13 tetori, LSI sulmon KQZ, por harron se Metën e rrëzoi Kolegji Zgjedhor

Të shtunën dështoi mbledhja e Komisionit Qendror të Zgjedhjeve, që do duhet të diskutonte kërkesën e partive opozitare për zhvillimin e zgjedhjeve të 13 tetorit. Dështimi i kësaj mbledhje nuk është pritur mirë nga opozita, e cila e ka quajtur “veprim banditësh”. Me anë të një statusi në rrjetet sociale, nënkryetari i LSI, Petrit Vasili, ka sulmuar KQZ dhe anëtarët e saj, duke i quajtur “kamikazë”.

“30 qershori i paligjshëm dhe faqe e zezë në historinë e Shqipërisë. Zgjedhjet në 13 tetor, kjo është rruga dhe shpëtimi i vetëm për shqiptarët dhe integrimin. KQZ kreu një veprim banditësh sepse zgjedhjet nuk i ndalin dot 4 kamikazë të rilindjes në KQZ. Edi Rama dhe rilindja gjallojnë vetëm përmes bojkotimit të zgjedhjeve të lira e dt ndeshme dhe bojkotit të çdo forme të funksionimit të shtetit të së drejtës”, shkruan ndër të tjera Vasili.

Ndërkohë, dekreti i Ilir Metës për zgjedhjet e 13 tetorit është ‘nul’, pasi është rrëzuar nga Kolegji Zgjedhor, gjykata supreme e zgjedhjeve, vendimet e të cilës nuk kanë rekurs. Në këto kushte, do të jetë Gjykata Kushtetuese, kërkesë edhe amerikanëve (lexo intervistën e Matheë Palmer), që do të bëj vlerësimin e dy dekreteve të Metës, atij të 10 qershorit për anulimin e 30 qershorit dhe atij për 13 tetorin, që e shpallte ditë zgjedhjesh.

Ndërkohë, pas ditës së diel të 4 gushtit, dekreti i Ilir Metës për 13 tetorin, veç rrëzimit nga Kolegji Zgjedhor dhe gjykatat e shkallëve të para në vend, është zyrtarisht ‘nul’ edhe për shkak të afateve ligjore të regjistrimit të subjekteve politike, 70 ditë para ditës së mbajtjes së zgjedhjeve në KQZ.

Kolegji rrëzon BD, Patozi: Duhet reformë e thellë zgjedhore

Kolegji Zgjedhor rrëzoi kërkesën e Partisë Bindja Demokratike të shpallte të pavlefshme zgjedhjet në Bashkinë e Selenicës. Kjo ka sjell reagimin e koordinatorit të saj, Astrit Patozi, i cili tha se e priste këtë vendin edhe pse pretendimet e tyre për parregullsi dhe deformim të procesit zgjedhor ishin të drejta dhe të mbështetura fort në Kodin Zgjedhor. Patozi tha se si garues në këto zgjedhje u bënë dëshmitarë të manipulimit dhe deformimit të procesit të zgjedhjeve duke e cilësuar këtë si “një sëmundje të rëndë të politikës shqiptare prej vitesh”. Ai bëri thirrje për një reformë të thellë zgjedhore që do të ishte e vetmja zgjidhje që do të ndalojnë një proces të deformuar dhe të siguronte një proces zgjedhjesh normal në të ardhmen.

“Duke qenë garues në këto zgjedhje, ne u bëmë dëshmitarë të manipulimit të vullnetit të zgjedhësve, një sëmundje e rëndë kjo e politikës sonë, që vijon prej shumë vitesh…Manipulimi i rezultatit të 30 qershorit e bëjnë të domosdoshme nevojën e një reforme të thellë zgjedhore, si kushti i parë për të pasur një proces normal në të ardhmen. Shqipëria duhet të hyjë në një cikël të ri duke i dhënë fund këtij sistemi të kalbur politik, i cili për shkak se është në grahmat e fundit, ka prodhuar këtë krizë të pashembullt, që po i shkakton shumë kosto vendit. BINDJA DEMOKRATIKE është e vendosur që të japë kontributin e vet në funksion të këtij qëllimi madhor, i cili më shumë se për të zgjidhur hallet e partive politike, duhet t’i shërbejë të gjithë shoqërisë shqiptare, që vuan prej shumë vitesh padrejtësisht pasojat…Natyrisht, që vendimet e KQZ-së në fillim dhe sot të Kolegjit Zgjedhor nuk sollën asnjë surprizë për ne dhe për publikun, ndonëse pretendimet tona ishin të drejta dhe të mbështetura fort në Kodin Zgjedhor.”- shkruan Patozi

