduar për rikthimin e PD në sistemin politik legjitim që kemi kalon çdo ditë, dhe sa më shumë Basha të mendohet, aq më vonë do të jetë për PD.

Ngrefosjet e tij se do përgjakë bashkitë që ka pasur PD, duke mos i dorëzuar ato, kam frikë se nuk ja përfillin as vetë ish- kryebashkiakët e tij, të cilët, nuk kanë ndërmend të bëhen viktima të luftës për karrigen e Bashës, duke bërë sikur luftojnë për karrigen e tyre.

Në këtë pikë, Basha po sillet njësoj si Ilir Meta, që shpreson se është ende president, bile president që ka dhe kushtet e tij për t’u ulur në bisedime. Pa llogaritur që nuk e ka ftuar askush, as për të biseduar, dhe as për të ndërmjetësuar.

PD merr në mbrojtje Metën, Bardhi: Shkarkimi telenovelë e Ramës

Partia Demokratike del hapur në mbrojtje të Presidentit Ilir Meta, duke e quajtur “telenovelë vere të Edi Ramës”, ngritjen e Komisionit Hetimor për shkarkimin e tij. Sekretari i përgjithshëm i PD, Gazmend Bardhi ka bërë një deklaratë në rrjetin e tij social, ku i del hapur në mbrojtje Ilir Metës, duke i cilësuar veprimet e kreut të shtetit si “kompetencë kushtetuese”.

“Për të mbuluar vjedhjen e shqiptarëve, vjedhjen e votës, vjedhjen e taksave, vjedhjen e pasurive, Edi Rama ka nisur shfaqjen për herë te parë te telenovelës “Parlamenti i krimit kundër Presidentit”, ku vetë është regjisor, vetë skenarist, vetë producent, vete aktor. Edi Rama e ka të qartë se telenovela me shkarkim presidenti është vetëm nje sajesë vere dhe abuzim me fondet publike”.

“Presidenti i Republikës nuk ka kryer asnjë shkelje, por ka ushtruar kompetencën e tij kushtetuese për t’u garantuar qytetarëve të drejtën për të zgjedhur në një sistem demokratik dhe pluralist. Duke shfaqur telenovelën bajate, me aktorë kryesorë personazhet e dosjeve 184 dhe 339 të blerjes së zgjedhjeve me krimin, Edi Rama do që të mos flitet për krimet e tij ndaj shqiptarëve”, shkruan ndër të tjera numri dy i PD-së.

Po, a është kompetencë kushtetuese vendimi për të çdekretuar një dekret? Sigurisht që Bardhi e di mirë që nuk është kompetencë kushtetuese një gjë e tillë, pasi është jurist. Dhe në Kushtetutë nuk ka një nen ku theksohet se “Presidenti mund të anulojë dekret që nxjerr vetë”. Megjithatë, Gazmend Bardhi vijon duke u shprehur në fund të tij se “votimet moniste të 30 qershorit, siç shprehet edhe OSBE/ODIHR, u mbajtën pa e marrë fare në konsideratë intersin e qytetarëve”, shkruan sekretari i PD-së.

Ish zv.ministri i Drejtësisë e shpjegon me kushtetutë “ngordhjen” e dekretit

Ish zëvendës ministri i drejtësisë Arben Isaraj ka hapur Kushtetutën dhe ka renditur të gjitha nenet që rrëzojnë dekretin e presidentit Meta për anulimin e zgjedhjeve. Madje ai e cilëson atë si “ngordhje” administrative, duke sqaruar se dekreti nuk është një akt kushtetues.

Fillimisht Isaraj shpjegon se çfarë çështjesh gjykon dhe për çfarë vendos Gjykata Kushtetuese. Për këtë ai i referohet nenit 131/21, të Kushtetutës dhe rendit të gjitha çështjet që gjykohen nga kjo gjykatë dhe ku nuk bën pjesë dekreti i presidentit.

Isaraj ngre pyetjen që është bërë kaq shpesh këto kohë nëse gjykata Kushtetuese ka tagrin të gjykojë dekretin e presidentit për caktimin e datës së zgjedhjeve? Dhe përgjigja vjen sërish nga Kushtetuta.

