Përzgjedhja e kandidatëve në zgjedhje, Lubonja: Hap pozitiv i PD-së, por nuk mjafton

Analisti Fatos Lubonja i ftuar në emisionin ‘’Real Story’’ të Sokol Ballës në ka komentuar procesin e përzgjedhjes, vlerësimit dhe filtrimit të kandidatëve për deputetë në PD.

Lubonja thotë se në PD nuk duan përçarje, madje as i duhet në këto momente, por i duhet dhe rinovim.

Sipas tij rinovimi duhet të kishte ndodhur më herët dhe jo në momentin kur futesh në zgjedhje.

”Këtu dalim tek ai sqarim që bëri z.Kaso. Ky është dhe një problem. Ju nuk doni përçarje, dhe nuk i duhet përçarje. Nga ana tjetër duhet dhe rinovim, t’i jepej publikut e drejta, pra pastrim.

Problemi i PD është që duhet pastrimi i partisë duhej bërë më herët. Dhe jo kur futesh në zgjedhje.

Ky është një hap pozitiv i PD, por i pamjaftueshëm.”- tha Lubonja.

“Do ofrojë zgjedhje të lira. Me Ramën?”. Bylykbashi debat me Lubonjën në Real Story

Ish-deputeti i Partisë Demokratike, që është pjesë e “Këshillit Politik” për Reformën Zgjedhore, Oerd Bylykbashi debatoi me analistin Fatos Lubonja në studion e “Real Story”. Bylykbashi u shpreh se me Edi Ramën nuk mund të ketë zgjedhje të lira e të ndershme. Ai shtoi se hartimi i Reformës Zgjedhore do t`i ofrojë shqiptarëve zgjedhje të lira dhe zgjidhjen e krizës. Por, analisti Fatos Lubonja u e pyeti Bylykbashin se si do të arrihej kjo gjë.

Pjesë nga debati:

Bylykbashi: Unë s’jam demagog e populist, jam realist. Nuk thashë shumë gjëra nga ato që tha Lubonja tani. Shtrembëruat një nga tezat e mia. Reforma Zgjedhore nuk do të bëhet asnjëherë bajonetë. Edhe kur zgjedhjet kanë qenë shumë të këqija, si ato të 2001, Reforma zgjedhore ka arritur konsensus. PD nuk ndalet në asnjë sekondë në kursin e saj, përfshi protestat. Kriza në Shqipëri është gjithnjë e më e rëndë. Kriza do vazhdojë, sa kohë Rama nuk lëviz. Në këtë situatë, duke qenë se kriza është kaq e rëndë, alternativa e zgjidhjes është me zgjedhje. Një vit ne kërkuam largimin e Ramës dhe zgjedhje të lira e të ndershme.

Lubonja: Unë dua një përgjigje, por s’po e marr. Unë po të fus në hulli.

Bylykbashi: Kemi Reformë Zgjedhore, zgjedhje të lira e të ndershme dhe zgjidhje.

Lubonja: Me Ramën kryeministër? Se ky është problemi.

Bylykbashi: Rama nuk mund të jetë kurrë garancia për zgjedhje të lira e të ndershme. Testimi i zgjedhjeve dhe i Reformës Zgjedhore bëhet vetëm me zgjedhje. Rama thotë që do rri deri më 2021, do përpiqem të vë gjyqtarët që kam kapur unë, dhe më pas testojmë dhe me kismet për shqiptarët Evropa do hapë fazën e dytë për negociatat më 2022.

Lubonja: Turqia i ka hapur negociatat qysh kur dhe ka shkuar keq e më keq. Ju e keni parasysh këtë përvojë? Ja u vonua hapja e negociatave, ç’i prishi punë Ramës?

“Jemi më të sigurt me SHBA. Logjikë si e Enver Hoxhës”. Shehu debat me Lubonjën në Real Story

Vrasja e Kasem Sulejmanit, komandantit të forcave iraniane QUDS, shkaktoi debate të forta në studion e “Real Story”. Ish-ministri i Jashtëm, Tritan Shehu tha se Shqipëria në politikën e jashtme ndjek linjën e diplomacisë amerikane, pasi janë partnerët tanë strategjik. Shehu tha se Shqipëria është më e sigurt pranë SHBA, duke iu referuar një rreziku të mundshëm për sulme nga Irani. Ndërkohë, ky pohim gjeti kundërshtimin e analistit Fatos Lubonja i cili e quajti këtë “logjikë të diktatorit Enver Hoxha”.