EDHE KOLEGJI ZBATON POROSINË E EDI RAMËS PER T’I VËNË KAPAK 30 QERSHORITKolegji Zgjedhor rrëzoi sot ankimimet e…
Gepostet von Astrit Patozi am Montag, 22. Juli 2019

Kolegji rrëzon Bindjen: Zgjedhjet në Selenicë të rregullta

Kolegji Zgjedhor ka vendosur të rrëzojë padinë e partisë Bindja Demokratike, që kërkonte shpalljen të pavlefshëm të zgjedhjeve në Bashkinë e Selenicsë. BD kishte kërkuar në kolegj që zgjedhjet e 30 qershorit në Selenicë të mos njiheshin, pasi sipas kësaj partie në kutitët e votimit janë hedhur më shumë vota, nga sa kanë votuar votuesit në realitet.

Por Kolegji Zgjedhor ka vendosur të rrëzojë këtë kërkesë, duke konfirmuar ligjshmërinë e procesit të zgjedhjeve për Bashkinë Selenicë. Pas seancës në kolegj, ka folur përfaqësuesi ligjor i Bindjes Demokratike, Fabian Topallaj, i cili është shprehur se “mendojmë që kutitë janë mbushur nga komisionerët.

“Vëzhguesit tanë kanë vërejtur se në mbyllje të votimit ka pasur diskordancë në numrit të njerëzve që ata kanë numëruar të votojnë dhe numrit që rezultonte në lista”, tha Topollai.

“Mendojmë se komisionerët u kanë dhënë votuesve më shumë se një fletë votimi. Po ashtu mendojmë se kutitë janë mbushur nga komisionerët. Ka diskordancë të numrit të votave të numëruara në ekranet e numërimit dhe votave të pasqyruara në procesverbale. Në kërkuam ne KQZ të hapen kutitë e materialeve zgjedhore”.

Ndërkohë, lidhur me këtë çështje, i pranishëm në seancën e Kolegjit Zgjedhor, përfaqësuesi ligjor i Partisë Socialiste në KQZ, Eridian Salianji, u shpreh se “pretendimet e Bindjes Demokratike, janë thjeshtë politike, dhe nuk ka asgjë në të vërtetë në to”.

Në këto kushte, Kolegji Zgjedhor i jep një tjetër verdikt ligjor procesit zgjedhor të 30 qershorit, duke rrëzuar indirekt edhe akuzat e Partisë Demokratike se “në 30 qershor u mbushën kutitë me fleë votimi.

Gjatë ditës së hënë pritet që të shqyrtohet po në Kolegj Zgjedhor edhe disa kërkesa të Partisë Socialiste për shpërndarjen e mandateve të këshillave bashkiakë në disa bashki.

Balla: Gjykata shkeli ligjin në Durrës, mandatin e jep KQZ

Kryetari i Grupit Parlamentar të Partisë Socialiste, Taulant Balla ka reaguar pasditen e të mërkurës, pas vendimit të Gjykatës së Durrësit, për të mos njohur mandatin e të zgjedhurës në krye të bashkisë së këtij qyteti Valbona Sako. Balla ka shprehur indinjatën për këtë akt të gjyqtares së Durrësit, duke u shprehur se ajo ka shkelur në mënyrë flagrante ligjin.

“Keqardhje për vendimin absurd, arbitrar dhe nul të një gjyqtareje, e cila mori brohoritjet e atyre qe në vijim të përpjekjes se deshpëruar per kaos e pasiguri, nuk dinë më çfarë bëjnë. Pavarësisht kesaj lajthitjeje anti-ligjore dhe anti-logjike të radhës, në respekt të vullnetit të popullit, çdo kryetar i sapo zgjedhur pas shpalljes së vendimit vetëm nga KQZ apo Kolegji Zgjedhor do ta marrë detyrën, do ta ushtrojë dhe do të japë llogari përpara Këshillit Bashkiak sikurse ligji e parashikon”.

