City bën detyrën. Chelsea lë pas krizën

Manchester City ka fituar në transfertë ndaj Everton me rezultatin 3-1. Skuadra e Pep Guardiolës shënoi në të 24` me Garbiel Jesus, ndërsa vendasit barazuan me Dominic Calvert-Lewin në të 33`. Në një moment ndeshja u duk se po shkonte drejt barazimit, derisa Riyad Mahrez shënoi golin e avantazhit për Cityn në të 71` dhe Sterling trefishoi në të 84`.

Me fitoren e të shtunës, City mban vendin e dytë në Premier League me 16 pikë, 5 më pak se Liverpool që fitoi pasditen e të shtunës, duke vendosur një rekord me 7 ndeshje pa humbje apo barazim.

Është rikthyer te fitorja edhe Chelsea që mundi në shtëpi Brighton me rezultatin 2-0. Ishte Jorginho në të 50` që shënoi goline avantazhit për “Blutë” e Londrës, ndërsa William në të 76` dyfishoi duke i dhënë tre pikë skuadrës së tij. Chelsea ngjitet në vendin e gjashtë me 11 pikë pas fitores të së shtunës.

Në sfidat e tjera, Aston villa barazoi 2-2 West Ham, ndërsa Crystale Palace mundi në shtëpi NorWich. Me shumë vështirësi fitoi dhe Tottenham ndaj Southampton, duke marrë tre pikë me shumë vlerë që e ngjisin në vendin e 4 të Premier League. Wolverhamton mundi gjithashtu në shtëpi Watford me rezultatin 2-0.

Ngjela: S`ka krizë politike. SHBA kundër bojkotit të Parlamentit

Avokat Spartk Ngjela, i ftuar në studion e emisionit “Real Story” të gazetarit Sokol Balla, në News 24, është shprehur se PD gaboi me djegien e mandateve, pasi nuk kuptoi se SHBA dhe Gjermania nuk do e pranonin këtë vendim. Sipas tij, largimi nga Parlamenti është koncept anti-perëndimor. “Duhet të përcaktojmë se krizë nuk ka. Për mua kriza është në parlament. Pushteti luhet atje. Opozita iku, tani ka bërë dy gabime të rënda opozita në funksion të vetvetes. E para, nuk kuptoi që SHBA dhe Gjermania nuk do e pranonte bojkotin e parlamentit. Bojkoti është koncept anti-perëndimor. E bën dhe doli fitimtar Saliu dhe Basha. Nuk ka rëmdësi se çfarë ka pasur në mendje. Ikën nga parlamenti, nuk ta pranon perëndimi. Sepse e kupton që je i paaftë”, tha Ngjela.

Më tej, ai shtoi se PD bëri gabim që u largua në Kuvendi. Sipas tij, kriza mund të shkaktohej në Parlament duke bllokuar mazhorancën me vota. Ndërkohë, Ngjela tha se opozita nuk ka rrugëdalje tjetër veç dialogut me Kryeministrin Edi Rama. “Përse të duhet më shumë? Rregullo sistemin zgjedhor, kërko ndihmë nga perëndimit. Një rast ka në historinë botërore; socialistët e Italisë, ikën nga parlamenti, ua mori vendet Partia Komuniste. Ata kishin arsye shumë të madhe. Momenti duket, opozita e pa që nuk ka rrugëdalje. Mirëpo nuk është në parlament. Rama më mirë do të bashkëpunojë me këta, se sa nuk di se kush drejton opozitën parlamentare”, tha Ngjela.

Avokat Spartak Ngjela shprehet gjithashtu se situata do fillojë të jetë në favor të opozitës, në momentin që një delegacion ndërkombëtar do takohet me përfaqësuesit e saj. “Rama tani s`mund të thotë që nuk më lë opozita. Janë tre-katër grupe konfliktesh. Politika do fillojë të ndryshojë në favor të tyre, kur një delegacion i rëndësishëm që vjen këtu t`i takojë. Kriza është kur unë bllokoj qeverinë, s`ka vota për të marrë vendime. Kjo është krizë politike”, tha Ngjela. /Realstory.al/

Kriza e Brexit po e bren nga brenda politikën britanike

Me thirrjet “Orderrrr”- John Bercow, kreu i parlamentit britanik u bë shumë i njohur. Tani ai largohet, parlamenti britanik ndodhet në pushim të detyruar, Britania e Madhe – nëna e demokracisë si kurrë më parë në krizë.

John Bercow është njeri me humor të hollë. Herë pas here kreu i parlamentit britanik joshej nga një retorikë pa kufi, e megjithatë gjithmonë ishte më shumë se një kryetar, që thjesht ndjek planin e ditës dhe kujdeset që të mos ketë shumë fyerje. Në fjalën e lamtumirës, John Bercow tha, se e shihte veten si zëdhënës për ata të rreshtit të fundit, pra si dikush që kujdesej që të drejtat e deputetëve të mos shkeleshin me këmbë nga luanët e radhës së parë. Dhoma e Ulët duhet të jetë mirënjohëse. Por edhe në vlerësimin për “speaker”-in dhe rolin e tij drejtues u duk qartë, se sa të ndara janë frontet në politikën britanike.

Në një kohë që opozita dhe konservatorët e moderuar i drejtuan fjalë të ngrohta John Bercow që largohet në fund të tetorit, disa krerë të konservatorëve nuk e fshehën dot përbuzjen. Ata mendojnë se kryetari i parlamentit ka qenë i njëanshmëm në favor të opozitës. Në një kohë që ai ka qenë i angazhuar për të drejtat e parlamentarëve kundrejt një qeverie fuqiplotë dhe kërcënuese.

Sulm kundër parlamentarizmit

Por konservatorët e djathtë donin të hakmerreshin dhe ta shkelnin traditën që “speakerit” nuk i vendosej kundërkandidat në zonën e tij zgjedhore. Me dorëheqjen John Bercow i parapriu goditjes që do të vinte nga partia e tij. Lufta mes qeverisë dhe parlamentit ndërkohë është kaq e ashpër, saqë përkrahësit e Boris Johnsonit janë të gatshëm t’i fshijnë edhe etiketat e fundit të mirësjelljes në këtë shtëpi të nderuar parlamentare, vetëm e vetëm që t’i hapin rrugën Boris Johnsonit për Brexit.

“Ne po e dobësojmë vetë këtë parlament duke rrezikuar veten”, u dha si porosi John Bercow deputetëve që duhet të bëjnë një pushim të detyruar 5 javor. Por ai për të cilin u tha ky paralajmërim i mbyll veshët. Boris Johnson do të donte të qeveriste sipas stilit të burrave të fortë në Turqi, Rusi apo diku tjetër pa përzierjen e bezdisshme të parlamentit.

