PD përplaset me Komisionin e Venecias. Dy axhenda të ndryshme për takimet

Partia Demokratike ka reaguar pasditen e të shtunës, duke përgënjështruar sipas saj, lajmin se ekspertët e Komisionit të Venecias nuk do të kenë asnjë takim me Bashën apo përfaqësues të Partisë Demokrtike. “Lidhur me lajmin e mbërritjes së ekspertëve të Komisionit të Venecias në Shqipëri, disa media, duke iu referuar një axhende të papërditësuar, kanë njoftuar se Komisioni i Venecias nuk do të takohet me opozitën. Në të vërtetë, takimi me PD dhe LSI është planifikuar të jetë në 10 shtator, ora 08:00, në Rogner. Përfaqësues të opozitës në takim do të jenë Oerd Bylykbashi dhe Klajda Gjosha”, shkruan PD në njoftimin e saj.

Në fakt, ndonëse Partia Demokratike ka njoftuar se lajmi i mëparshëm është i referuar nga ‘axhenda e papërditësuar’ e Komisionit të Venecias, nga ky institucion nuk ka asnjë konfirmim për takimin me përfaqësues të opozitës. Të paktën, deri në orën 16:35 të pasdites, në faqen zyrtare të Komisionit të Venecias, nuk ka asnjë ndryshim apo përditësim të axhendës, siç pretendon Partia Demokratike.

“Një delegacion i Komisionit të Venecias do të vizitojë Shqipërinë në kuadër të përgatitjes së projekt-opinionit për kompetencat e Presidentit për caktimin e datës së zgjedhjeve në një Sistem Parlametar. Delegacioni do të takojë autoritetet e mëposhtme shqiptare: Presidentin e Shqipërisë, Kryeministrin, Kryetarin e Kuvendit dhe përfaqësuesit e mazhorancës dhe opozitës në Kuvend, përfshirë Komisionin e Posaçëm të Hetimit, si dhe Ministrin e Brendshëm, përfaqësuesit e Komisionit Qendror të Zgjedhjeve dhe ushtruesin e detyrës së Kryetarit të Gjykatës Kushtetuese. Drafti i opinionit është në rendin e ditës të seancës së tetorit 2019 të Komisionit”, shkruhet në të gjithë njoftimin e Komisionit të Venecias, pas njoftimit të bërë nga Partia Demokratike, se ka një axhendë të ndryshuar të përfaqësuesve të këtij komisioni.

Pra, siç shkruhet e zeza në të bardhë, të paktën nga njoftimi zyrtar nuk ka asnjë axhendë të ndryshuar. Ndërkohë, fakti që Venecia shmang takimet me opozitën jashtëparlamentare dhe fut në axhendë takimet me opozitën në parlament, duket se nuk është pritur mirë nga Selia Blu, që ndoshta ka nënkuptuar se institucioni më i rëndësishëm i gjykimit konstitucionalit në Europë dhe jo vetëm, njeh ‘opozitë të ligjshme’ atë në parlament, që voton ligje e merr vendime për vendin. Reagimi i Partisë Demokratike erdhi pas më shumë se 6-të orësh nga publikimi i axhendës së Komisionit të Venecias me takimet që ka parashikuar të zhvillojë në Shqipëri në datën 10 dhe 11 shtator./Realstory.al/

ZBARDHET AXHENDA, EKSPERTËT E VENECIAS PËRJASHTOJNË BASHËN NGA TAKIMET

Meta sfidon nga 2751 metra lartësi: Kaloj çdo pengesë (edhe shkarkimin?)

Kreu i shtetit, Ilir Meta ka zgjedhur majën e malit të Korabit, që ndodhet 2751 metra mbi nivelin e detit, që të sfidojë mazhorancën, vetëm pak ditë para se të nisë sesioni i ri parlamentar, pasi në shtator komisioni hetimor do të nxjerrë konkluzionet për shkarkimin e Presidentit. I braktisur pothuajse plotësisht nga faktori ndërkombëtar, por edhe nga kreu i opozitës, i cili nuk pranoi të regjistrohet për 13 tetorin, pavarësisht se Meta i shtyu zgjedhjet e 30 qershorit për të, kreu i shtetit ka zgjedhur që mesazhet politike, kohët e fundit edhe më të rralla, t’i japë nga lugina dhe nga male, si në Kosovë, ashtu edhe në Shqipëri.

Të premten në mëngjes, ai ka nxjerrë një postim në rrjetet sociale, duke treguar se ishte në majën e Malit të Korabit, nga ku ka dhënë një mesazh sfidues për mazhorancën, e cila po pret me padurim votimin për shkarkimin e tij dhe ngritjen e Gjykatës Kushtetuese për vulosjen e këtij vendimi. “Në majën më të lartë të maleve shqiptare, mbi Korab, aty ku duket sikur prek qiellin me dorë. Ngjitja ishte sfidë jo e lehtë, por bukuritë dhe monumentet e rralla natyrore të këtij mali madhështor, të frymëzojnë dhe të japin energji të reja për të kaluar me sukses çdo pengesë!”, shprehet Meta, duke dhënë mesazhin se ai nuk e ka pasur të lehtë ngjitjen në krye të shtetit, por edhe duke paralajmëruar se do të kalojë pengesën e shkarkimit, që duket se po i afrohet gjithnjë e më shumë. Megjithatë, krahasimi metaforik i Metës duket paksa i ekzagjeruar, ndoshta edhe për faktin, ashtu siç ai shprehet në pjesën e parë të mesazhit se aty i duket sikur prek qiellin me dorë.