“Kushtetueshmëria apo paligjshmëria, e Dekretit të Presidentit për “caktimin (anulimin) e datës së zgjedhjeve”, sipas pikave “a” deri në “f” të nenit 131/21 të Kushtetutës, nuk është objekt gjykimi për Gjykatën kushtetuese.

Pasi:

A ) Dekreti i Presidentit për “caktimin (anulimin) e datës së zgjedhjeve” nuk është ligj;

b) Dekreti i Presidentit për “caktimin (anulimin) e datës së zgjedhjeve” nuk është marrëveshje ndërkombëtare për tu ratifikuar në Kuvend;

c) Dekreti i Presidentit për “caktimin (anulimin) e datës së zgjedhjeve” nuk është akt normativ i një organi qëndror, sipas Kushtetutës;

ç) Dekreti i Presidentit për “caktimin (anulimin) e datës së zgjedhjeve” nuk i ka marrë kompetencën asnjë pushteti tjetër qendror dhe vendor;

d) Dekreti i Presidentit për “caktimin (anulimin) e datës së zgjedhjeve” nuk merret me kushtetutshmërinë e partive dhe të organizatave të tjera politike;

dh) Dekreti i Presidentit për “caktimin (anulimin) e datës së zgjedhjeve” nuk merret me shkarkimin nga detyra të Presidentit të Republikës dhe me vërtetimin e pamundësisë së ushtrimit të funksioneve të tij ;

e) Dekreti i Presidentit për “caktimin (anulimin) e datës së zgjedhjeve” nuk merret me çështjet që lidhen me zgjedhshmërinë dhe papajtueshmëritë në

ushtrimin e funksioneve të Presidentit të Republikës, si dhe me

verifikimin e zgjedhjes së tij.

ë) Dekreti i Presidentit për “caktimin (anulimin) e datës së zgjedhjeve” nuk është Referendum ;

f) Dekreti i Presidentit për “caktimin (anulimin) e datës së zgjedhjeve” nuk është ankesë individi kundër çdo akti të pushtetit publik ose vendimi gjyqësor që cenon të drejtat dhe liritë themelore të garantuara në Kushtetutë, pasi të jenë shteruar të gjitha mjetet juridike efektive për mbrojtjen e këtyre të drejtave”, sqaron ish zëvendësministri i Drejtësisë.

Po kështu ai sqaron edhe një gjë thelbësore, pasi presidenti Meta gjatë gjithë kësaj kohe e ka cilësuar të vlefshëm dekretin e tij për anulimin e zgjedhjeve për shkak se ai është botuar në Fletoren Zyrtare, por sipas Arben Isarajt “Kushtetuta në asnjë germë të saj, nuk thotë se Dekreti i Presidentit botohet në Fletoren Zyrtare. As dhe se ai hyn në fuqi kur botohet në Fletoren Zyrtare”.

Në përmujorin e "ngordhjes" administrative.Pothuaj një muaj më parë, na ngordhi pa u pjellë mirë, një hibrid…
Gepostet von Arben Isaraj am Donnerstag, 11. Juli 2019

Sondazhi i Realstory.al, 81% e votuesve, pro shkarkimit të Metës

Rreth 81% e qytetarëve shqiptarë e vlerësojnë “të drejtë” shkrkimin e Ilir Metës nga posti i Presidentit të Republikës së Shqipërisë. Kjo është përgjigja ‘pro’ që i kanë dhënë sondazhit të “Realstory.al”, rreth 944 votues në pak më shumë se 24 orë, nga hapja e pyetësorit, që Realstory.al i drejton shqiptarëve për vendimin e Qeverisë mbi shkarkimin e kreut të shtetit. Ndërkohë, 19% e votuesve e vlerësojnë si të gabuar vendimin për shkarkimin e Ilir Metës nga posti që mban. Të hënën Parlamenti votoi me 101 vota pro kërkesën e Komisionit të Ligjeve për ngritjen e Komisionit Hetimor, i cili do të hetojë shkeljet e Kushtetutës nga Presidenti i Republikës dhe më pas do të kërkojë nga Parlamenti shkarkimin e tij.