“Nuk ishte parë e dëgjuar në gjithë këto vite që një vërtetim i thjeshtë fakti të refuzohet duke dalë hapur në shkelje flagrante të ligjit mbi një vendim të formës së prerë. Në Shqipëri sipas Kodit Zgjedhor mandatet e të zgjedhurve i jep vetëm KQZ dhe Kolegji Zgjedhor. Dhe vendimet e Kolegjit Zgjedhor janë përfundimtare dhe të pa-ankimueshme. Sidoqoftë me keqardhje për ata që kanë humbur rrugën e arsyes, ne mbetemi të qetë dhe të vendosur në rrugën e hapur nga populli më 30 Qershor”, shkruan Balla.

Vendimi i Gjykatës së Durrësit për të mos njohur mandatin e Valbona Sakos, është përshëndetur nga drejtuesit e opozitës. Basha dhe Kryemadhi e kanë lexuar këtë si një fitore të tyre, duke kërkuar hetim penal për anëtarët e KQZ-së, që sipas tyre kanë shpërdoruar detyrën me mbajtjen e zgjedhjeve lokale të 30 qershorit.

Por, vendimi i Gjykatës së Durrësit ishte në kundërshtim me vendimin e të tjera gjykatave në vend, si psh, asaj të Korçës, që njohu Erion Isain si kryetar të Bashkisë Kolonjë, pavarësisht se në këtë bashki kandidonte dhe një tjetër person nga radhët e Bindjes Demokratike.

Thënë kjo, pasi në vendimin e Gjykatës së Durrësit, argumenti i vetëm për refuzimin e mandatit të Valbona Sakos, ishte pikërisht ‘regjistrimi i Bindjes Demokratike’ jashtë fateve ligjore për pjesëmarrjen në zgjedhje. Ndërkohë, Gjykata e Tiranës ka shpallur moskompetencë për të gjykuar kërkesën njohjes së mandatit, e bërë nga kandidati fitues i PS në Vorë në zgjedhjet e 30 qershorit.

Tashmë, pritet me interes një tjetër vendim i Gjykatës së Tiranës, e cila do të duhet që në ditët në vijim të gjykojë mandatin e kryebashkiakut të Tiranës, Erion Veliaj, i cili dorëzoi kërkesën për njohjen e mandatit nga Gjykata e Tiranës këtë të mërkurë.

Zguri është kundër, PS kërkon mandatet e këshillave në Kolegj

Partia Socialiste ka dërguar në Kolegjin Zgjedhor 4 padi, ku kërkon shpërndarjen e mandateve për këshilltarët bashkiakë të dalë nga zgjedhjet e 30 Qershorit. Padia e PS vjen pasi KQZ-ja e ka të pamundur të shpërndajë mandatet për këshilltarët bashkiakë, pasi kërkohet shumicë e cilësuar votash të anëtarëve të Komisionit Qendror të Zgjedhjeve, gjë që për momentin nuk është e mundur.

Shkaku është Klemt Zguri, i cili në të gjitha rastet ka votuar kundër shpërndarjes së mandateve, pasi kreu i KQZ nuk e njeh 30 qershorin si datë të ligjshme zgjedhjesh, duke respektuar dekretin e Ilir Metës. Aktualisht, PS kërkon nga Kolegji Zgjedhor shpërndarjen e mandateve në katër bashki: Ura Vajgurore, Konispoli, Devolli dhe Kuçova.

Ky veprim i PS vjen pasi kryetarët e rinj të bashkive të zgjedhur në 30 qershor, nuk mund të marrin dot mandatin e kryetarit pa bërë betimin në Këshillin Bashkiak. Rrjedhimisht, Partia Socialiste do të kërkojë nga Kolegji Zgjedhor shpërndarjen e mandateve për të gjitha bashkitë e vendit, me qëllim që të përmbyllet gjithë procesi elektoral i 30 qershorit dhe kryetarët e rinj të marrin mandatin e tyre.

Një situatë e ngjashme si kjo tani ka ndodhur në 2011, kur Kolegji Zgjedhor bëri certifikimin e mandateve për këshilltarët e zgjedhur të bashkisë së Tiranës. Sipas Kodit Zgjedhor, certifikimi i këshillave bashkiakë është i vlefshëm kur votojnë ‘pro’ jo më pak se 5 anëtar të KQZ-së. Kështu, në mungesë të shumicës absolute, pasi Klement Zguri voton kundër, Partia Socialiste është e detyruar të kërkojë shpërndarjen e mandateve nga Kolegji Zgjedhor.