Ndërsa një tjetër sfidë e Metës është 13 tetori, që deri më sot është njohur vetëm nga LSI dhe disa aleatë të vegjël të opozitës, të cilët më shumë e kanë pranuar për faktin se mbetën pa asnjë pushtet për shkak të aksionit opozitar të drejtuar nga Basha, sesa mendojnë që do të ketë zgjedhje me këtë datë. Gjithsesi, nga e hëna, kreu i shtetit rikthehet në zyrë, ndërkohë që Komisioni Hetimor ka vijuar punën gjatë gjithë verës për përgatitjen e relacionit për shkarkimin e tij.

Një nga informacionet e publikuara gjatë gushtit për punën e kryer nga Komisioni Hetimor janë mbledhja e të dhënave të policisë për krimet zgjedhore para anulimit të 30 qershorit, duke qenë se Meta ka deklaruar që kishte informacione se po përgatiteshin krime të rënda gjatë procesit zgjedhor. Por, nga të dhënat e policisë së shtetit rezulton se kishte pasur vetëm 2 kallëzime për krime elektorale, ndërsa pas 10 qershorit, u proceduan 192 persona, duke shkaktuar kështu një krizë, jo vetëm institucionale, por edhe goditje ndaj rendit kushtetues. Gjithsesi, përveç institucioneve që janë vënë në lëvizje, një rol të rëndësishëm në procesin e shkarkimit të Presidentit pritet të ketë edhe Komisioni i Venecias, që më 9 shtator do të zbarkojë në Tiranë. / Realstory.al

Në majën më të lartë të maleve shqiptare, mbi Korab, aty ku duket sikur prek qiellin me dorë. Ngjitja ishte sfidë jo e…
Gepostet von Ilir Meta am Freitag, 30. August 2019

Shkarkimi i Metës në prag. Venecia dërgon delegacion ekspertësh në Tiranë

Një delegacion i Komisionit të Venecias do të mbërrijë në Shqipëri në shtator për t’u konsultuar në lidhje me kërkesën që Kuvendi i Shqipërisë i ka dërguar në lidhje me nismën për të shkarkuar presidentin e Republikës, Ilir Meta për shkelje të rëndë të kushtetutës.

Ekspertët e Komisionit të Venecias do të vizitojnë Tiranën zyrtare në datat 9-11 shtator dhe do të zhvillojnë takime me presidentin Meta, kryeministrin Rama si dhe me përfaqësues të Kuvendit, kryetarin Gramoz Ruçi dhe anëtarët e Komisionit hetimor për shkarkimin e presidentit.

Vizita e delegacionit të Komisionit të Venecias vjen pas kërkesës së një grupi deputetësh së PS për shkarkimin e presidentit Ilir Meta, për të cilin është ngritur edhe një komision i posaçëm hetimor.

Ka qenë kryetari i Kuvendit Gramoz Ruçi i cili i është drejtuar me një kërkesë zyrtare Komisionit të Vecencias që të japë asistencën e tij në lidhje me procedurat parlamentare që ka ndërmarrë Shqipëria për të shkarkuar presidentin. Duhet thënë se kjo është një nismë që ndodh për herë të parë në Shqipëri dhe për të mos lënë vend për keqinterpretime, kuvendi ka kërkuar ndihmën e Komsionit të Venecias, që shquhet për paanëshmërinë e tij.

Ndërkaq Komisioni i Venecias e ka përfshirë kërkesën e kuvendit të Shqipërisë në axhendën e punimeve të tij.

Me futjen në axhendë të kësaj kërkese, Komisioni i Venecias pritet që ta shqyrtojë këtë çështje në mbledhjen e tij më të afërt që është në tetor. Por nisur nga praktika e punës e Komisionit të Venecias, përpara se të japë mendimin final sa i takon kërkesës së mazhorancës, pritet që të japë një opinion të ndërmjetëm. Me shumë gjasa gjatë muajit shtatorit ky opinion do të jetë në dorën e Kuvendit dhe do të shfrytëzohet nga mazhoranca pa humbur kohë. Kështu, nëse opinioni i ndërmjetëm i dhënë nga Venecia do t’i japë të drejtë mazhorancës, duke bërë “fajtor” Presidentin Ilir Meta, ajo do të vijojë pa humbur kohë me procedurat e shkarkimit të kreut të shtetit. Sipas të gjitha të dhënave pritet që presidenti Meta të shkarkohet në shtator. Dhe fill pas vendimit të parlamentit çështja do t’i kalojë Gjykatës Kushtetuese e cila do të thotë fjalën e fundit. Gjykata Kushtetuese pritet të ngrihet shumë shpejt dhe deri në shtator do të jetë gati të thotë mendimin e saj./realstory.al

