Kumbulla tek Inter në verë. Mediat italiane e bëjnë fakt të kryer

“Milano, kryeqyteti i ri evropian. Ardhja dhe ikja e turistëve rritet nga java në javë, por në janar është e lehtë të takohen fytyra të njohura nga bota e futbollit. Inter vazhdon të punojë për të tashmen, por vizioni i “Nerazzurri” nuk është i kufizuar vetëm për sezonin aktual. Dje agjentë lojtarësh u vunë re në selinë e Interit”, kështu e nis prestigjiozja italiane “Gazzetta dello sport”, artikullin kushtuar mbrojtësit të kombëtares shqiptare, Marash Kumbulla, që tashmë është në listën e klubeve të mëdha.

“Emri më i nxehtë mbetet ai i Marash Kumbullës, mbrojtës grupmoshës 2000 që luan te Verona. Ai është në listën e klubeve të mëdha, jo vetëm italiane. Dje Gianni Vitali, agjenti i lojtarit, u takua me drejtuesit e Interit. Klubit i pëlqen shumë, gjithashtu për fleksibilitetin e tij taktik, por edhe sepse ai tashmë është lider i një mbrojtje me tre. Kumbulla, pra, nuk do të kishte probleme për të hyrë në skemat e Contes”, shkruan ndër të tjera media italiane.

Por nuk ndalet me kaq, pasi transferimin e Kumbullës te Inter në verë, media sportive e vendit fqinj e bën fakt të kryer. “Verona dhe Interi tashmë kanë një marrëveshje në parim për transferimin e tij gjatë verës. Skuadra që ka pronësinë e Kumbullës dëshiron 20 milion euro për transferimin e lojtarit”. Megjithatë, lojtari është në fokusin e klubeve të tjera të Premier League, Chelsea, United dhe Evertoni i Ancelottit janë tashmë në garë për lojtarin. Marash Kumbulla është një nga lojtarët më të talentuar shqiptarë për momentin. Vlera e kartonit të tij, sipas “Transfermarkt” shkon 10 milionë euro.

Po shkëlqen te Verona, rritet vlera e kartonit të Marash Kumbullës

Mbrojtësi i kombëtares shqiptare, Marsh Kumbulla bëri një kapërcim të jashtëzakonshëm në vetëm pak muaj. Mbrojtësi, që aktivizohet te Verona në Seria E, arriti vlerën rekord të kartonit të tij në 10 milion euro. Në fakt, rritja nuk ka qenë graduale, por në vetëm dy muaj. Kështu, Marash Kumbulla që gjatë muajit tetor të vitit që lam pas vlerësohej me 3 milionë euro, tashmë kushton 10 milionë euro.

Këto janë shifrat që jep faqja e specializuar për vlerësimin e kartonit të lojtarëve. Sipas këtij sajti, Kumbulla është futbollisti më i shtrenjtë i skuadrës së Veronës, duke lënë pas të gjithë shokët e tij të skuadrës. Ndërsa renditet si futbollisti i 158 më i shtrenjtë në Serie A. Gjithashtu, talenti që është vetëm 19 vjeç, vlerësohet si një nga tre lojtarët më të shtrenjtë në kombëtaren shqiptare, duke lënë pas shumë yje të kësaj skuadre.

Por si ka ndodhur që Kumbulla është rritur në këto vlera? Në fakt gjithçka lidhet me performacat e tij te skuadra e Veronas. Ai është pjesë e përhershme e formacionit titullar duke bërë performanca të shkëlqyera në fushë. Kjo bëri që Kumbulla të bashkohet me ekipin tonë kombëtar, ndërsa paraqitjet e tij kanë vënë në lëvizje shumë klube në Serie A. Ato po mbajnë nën vëzhgim lojtarin dhe synojnë, ku mes këtyre klubeve është dhe Juventus.

Kombëtarja, dëmtohet Kumbulla. Seferi ndëshkon Xhakën

Trajneri Edy Reja mori një lajm të keq në prag të grumbullimit të lojtarëve për ndeshjen me kombëtaren. Qendërmbrojtësi Marash Kumbulla, që aktivizohet me Verona në Serie A, u dëmtua në takimin e të dielës pasdite kundër Brescia së Emanuele Ndoji. Vetëm 14-t minuta pasi kishte nisur sfida, Marash Kumbulla kërkoi ndihmën e stafit mjekësor të Verona, pasi pati një dëmtim.

Mjekët u futën në fushë, duke konstatuar se lojtari e kishte të pamundur të vazhdonte më tej takimin. Kështu, Kumbulla largohet nga fusha në të 16`, ndërsa vendin e tij e zuri një tjetër lojtar. Verona fitoi takimin kundër Brescia, ku Emanuele Ndoj e nisi si zëvendësues në minutën 46-t duke bërë paraqitje pozitive, ndonëse ekipi i tij u mund.

Verona shkon 15 pikë në renditje dhe ngjitet në vendin e 9-t të Serie A, ndërsa Brescia ndodhet në vendin e 18 me 7 pikë. Ndërkohë, në Zvicër futbollisti tjetër i kombëtares, Taulant Seferi dha një asist të bukur në sfidën që Xamax luan në transfertë ndaj Baselit të Taulant Xhakës. Në pjesën e parë, Seferi nxori një top të bukur nga mesi i fushës për shokun e tij të skuadrës Nuzzolo, duke i dhënë avantazhin ekipit të tij.