Fushatë propagandistike kundër deputetëve

“Tradhtarë të vullnetit të popullit” është shkruar në pllakate protestuese në Westminster. Zgjedhja dashakeqe e këtyre fjalëve nga shtypi bulevardesk i djathtë, është e qëllimshme, bashkë me kryeministrin, ata duan të bindin qytetarët, se parlamenti është një kthinë muhabetesh pa bereqet, ku shpërdorohet koha, në vend që të realizojë shpejt e pa vonesë vullnetin e shumicës për një Brexit të ashpër. Denigrimi i deputetëve duke i quajtur ata frikacakë, budallenj, dhe të pavendosur është repertori standard i Boris Johnsonit.

E me këtë ai e hedh sopatën tek rrënjët e demokracisë parlamentare. Përfaqësuesit e popullit nuk kanë janë zbatues të pafjalë të vullnetit të shumicës të qarqeve të tyre zgjedhore. Ata kanë detyrim para të gjithë qytetarëve dhe luftojnë për të mirën e çdo qytetari në komunitet. Edhe sikur në Nottingham një shumicë të vonte për t’u hedhur nga aeroplani, është detyra e secilit deputet t’u sqarojë qytetarëve, që në avion nuk ka parashuta. E nëse duan prapë të hidhen, ata duhet edhe t’i ndalin në këtë hap në rast nevoje.

E pikërisht këtë kanë bërë deputetët në Dhomën e Ulët me ligjin kundër një Brexiti të ashpër pa marrëveshje në minutën e fundit. Shumë prej tyre e nënvlerësuan vështirësinë e daljes nga BE, kur votuan para dy vjetësh për largimin nga unioni. Ndërkohë ky plan është kthyer në një helm të fortë politik, që po e shkatërron nga brenda politikën britanike. E për përpjekjet e tyre për të penguar rënien ekonomike dhe politike, ata vihen me shpatulla pas muri. Fyerjet e madje kërcënimet për vrasje në mediat sociale janë bërë të zakonshme.

Nëna e demokracisë po vetëçmontohet

Britania e Madhe ka qenë gjithmonë krenare për institucionet qindravjeçare, traditat e saj, ndoshta edhe me disa rregulla të çuditshme. Imazhi si nëna e demokracisë së patundur ishte pjesë e rëndësishme e imazhit britanik, pjesë e reputacionit politik të këtij vendi në botë. Por që nga fillimi i krizës së Brexit, britanikët humbën fillimisht imazhin se drejtohen nga arsyeja e pragmatizmi. E tani fqinjët e shokuar, duhet të shohin se si qeveria në Londër paralizon institucionet demokratike, dëmton imazhin dhe funksionimin e saj.

Deputetët në Dhomën e Ulët duhet të shkojnë tani në pushim të detyruar dhe deri pak para datës së Brexitit nuk mund të bëjnë dot asgjë. Ata bënë të pamundurën për t’i lidhur duart Boris Johnsonit. Por nëse, ligji i ri kundër një Brexiti të parregulluar është aq i fortë sa ta frenojë kryeministrin, kjo nuk dihet. Sidomos parlamenti është i pambrojtur nga spostimi që i bëhet, si psh pushimi i detyruar. Në javët e ardhshme kryeministri në Londër mund të bëjë ç’të dojë, sepse nuk ka instancë të kontrollit demokratik. E kjo është një rrethanë shumë e rrezikshme për një kryetar qeverie që ka marrë kursin e shkatërrimit./DW/

Influenca ruse sjell në Tiranë zyrtarin e lartë të DASH

Frika për influencën ruse në Ballkanin Perëndimor, të paralajmëruar, jo vetëm nga SHBA, por edhe nga BE, do të sjellë në Tiranë një të dërguar special nga Departamenti i Shtetit. Drejtori për Europën Qendrore dhe Jugore në Departamentin Amerikan të Shtetit, David Kostelancik, do të jetë këtë javë në Tiranë, ku do të zhvillojë takime me përfaqësuesit e lartë të shtetit shqiptar.

Vizita e tij ndodh në një moment kyç të vendit tonë, pikërisht pak javë para vendimit për negociatat me BE, por edhe në kohën kur kriza ka mbërthyer klasën politike, ndërkohë që kreu i opozitës, Lulzim Basha, është vënë nën akuzë nga prokuroria shqiptare për pastrim parash dhe falsifikim dokumentesh për paratë e përdorura për të lobuar në SHBA për të cilën po hetohet edhe nga FBI. Basha akuzohet se ka fshehur financimin prej 650 mijë dollarëve në SHBA për fushatën e elektorale të vitit 2017. Prokuroria deklaron se njëra nga këto pagesa rezulton të jetë bërë nga “Biniatta Trade”, që rezulton një kompani fantazmë, e regjistruar në Edinburg të Skocisë dhe është në pronësi të rusëve dhe pjesë e një zinxhiri kompanish të regjistruara në Belize, një shtet i Amerikës Qendrore i njohur si “parajsë fiskale”.

Megjithatë, ky nuk është shqetësimi i vetëm për influencën ruse në Ballkanin Perëndimor, e sidomos në Shqipëri, duke parë edhe zhvillimet e fundit në vend, ku mediat ruse i kanë bërë jehonë deklaratave të kreut të shtetit, Ilir Meta kundër amerikanëve dhe reformës në drejtësi. Një prej tyre ka qenë portali rus regnum.ru i cili ka pasqyruar çdo deklaratë të presidentit shqiptar gjatë dy muajve të fundit. Vetëm dy ditë më herët portali ka pasqyruar sulmin e presidentit Meta kundër asaj që ai e cilëson si “Ramaforma” dhe që akuzon kryeministrin që së bashku me amerikanët kanë penguar hedhjen e shortit për KED-në dhe zgjedhjen e anëtarëve të gjykatës kushtetuese.

Duke marrë shkas nga këto fakte dhe nisur nga fakti që SHBA është partner strategjik i Shqipërisë prej vitesh, diplomati amerikan pritet të ketë një sërë takimesh me politikën shqiptare. Sipas Vizion Plus, diplomati amerikan do të zhvillojë një takim me kryetarin e Partisë Demokratike, Lulzim Basha ditën e enjte, i cili pra është nën akuzë 650 mijë USD, që dyshohet se janë para ruse.

David Kostelancik është një diplomat karriere. Më parë ai ka qenë pjesë e stafit të ambasadës amerikane në Tiranë dhe e njeh shumë mirë situatën politike në Shqipëri, por edhe politikën e rajonit. Influenca ruse ka shqetësuar SHBA dhe BE, jo vetëm për Ballkanin, por edhe për vendet e tjera, anëtare të BE. Para pak kohësh, Merkel deklaroi se paratë ruse po përdoren për financimin e partive populiste, ndërkohë që Ministri italian i Brendshëm Mateo Salvini po përballet së fundi me akuzat se ai ka përfituar financime nga kompani ruse për fushatën zgjedhore, ashtu si Basha në Tiranë. / Realstory.al

Ambasadori në largim i Austrisë tregon detajin, Sattler: Kriza do zgjidhet

Ambasadori i Austrisë në Shqipëri, Johan Sattler, ka mbyllur shërbimin në vendin tonë, për të marrë një tjetër detyrë diplomatike, duke shkuar po ambasador, në Bosnje Hercegovinë. Me rastin e largimit të tij nga Shqipëria, është zhvilluar një mbrëmje, ku i ftuar ka qenë dhe kryeministri Edi Rama. Gjatë fjalës së tij mbajtur përpara të pranishmëve, ambasadori Sattler, është shprehur se ‘kam bindjen se kriza do të zgjidhet shpejt’, duke lënë të kuptohet, se diçka është duke ndodhur për t`i dhënë fund krizës të tej zgjatur politike në vend.