Pjesë nga debati:

Tritan Shehu: Çështja e Muxhahedinëve ka ndodhur që në kohën e Obamës. Erdhën 270 persona. A rrezikojmë ne apo jo duke marrë këtë apo atë?! Ne jemi një vend i angazhuar, nuk hymë në vendet e paangazhuara. Për ne aleati kryesor janë SHBA-të. Janë ata shkaku dhe forca kryesore e pavarësisë së Kosovës, e ndryshimeve demokratike në Mal të Zi dhe Maqedoni. Kur je i angazhuar, je. Pyetja e parë është; sa do i realizojë detyrimet e mia? Ne si PD e kemi deklaruar qartësisht edhe kur kjo qeveri votoi kundër rezolutave të SHBA. Ishte e turpshëm ajo që u bë ndaj rezolutës së SHBA. Ishte thikë pas shpine ndaj SHBA. Në çështjen e sigurisë globale ndjekim SHBA-të. Të jemi realist. Nëse ne luajmë rol aktiv, e luajmë në rajon. Dhe të duam që të luajmë rol në botë, s’luajmë dot.

Lubonja: Pse do vijë me ushtri Irani këtu?

Shehu: Unë e shtroj përgjigjen në formën e një pyetje. Kur jemi më të sigurt ne? Kur jemi pranë SHBA apo larg saj? Ne do jemi më të sigurt si komb, sa më pranë SHBA të jemi.

Lubonja: Kjo është logjika e Enver Hoxhës

Shehu: As më duhet fare ai. Flasim për vendin më të madh në botë, që është garancia e vlerave.

Lubonja: Gallup-i e quan vendin më të pasigurt në botë me sondazhet e tij.

Shehu: Kam ardhur që të them mendimet e mia dhe jo të Gallup-it. Ne jemi të sigurt kur jemi pranë SHBA. Garancia jonë dhe mbijetesa jonë lidhet me garancinë ndaj SHBA-ve. Ai u tregua fanatik. Kërcënim? E marr me rezerva. Detyra jonë është që të qëndrojmë bashkë me SHBA. Është gabim që të krijosh dyshime dhe jo solidaritet me SHBA. Pasi nxit dyshime. Ky realitet duhet parë në sy. Për mua ishte një detyrim që kishim ndaj SHBA-së. Ne realizuam një detyrim. Dikush çon ushtarë në luftë.

Lubonja: Pse nuk hynë amerikanët tek kurdët? Duhet ta pranojmë këtë fakt.

Shehu: Në radhë të parë jam shqiptar. Shoh interesin e shqiptarëve.

Lubonja: Të njëjtën gjë bën këta (të dyja palët PD-PS) kur shkoi ushtria në Irak. Këta e donin për mision lufte, për servilizëm. A e kanë pranuar që nga Trump, e Clinton, e Obama që ishte gabim ndërhyrja në Irak?!

Shehu: Nuk është thënë se ishte gabim.

“Ne jemi servil ndaj SHBA”, Lubonja: Muxhahedinët i quanin organizatë terroriste

Analisti Fatos Lubonja, i ftuar në “Real Story” të gazetarit Sokol Balla, u shpreh se muxhahedinët në vitin 2012 cilësoheshin terroristë në Europë dhe nga SHBA. Sipas Lubonjës, anëtarët e opozitës iraniane u strehuan në Shqipëri për shkak të “servilizmit të politikanëve shqiptarë ndaj SHBA”. “Muxhahedinët deri më 2012 konsideroheshin organizatë terroriste. Tani këta nuk i pranoi Gjermania, Rumania etj dhe në vend të kësaj, mbështesim çdo gjë që na thonë Amerika. I marrim ne sepse jemi servil ndaj SHBA-ve, shto këtu edhe faktin që politikanët tanë janë me shumë probleme në përgjegjësitë e tyre”, tha Lubonja.

Sipas analistit Lubonja, Shqipëria ka qenë historikisht servile ndaj SHBA. “Jam kritik ndaj servilizmit absolut të të gjithë politikës shqiptare ndaj cdo gjëje që bën Amerika, qoftë kur është Obama, Trump etj,. pa dallim as ideologjik mes partive, që mua më çon tek një servilizëm ndaj SHBA-ve, e kam thënë në këtë kontekst. Që ta nis tek vrasja e Sulemanit, unë pashë Hillary Klinton që akuzon Trumpin se mund të fusë në luftë Amerikën, që ky po prish të gjitha përpjekjet e administratës së Obamës për të denekluarizuar me Iranin, një njeri që kërkon të na fusë në luftë, që nuk mund t’i jepen butonat e armëve bërthamore.

