Exsluzive/ Aksidenti tragjik në Formula 2, piloti shqiptar i Sauber tregon momentet dramatike të përplasjes

Të shtunën në pistën e Francorchamps humbi jetën piloti 22-vjeçar i Renault, Anthoine Hubert, pas një përplasje fatale me dy makina të tjera. Piloti që garonte në botërorin e Formula 2, një nivel para Formula 1, nuk arriti t`u mbijetonte plagve të marra gjatë aksidentit. Kjo ngjarje ka tronditur mbarë botën e automobilizmit, pasi prej vitesh nuk kishte nodhur një aksident me pasojë vdekjen e një piloti.

Realstory.al ka kontaktuar me pilotin shqiptar të skuterisë Sauber Junior Team pjesë e Alfa Romeo, që garon në botërorin e Formula 3. Talenti i vetëm shqiptar, Lirim Zendeli, që garoi vetëm pak orë para se të vdiste Anthoine Hubert në pistën e Belgjikës, tregon momentet e tmerrit të aksidentit, ku u përfshi dhe shoku i tij i skuadrës, Juan Manuel Correa, që garon në Formula 2.

Zendeli në ato momente tregon se ka qenë duke e ndjekur garën nga tribuna, kur të gjithë tifozët janë tronditur nga aksidenti i tmerrshëm, ndërsa fillimisht flet për shokun e tij të skuadrës, që ndodhet në spital. “Djali që u aksidentua nga ekipi jonë është në spital. I është nënshtruar një operacioni në këmbë, por s`mund të them me saktësi se çfarë dëmtimesh ka marrë”, shprehet piloti shqiptar i Alafa Romeo.

The French driver Anthoine Hubert has died after a high-speed collision on lap two of the Formula 2 feature race at the Belgian Grand Prix, the FIA has announced.😭😭😭 pic.twitter.com/AeeNukb760
— PowerFull Cars (@powerfull_cars) August 31, 2019

Më tej ai tregon dhe momentin e aksidentit ku u përfshi shoku i tij i skuadrës dhe piloti që humbi jetën. “Makina u përplas me gomat e murit anësor të pistës dhe më pas doli përsëri në pistë. Më pas ka ardhur Anthoine dhe e ka goditur me një shpejtësi rreth 240 km në orë. Ka qënë përplasje e vështirë dhe shanset për t`i mbijetuar atij aksidenti kanë qenë të vogla”, tregon Zendeli.

Në fund ai rrëfen edhe diçka për pistën e Belgjikës, aty ku paraditen e të dielës, pilotoi përsëri me makinën e tij për botërorin e Formula 3. “Pista nuk është e rrezikshme, është shumë e bukur. Të gjithë pilotët kur vijnë në Belgjikë, shprehen se pista ‘është magjike’, është shumë e bukur. Por ka një këthesë shumë të shpejtë, ku dihet se nëse ndodh një aksident, pasojat janë të mëdha”, tregon Zendeli, i cili ka përjetuar momente të vështira të shtunën në Belgjikë pas aksidentit tragjik ku humbi jetën një pilot, që sezonin e ardhshëm priste të debutonte në Formula 1 me ekipin e Renault.

Ndërkohë, piloti shqiptar, nuk ka pasur një sezon të mirë deri tani, megjithatë ai shpreson që vitin e ardhshëm të kalojë në nivelin e Formula 2, ku do të jetë vetëm një hap larg debutimit në Formula 1.

Piloti shqiptar merr pikët e para në Formula 3, drejt realizimit të ëndrrës…F1

Talenti shqiptar, Lirim Zendeli, që është duke jetuar ëndrrën në botën e motorëve, duke garuar me makinat e shpejta, ka arritur suksesin e parë sezonal në Formula 3 me ekipin e Sauber Motorsport. Zendeli zuri vendin e tetë në garën e parë të për Çmimin e Madh të Austrisë në pistën e Spielberg (ku njëkohësisht është duke u zhvilluar edhe gara e Formula 1). Piloti i ri me orgjinë shqiptare nga Maqedonia, mposhti temperaturat e larta në Austri, duke arritur që pas 24 xhirosh të mbante vendin e tetë në pistën e Spielberg.