Ilir Meta, sipas raportit të Komisionit të Ligjeve, ka bërë disa shkelje të rënda kushtetuese, të cilat lidhen me dekretin e datës 10 qershor, për anulimin e dekretit të mëparshëm, që cakton 30 qershorin si datë të ligjshme të zgjedhjeve. Në këtë pikë, Ilir Meta vulosi fatin e tij në zyrën e Presidentit, pasi bëri një akt të paprecendentë dhe mbi të gjitha i pabazuar në Kushtetutë, pasi akti themeltar i shtetit, nuk e njeh çdekretimin si veprim.

Ndaj, Qeveria vendosi t`i shkojë deri në fund shkarkimit të Ilir Metës, çka tashmë duket se ka dhe mbështetje të gjerë qytetare, referuar sondazhit të Realstory.al. Duket se qytetarët, në shumicë kanë kuptuar qartë veprimet e Presidentit, i cili me dekretin anti-kushtetues, jo vetëm që nuk i dha zgjidhje krizës politike në vend, por e drejtoi vendin drejt një përplasje civile, që për fatin e mirë të Shqiptarëve, u shmang pas ndërhyrjes së menjëhershme të Shteteve të Bashkuara ta Amerikës. Ndërkohë, sondazhi i Realstory.al, vijon të jetë i hapur për të gjithë qytetarët shqiptarë që duan të shprehin mendimin e tyre. Ju mund të votoni në Facebook, dhe në ueb në www.realstory.al.

Voto në sondazhin e mëposhtëm

Shkarkimi i Presidentit:

Lind Republika anti-perëndimore e Shqipërisë

Nga Mero Baze

Shqipëria duhet t’i japë shpejt zgjidhje krizës presidenciale, jo aq për ndonjë rëndësi të Ilir Metës brenda vendit, se sa për imazhin qesharak që po i jep Shqipërisë, duke përfaqësuar një “Shqipëri paralele” anti-perëndimore dhe anti-kosovare nga Republika zyrtare e Shqipërisë.

Rasti më ekstrem është Samiti i Jahorinës në Bosnjë, organizuar nga anëtari serb i Presidencës së Bosnjës, Milorad Dodik, i cili përveçse një manekin banal i presidentit Putin, përfaqëson ende të vetmen vrimë të zezë të nacionalizmit etnik serb në Ballkan, që ushtron pushtet.

Presidenti i Kosovës, Hashim Thaçi, e refuzoi ftesën si poshtëruese për Kosovën dhe ai natyrisht ka një gjykim më të gjerë për këtë vendim. Në solidaritet me të, Ministria e Jashtme e Shqipërisë, po ashtu e refuzoi pjesmarrjen e Shqipërisë zyrtare aty.

Fill pas kësaj, Ilir Meta i hipën avionit dhe shkon në një takim, ku ka prodhuar dy lajme kryesore.

E para, që nuk ka përfillur qëndrimin zyrtar të Shqipërisë dhe e ka trajtuar edhe qëndrimin zyrtar për çështjen kombëtare të Shqipërisë, si një qëndrim ku diskutojmë për protestat e Lulit.

E dyta, që ka tentuar të duket një lider me tipare lindore anti-emigracion, pro autoritarist dhe anti-perëndimor, duke lavdëruar presidentin Erdogan për një gjë që dhe ai vetë do të jetë çuditur, për faktn që i ka prerë rrugën emigracionit të paligjshëm në Ballkan.

Në fakt, presidenti turk i ka bërë presion Europës dhe kryesisht Gjermanisë, të rrisin financimet për Turqinë për të ndërprerë valën e refugjatëve të luftës drejt Perëndimit, por kjo është një çështje mes tij dhe Perëndimit.

Turqia nuk ka problem shkuarjen e emigrantëve në Turqi, por ikjen e turqve nga Turqia, si çdo vend i varfër i Ballkanit.

