Kaosi në Kadastrën e Vlorës, KLSH, në “sitë” të gjitha dosjet

Vala e shkarkimeve, dorëheqjeve dhe nisja e hetimeve për 23 specialistë në kadastrën e Vlorës, të akuzuar për tjetërsim prone, ka bërë që edhe Kontrolli i Lartë i Shtetit të nis verifikimin e dosjeve që këto persona kanë kaluar nëpër duar. KLSH do të kalojë në sitën e saj të gjitha dosjet e firmosura në 4 vitet e fundit, për të parë nëse ka pasur shkelje të tjera apo jo.

Gjatë të mërkurës, në Kadastrën e Vlorës u shfaq seksioni i krimit ekonomik, ku vuri nën hetim 23 punonjës, pasi akuzohen se kanë tjetërsuar pronën e një personi në Jalë duke ia kaluar një tjetri, përmes falsifikimit të dokumenteve.

Kadastra e Vlorës prej disa ditës është përfshirë në një furtunë shkarkimesh dhe dorëheqjesh. Gjatë të hënës u shkarkua nga detyra nëndrejtori i Kadastrës, Klodian Troci dhe tre specialistë, si pasojë e mos zbatimit të një vendimi gjykate për një pronë. Gjithashtu kanë dhënë dorëheqjen edhe drejtori i komanduar i Kadastrës Florian Almadhi, i cili u zëvendësuar me Alteo Nazëraj dhe nënkryetari i kadastrës së Vlorës, Ardian Musta.

Në lidhje me rastin, edhe kreu i Kadastrës, Artan Lame doli në një deklaratë për mediat ku i bëri

apel deputetëve, ministrave dhe të gjithë miqve të tij, që të mos i kërkojnë qoka për punësime. “O më thoni të bëj Kadastrën, o më thoni të bëj qokat e miqtë, të dyja nuk bëhen dot!” tha Lame, i cili deklaroi se ka nisur një reformë e thellë për të përmirësuar punën e Kadastrës dhe shmangur abuzimet.

Petraqi “puthet me Milon”: KLSH, dështimi tretë i Metës

Për herë të tretë, Komisioni i Ekonomisë, ka rrëzuar kandidaturën e përzgjedhur nga Presidenti i Republikës, Ilir Meta, për kreun e KLSH-së. Konkretisht, kandidati Petraq Milo nuk ka kaluar në Komisionin e Ekonomisë në Kuvend, duke u bërë kandidati i tretë, pas Bahri Shaqirit dhe Vitore Tushës, që rrëzohen si kandidat për të drejtuar Kontrollin e Lartë të Shtetit. Ka qenë deputetja Evis Kushi, ajo që i ka drejtuar tre pyetje kyçe Petraq Milos, në lidhje me karrierën e tij.

Sipas deputetes socialiste, në CV e Milos mungojnë të dhënat për detyrën që ka mbajtur nga vitit 1998 deri në vitin 1991. Gjithashtu, sipas deputetes Kushi, në karrierën e tij Petraq Milo ka mbajtur një funksion në Bankën e Shqipërisë në kundërshtim me ligjin, pasi ai ka qenë kandidat për anëtar të Këshillit Kombëtar të PD-së. Në pyetjen e tretë, Kushi ka kërkuar dhe informacion, rreth arsyeve të dorëheqjes së Petraq Milos nga posti që ka mbajtur në Bankën e Shqipërisë.

Ndërkohë, kandidati i prezantuar nga Ilir Meta, që më herët ka qenë këshilltar i Berishës, u shpreh se sipas ligjit në CV duhet të jenë të shënuar 10-të vitet e fundit të karrierrës së tij, ndërsa sipas tij, informacioni i dhënë në CV është për 20 vitet e fundit.

Ndërkohë, Petraq Milo ka mohuar që ka dhënë dorëheqjen nga BSH. “Në periudhën 88-91, kam qenë drejtor i drejtorisë ekonomike të kombinatit të autotraktorëve. Funksioni në Bankën e Shqipërisë është para PD. Nuk kam dhënë dorëheqjen nga Banka e Shqipërisë. Në punën time kam qenë model për të qenë bashkëpunues, për të mbështetur çdo qeveri. Nuk ka pasur asnjë qëndrim politik në punën time”, deklaroi Milo. Të martën, Kuvendi rrëzoi përsëri kreun e shtetit, i cili i kishte kthyer disa ligje për rishqyrtim, të cilat u rimiratuan në Komisionin e Ekonomisë, dhe do t`i shkojnë përsëri Kuvendit për miratim.

KLSH për transportin dhe ruajtjen e barnave: Jashtë standardeve

Kontrolli i Lartë i Shtetit ka bërë një auditim mbi Cilësinë dhe Sigurinë e Barnave në Rrjetin e Hapur Farmaceutik dhe Shërbimin Spitalor, në të cilin vuri re se cilësia e ruajtjes dhe transportit të barnave është e cenuar. KLSH sqaron se në mungesa e inspektimeve në nivelet e duhura në depot farmaceutike dhe kushtet në të cilat ruhen dhe transportohet këto barna tregon një mungesë të theksuar organizative të inspektimeve për zbatimin e detyrimeve ligjore.

Gjithashtu mungesa e pullës së sigurisë në barnave cenon cilësinë dhe sigurinë e tyre në farmacitë spitalore, përmes të cilave mund të abuzohet dhe të kalojnë edhe për tregtimin në farmacive e rrjetit të hapur.

Në raport thuhet gjithashtu se shërbimi farmaceutik nuk përmbush asnjë standard lidhur me ruajtjen dhe shpërndarjen e barnave, ndërsa mungesa e fletë-udhëzuesit të barnave në gjuhën shqipe, megjithëse është përcaktuar në ligjin e barnave dhe në rregulloren për dhënien e autorizimit të tregtimit të barnave, ende nuk ka gjetur zbatim. Një problem tjetër i ngritur nga auditimi i KLSH ishte edhe mungesa e një harte të plotë të rrjetit të farmacive, importuesve dhe distributorëve si dhe mos akreditimi i Laboratorit të analizimit të barnave.

Bujar Leskaj firmos “rikthimin” e tij në krye të KLSH-së

Pas përfundimit të mandatit në krye të Kontrollit të Lartë të Shtetit, Bujar Leskaj ia kishte deleguar kompetencat zv. kryetares së këtij institucioni, Lindita Lati Milos. Mirëpo Milo është tërhequr nga ushtrimi i kompetencave drejtuese për arsye personale.

Kjo ka bërë që në krye të saj të vendoset sërish Leskaj, deri në zëvendësimin e tij me drejtuesin e ri, për të siguruar mbarëvajtjen e punës.

“Pas kërkesës për tërheqje nga kompetencat e deleguara të zv. Kryetares, znj. Lindita Milo për arsye personale, dt. 21.05.2019, nr. 347, dhe garantimit te vijueshmërisë normale të punës;

Në kushtet e zgjatjes në kohë të nominimit dhe përzgjedhjes së Kryetarit të ri të KLSH-së, sipas përcaktimeve të Ligjit 154/2014.

VENDOSA:

Shfuqizimin e kompetencave të deleguara me vendimin e Kryetarit nr. 244, datë 12.12.2018 zv/Kryetarit të KLSH-së znj. Lindita Lati (Milo).
Ky vendim do i përcillet Presidentit të Republikës, Kryetarit të Kuvendit, Kryetarit të opozitës.” – thuhet në vendimin e kreut të KLSH.