Kolegji i kapur nga Rama? Pesë anëtarët i zgjodhi Nishani. Kalaja i dha Bashës bashkinë në 2011

PD ka nisur sulmin frontal ndaj Kolegjit Zgjedhor pas vendimit për rrëzimin e dekretit të Metës për anulimin e datës së zgjedhjeve, duke e cilësuar këtë institucion të kapur nga Rama. Po kush janë anëtarët e Kolegjit Zgjedhor dhe kush i ka zgjedhur ata? A po vepron PD me dy standarde?

Së pari, tetë anëtarët e Kolegjit Zgjedhor janë zgjedhur me datën 9 dhjetor 2016, nga Këshilli i Lartë i Drejtësisë, në atë kohë me kryetar Bujar Nishanin. Anëtarët janë zgjedhur përmes shortit. Në dhjetor të 2016 u zgjodh përmes shorti edhe Gjin Gjoni. Në atë kohë, KLD, kontrollohej nga Partia Demokratike, përmes ish-presidentit Bujar Nishani dhe një grupi anëtarësh. Pikërisht për shkak të kontrollit politik të KLD, në atë kohë pati shumë polemika dhe dyshime sa i takon shortit.

Së dyti, Astrit Kalaja, ka qenë pjesë e Kolegjit Zgjedhor edhe gjatë zgjedhjeve lokale të 2011, kur KQZ-ja dhe Gjykata e Zgjedhjeve i dhanë Lulzim Bashës Bashkinë e Tiranës, pasi humbi garën përballë Edi Ramës në përfundim të procesit të parë të numërimit. Konflikti nisi pas përfundimit të procesit të numërimit të rregullt ku Edi Rama fitoi zgjedhjet me një diferencë prej 10 votash. Në këtë kushtet, pas urdhrit publik të PD, në atë kohë në pushtet, KQZ vendosi me një procedurë ekstraligjore të numërojë disa vota të hedhura gabim, ku edhe përmbysi rezultatin e zgjedhjeve. PS, në atë kohë në opozitë, e ankimoi këtë procedurë në Kolegj, por gjykata e zgjedhjeve legalizoi vendimin e KQZ.

PS, bëri një tjetër padi në Kolegj, ku tashmë kërkoi pavlefshmërinë e zgjedhjeve, duke sjellë si fakte mospërputhjen e numrit të votave me numrin e zgjedhësve. Edhe këtë padi Kolegji Zgjedhor e rrëzoi, duke emëruar Lulzim Bashën në krye të Bashkisë së Tiranë. Pjesë e trupave gjykuese për shqyrtimin e padive të PD në vitin 2011 ka qenë edhe Astrit Kalaja. Në atë kohë Partia Demokratike dhe LSI i dolën në mbrojtje Kolegjit Zgjedhor, duke e konsideruar të pavarur. Tetë vjet më vonë, PD-LSI sulmojnë Kolegjin Zgjedhor, duke e akuzuar si të kapur dhe të trembur, ndonëse anëtarët e tij janë zgjedhur nga KLD-ja e Bujar Nishanit dhe një nga anëtarët ka qenë pjesë e Kolegjit në vitin 2011, pikërisht atij Kolegji që i dha Lulzim Bashës Bashkinë e Tiranës në tavolinë.

Së treti, Artur Malaj, i cili ka votuar pro mbajtjes së zgjedhjeve në 30 qershor, është konfirmuar në detyrë nga Komisioni i Pavarur i Kualifikimit, organi bazë i Vetingut. Komisioneri Publik ka vendosur që vendimin për konfirmimin e Malajt në detyrë ta ankimojë në Kolegjin e Apelimit. Ndërkaq, procesi i Vetingut për Astrit Kalajën ka nisur që në shtator të 2018. Ai nuk ka dalë ende para Vetingut, por gjetjet e konstatuara nga KPK nuk e ndryshojnë fatin e tij. Edhe për Ridvan Hadon dhe Linida Sinanajn Vetingu ka nisur që më 15 nëntor 2018. Të tre gjyqtarët e kanë marrë tashmë mesazhin nëse do të konfirmohen apo shkarkohen nga detyra, pasi kanë disa muaj që shkëmbejnë e-maile me KPK, ndaj vendimi i tyre kundër dekretimit të Metës nuk ka lidhje me procesin e Vetingut./Shqiptarja.com

New York Times dhe Washington Post: Zgjedhjet më 30 qershor

Vendimi i Kolegjit Zgjedhor për mbajtjen e zgjedhjen më 30 qershor ka tërhequr vëmendjen e dy prej mediave prestigjioze amerikane, New York Times dhe Washington post, të cilat kanë lexuar vendimin e dhënë nga institucioni më i lartë i drejtësisë për zgjedhjet. Vendimi i organi suprem të drejtësisë për zgjedhjet vuri “vulën”, këtë të hënë, se zgjedhjet do të mbahen duke mos pranuar kërkesën për çregjistrim e Partisë së Unitetit kombëtar nga lista zgjedhore.