Ballkani po ashtu nuk ka problem që po i vijnë emigrantë, por që po i ikin qytetarët e vet emigrantë. Vetëm Ilir Meta ka zbuluar se Ballkani rrezikohet nga emigrantët e huaj, dhe për këtë i është mirënjohës presidentit Erdogan.

Në fakt, nuk e ka fare për këtë. Duket se Ilir Meta ka vendosur të imitojë liderët autoritarë dhe ksenofobë të Lindjes, ku krye-modeli është Orban. Ai tenton të bëhet ksenofob, anti-emigracion, anti-perëndimor, dhe si çdo menu tjetër e Internacionales së autokratëve do dhe “një kokë të prerë armiku në sini”, dhe ky ka gjetur Sorosin.

Ilir Meta duket se ka shkuar deri tek Dodiku, një mik personal i Putinit, nga ato levat e neveritshme të tij në Ballkan, për të na treguar se tani ai ja ka hipur kalit drejt Lindjes, dhe për të na treguar se nuk i ha palla nga qëndrimet e ftohta të Perëndimit ndaj tij.

E njëjta gjë vërehej dhe në intervistën e tij me gazetarin e njohur grek Stavros Ximas, ku përpiqej të paraqiste dy Shqipëri, Shqipërinë zyrtare, që e identifikonte të keqe, me Edi Ramën, dhe Shqipërinë e tij, siç e ka tani në mendjen e tij të turbullt.

Shqipëria paralele e Ilir Metës, nuk është ndonjë krim. Shqipëria është vend i lirë dhe këtu çdokush është i lirë të zgjedhë një pozicion kundrejt rrugës perëndimore të Shqipërisë, pro ose kundër saj.

Deri tani kemi qenë të gjithë pro. Tani Ilir Meta ka vendosur t’i kundërvihet kësaj rruge. Nuk është ndonjë dramë e madhe. Është një eksperiment i ri politik i Moskës në Tiranë.

Problemi është që këtë eksperiment, Ilir Meta nuk mund ta bëjë nga posti i presidentit të Republikës së Shqipërisë, pasi ai është duke folur në emër të një Shqipërie të panjohur ende.

Ai nuk mund të përfaqësojë dy Shqipëri në tryezën e një zagari të Putinit. Nuk mund të jetë aty, edhe si përfaqësues i Shqipërisë anti-perëndimore dhe anti- Kosovë.

Mund të jetë si politikan i tillë, por jo si President. Si president në atë tavolinë mund të ulet, kur t’ia nisi nga e para si politikan anti-perëndimor, të fitojë, të bëjë shumicë, e të bëhet prapë President.

Pastaj dhe mund të flejë në një krevat me Dodik e Putinin, se nëse do ndodhë ta votojnë shqiptarët si të tillë, ky vend nuk do të ekzistojë më.

Por si përfaqësues i Shqipërisë pro-perëndimore, si përfaqësues i Shqipërisë që e ka në Kushtetutë mbrojtjen e interesit kombëtar të shqiptarëve jashtë Shqipërisë dhe sidomos Kosovës, ai nuk mund të ulet në atë tavolinë dhe të flasë në emër të kësaj Shqipërie.

Jo se shkatërron ndonjë kauzë të madhe, pasi atë nuk e merr njeri seriozisht as këtu, por na bën objekt barcaletash mes një klubi anti-shqiptar, duke vërtetuar gjithë anektodat e vjetra serbe, që jemi njerëz me bisht.

Në fakt, thjesht kemi një President me bisht.

Kryemadhi si Basha për ndryshimin, si Meta për Shqipërinë!

Disa orë pasi Lulzim Basha publikoi një video të protestës së 8 korrikut, ku fjalën më të përdorur të përshkrimit të tij kishte “ndryshimin”, shembullin e kreut të PD-së, e ka ndjekur dhe partnerja e tij opozitare, Monika Kryemadhi. Kryetarja e LSI-së, ka publikuar gjatë pasdites të së martës një video nga protesta, ku përsëri flet për ndryshimin. Megjithatë, ndryshe nga Basha, Monika është më e përmbajtur te përdorimi i fjalës “ndryshim”, pasi e përdor vetëm një herë këtë fjalë, ndryshe nga Basha, që e përdorte plotë gjashtë herë, në pesë fjali.