Kemi një kryeministër që ashtu quhet qendër e majtë, që dikur thoshte se Trump është rrezik për botën, kurse tani nxiton menjëherë ta mbështesë, ndërsa kjo që ka ndodhur i jep të drejtë Hillarit. Kemi një PD që reklamohet si parti e së djathtës që ka partnere partinë e Berluskonit ose të Merkleit, e jo të Salvinit, që përshëndeti vrasjen e Sulimanit. Ore këta parti kanë ideologji apo janë thjesht servilizëm. Chomsky e quajti këtë akt si shpallje lufte”, deklaroi Lubonja.

Lubonja mbron opozitën, Minxhozi: Nuk hoqi dot një drejtor, studentët hoqën 6 ministra

Gjatë emisionit të fundit të “Real Story” për këtë vit, ku u bë bilanci i 2019 dhe asaj që na pret në 2020, analisti Fatos Lubonja u shpreh pesimist për SPAK. Sipas tij, e vetmja shpresë për ndryshuar gjërat në 2020 është populli, duke pohuar se edhe në këtë pjesë duhet të jetë opozita, pasi s`mund të ndahet. Por, ndaj argumentit të Lubonjës, replikoi Skënder Minxhozi, i cili u shpreh se protesta e vetme që dha shpresë ishte ajo e studentëve, që sollën largimin e 6 ministrave. Ndërsa për Minxhozin, 10 protestat e opozitës nuk sollën as largimin e drejtorit të ujësjellësit.

Për më tepër lexoni debatin e plotë të analistëve në “Real Story”.

Lubonja – Në Kili kanë dalë njerëzit në rrugë për shkak të një liberalizmi ekstrem, të privatizimeve ekstreme deri tek uji. Shqipëria është më keq se Kili në këtë polarizim të pasurisë. Dy gjëra dëgjova unë që hedhin pak dritë në 2020; shpresa te SPAK dhe mund të dalë dhe populli. Unë mendoj se reforma në drejtësi krijonte rrezikun e kapjes nga forca që e kontrollon. Se sa kemi ne mundësi të nxjerrim individ në këtë sistem kriminal për të rezistuar, unë dyshoj shumë. Mund të ndodhi që në një situatë të vështirë për Edi Ramën, të bëhen kokat e turkut. Të marrim këta nga opozita, se këta na e krijojnë turbullirën. Unë mbetem te populli. A mund të lëvizë populli. Por dhe këtu nuk ndahet dot nga opozita.

Minxhozi – Protesta më e shëndetshme dhe që solli ndryshim ishte një javë protestë e studentëve në Rrugën e Durrësit. Ndryshoi 6 ministra.

Lubonja – Më ndrysho Kryeministrin të them që ka ndryshim.

Rakipllari – Ajo ishte makijazh…

Minxhozi – Protestat e opozitës nuk hoqën as drejtorin e ujësjellësit…

Lubonja – Pati aq sa pati lëvizja studentore për ndryshim. Por mendoj se një nga elementët është kredibiliteti. Ne opozitën e kemi shpallur armik. Ky eliminim i opozitës e ngarkon me përgjegjësi Edi Ramën, aq sa e ngarkon opozitën me përgjegjësi. Shpresa ime është një opozitë që ndryshon diçka të rëndësishëm për të tërhequr më shumë popull.

Rakipllari – E gjithë analiza jonë lidhet me faktin se nuk e dimë kush është shumicë kush është pakicë.

Balla – Sot 55% e shqiptarëve që kanë të drejtën të votojnë, nuk votojnë. Këta janë shumica.

Minxhozi – Protestë politike, e nxitur apo e shtyrë nga politika, baraz me protestë të vogël pa produkt. Protestë e çliruar nga interesat e partive është një protestë që lë gjurmë.