Kolegji rrëzoi kërkesën e Partisë së Unitetit Kombëtar, për tu çregjistruar, si pasojë e dekretit të presidentit. Tashmë edhe ligjërisht, dekreti i Ilir Metës për anulimin e zgjedhjeve të 30 qershorit nuk njihet si i vlefshëm.

Në një shkrim “New York Times” dhe “Washington post” cilësuan se “Kolegji Zgjedhor në Shqipëri ka vendosur në favor të mbajtjes së zgjedhjeve lokale të dielën duke shmangur lëvizjen e presidentit Meta, për t’i anuluar ato. Kolegji Zgjedhor votoi në mënyrë unanime, me 5 vota pro dhe asnjë kundër, se Partia e Unitetit Kombëtar, e cila kërkoi të çregjistrohet bazuar në veprimin e Presidentit Ilir Meta, duhet të marrë pjesë në zgjedhjet e së dielës. Presidenti Meta anuloi mbajtjen e zgjedhjeve më 30 qershor, duke pasur frikë se votimi do të ishte “jodemokratik” pa partitë opozitare që e kanë bojkotuar atë.

Ky vendim u cilësuar anti-Kushtetues dhe parlamenti, prej 140 vendesh ka filluar një procedurë të gjatë për të rrëzuar Metën, edhe pse vetë socialistët nuk kanë 94 vota që do të kishin nevojë cilësojnë mediat e huaja.”

Realstory ka zbuluar të hënën strategjinë që do të ndjekë qeveria kundër dekretit të Presidentit Meta për anulimin e datës së zgjedhjeve dhe rrjedhimisht argumentet për shkarkimin e tij.

Në dokumentin e qeverisë përcaktohen të gjitha nenet që ka shkelur Presidenti dhe si duhet të veprohet ligjërisht në një rast të tillë, bazuar kjo në vendimet e mëparshme të Gjykatës Kushtetuese, por edhe në nenet e Kodit Zgjedhor.

Dokumenti sjell në vëmendje faktin se në Kushtetutë janë përcaktuar qartë kompetencat e Presidentit që është vetëm ajo e përcaktimit të datës së zgjedhjeve dhe jo anulimi i tyre. Një tjetër argument që përdor qeveria është se presidenti zgjat në mënyrë antikushtetuese mandatin e të zgjedhurve vendorë.

“BETEJA” PËR DEKRETIN, REALSTORY ZBULON STRATEGJINË E RAMËS KUNDËR PRESIDENTIT

Zgjedhje ka, dhe do jenë në 30 qershor (Jo se e thotë Rama, por Kolegji Zgjedhor)

Realstory.al e paralajmëroi më 13 qershor, se dekreti i Presidentit Ilir Meta për anulimin e zgjedhjeve do të merrte një gjykim ligjor, në mungesë të Gjykatës Kushtetuese, pikërisht në Kolegjin Zgjedhor. Kështu edhe ndodhi. Organi suprem i drejtesisë për zgjedhjet, i vuri “vulën” këtë të hënë.

Me një vendim të formës së prerë, pasi u tërhoq për më pak se gjysëm ore, Kolegji rrëzoi kërkesën e partisë së Unitetit kombëtar, për tu cregjistruaer, si pasojë e dekretit të presidentit. Tashmë edhe lijgërisht, dekreti i Ilir Metës nuk njihet si i vlefshëm, pasi Kolegji Zgjedhor vendosi të lërë në fuqi vendimin e Komisionit Qendror të Zgjedhjeve, për të mos çregjistruar Partinë Unitet Kombëtar nga zgjedhjet e 30 qershorit. Pra zgjedhjet do të mbahen më datë 30.