“Në Shqipëri më thanë se nuk mërzitesh kurrë, dhe në fakt këtë e kam vlerësuar dhe e kam përjetuar gjatë gjithë kohës. Jam i bindur se do të ketë një zgjidhje të krizës. Jam mjaft i lumtur që këtu ndodhet edhe kryeministri, kemi mjaft miq këtu që kemi punuar ngushtë gjatë këtyre viteve. Këtu nuk ka ndasi etnike apo fetare dhe patjetër ka mundësi për t’u bërë të gjithë së bashku. Duhet kujdes edhe me fjalët, pasi ato kanë edhe pasoja. Nuk do të ketë demonstrime, mëreni me qetësi dhe shpresoj të qëndroni këtu me mua”, tha Sattler.

Ndonëse nuk dha sqarime për këtë deklaratë, Johan Sattler si pjesë e ambasadave mike të vendit tonë, ka treguar një detaj, se pavarësisht qëndrimeve publike të palëve, nën dhe ka një përpjekje për të kthyer vendin në normalitet. Megjithatë, do të duhet të pritet fillimi i muajit shtator, për të parë rrjedhën e ngjarjeve dhe rolin e Quintit të ambasadorëve, për të kuptuar më qartë se çfarë do të ndodhë me situatën në vend.

Ndërkohë, gjatë fjalës së tij, Kryeministri Edi Rama i ka shprehur mirënjohjen ambasadorit austrika, duke u shprehur se është moment shumë prekës, “për t`iu thënë lamtumirë”. “ Sa i përket Shqipërisë, gjithmonë e duan më shumë atë. Shprehim mirënjohjen për ju ambasador për atë që keni bërë. Një zonjë po kujdeset për ju. Ky është një moment mjaft prekës për t’iu thënë lamtumirë. Na ka bërë të ndihemi mirë dhe na ke pranuar ashtu sikur unë jam. Me të vërtetë, iu duan shumë për gjithçka keni bërë”, tha Rama.

LSI kundër Bashës: Kriza zgjidhet me kompromis (shpreson ende te 13 tetori Metës)

Pretendimet e PD për dënimin e Agim Kajmakut në Greqi në vitin 2003, kanë rikthyer dhe njëherë debatin për zgjedhjet lokale. Të paktën, në rradhët e opozitës, është LSI që artikulon mbajtjen e zgjedhjeve lokale dhe parlamentare, në një ditë të vetme. Me anë të një reagimi, ish-deputeti i LSI, Edmond Panariti shkruan se ‘vetëm zgjedhjet e menjëhershme lokale dhe parlamentare”, krijojnë mundësinë për të dalë nga gremina. Sipas Panaritit, zgjedhjet duhet të mbahen ‘brenda afatit kushtetues’, duke u shprehur se ’13 tetori është kushtetues’.

“Sigurisht në afatin më të afërt kushtetues të mundshëm. Trembëdhjetë tetori është afat kushtetues, i dekretuar tashmë. Është datë në fuqi dhe e pa rrëzuar nga gjykatat supreme të vendit. Interpretimte mbi validitetin nuk mundet ti bëjnë partitë dhe politikanët, as komisionet dhe kolegjet zgjedhore, por vetëm ligji dhe kushtetuta. Por koha ecën dhe datat treten. Bashkë me to dhe shpresa për legjitimitet dhe kushtetueshmëri në këtë vend”, shkruan ndër të tjera Panariti.

Pra, sipas ish-deputetit të LSI, 13 tetori është datë kushtetuese pasi nuk është rrëzuar nga asnjë gjykatë supreme në vend. Për kujtesë, 13 tetori është rrëzuar nga gjykata supreme e zgjedhjeve në vend, Kolegji Zgjedhor. Ishte kjo gjykatë që njohu zyrtarisht 30 qershorin pas dekretit të Ilir Metës për të anuluar këtë datë zgjedhjesh, duke i hapur rrugë procesit legjitim sipas kushtetuës. Gjithashtu, 13 tetori vërtetë nuk është rrëzuar si datë kushtetuese e zgjedhjeve, zyrtarisht nga një gjykatë, por e vetmja gjykatë që ka këtë tagër, është Gjykata Kushtetuese.

Ky është vullnet i ndërkombëtarëve, të cilët në mbështetje të rendit kushtetues, duke dalë garant për zhvillimin e zgjedhjeve lokale të 30 qershorit, deklaruan pas këtij procesi, se “ligjshmëria ose jo e zgjedhjeve mund të gjykohet vetëm nga Gjykata Kushtetuese në vend”, u shpreh Matheë Palmer, Zëvendës Ndihmës Sekretari Amerikan i Shtetit, pak ditë pas mbajtjes së zgjedhjeve të 30 qershorit. Pra, 13 tetori, që opozita e njeh si datë kushtetuese, në fakt është një datë normale, ku nuk mund të mbahen zgjedhjet pa pasur një vendim të Gjykatës Kushtetuese për të së pari.

Gjithashtu, rrëzimi i 13 tetorit ka rënë edhe për një arsye tjetër. Po ndërkombëtarët dhe misioni vëzhgues i zgjedhjeve, ODIHR, raportoi sygjeroi pas 30 qershorit, se ‘verdiktin përfundimtar për zgjedhjet do ta jepnin gjykatat në vend”. Në fakt, gjykatat e shkallëve të para në vend njohën dhe vërtetuan mandatet e të zgjedhurve të 30 qershorit, një vendim që u mor si pasojë e vendimit të një gjykate supreme, Kolegjit Zgjedhor, që njohu pikërisht procesin zgjedhor.

Megjithatë, Panariti, ndonëse përpiqet që të promovojë 13 tetorin si datë kushtetuese, ai shkruan se “unë kam bindjen se përsëri mundemi që edhe në “Zeitnot” apo “Last minute” me vullnet dhe kompromis politik, procesi mund të rikthehet dhe të rimerret nga fillimi, duke e futur atë në shtrat kushtetues dhe në afate ligjore, duke garantuar garë, alternativa dhe sidomos besueshmëri dhe gjithë pranim. Tashmë nuk jemi thjesht vetëm ne kushtet e ilegjitimitetit zgjedhor , por ndodhemi të ndotur me kriminalizim madje edhe pa patur konkurrence dhe konkurente”, shkruan Panariti. Nga kjo deklaratë e ish-deputeti të LSI, kuptohet qartë se tashmë kjo forcë politike, ndryshe nga PD, kërkon kompromis për t`u futur në zgjedhje, madje duke mos cituar në asnjë moment dorëheqjen apo ‘zgjedhje pa Edi Ramën’ Kryeministër.