Lubonja – Ajo që bëri lëvizja studentore tregoi krizën e opozitës. Në një vend ku funksionon demokracia dhe drejtësia, nuk ka rëndësi se kush është opozita dhe çfarë qëllimi ka. Por nëse argumenti që ka ngritur qëndron, unë e dëgjoj pavarësisht, e dëgjon dhe prokurori. Shpresa jonë është nëse mundet të kemi një maxhorancë që dëgjon. Unë them jo, nuk kemi një maxhorancë të tillë. Edhe studentët po ta politizonin, sepse po të fusnin dhe “Astirin” ata nuk do e dëgjonin. Qëndron ky problem, 20 milionë euro? SPAK-un e pamë se çfarë ka vepruar deri tani. A do ta shohim?

Minxhozi – Me sherr u zgjidh 20-milionshi? Duhet të ketë një faktor të tretë që të zgjidhet, që të thotë t’i shkon.

Lubonja – Kur faktori i tretë thërret kryetarin e opozitës për paratë ruse dhe nuk thërret Kryeministrin për ato 80 mijë dollarë në Amerikë, këtu ka një problem. Dhe kur faktori ndërkombëtar hesht për këtë dhe flet për këtë, këtu është problemi. Nga përvoja e drejtësisë në Shqipëri, kemi të drejtë të ngremë dyshime. Pastaj do themi kush ka pasur të drejtë. /Realstory.al/

Rakipllari e Lubonja, pesimistë për 2020, por besojnë te vendosja e ekuilibrave politikë

Analistët Robert Rakipllari dhe Fatos Lubonja besojnë se në 2020 Shqipëria do të ketë më shumë qëndrueshmëri në aspektin politik. Në “Real Story”, Rakipllari u shpreh se 2019 ka qenë një vit me shumë dështime. Por, sipas tij, problemi kryesor është bllokimi i sistemit politik. Ndaj, Rakipllari theksoi se mbetet optimist për shkak se po bëhen përpjekje për të zhbllokuar sistemin e politikës dhe për të risjellë ekuilibrat në vend.

“Dështimit të këtij viti, dua t’i shtoj dhe refuzimin e hapjes së negociatave. Refuzimi që na bëri Europa për negociatat, nuk ishte një refuzim rutinë. Ishte një refuzim në koncept, Franca tha se këto vende nuk janë gati të futen në BE. Unë nuk e shoh pa dritë në fund të tunelit të ardhmen. Për mua problem kryesor është bllokimi i sistemit tonë politik. Shqiptarët nuk ikin vetëm se nuk kanë të ardhme ekonomike, por edhe se nuk kanë mundësi të zgjedhin”, tha Lubonja.

“Ne duhet të rithemelojmë institucionin e zgjedhjeve të lira. Rama tha në 2017; ma lini mua timonin se di ta bëj më mirë. Nga ai moment ne kemi regres. Pas 2017 ne kemi rënie të mëdha, Shqipëria nuk po qeveriset mirë. Optimizmi im është se ka një përpjekje për të zhbllokuar sistemin e politikës, për të rikthyer sistemin e garës brenda partive. Minimumi që mund të na sjellë kjo është një pushtet i ekuilibruar. Unë besoj se me SPAK do të kemi ndëshkime”, tha Rakipllari.

Edhe për analistin Fatos Lubonja, ndonëse pesimizmi dominon në optikën e tij, përsëri ai sheh dritë në fund të tunelit. Lubonja beson se në 2020 futja e opozitës në sistem mund të vendosë balancat në politikën e vendit. “Ne përgjithësisht na dominon një lloj pesimizmi. Pyetja që ngre unë është; a mendojnë kështu ata që kemi në pushtet, kështu si ne? Apo ne analistët që flasim për këto shqetësime ata na shohin si “qen që lehim”. Nëse kemi një qeverisje që nuk mendon kështu, atëherë është problem e ardhmja e vitit që vjen. A kemi ne shpresë se dhe brenda kësaj partie të ketë lëvizje, jam më shumë pesimist se sa optimist.

Ky Prokurori i Përgjithshëm, që është i pavarur, a kemi ndonjë shpresë nga ky? Ai ka prova konkrete! Kjo prapë të çon te pesimizmi. Futja e opozitës në lojë mund të balancojë gjëra dhe disa probleme mund të trajtohen. Por nuk duhet të harrojmë se kemi një opozitë, që dhe kulturalisht dhe nga mëyra se si është imponuar dialogu politik, mund të na çojë në një konflikt ose në eliminim të opozitës. Situata e 2020 mund të na çojë në kontroll të mëtejshëm të pushtetit nga Edi Rama dhe me stabilitet, por mund të na çojë në një degjenerim. Nuk jam shumë optimist”, tha Lubonja. /Realstory.al/

Protestat dhe ndërkombëtarët, Lubonja përplaset me Minxhozin e Rakipllarin

Krahasimi mes vitit 1997 dhe vitit 2019 për zhvillimet politike ka sjellë edhe një debat në Real Story mes të ftuarve të Sokol Ballës, ku analisti Fatos Lubonja u shpreh se ndërkombëtarët në Shqipëri, si në atë kohë, edhe sot, kanë qenë gjithmonë me pushtetin.