Nëse Kolegji Zgjedhor do ti jepte të drejtë PUK së Idajet Beqirit, atëherë edhe dekreti i Metës do të merrte fuqi, por indirekt edhe në këtë rast, pasi KQZ-ja do të duhej të kërkonte shtyrje të datës së zgjedhjeve për të riprintuar fletët e votimit nga e para pa praninën e logos dhe emrin e partisë Unitet Kombëtar.

Kjo procedurë gjithashtu do të kërkonte edhe ndryshim në Kodin Zgjedhor, duke detyruar Parlamentin që të mblidhej për të bërë disa ndryshime, për zgjatjen e mandatit të të zgjedhurve lokal. Në këto kushte, situata politike do të ndryshonte katërcipërisht, sepse kështu, në mundësinë që i krijon koha që nevojitet për të kryer ndryshimet në Kodin Zgjedhor dhe riprintimin e fletëve të votimit, opozita mund të rishikonte vendimin për të hyrë në zgjedhje.

Por kjo nuk ndodhi.

Kryetari i trupës gjykuese të Kolegjit Zgjedhor, i dha fund këtij debati dy javor me në dy fjali: “Kolegji Zgjedhor ka vendosur të rrëzojë kërkesën e Partisë Unitet Kombëtar kundër KQZ-së. Ky vendim është i formës së prere dhe nuk lejohet asnjë animim i tij”.

Trupa e gjyqtarëve të Kolegjit Zgjedhor që do të shqyrtojë kërkesën përbëhet nga Astrit Kalaja, Ridvan Hado, Tomor Skerli, Artur Malaj dhe Lindita Sinanaj, të cilët kanë votuar unanimisht për rrëzimin e padisë së bërë nga Partia Unitet Kombëtar.

Pas vendimit të dhënë nga Kolegji Zgjedhor, ka ardhur dhe reagimi i Presidentit. Ka qenë zëdhënsi Tedi Blushi që ka shkruar vetëm një fjali në rrjetet sociale: “Asnjë surprizë nga skeçi i radhës i orkestruar prej kohësh”.

Sot vendoset fati i dekretit të Metës në Kolegjin Zgjedhor

Ajo që Realstory.al tha më 13 qershor, merr jetë këtë të hënë vetëm. Kolegji Zgjedhor mblidhet këtë fillim jave për të shqyrtuar vendimin e KQZ-së, e cila mohoi pak ditë më parë kërkesën e Partisë Unitet Kombëtar për tu çregjistruar nga procesi zgjedhor. PUK e drejtuar nga Idajet Beqiri u shpreh para anëtarëve të KQZ-së se Presidenti i Republikës kishte nxjerr një dekret që anulonte datën e zgjedhjeve, për rrjedhojë, partia e tij kishte vendosur të respektonte këtë vendim të kreut të shtetit.

Megjithatë, Realstory.al paralajmëroi se kjo lëvizje e Idajet Beqirit ishte rruga nga e cila maxhoranca do të provonte ligjërisht vlefshmërinë ose jo të dekretit të kreut të shtetit, në mungesë të Gjykatës Kushtetuese, pasi pas rrëzimi të kërkesës së Partisë për Unitet Kombëtar nga KQZ, vendimi i kësaj të fundit shkoi në Kolegj Zgjedhor. Këtë të hënë pritet të mblidhet kjo gjykatë zgjedhore e cila do të marri në shqyrtim vendimin e KQZ-së, për të gjykuar vlefshmërinë ose jo të tij.

Një vendim në favor të partisë së Idajet Beqirit do ti jepte të drejtë dekretit të presidentit për anulimin e zgjedhjeve, ndërsa rrëzimi i kërkesës për çregjistrim nga zgjedhjet automatikisht rrëzon dhe dekretin e presidentit duke lejuar ligjërisht zhvillimin e zgjedhjeve. Trupa e gjyqtarëve të Kolegjit Zgjedhor që do të shqyrtojë kërkesën përbëhet nga Astrit Kalaja, Ridvan Hado, Tomor Skerli, Artur Malaj dhe Lindita Sinanaj.

Presidenti i Republikës Ilir Meta dhe opozita pretendojnë se dekreti për anulimin e zgjedhjeve është kushtetues dhe duhet të zbatohet nga të gjithë, ndërsa shumica e konsideron antikushtetues dhe për rrjedhojë ka nisur procedurat për shkarkimin e Presidentit.