Meta sheh “armiq të huaj”: Po kërkohet gjakderdhje, kriza në Shqipëri lidhet me Kosovën

I ftuar në një emision satirik në Kosovë, Presidenti Ilir Meta ka folur shumë seriozisht për krizën në Shqipëri, ndërsa ka sulmuar qeverinë, opozitën, kuvendin dhe ndërkombëtarët.

Madje presidenti ka deklaruar se përmes krizës në Shqipëri po kërkohet gjakderdhje. Ai thotë me tej se kriza në Shqipëri është artificiale dhe lidhet me dialogun Kosovë-Serbi.

“Ajo që dua të them, me bindje të plotë, është se kjo krizë artificiale në të cilën ndodhet Shqipëria dhe që nuk e meriton populli shqiptar, padyshim që për mendimin tim ka një lidhje edhe me zhvillimet në Kosovë, me dialogun Kosovë-Serbi.

Për mua ka qenë dhe mbetet shqetësuese: përse kërkohet patjetër ky konflikt në Shqipëri?! Nuk mund ta teproj ndoshta edhe po të them: përse kërkohet edhe një gjakderdhje në Shqipëri?!

Pra kjo krizë është aq artificiale në vlerësimin tim dhe duket që ka një interes që Shqipëria të duket keq. Në momentin kur Shqipëria duket keq, kjo nuk e ndihmon as Kosovën, as shqiptarët në përgjithësi si një faktor që mund të imponohen më suksesshëm në kërkesat e tyre të drejta dhe legjitime. Sepse kërkohet patjetër të provohet se ne shqiptarët e kemi të vështirë të bëjmë shtet.

Kurse unë mendoj se kemi të bëjmë me lojëra të individëve të caktuar, të cilët janë kyçur në skenare që nuk i shërbejnë as stabilitetit të Shqipërisë, dhe as afirmimit të saj si një faktor stabilizues, europianizues në rajonin tonë”, është shprehur Meta.

Përmes kësaj deklarate presidenti sulmon ndërkombëtarë të caktuar por edhe personazhe të politikës shqiptare, të cilët nuk i përmend me emra por thotë se “janë individë të caktuar që po bëjnë lojëra dhe skenare kundër stabilitetit në vend”.

Kujtojmëse trazirat në qershor në Shqipëri morën shkas nga dekreti anti kushtetues i presidentit për anulimin e zgjedhjeve të 30 qershorit. Ky dekret nxiti protestat me molotov të opozitës dhe u desh thirrja e fortë e ndërkombëtareve që opozita të tërhiqej. Ndërsa përsa i përket shtatorit ende nuk ofrohet asnjë zgjidhje pasi presidenti bën thirrje për zgjedhje më 13 tetor, që është sërish një datë antikushtetuese, ndërsa opozita ka njoftuar protesta popullore, përsëritjen e një aksioni opozitar që të ofron kaos në prag të çeljes së negociatave.

Akuza parlamentit dhe Ramës

Në intervistën e tij Meta ka sulmuar Kuvendin duke thënë se po bëhen ligje për të sulmuar persona të veçantë.

“Parlamenti përdoret thjesht për të mbuluar paligjshmërinë e akteve të qeverisë. Pra, bëhen ligje për persona të veçantë në kundërshtim me Kushtetutën, në kundërshtim me detyrimet që Shqipëria ka nga Marrëveshja e Stabilizim-Asociimit me BE-në, në kundërshtim me konkurrencën, në kundërshtim me parimet e mosdiskriminimit, që është një parim kushtetues e kështu me radhë”, – është shprehur Meta.

Por sigurisht që përgjegjësinë kryesore në këtë drejtim e ka kryeministri i cili “me politikën e tij të qartë për të kontrolluar gjithë pushtetet në vend dhe për të asgjësuar demokracinë, dialogun politik, të drejtat e opozitës dhe të pakicave, lirinë e medias, pavarësinë e gjithë institucioneve të tjera, për të kapur edhe sistemin e ri të drejtësisë për fat të keq”. Siç duket Metës nuk i del e keqja nga reforma në Drejtësi dhe nuk gjen rast pas e sulmuar atë.

Opozita, asnjë alternativë

Pjesë e sulmit ka qenë dhe opozita për të cilën thotë se ka ndjekur strategji të gabuar.

“Njëkohësisht nuk mund të mbetet pa përgjegjësi edhe opozita, që në vlerësimin tim ka ndjekur një strategji të gabuar, atë të djegies së mandateve, të mosmarrjes pjesë në zgjedhjet vendore, pra të mosregjistrimit në kohë, por edhe të delegjitimimit të çdo institucioni, ndërkohë që mund të kishte ndjekur një politikë tjetër.

Atë të paraqitjes së një alternative që mund të ndihmonte në parandalimin e kësaj drame institucionale dhe demokracie që ne sot kemi në vend, ku praktikisht sistemi i llogaridhënies është asgjësuar si në nivel qendror, në parlament, si në nivel vendor”, është shprehur Presidenti.

Siç duket në qendër të sulmeve të presidentit janë të gjithë, duke nisur nga ndërkombëtarët të cilët kanë asistuar dhe kanë vlerësuar ecurinë e reformës në drejtësi, nga qeveria e cila po i qëndron zotimeve në realizimin e kësaj reforme, dhe së fundi opozita e cila jo vetëm që doli jasht çdo sistemi, aktualisht nuk ofron asnjë alternativë për vendin. Presidenti i cili është në prag të shkarkimit duket se po bën gati terrenin për t’u rikthyer si kryetar partie në skenën e politikës. Duke i shpallur të gjithë armiq, Meta kërkon të dalë vetëm ai që po lufton për Shqipërinë dhe zgjidhjen e krizës për të fituar sa më shumë elektorat me partinë e tij të re, pasi siç tha vetë “LSI nuk është më ambicia” e tij./Realstory.al

META KONFIRMON REALSTORY PËR PARTINË E RE: LSI NUK ËSHTË AMBICIA IME

PROTESTA NË PRAG TË NEGOCIATAVE, BASHA E META ME SKENAR SI I QERSHORIT

Ristani në Real Story: Bojkoti dështoi, Këshilli të rishikojë vendimin. Rama ikën vetëm me zgjedhje

Arben Ristani, ish-Sekretar i Përgjithshëm i Partisë Demokratike, ishte i ftuari i emisionit ‘special’ në “Real Story” të gazetarit Sokol Balla. Një nga ish-njerëzit më të afërt të Lulzim Bashës disa vite më parë, Arben Ristani ka folur për shumë çështje që lidhen me situatën e krizës politike në vend, por kryesisht me Partinë Demokratike. Ristani u shpreh se aksioni opozitar, me djegien e mandateve, bojkotin e zgjedhjeve të 30 qershorit dhe protestat e dhunshme, dështoi. Ndaj, sipas tij, tashmë është koha për reflektim, dhe Lulzim Basha duhet të pranojë zgjedhjet, si e vetmja rrugë për të mundur Edi Ramën. Sipas ish-deputetit demokrat, Lulzim Basha duhet të fokusohet te PD dhe të mendojë për hapjen e saj, si Berisha në 2005, që solli më pas fitoren e të djathtëve. Arben Ristani gjithashtu ka folur dhe për çështje të tjera, si 13 tetori, datë për të cilën Rsitani u shpreh se po shkon drej zhvleftësimit, për shkak të marrjes së mandateve nga të zgjedhurit e rinj në 30 qershor. Megjithatë, Ristani shtroi propozimin që PD duhet të ulet në dialog, dhe të diskutojë për një datë të re zgjedhjesh me Edi Ramën, në mënyrë që votat e djathta të përfaqësohen në pushtetin lokal.