Monika Kryemadhi shkruan se “shqiptarët meritojnë një qeveri që mban përgjegjësi para popullit, një sistem demokratik funksional që vjen nga zgjedhjet e lira e të ndershme, një Shqipëri ku të gjithë janë të barabartë para drejtësisë, me mundësi të barabarta për punësim, mirëqenie, shëndetësi, arsim dhe ku dinjiteti njerëzor nuk nëpërkëmbet”.

“Ky është momenti për t’i dhënë Shqipërisë një shtet me institucione të forta dhe sistem që nuk çimenton kontrollin e individit mbi shtetin por garanton fuqinë e popullit mbi pushtetin. Pazaret në kurriz të shqiptarëve për karriket e politikës kanë marrë fund. Ne jemi së bashku në këtë betejë si qytetarë të barabartë që duan më shumë Shqipërinë se sa partinë. Rruga jonë është e mbushur me sfida dhe ne jemi të gatshëm t’i përballojmë. Sepse për ne Shqipëria është e para, shqiptarët janë të parët. Zoti e bekoftë Shqipërinë dhe shqiptarët”, shkruan në komentin shoqërues të videos nga protesta.

Ndërsa në mesazhin e videos, ndër të tjera theksohet “protestat e shqiptarëve janë për ti dhënë fund tranzicionit 30 vjeçar që ka kapur Shqipërinë”. Pra, në fakt, shefja e LSI thotë diçka të vërtetë në këtë rast, pasi ajo, bashkëshorti i saj Ilir Meta, Sali Berisha dhe disa politikanë të tjerë, kanë prej 1990-së që mbajnë Shqipërinë në tranzicion.

Theu bojkotin shqiptar, Meta lutet për negociatat në Bosnje

Ilir Meta vendosi të thyente bojkotin e shqiptarëve ndaj Samitit të SEECP në Sarajevë, për shkak të ftesës denigruese që ju bë Kosovës për pjesëmarrjen në këtë samit. Kreu i shtetit shqiptar, vendosi të dilte kundër Hashim Thaçit dhe Gent Cakajt, duke shkuar në Bosnje, aty ku mesaduket, më shumë se sa për samitin, ka pasur qëllim takime me ndërkombëtarët (në kushtet që në Shqipëri e kanë anashkaluar totalisht. Lexo lajmin e Realstory.al për takimin e Metës me Erdogan). Megjithatë, Ilir Meta kërkon të justifikiojë vizitën e tij në Sarajevë, duke shkruar disa rradhë shkurt për këtë samit. Në postimin në rrjetet sociale, Meta shprehet se ka besim se Këshilli i Be-së do të vendosë për hapjen e negociatave me Shqipërinë në tetor.

“Përparimi i të gjitha vendeve të Ballkanit Perëndimor në procesin integrues për në Bashkimin Europian është thelbësor. Mbetemi të përkushtuar dhe me shpresë se Këshilli i BE-së do të vendosë në tetor për të hapur negociatat e anëtarësimit me Shqipërinë dhe me Maqedoninë e Veriut fqinje. I jemi mirënjohës vizionit të Kancelares Angela Merkel, që u përsërit edhe në Samitin e fundit të Poznanit, se dhënia e mundësisë vendeve të Ballkanit për t’i bashkëngjitur BE-së është në interesin strategjik të bllokut komunitar evropian”, shkruan Meta, duke përmendur edhe Kancelaren gjermane Angela Merkel, për vizionin që ka pasur për anëtarësimin e vendeve të Ballkanit Perëndimor në Be.

META BËN PATRIOTIN, NDËRKOHË QË THEU BOJKOTIN

Analiza në Real Story: Meta në hall të madh, ai e di çfarë po gatuhet për të

Emisioni “Real Story” i gazetarit Sokol Balla, pati si temë të diskutimit krizën politike dhe shkarkimin e Presidentit Ilir Meta nga Kuvendi. Të ftuar në emisionin e të hënës ishin analistët Arian Vasjari, Skënder Minxhozi, gazetari Artan Hoxha dhe ish-kreytari i KQZ, Çlirim Gjata.