Lubonja kujton se edhe në vitin 1997, kur sipas tij, njerëzit e Berishës rrihnin gazetarët dhe nuk kishte fjalë të lirë, ndërkombëtarët ishin me ish-presidentin. Sipas tij, edhe më 2019, ambasadorët në Tiranë po mbështesin një regjim. “Një ndryshim në lidhje me ndërkombëtarët, shkurt. Ndërkombëtarët, mos të harrojmë se edhe atëherë kanë qenë deri vonë, deri në shkurt të vitit 1997 mund të themi me pushtetin dhe jo me opozitën, me gjithë ata gjëra që kanë ndodhur. Dhe vetëm kur e bëri fakt të kryer situatën, për mendimin tim populli që u ngrit dhe gjithë ajo katrahurë që u krijua, dhe një shkrim i famshëm i ‘Indipendent’ i asaj kohe ‘Ky regjim gangsterësh që ne mbështesim’, që ne mbështesim ose financojmë nuk e mbaj mend saktë, atëherë filloi ndryshimi”, tha Lubonja.

Kjo është komentuar edhe nga Robert Rakipllari, që sipas tij ishte e gabuar. “Ai rezultoi një veprim i gabuar, i cili i la mundësinë kryeministrit që të shtonte pushtetin e tij në parlament, në pushtet lokal etj dhe sot jemi para kësaj situate, ku kryeministri Rama kontrollon të gjitha pushtetet në Shqipëri”, tha Rakipllari, duke i kujtuar Lubonjës se në atë kohë amerikanët kundërshtuan zgjedhjet lokale që më 1996 dhe përplasja e ish-presidentit Berisha me amerikanët ka nisur që me zgjedhjet.

Duke folur mbi çështjen e zgjedhjeve të vitit 1997, Skënder Minxhozi kujtoi se në atë kohë, SHBA ka kërkuar përsëritjen e zgjedhjeve në 40 zona, ndërsa Berisha i përsëriti në 18 zona. “Pasi ai nuk pranoi 40 zonat, të gjithë perëndimorët kërkuan përsëritjen e zgjedhjeve të 26 majit”, tha Minxhozi.

Pjesë nga debati në Real Story

Fatos Lubonja: Në tërësi ka qenë mbështetje e gjerë e tyre dhe ne që bënim protesta atëherë, meqë më përmendi amerikanët se nuk doja të kthehesha te 1997, kur kam shkuar për t’u ankuar se na rrahu Sali Berisha ose na mbylli, ku di unë aty më tha ajo e të drejtave të njeriut të ambasadës, që unë jam shumë e lumtur që kam ngrënë dje, parmbrëmë një darkë me presidentin Berisha. Pra ky ka qenë qëndrimi në tërësinë e vet. Për mua, këtu ka munguar populli dhe a e bënte dot, që ndodhi gjithë ajo ngjarje dhe u ndërhy pastaj u bë siç e dimë. Mos harrojmë se Berisha u zgjodh edhe më 3 mars, u bë president pa e çarë kokën, kur u dogj gjithçka. Këtu tani vijmë tek e sotmja, te situata e sotme. Nuk jam dakord me Bertin për një gjë, se Berti e quan pjekuri të popullit shqiptar këtë.

Robert Rakipllari: Emancipim të shoqërisë shqiptare në një farë mënyrë që nuk shkon në përplasje them unë.

Fatos Lubonja: Jo, jo, për mua jo. Unë them këtë. Për mua këtu nuk kemi të bëjmë me emancipim. Këtu është zhgënjim me klasën politike, mungesë besimi për t’u …sepse situatat që të dalësh e të kërkosh një ndryshim me forcë, nuk po them duke djegur, duke vrarë ose duke u bërë, se dhe atje protesta bënin, vrasjen e bëri Berisha. Kjo nuk është pjekuri e popullit shqiptar, por një zhgënjim dhe nënshtrim për mua Opozita u motivua për paratë e jo për demokracinë. Se më 1996 dolën 3 mace aty. 1994 e kapërceu ai, mbështetje kishte, Forestin me vete. 1996 e bëri, pushtetin e mori.