Më poshtë, pjesët kryesore të deklaratave të Arben Ristanit.

Ristani në “Real Story”: Basha la demokratët të pa përfaqësuar, pasoja të tmerrshme për PD

Arben Ristani ka qenë i ftuari i emisionit ‘special’ në “Real Story” të gazetarit Sokol Balla. Ish-sekretari i PD-së, një nga ish-njerëzit më të afërt të Lulzim Bashës, ka treguar se tashmë askush në Shqipëri nuk është i kënaqur me situatën në vend. Ristani u shpreh se: “Askush në këtë moment nga opozita nuk mund të jetë i kënaqur, por unë shoh që dhe shqiptarët nuk janë të kënaqur sepse nuk jetojnë më në një vend normal. Nuk kanë më një politikë normale, një ekonomi të mirë, po largohen nga vendi çdo ditë. Shqipëria është në krizë dhe do zgjidhje. Patjetër që pesha e madhe sigurisht është e Qeverisë, sepse ajo ka detyrimin kryesor që të sigurojë normalitetin në vend. Por edhe opozita ka pjesën e saj në këtë përpjekje për ta çuar Shqipërinë drejt Europës që kemi ëndërruar prej vitesh tashmë”, tha Ristani.

Lidhur me aksionin e opozitës, Ristani u shpreh se gjithçka ishte e menduar, por ajo që nuk dinin ishte reagimi ndërkombëar. Sipas Ristanit, vendimmarrja e Bashës për të bojkotuar zgjedhjet e 30 qershorit, duhet të kishte informacion se çfarë mendimi kishin ndërkombtarët për këtë. Sipas Ristanit, ajo që rezultoi më pas, ishte se PD rrezikoi të shpallej ‘organizatë e dhunshme’.

“Më pas ky veprim u shoqërua me një vendimmarrje për të mos hyrë në zgjedhje me Ramën kryeministër. Në këto kushte kryetari i partisë ka pasur informacionin më të madh, dhe u besua se diçka e tillë do të ishte dhe e dakordësuar, për të arritur në qëllimin final. Ajo që ndodhi ishte se rrezikuam dhe të shpalleshim organizatë e dhunshme. Si përfundim u krye maskarada e zgjedhjeve, pasi ato nuk ishin zgjedhje. PD tashmë humbi veç pushtetit qendror dhe atë lokal. Jemi përpara një pasoje të tmerrshme në politike. E gjithë e djathta, dhe aleatët, dhe një pjesë e shqiptarëve që besojnë te PD, mbetën të papërfaqësuar, qoftë në pushtet qendror, qoft në pushtet lokal”, tha Ristani.

Lënia e mandateve, Ristani: Edhe Murrizi votoi ‘pro’, por s`dinim ç`mendonin ndërkombëtarët

Arben Ristani ishte i ftuari i mbrëmjes në “Real Story” të gazetarit Sokol Balla. Ish-Sekretari i Përgjithshëm i Partisë Demokratike, ka treguar një detaj interesant nga vendimi opozitës për djegien e mandateve në muajin shkurt. Ristani, duke treguar se vendimi për të djegur mandatet nuk erdhi rastësisht, por i menduar, u shpreh se deputeti demokrat, Myslim Murrizi, votoi ‘pro’ lënies së mandatit dhe më pas u rikthye në Parlament. “Djegia e mandateve nuk erdhi si dielli në një ditë me shi. Ishte paraprirë nga deklarata të Berishës. Te demokratët ishte një mendim që kishte kohë që rrihej, ka qenë një vendim i marrë me unitet. Vendimi për të vajtur këtu, ishte unanim. Madje edhe Murrizi ka ngritur dorën lart pro vendimit. Pothuajse ka qenë 100% i dakordësuar. Edhe unë kam votuar pro”.

Më tej, në delartën e tij, Ristani u shpreh se ndonëse mendimi për lënien e mandateve nuk erdhi si rrufeja në qiell të hapur, në fakt, anëtarët e kryesisë dhe deputetët, nuk kishin informacion rreth qëndrimeve të ndërkombëtarëve. Sipas tij, ajo çka ndodhi më pas, tregoi se ndërkombëtarët nuk ishin pro këtij vendimi. “Por informacioni që na mungonte ne ishte konsulta me partnerët ndërkombëtarë, që janë ekskluzivitet i liderit. Duhet të ishte diçka e dakordësuar para se të merrej. Fakti që nuk pati mbështetje ndërkombëtare, tregon që nuk ishte dicka e dakordësuar”. Gjithashtu, Ristani shton se tashmë demokratët janë të papërfaqësuar në të gjithë Shqipërinë, duke e cilësuar këtë si momentin e duhur për reflektim nga kreu i PD-së, Luzlim Basha.

“Ky moment është i duhuri për të reflektuar për të parë dhe gjetur se cila është rruga e duhur për t`ia arritur qëllimit. Është kollaj të thuash se Rama ka rënë, ja dhe pak, deri sa të vijnë zgjedhjet e 2021. Zgjidhja duhet gjetur shpejt, ai zullumin e ka bërë të madh, mundësitë për ta mundur janë, çështja është që ne duhet të shohim te vetja për të mundur rrëzimin e Ramës dhe për të ardhur PD në pushtet. Aktualisht kemi demokrat të papërfaqësuar. Kjo është e tmerrshme në demokraci, i një partie që duhet të mbajë mbështetësit e vetë, dhe të bëhet gati për të ardhur në pushtet. Ka vend për të reflektuar, PD është në mundësitë e veta për të qenë forcë fituese”, u shpreh Ristani.

Ristani: Rruga dështoi, zgjidhja vjen prej zgjedhjeve, po a është gati PD?