Komisioni Qendror i Zgjedhjeve nuk e ka njohur dekretin e kreut të shtetit, duke vijuar përgatitjet për zhvillimin e procesit zgjedhor në 30 qershor. Nga ana tjetër, opozita dhe Presidenca kanë kërcënuar anëtarët e KQZ me burg. Në këto kushte, Kolegjit Zgjedhor do të thotë fjalën e fundit për përplasjen e paprecedentë në historinë e pluralizmit shqiptar.

Meta kapet pas dekretit: Juncker e ka gabim, zgjedhje s’mund të ketë

Presidenti i Repbulikës Ilir Meta ka folur në një intervistë për transmetuesin “Al Jazeera”, ku ka shprehur bindjen se më 30 qershor nuk do të ketë zgjedhje. “Nuk do të ketë zgjedhje më 30 qershor. Ky dekret është publikuar tashmë në Fletoren Zyrtare dhe të gjithë kanë detyrimin ta zbatojnë atë”, ka thënë ndër të tjera Meta. Për gazetarin John T. Psaropoulos, Ilir Meta ka thënë se dekreti për anulimin e zgjedhjeve ka hyrë në fuqi dhe duhet të zbatohet nga të gjitha palët. Ndërsa, lëvizjen e tij, e ka argumentuar si të nevojshme për të ruajtur paqen dhe stabilitetin në vend.

“Ky vendim i shërben paqes sociale, stabilitetit, duke shmangur përshkallëzimin e mëtejshëm e të pakontrolluar të situatës, që mund të çojë në një përplasje civile në vend ashtu siç edhe ju e keni parë gjatë zhvillimeve të muajit të fundit, sepse zgjedhjet pa opozitën, jo vetëm minojnë stabilitetin e vendit, por gjithashtu çdo shans pozitiv që Shqipëria të bëjë hapa përpara në procesin e çeljes së negociatave me BE-në sa më shpejt të jetë e mundur”, ka thënë Meta.

Partia për Unitet Kombëtar e Idajet Beqirit, pritet të dërgojë në Kolegjin Zgjedhor vendimin e KQZ-së për mos çregjistrimin si parti politike nga zgjedhjet e 30 qershorit. Në këtë mënyrë, në rast se Kolegji Zgjedhor lë në fuqi vendimin e marrë nga KQZ pak ditë më parë, atëherë merr miratimin e parë ligjor mbajtja e zgjedhjeve më 30 qershor, dhe rrëzohet dekreti i kreut të shtetit. Por, Ilir Meta shprehet se dekretin e anulimit të zgjedhjeve, në kushtet aktuale, nuk mund të kontestohet nga asnjë gjykatë tjetër në vend, veç Gjykatës Kushtetuese.

“I vetmi autoritet suprem që mund të shqyrtojë këtë dekret është Gjykata Kushtetuese, por ajo për të cilën dëshiroj t’ju siguroj është se ky diskutim dhe ky debat është humbje kohe, pasi ky dekret është publikuar tashmë në Fletoren Zyrtare. Tani në këto kushte ky dekret nuk mund të kontestohet nga asnjë gjykatë tjetër në vend. Dhe sigurisht, është një dekret që unë e kam firmosur para qytetarëve shqiptarë, duke marrë të gjitha përgjegjësitë për atë veprim”, ka thënë Meta.

Zhvillimi i zgjedhjeve më 30 qershor ka pasur miratimin e faktorit ndërkombëtar dhe Bashkimit Europian. Megjithatë, Meta, në intervistën për “Al Jazeera” është shprehur se Juncker nuk është informuar siç duhet për zgjedhjet e 30 qershorit.

“Jam i sigurt se ai nuk është informuar siç duhet për faktin se zgjedhjet e 30 qershorit praktikisht, ose në thelb janë thjesht votime dhe jo zgjedhje, sepse janë zgjedhje pa opozitën. Jam i sigurt se ai nuk është plotësisht në dijeni të gjithë situatës.Në këtë drejtim, ajo që ju thoni është korrekte, por tani nuk është më përgjegjësi e Komisionit Europian, sepse ky Komision e ka bërë tashmë një rekomandim pozitiv për Shqipërinë. Tani ky vendim do të merret në nivelin më të lartë të politikës europiane dhe mesazhet janë të qarta se zgjedhjet pa opozitën nuk ndihmojnë progresin europian të Shqipërisë”, ka thënë ndër të tjera Meta.

Intervistën e plotë te Ilir Metës e lexoni KËTU