#FCBasel vs Neuchâtel Xamax FCS HT' 0:1 Assist Taulant Seferi
Gepostet von Taulant Seferi am Sonntag, 3. November 2019

E bujshme, Marash Kumbulla në “radarët” e Juves

“Nuk e di se si nuk e kanë parë deri më tani në Serie A”, u shpreh Edy Reja pak ditë më parë për mbrojtësin Marash Kumbulla. Dhe duket se pas fjalëve të trajnerit të kombëtares shqiptare, klubet italiane bën lëvizje të menjëhershme. Sipas “Calciomercato”, Juventus kërkon mbrojtësin e kombëtares shqiptare Marash Kumbulla. Në takimin mes Napolit dhe Veronas, ku Kumbulla luajti si titullar, skuadra nga Torino kishte dërguar përfaqësues në stadium për të ndjekur mbrojtësin e talentuar shqiptar.

“Mbrojtësi shqiptar është i mahnitshëm që prej fillimit të kampionatit, për forcën dhe personalitetin fizik. Është bërë një element kryesor, ka shënuar golin e tij të parë dhe tani nuk dëshiron të ndalet. Juventus tashmë e kanë shënuar në listë, dhe nuk janë të vetmit”, është komenti përshkrues i portalit italian të transferimeve “Calciomercato”. Ndërkohë, për Marash Kumbullën është interesuar dhe Fiorentina, ndërsa Napoli është prej kohësh pjesë e skuadrave që vëzhgojnë talentin shqiptar.

Madje të shtunën pasditen e të shtunës, Ancelotti pati shansin për të parë nga afër mbrojtësin e kombëtares shqiptare, që po shkëlqen me ekipin e sapongjitur në Serie A. Në krahun tjetër, Verona nuk dëshiron që futbollisti të largohet, para se klubet e interesuar të pagujanë të paktën 10 milion euro për shqiptarin. Aktualisht, vlera e Marash Kumbullës është 3 milion euro sipas sajtit të njohur të transferimeve, Transfermarkt. Ky është një kapërcim i jashtëzakonshëm, pasi në muajin qershor të këtij viti, Kumbulla vlerësohej me 750 mijë euro, ndërsa në pak muaj ai kushon 3 milion euro.

Kumbulla gol me kokë në Itali. Berisha bëhet “mur”

Mbrojtësi i kombëtares shqiptare, Marash Kumbulla shënoi në Serie A ndaj Sampdorias në takimin e javës së 7-të të kampionatit. Mbrojtësi gjeti rrjetën në të 9`, duke kaluar Veronan në avantazh. Një gjuajtje e bukur e Veloso nga këndi, gjen kokën e Kumbullës që kalon mbrojtësit kundërshtar, dhe dërgon topin në rrjetë.

Stadiumi shpërthen në festë, ndërsa futbollisti kuqezi “shlyen” në mënyrën e duhur mungesën në dy ndeshje, pas kartonit të kuq që mori në takimin ndaj Juventusit. Verona e fitoi ndeshjen 2-0, me golin e dytë që ishte një autogol nga Murru në të 81`. Fitorja e të shtunës e ngjit Veronan në vendin e 9-të në Serie A me po kaq pikë.

Ky është lajm i mirë për trajnerin Edy Reja, që pritet të grumbullojë Marash Kumbullën për dy ndeshjet e radhës kualifikuese të ekipit tonë kombëtar, ndaj Turqisë dhe Moldavisë.

Ditë pozitive ishte dhe për Etrit Berishën, i cili doli me tre pikë nga sfida kundër Parmës. Spal gjeti rrjetën në të 31`, ndërsa Berisha mbajti portën të pa prekur edhe pse skuadra e tij luajti me një futbollist më pak për shumë minuta. Kjo ishte fitorja e dytë e Spal në Serie A, pas 5 humbjesh.

Ftesa kuqezi, Kumbulla: Reja më emocionoi, ndjek shembullin Chielini

Në konferencën për shtyp nga resorti ku është grumbulluar ekipi kombëtar, ka dalë në konfernecë për shtyp, veç Keidi Bares, dhe mbrojtësi Marash Kumbulla. Talenti i ri i kuqezinjve, ka folur fillimisht për aventurën në Itali me Hellas Verona në Serie A, duke u shprehur se shpreson të ketë hapësira për të luajtur. “Më Veronën nuk kam patur shumë hapësira, por me trajnerin e ri janë shtuar. Uroj të luajë gjithë kampionatin. Unë mendoj për ekipin aktual dhe për të dhënë maksimumin. Më shumë më pëlqen Kielini”, ka thënë Kumbulla.

Ftesa në kombëtare e ka emocionuar, ndërsa tregon se synimi i grupit në dy ndeshjet e ardhshme është marrja e sa më shumë pikëve. “Isha shumë i emocionuar me Kombëtaren. E mendoja se do luaja me U-21, por isha i lumtur kur më thiri Edi Reja. Skuadra më duket mirë, se ka eksperiencë. Shpresojmë të marrim sa më shumë pikë në këto dy ndeshje”, shprehet mbrojtësi.

Në fund ai ka rrëfyer edhe pritjen që i është bërë në skuadër nga lojtarët e tjerë. “Të gjithë lojtarët me kanë pritur mirë. Janë të gjithë lojtarë me eksperiencë. Trajneri e ndjek kampionatin italian dhe e di shumë mirë gjendjen e lojtarëve. Me trajnerin nuk kam bërë ndonjë bisedë, vetëm me grupin”, ka përfunduar mbrojtësi.