Artan Hoxha ka bërë një deklaratë befasuese në emision, pasi është shprehur se Ilir Meta e di mirë se çfarë po gatuhet për të. “Presidenti ka një hall të madh. Ai e di se çfarë ka bërë dhe se çfarë po gatuhet për të. Çfarë i ndodhi Presidentit që nga Gjiri i Lalëzit, doli në fushën e betejës?”, u shpreh Artan Hoxha.

Më tej, gjatë debatit, duke folur për përgjimet e Bild, gazetari Hoxha tregoi edhe një detaj tjetër interesant, që lidhet me njeriun që i shpërndau ato. Sipas gazetarit Artan Hoxha, nuk është Prokurori Besim Hajdarmataj ai që i ka çuar përgjimet te gazeta gjermane, por, sipas tij, ato i ka shpërndarë ish-kryerprokurori Adriatik Llalla.

“Përgjimet i ka nxjerr Adriatik Llalla. Nuk e ka bërë Besim Hajdarmataj, i ka bërë Adriatik Llalla, ai kishte akses tek ato”, tha Artan Hoxha. Gjithashtu, lidhur me krijimin e institucioneve të reja të drejtësisë, dhe kryesisht të Prokurorisë Speciale (SPAK), e cila do të hetojë krimet e politikanëve, Artan Hoxha shprehet se për ky institucion nuk do të ketë rradhë, por hetimi do të fillojë me atë që kapet në flagrancë.

“Në momentin që fillon punën SPAK, aty nuk ka rradhë për hetimet. Hetimi më i shpejtë është për atë që kapet në flagrancë”, u shpreh Artan Hoxha. Për analistin Arian Vasjari, pyetja që shtohet është nëse ka material të mjaftueshëm për shkarkimin e Ilir Metës, megjithatë, ai thekson, se sipas tij, Presidenti është provokatori më i madh i Kushtetutës.

“A ka material për të filluar procesin e shkarkimit të Presidentit të Republikës? Për këtë duhet ti referohemi dispozitave Kushtetuese. Veprimet e tij në muajt e fundit më bën që ta shoh Ilir Metën si provokatorin më të madh të Kushtetutës. Nuk mund të përfshihet në beteja politike”, tha Vasiari. Ndërkohë, Çlirim Gjata, u shpreh se nëse Ilir Meta nuk do të kishte nxjerr dekretin për zgjedhjet, askujt nga Qeveria nuk do i binte në sy qasja e Presidentit.

Ndërkohë, analisti Skënder Minxhozi, u shpreh se Ilir Meta dha indicie që në nisje të mandatit si President, se si do të ishte ai në këtë post. “Ju kujtohet fushata e 2017, sapo Ilir Meta u votua President, zbriti në fushatën e LSI dhe ka bërë një nga fushatat më të ashpra kundër Partisë Socialiste”, u shpreh ndër të tjera Minxhozi. /Realstory.al/

Ngrihet Komisioni me 101 vota pro, 3 muaj hetime për shkarkimin e Ilir Metës

Parlamenti ka votuar me 101 vota pro dhe 6 kundër, 2 abstenim, ngritjen e Komisionit Hetimor, që do të hetojë shkeljet e Kushtetutës nga Presidenti i Republikës, Ilir Meta. Fjalën e hapjes në seancën parlamentare e mbajti Ulsi Manja, i cili lexoi argumentet dhe gjetjet e raportit të Komisionit të Ligjeve, i cili i propozoi Kuvendit më pas votimin për ngritjen e Komisionit Parlamentar.

Më pas, ishte Kryeministri Edi Rama, që mbajti një fjalim më pak se koha e parashikuar, por i argumentuar ku cilësoi shkeljet e rënda kushtetuese të Ilir Metës, si dhe sulmet e paprecedenta të Presidentit ndaj partnerëve ndërkombëtar. Rama i bëri thirrje gjithashtu deputetëve të opozitës që të votojnë pro ngritjes së Komisionit Hetimor.