Arben Ristani deklaroi në “Real Story” se e vetmja rrugë për të dalë nga kriza janë zgjedhjet. Të parakohshme apo në vitin 2021, sipas ish-Sekretarit të Përgjithshëm të PD, në demokraci ka vetëm një rrugë për të mposhtur kundërshtarin, zgjedhjet. “Ristani: Sigurisht që shtatori nuk është larg. Unë besoj që rrugë për të dalë ka. Në demokraci zgjedhjet janë rruga e vetme për të ndryshuar pushtetutet. Edhe protestat janë forma demokratike, por në përfundim do shkojmë në zgjedhje, normale apo të parakohshme”, tha Ristani, duke shtuar se tashmë është koha që PD të krijojë besim te shqiptarët. “Patjetër që zgjedhjet janë. Demokratët presin që PD t`i fitojë zgjedhjet, dhe në këto kushte, dhe e vetmja mënyrë që të kompensohet qenia jashtë institucioneve, duhet të rritet doza e besimit te lidershipi. Që të rritet besimi, do të duhet, duke u nisur dhe nga një sër sondazhesh, kjo do të thotë që ka probleme me besimin te njerëzit. Pasja e një programi të mirë është pjesë. Ky program i mirë, do dhe njerëzit që do e realizojnë programin. Besueshmëria do duhet edhe te njerëzit që do e realizojnë programin. Ajo që mungon sot është stafet që do realizojnë nesër programin”, u shpreh Ristani.

Megjithatë, për Arben Ristanin, aktualisht Partia Demokratike ka dhe një problem tjetër. Mungesën e një ekipi, i cili do të duhet të prezantojë dhe të bind shqiptarët me një program. Në këtë pikë, Ristani u shpreh se PD duhet që së pari të hapet si parti, duke reflektuar demokracinë e brendshme, në mënyrë që më pas, këtë demokraci ta reflektojë dhe në qeverisje. “Idea ishte që do bëjmë të mundur që “do ketë zgjedhje pa Ramën kryeministër”. Kishte optimizëm, mendohej që do ia dilnim një situate të tillë. Të dyja vendimmarrjet kanë qenë njër pas tjetrës. Sidomos në situata revoltash, është e vështirë të kërkosh dialog. Për tu kthyer te arsyetimi, nga ana tjetër, programi duhet dhe rregullat brenda partisë. PD duhet të reflektojë demokracinë e brendshme, që do e reflektojë në qeverisje. Partia duhet të respektojë dhe funskionojë në bazën e disa parimeve të caktuara. Unë besoj që ka nevojë për tu vënë në pah dhe për tu zbatuar, për të qenë të dukshme për publikun. Ka një punë që ka nisur në PD, por që është në fazat e para. Ekipi i mirë, sigurisht dhe marrëdhëniet me ndërkombëtarët, na duhet patjetër që të kemi mbështetjen e tyre. të gjitha këto, unë besoj që e bëjnë përsëri PD forcë fituese”, tha Rsitani.

Duke u shprehur se Basha ka përgjegjësi për atë që ka ndodhur deri më tani, Ristani u shpreh se tashmë nuk është koha për të diskutuar të keqen që kanë shqiptarët nga Rama, por çështja është se sa e përgatitur është PD për të marrë besimin e shqiptarëve. “Patjetër që lideri i PD ka peshën e vetë të përgjegjësive. Ajo që unë e kam parë me inters, me shumë miratim te zoti Basha, ka qenë ndjesia për të kërkuar ndjesë pas një gabimi. Unë di të them pas zgjedhjeve të 2017, pavarësisht se u ndikuan nga bandat, për ato përgjegjësi që ishin dukshëm të lidershipit të PD, ai ka kërkuar dhe ndjesë. Ajo që nuk duhet të ndodhë është përsëritja e gabimit të 2017. Politikanët kanë demagogjinë e tyre dhe retorikën e tyre për të shprehur mendimin. Unë besoj se koha është për të thënë të vëretën. Nuk mban më retorika që duket sikur u hedhë sy shqiptarëve. E vërteta është kjo; Rama nuk po drejton mirë vendin, që po krijon shumë probleme, për ekonominë, drejtësinë, është e keqe e madhe që shqiptarët e kuptojnë. Çështja është se sa të përgatitur jemi ne për të marrë besimin e shqiptarëve dhe për të fituar zgjedhjet”.

Ristani: Basha të futet në zgjedhje me Ramën, nëse s`e largon dot ndryshe

Arben Ristani tregoi në “Real Story”, se sipas tij, votat e pavlefshme të 30 qershorit, tregojnë që ka një rrevoltë ndaj qeverisë. Megjithatë, Arben Ristani shprehet se në këto momente është mirë që PD të fokusohet te vetja, duke u futur në rrugën e reflektimit. “Zgjedhjet e 30 qershorit, me votat e pavlefshme, pjesëmarrjen, treguan që ka një rritje të mosdakordësisë, të revoltës, ka vend për ndryshim, por çështja është se a do të jemi ne ata që do të bëjmë ndryshimin?! Në fakt, do të doja shumë që fokusi të ishte te qeveria, por bëjmë mirë që të kthehmi dhe te vetja. PD gjithsesi funksionon si institucion, dhe gjërat zgjidhen brenda mekanizmave që paraqet institucioni. Unë shpresoj që këto që po ndodhin të nxisin frymën e reflektimit”.

Arben Ristani shprehet se ky reflektim duhet të përfshijë edhe Lulzim Bashën, duke pranuar zgjedhjet. “Nuk është përgjegjësia vetëm për veten, por për të gjithë shqiptarët. Besoj që është moment reflektimi, duhet ta bëj dhe Bashën për këtë që po ndodhë. Duhet të kapërcejmë dhe vetveten në këtë. Po përdor një shprehje të Berishës, që i tha Bashës “në këto momente duhet të kalosh dhe detin në këmbë”. Unë besoj që në zgjedhje do shkojmë patjetër, nuk ka rrugë tjetër”, tha Ristani.

Mirëpo problemi është deviza e PD, që me Ramën nuk futet në zgjedhje. Në këtë pikë, sipas Ristanit, PD përsëri duhet të reflektojë, pra të futet në zgjedhje me Ramën, nëse s`ka mundësi për ta larguar atë në rrugë tjetër. “Me Ramën apo jo? Nëse çështja është e realizueshme, dakord, por nëse nuk e arrijmë dot, duhet të futemi në zgjedhje me Ramën, të përballemi. Shembujt i kemi, nuk do shpikim në këtë mes. Është vendimmarrja institucionale e PD është nuk ka dialog me Ramën. Unë besoj që ka nevojë për reflektim, ka nevojë që të mblidhemi ta diskutojmë. Të gjendet mënyra të shkohet në zgjedhje, qoftë dhe në zgjedhje të parakohshme. Shqiptarët të papërfaqësuar sa i përket votave të djathta. Ky rezultat është një rezultat shumë i keq që duhet korrigjuar. Prishen balancat e demokracisë, për mua do duhet të gjejmë mënyrë për të shkuar dhe në zgjedhje të parakohshme”.