Kuvendi letër “Venecias’, kërkon opinion për shkeljet kushtetuese të Metës, Ruçi: Duam përgjigje të shpejtë

Kuvendi i Shqipërisë i ka dërguar një letër Komisionit të Venecias, ku i kërkon një opinion lidhur me rolin e Presidentit të Republikës në procesin zgjedhor. Në letrën e firmosur nga kryetari i Kuvendit Gramos Ruçi, Venecias i kërkohet një opinion për tetë pika të parashtruara në letër. Duke bërë një përblmedhje të gjithë situatës, nga dekreti i vitit të kaluar për miratimin e datës së zgjedhjeve të 30 qershorit, mbajtjen e procesit nga KQZ në bazë të Kodit Zgjedhor, dekretin e dytë të Ilir Metës për anulimin e datës së zgjedhjeve, e deri te vendimi i Kuvendit për shkarkimin e Presidentit, Gramoz Ruçi i kërkon një opinion Komisionit të Venecias, së pari për rolin e Presidentit të republikës në regjimet parlamentare si Shqipëria, në raport me pushtetet e shtetit sa i takon proceseve zgjedhore.

Në pikën e dytë, Gramoz Ruçi pyet Komisionin e Venecias lidhur me “detyrimet kushtetuese dhe konventore që i imponohen Presidentit të Republikës në regjimet parlamentare, siç është edhe Shqipëria, në ushtrimin e kompetencës për caktimin e datës së zgjedhjeve”. Në pyetjen pasardhëse, Kuvendi kërkon të di nëse “ka kufizime në ushtrimin e kësaj kompetence, të përmendur në pikën dy, që rrjedhin nga e drejta demokratike zgjedhësve për ta ushtruar këtë të drejtë sipas marrëveshjes kushtetuese, me siguri dhe parashikueshmëri?”.

Një tjetër pikë, që Kuvendi kërkon opinion nga Komisioni i Venecias, është nëse “Kompetenca e Presidentit të Republikës për caktimin e datës së zgjedhjeve, është e drejtë e tij për të vendosur ushtrimin e e sovranitetit të popullit, apo një detyrum i tij për të garantuar cilësisht ushtrimin e sovranitetit popullor, brenda kufizimeve që sovrani ka vendosur nëpërmjet Kushtetutës së miratuar prej tij”, thuhet në letër.

Gjithashtu, në pikën pesë të letrës, Kuvendi kërkon një opinion nëse “Presidenti, pasi e ka caktuar datën e zgjedhjeve dhe organet e administrimit të zgjedhjeve janë duke kryer veprimet sipas ligjit, e anullon dhe cakton një datë tjetër, a kemi cenim të parimeve të së drejtës për të zgjedhur dhe të sigurisë kushtetuese?”, thuhet në letër.

Pika e gjashtë, është në funksion të pikës së pestë, ku kërkohet të mësohet “nëse në rastin e mësipërm kemi ndërhyrje të Presidentit të Republikës në procesin zgjedhor, duke cënuar të drejtën e subjekteve zgjedhore për të konkurruar në mënyrë të barabartë dhe të lirë”.

Në pikën e parafundit, Kuvendi kërkon opinion, se nëse “Dekreti i Presidentit për anulimin e datës së 30 qershor si datë të mbajtjeve të zgjedhjeve, që zgjat qëndrimin në detyrë të të zgjedhurve të mëparshëm, a respekton parimin e periodicitetit të zgjedhjeve”.

Në pyetjen e fundit, Gramoz Ruçi i drejtohet Komisionit të Venecias: “Duke patur parasysh se ndryshimi i datës së zgjedhjeve ndikon tek pritshmëritë ligjore për subjektet zgjedhore dhe zgjedhësit, a konsiderohet se cenohet siguria juridike në këto raste? A është i lidhur cenimi i sigurisë juridike me pasojat që vijnë apo mjafton shkelja e parashikimeve kushtetuese dhe cenimi konsiderohet i kryer”, përfundojnë tetë pikat, ku Kuvendi kërkon opinion nga Komisioni i Venecias.

Në fund, Kryetari i Kuvendit i kërkon Komisionit të Venecias, që opinioni i tyre për këto kërkesa do të ishte shumë me vlerë të jepej sa më shpejt në kohë, për shkak të situatës ku ndodhet vendi. Pritet që opinioni i Komisionit të Venecias të jetë vendimtar në ecurinë e punës së Komisionit Hetimor për shkarkimin e Ilir Metës, pasi sipas mazhorancës kreu i shtetit ka shkelur Kushtetutën. Mazhoranca po ndjek me kujdes çdo hap ligjor, duke kërkuar mendim edhe nga ky organ ndërkombëtar konstitucionalit, çka do të thotë, se vendimi përfundimtar për shkarkimin e Ilir Metës, do duhet të jetë i “pakundërshtushëm nga të gjithë”, siç dhe u shpreh ambasadori i Italisë në Tiranë në studion e “Real Storyt” të gazetarit Sokol Balla.

Letra e Plote e Kuvendit drejtuar Komisionit te Venecias