Në fakt, këtë thirrje e konfirmuan shumica e deptetëve të opozitës, të cilët gjatë fjalës së tyre në parlament, u shprehën pro shkarkimit të Ilir Metës, dhe ngritjen e Komisionit Hetimor, që i hap rrugë ligjërisht këtij vendimi. Komisioni Hetimor, pas votimit në Parlament, ngrihet brenda dy ditësh dhe nis punën për nisjen e hetimit dhe përgatitjes së raportit përfundimtar, që do të votohet nga Parlamenti për shkarkimin e presidentit.

Po çfarë ndodh pas ngritjes së Komisionit Hetimor. Ligjërisht, ky komision do të ketë një periudhë kohore tre mujore për të hetuar shkeljet kushtetuese të Ilir Metës. Presidenti do të thirret për të folur para anëtarëve të Komisionit Hetimor, një e dretjë ligjore e tij. Më pas, vijohet me hetimin e shkeljeve të ndryshme kushtetuese, të cilat në fakt, mazhoranca pothuajse i ka gati, pasi ato janë pjesë e raportit të Komisionit të Ligjeve të miratuar në Parlament, dhe përbëjnë bazën kryesore të pikave ku bazohet shkarkimi i Ilir Metës. Megjithatë, afati tre mujor i funksionimit të Komisionit Hetimor, ka dhe një tjetër domethënie.

Nëse ky komision, dorëzon në Parlament raportin përfundimtar të hetimit të Metës, dhe Kuvendi voton shkarkimin e Presidentit, është Gjykata Kushtetuese ajo që thotë fjalën e fundit për shkarkimin ose jo të kreut të shtetit. Ndaj, mazhoranca, brenda këtij afati 3 mujor të Komisionit Hetimor, paralelisht, ka mundësi të votojë në Kuvend edhe emrat për ngritjen e Gjykatës Kushtetuese, e cila mund të jetë funksionale në momentin e shkarkimit të Presidentit nga Parlamenti, dhe si rrjedhojë, e gjithë procedura e shkarkimit të Ilir Metës, përfshi dhe vlerësimin në Kushtetuese, mund të mbyllet brenda vjeshtës.

Komisioni Hetimor përbëhet nga:

1-Ulsi Manja, kryetar

2-Vasilika Hysi, anëtar

3- Klotilda Ferhati, anëtar

4-Bashkim Fino, anëtar

5-Alket Hyseni, anëtar

Nga opozita parlamentare:

1- Alban Zeneli

2- Halit Valteri

3- Adriak Alimadhi

Nga deputetët jashtë grupeve parlamentare:

1-Krenar Rryçi

Deputetët e djathtë pro shkarkimit, Elezi: Meta i trajton dekretet si porosi me bllok në dorë

Deputeti i djathtë, Arben Elezi, gjatë fjalës së tij në kuvend, la të kuptohet se deputetët e djathtë do të votojnë pro ngritjes së Komisionit Hetimor për shkarkimin e Ilir Metës.

“Ne deputetët e djathtë nuk jemi gabimisht këtu, jemi se dikush braktisi detyrën. Jemi këtu të themi në sy të vërtetën për shqiptarët. Për ne nuk është surprizë që Presidneti socialist Ilir Meta i quan dekretet si porosi me bllok në dorë”.

“Ne nuk ju lëmë as ju, që të zaptoni të gjitha pushtetet. Jemi këtu të votojmë kundër çdo socialisti që abuzon me detyrën, kundër socialistit Ilir Meta, kundër socialistit Edi Rama apo socialistve problematik si Ulsi Manja.

“Ka ardhur koha që shqiptarët të meritojnë më të mirën. Ju duhet të ikni bashkë me presidentin. Ne mbështesim Reformën në Drejtësi, që po bëjnë miqtë tanë të SHBA dhe BE. Ne duam që vendi të ketë një Reformë të Thellë dhe të denj zgjedhore”, u shpreh deputeti i djathtë në parlament.