Ristani: Koha për reflektim, Basha të tregoj planin që ka

Ish sekretari i përgjithshëm i Partisë Demokratike, Arben Ristani është një nga ato persona që ka pranuar se opozita gaboi me vendimet e saj për djegien e mandatave dhe refuzimin për të marrë pjesë në zgjedhjet e 30 qershorit. Nga studio e emisionit “Real Story” të gazetarit Sokol Balla, në një puntatë jashtë sezonit, Ristani shfaqet i penduar për vendimin e tij për djegien e mandateve dhe lënien e PD pa asnjë lloj pushteti. Duket parë përfundimet që nuk ishin aspak në favor të PD, Ristani bën thirrje se ka ardhur koha që PD por dhe vetë Basha të reflektojë dhe të gjejnë zgjidhjen e duhur për të dalë nga kjo situatë. Ristani tha se shpreson që Basha ta dijë se çfarë do të bëjë më 1 shtator dhe të mbledhë strukturat politike dhe t’i udhëzojë se cilat hapa duhen ndjekur për arritjen e fitores përfundimtare.

“Duke parë rezultatin e vendimit tonë për djegien e mandateve, mendoj që ndoshta duhet të kishim gjetur një rrugë tjetër. Shpresoj që Basha ta di çfarë do bëjë në 1 Shtator. Është koha për reflektim dhe për të kuptuar qartë se cila është rruga në të cilën do të ecim si do të ndahet ajo rrugë në etapa dhe si do të fitohen etapat njëra pas tjetrës për të arritur tek fitorja e madhe përfundimtare. Pra kemi nevojë për një qartësi të plotë dhe unë shpresoj që ta bluaj me mendjen e vet dhe t’ia bëj prezente edhe strukturave të PD, për ta diskutuar dhe për ta vendosur. Shpresoj shumë që do të ketë një reflektim. Basha duhet të sqarojë këtë konfuzion pasi demokratët kanë nevojë për një qartësim të situatës.” – tha Ristani

Ristani në “Real Story”: 13 tetori? Jo pa dakordësinë e palëve

13 tetori, data e re e zgjedhjeve të dekretuara nga Presidenti Meta, Arben Ristani e cilësoi si të pamundur dhe të pavlefshme nëse palët nuk bien sa më shpejt dakord .“Nuk mund të ketë 13 tetor nëse nuk ka dakordësi mes palëve” tha Ristani nga studio e emisionit “Real Story” duke shtuar gjithashtu se sa më shumë ditët kalojnë pa arritjen e një marrëveshje aq më i vështirë dhe i pamundur bëhet 13 tetori. Ristani cilësoi se dialogu dhe reflektimi sa më shpejt mes palëve politike është gjëja e duhur për kthimin në normalitet të vendit.

“Për momentin politika është kapur pas datës 13 tetor që sigurisht pas arritjes me dakordësinë e palëve mund të ketë një 13 tetor. Kjo nuk do të ishte një çudi e madhe, megjithëse gjërat kanë shkuar larg tashmë. Mbase pasi të dal nga loja edhe 13 tetori do të shtrohet ndryshe, por unë shpresoj më shpejt tek një reflektim për situatën. Këtu kaosi është prezent, këtu çuarja e shtetit në një absurditet është i prekshëm, të gjithë e shohim dhe e dimë, ne ecim mbi mina në rrugë tonë dhe shpresoj shumë që mendjet të ndriçohen dhe njerëzit të ulen në bisedime dhe të gjejnë gjuhën për të mirën e këtij vendi. Unë besoj se vendi duhet futur në rrugën e vet normale dhe në të kemi zgjedhje të lira dhe të ndershme dhe shqiptarët të vendosin se si dhe nga kush duan të drejtohen.” – tha Ristani

Ristani ka komentuar edhe vendimet e ndryshme të gjykatave për konfirmimin e mandatit të Kryetarëve të rinj të Bashkisë, duke cilësuar se kjo ndodh për shkak të mungesës së Gjykatës Kushtetuese. Por shtoi se sa më shumë njihen mandatet e kryetarëve të rij, aq më i pamundur bëhet 13 tetori si një datë reale.

“Ka pasur vendime të gjykatave që kanë konfirmuar mandatet e kryetarëve të bashkive, por ka pasur edhe një vendimmarrje tjetër nga gjykata. Sa më shumë kalojnë ditët, sa ma shumë vendimmarrje për njohjen e mandateve të kryebashkiakëve aq më e vështirë dhe i pamundur behet 13 tetori të jetë një datë reale. Kjo vjen në kushtet kur nuk ke Gjykatë Kushtetuese që mund ta kishe futur në lojë për të kërkuar pavlefshmëri të vendimmarrjeve të marra deri tani, kështu që nuk ka zgjidhje tjetër. Por gjithsesi mundësitë janë po të ulen dhe të bien dakord palët.” – tha Ristani

Ristani: Gabuam me djegien e mandateve, duhej gjetur një rrugë tjetër

Arben Ristani ka bërë një rikthim në vendimet e marra nga Partia Demokratike në lidhje me djegien e mandatave. I pyetur nëse po të kthehej në kohë do ta miratonte sërish djegien e mandateve, Ristani tha në “Real Story” se ky ishte një vendim i gabuar edhe pse për momentin u dukë si i drejtë. Ish sekretari i përgjithshëm i PD deklaroi se duke parë rezultatin final duhej gjetur një rrugë tjetër për të kërkuar largimin e Ramës dhe largimin e krimit nga qeveria. Madje Ristani shtoi se nëse PD do të ishte futur në zgjedhje mund edhe të kishin fituar duke shfrytëzuar skandalet e qeverisë.

Nëse virtualisht do të riktheheshit në shkurt do t’i digjnit mandatet dhe të mos merrni pjesë në zgjedhje? Ju vet si qëndroni në këtë histori?

Ristani: Unë mendoj se nuk ka qenë zgjidhja e duhur. Mendoj se PD do të kishte bërë mirë të gjente mekanizmat dhe të krijonte patjetër mbështetjen ndërkombëtare për sa i përket diskreditimit të qeverisë dhe lidhjet e saj me krimin dhe përdorimin e parave të pista dhe të mobilizonte partinë për të marrë pjesë në zgjedhje. Jam i bindur se ne mund t’i ishim afruar më shumë fitores në rast se do të kishim hyrë në zgjedhje. Duke u nisur nga sondazhet , duke u nisur nga goditjet e disa grupeve kriminale që besoj shumë se mund të kishim një rezultat tjetër. Dhe tek e fundit do të kishim pasur një shpresë më të madhe brenda partisë demokratike për tu përballuar më pas në zgjedhjet e përgjithshme, që afërmendsh mund të ishin edhe të parakohshme.

Pse nuk e morët mandatin në listë kur sot thoni se ishte gabim?

Ristani: Ju thash që me ndërgjegje kam votuar për djegien e mandateve dhe kam qenë pro, kam djegur edhe mandatin tim. Kjo do të thotë se kam qenë i bindur në atë moment për atë vendim që është marrë. Sot duke parë rezultatin po mundohem të reflektojë dhe të them që ndoshta mund të kishim ndjekur një rrugë tjetër. Unë dua të rris fëmijët në një vend normal. Kam besim se PD e ka drejtuar vendin më mirë në këto vite të demokracisë dhe kam besimin se ajo forcë do të duhet ta drejtojë përsëri për ta bërë më të mirë këtë vend.