Falë kësaj fitoreje të së shtunës, Lirim Zendeli do të ketë mundësi, që ditën e dielë në garën e dytë, të niset nga vendet e kreut. Ky ishte suksesi i parë në FIA Formula 3 edhe për ekipin e Sauber Junior Team, që është pjesë e ekipit të Alafa Romeo, që këtë sezon është rikthyer edhe në garat e Formula 1. Pas garës, Lirim Zendeli është shprehur i kënaqur për suksesin në Austri.

“Kjo ishte e mahnitshme! E dija që gomat e mia ishin më të mira se të rivalëve të mi. Është mirë të mendosh se kemi mundësi për të vazhduar përpara. Mund të kishim bërë dhe më mirë, por gabova në kthesën e parë, pastaj përmirësova në kthesën e tretë, dhe mu dha mundësi për të parakaluar. Fakti që nesër do të nisem nga P1, më vë në presion, por kjo është ajo që duam. Jam në kërkim të fitores së parë”, është shprehur Zendeli.

E zbuloi legjenda Schumacher, talenti shqiptar debuton nesër në F3 (foto)

Të premten në Barcelonë do të nis zyrtarisht kampionati i Formula 3, ku dhjetë ekipe do të marrin pjesë në tetë gara zyrtare gjatë këtij sezoni. Një ndër pilotët e këtij viti, që do të drejtojë njëvendshen Alfa Romeo, është dhe talenti shqiptar nga maqedonia, Lirim Zendeli.

18-vjeçari shqiptar do të debutojë në këtë kampionat si pjesë “Sauber Junior Team”, ku do të ketë dhe dy shokë skuadre, të cilët kanë përvojë të mëhershme në këtë kompeticion. Lirim Zendeli dhe ekipi i tij kanë kryer përgatitje gjatë dimrit, ndërsa gjatë pranverës ata kanë zhvilluar dhe djsa teste në Spanjë dhe Hungari.

Pak orë para debutimit të tij në kampionatin e Formula 3, Lirim Zendeli ka folur për faqen zyrtare të “Sauber Junior Team”, ku ndër të tjera ka shprehur dhe objektivat që ka për këtë sezon.

“Jam shumë i lumtur që jam kthyer të garojë pas një dimri të gjatë. Barcelona është një nga pistat e mia të preferuara, pasi ka kthesa ku mund të pilotosh me shpejtësi të lartë. Objektivi im është të jem i qëndrueshëm gjatë sezonit dhe të luftojë për vendet e kreut. Shpresoj të jem gjithmonë te pesë më të mirët, por objektivi im kryesor është të jemi gjithmonë në zonën e pikëve”, tha Zendeli.

Po kush është Lirim Zendeli? 18-vjeçari shqiptar me orgjinë nga Shkupi, ka lindur në Gjermani, teksa ka pasur fatin që ai të zbulohet si talent nga legjenda e Formula 1, Michael Schumacher.

Me ekipin “Kart” të 7-të herë kampionit të botës në F1, Lirim Zendeli ka pilotuar për disa vite, teksa ka qenë nën mbikqyrjen e vazhdueshme të Ralf Schumacher, gjithashtu ish-pilot i Formula 1.

Sezonin e shkuar, Lirim Zendeli u shpall kampion i Formula 4, duke kapërcyer këtë sezon në një nivel më të lartë pilotimi. Ai i përket një brezi talentesh, mes tyre Mick Schumacher, djali i Michael Schumacher, që aktualisht garon në Formula 2 dhe ndodhet një hap larg nivelit më të lartë të garave me makina, F1.