Skënder Minxhozi: U rrëzua pastaj.

Fatos Lubonja: Po mos kishin rënë Piramidat, do të kishim diktatorin.

Robert Rakipllari: Kishte shumë popull që mbështeste opozitën këtë vit, nuk mund ta injorojmë.

Fatos Lubonja: Kishte popull, por jo aq sa duhej.

Skënder Minxhozi: Popull nuk kishte. Nëse kishte popull, pse nuk prodhoi asgjë?

Fatos Lubonja: E patë ju çfarë bëri Astiri? Sepse u vodh vetë, jo se ka koshiencë. Është pyetja ne do presim të bëhemi si Astiri? Duhet të mësojmë që mos shkojmë te Astiri.

Policia: Një person me të meta mendore sulmoi makinën e vëllait të Lubonjës

Policia e Shtetit ka reguar zyrtarisht në lidhje me sulmin ndaj makinës së gazetarit Fatos Lubonja. Nëpërmjet një deklarate shpërndarë mediave, Policia njofton zyrtarisht se mjeti, i cili është sulmuar të dielën, nuk i përket gazetarit Lubonja, por të vëllait të tij. Gjithashtu, në reagimin zyrtar, policia ka sqaruar dhe dinamikën e ngjarjes, duke saktësuar se agresori ka qenë një person me probleme mendore, ndërsa para se të sulmonte makinën, ai ka kërcënuar disa qytetarë me mjete prerëse.

“Në pergjigje të zhurmës mediatike që po bëhet për dëmtimin e xhamit të automjetit të zotit F. Lubonja, Policia e Shtetit sqaron: Më datën 1 korrik 2019, shërbimet e Komisariatit Nr. 2, pas marrjes së një njoftimi, u vunë në ndjekje të një personi që po kërcënonte me mjete prerëse disa kalimtarë. Në tentativë për t’u larguar, shtetasi A.H. theu me sende të forta xhamin e një mjeti të parkuar në hyrje të pallatit ku banonte. Agjentët arrestuan 50 vjeçarin, nga Tirana”, shkruan Policia e Shtetit.

Por jo vetëm kaq, Policia thekson se personi në fjalë, ka ushtruar dhunë në familje, të cilën e ka denoncuar bashkëshortja e tij, dhe ka sqaruar se personi vuante prej vitesh nga shëndeti mendor. “Ndaj tij bëri kallëzim për dhunë në familje edhe bashkëshortja, e cila deklaroi se ai vuante prej disa vitesh nga shëndeti mendor. Për dëmtimin e mjetit bëri kallëzim shtetasi A.L, vëllai i zotit F. Lubonja, i cili deklaroi se ishte përdoruesi faktik i automjetit, se agresorin e kishte fqinj dhe se ky i fundit kishte shfaqur probleme mendore”.

Ndaj këtij shtetasi janë ngritur pesë akuza për vepra të ndryshme penale, ndërsa policia shprehet se hedh poshtë si të pavërteta dhe dashakeqe të gjitha insinuatat e bëra në drejtim të punës së saj, duke u shprehur se për këtë ngjarje, uniformat blu kanë qenë tërësisht profesionale.

“Materialet i kanë kaluar Prokurorisë për ”Dhunë në familje“, “Kanosje”, “Shkatërrim prone”, “Prishja e qetësisë publike” dhe “Mbajtje pa leje të mjeteve prerëse, të dyshuara si armë të ftohta”. Me këtë rast, Policia e Shtetit hedh poshtë si të pavërteta dhe dashakeqe të gjitha insinuatat e bëra në drejtim të punës së saj, e cila, edhe në këtë rast, ka qenë plotësisht profesionale”.

Rasti i goditjes së mjetit të vëllait të gazetarit Fatos Lubonja, u përdor politikisht nga opozita dhe Presidenti i Republikës, të cilët nxituan për ta cilësuar sulmin si politik “nga çunat problematik”. Megjithatë, ky reagim i uniformave blu, rrëzon deklaratat politike të Metës, Kryemadhi, Bashës dhe Berishës në lidhje me rastin në fjalë, për më tepër, mjeti nuk ka qenë në përdorim të gazetarit, por të vëllait të tij.