Ristani: Basha të hap partinë, aleatët t’i shoh rrugës

Arben Ristani ka komentuar edhe marrëdhëniet me aleatët e PD duke thënë se tani është koha që PD të fokusohet tek vetja, të reflektojë dhe të gjejë zgjidhjen që i duhet për t’u ringritur dhe arritur fitoren përfundimtare që kërkon. Për sa i përket marrëdhënies që PD krijon apo lidh ne aleatët e tjerë ato do i shoh rrugës. Nga studio e “Real Story” Ristani tha se PD është një parti që ka si shtyllë fondamentale vlerat parimore dhe duhet të për qëndrohet tek to, ndërsa aleancat mund t’i shoh edhe në mënyrë pragmatizmi, por fillimisht duhet të forcojë rolin brenda vetës, pasi të bësh pragmatizmin “duhen këllqe të forta”

“ Unë do preferoja që në këto kohëra pragmatizmi është një gjë, por mbështetja mbi parime është një shtyllë fondamentale e një partie. Në këtë kuptim unë jam që të përqendrohemi më shumë tek vetja dhe aleancat i sheh gjatë rrugës, mund ti përdorësh edhe në mënyrë pragmatiste gjatë rrugës, por së pari duhet të kesh këllqe të forta në partinë tënde.” – tha Ristani

Në lidhje me përfaqësimin e figurave publike të PD, Ristani tha se Basha duhet të ndjek shembullin e Berishës në 2005 dhe të hap partinë drejt figurave të reja dhe atyre që kanë qenë kontribuues në PD. Ristani theksoi se e gjithë kjo përvojë që ka pasur PD, nuk mund të shkoj dëm.

“Berisha në 2005 erdhi një numër të rinj dhe sigurisht edhe vlerat. Nuk ka parti politike pa u mbështetur tek vlerat. Një vendim nuk mund të bazohet vetëm në ligj por edhe në zemër. Kjo pjesa e zemrës ka të bëj pak me përvojën jetësore që kultivon njeriu. Në këtë kuptim e gjithë kjo përvojë që ka pasur Partia Demokratik nuk mund të shkoj dëm. Duhet ribashkuar dhe rithithur një numër i madh kontributorësh të PD që e kanë dashur dhe e duan dhe janë të lidhur edhe me strukturat e saj. Militantëve duhet t’u flasësh , por që t’u flasësh duhet të kesh edhe çfarë u thuash dhe t’u transmetosh. Po nuk transmetove, po nuk i njohe, po nuk ishe në hallet e tyre, në këtë kuptim ka shumë për të bërë dhe duke e konsideruar shumë të rendë daljen nga sistemi, duhet të veprojmë më idealizmin dhe besimin dhe ndërthurje të njerëzve.”- tha Ristani. /Realstory.al/

Ristani në “Real Story”: Rruga dështoi, zgjidhja vjen prej zgjedhjeve, po a është gati PD?

Analiza në “Real Story”: Kriza mbetet, vetëm Basha-Rama e zgjidhin

Shkarkimi i Presidentit Ilir Meta dhe skenarët e zgjidhjes së krizës politike, ishim tema e debatit mbrëmjen e së enjtes në “Real Story” të gazetarit Sokol Balla. Analistët e ftuar në studio, Alferd Lela, Arian Vasiari, Skënder Minxhozi, Agron Gjekmarkaj dhe Eduard Zaloshnja, kanë treguar disa nga mënyrat se si mund të marrë fund kriza e gjatë politike, që ka mbërthyer vendin. Sipas analistitit Alfred Lela, Kriza vijon të mbetet, duke u shprehur se veprimet e bëra nga Ilir Meta deri tani, nuk i përkasin antyrës së tij. “Kriza vazhdon të jetë, edhe pse kanë lëvizur shumë aktorët, ngjarjet janë po ato. Tashmë Ilir Meta është përtej Presidencës dhe patjetër edhe përtej LSI. Të gjithë gjërat që ka bërë deri më tani, janë gjëra që nuk i përkasin natyrës së Ilir Metës”, tha ndër të tjera Alfred Lela.

Agron Gjekmarkaj u shpreh se zgjedhjet e 30 qershorit nuk ishin të tilla, ndërsa sipas tij, Lulzim Basha bëri mirë që u tërhoq nga ideja e konfliktit civil. “Kemi praktikisht gjysmën e Shqipërisë që qeveriset nga e djathta, që nuk pranojnë të lëshojnë karrigen. 30 qershori nuk ishte zgjedhje, ishte një ditë votimesh. Lulzim Basha nuk ka fituar në këtë proces. Bëri shumë mirë që nuk i shkoi deri në fund “Rama Ik”. Unë kam bindjen se Basha nuk do e çonte popullin në konflikt civil”.

Arian Vasjari u shpreh se krizën mund ta zgjidhin vetëm Lulzim Basha dhe Edi Rama. “Kriza mund të zgjidhet vetëm nga Basha dhe Rama. Ilir Meta ështënjë aktor i tretë në këtë histori. Kriza ka mbetur e vetme ndaj i ka mundur të gjithë. Kriza ka fituar. Nuk është fare një krizë Kushtetuese, siç thotë Presidenti. Jemi në krizë sepse palët nuk e kanë respektuar atë”, tha Vasiari.

Gjatë debatit, analisti Eduard Zaloshnja, tregoi një të dhënë shumë interesante. Sipas tij, në zgjedhjet e 2005, Partia Demokratike, që u shpall fituese, mori vetëm 560 mijë vota. Në fakt, Zaloshnja e argumentoi këtë me faktin se në atë vit, LSI doli për herë të parë e vetme në zgjedhje, duke marrë vota nga PD dhe PS, ndërsa duke komentuar rezultatin e 30 qershorit, Zaloshnja u shpreh se politikisht ishte barazim. “Për mua, 30 qershori ka përfunduar në barazim politikish, pasi të dyja palët pretendojnë që kanë fituar. Njëra me vota, tjetra me bojkotin.

Në diskutimin për pjesëmarrjen në 30 qershor, Skënder Minxhozi, u shpreh se pati disa arsye që njerëzit nuk dolën të votonin. Një prej tyre ishte frika që po mbillej për konflikt ditën e zgjedhjeve. “Deri në 30 qershor, njerëzit kishin frikë të votonin. Gjuha e kalkuluara ishte e tillë që të demobilizonte votuesit për të votuar. Në Shqipëri digjeshin KZAZ, gjuha ishte shumë e ashpër. Ishte ana tjetër e logjikës, ‘çe duam votën se Erion Veliaj fiton me 5 vota’. Në këto kushte krijuan një situatë, që realisht do të shtynte drejt një pjesëmarrje të ulët. Këto zgjedhje, nuk ishin zgjedhje, ishin votime të shëmtuara”, tha Minxhozi.