Mitrovica si Vllaznia, kualifikohet në grupet e Champions Leage për femra

Shqiptarët do të përfaqësohen me dy ekipe në kompeticionin e Champions League për femra. Pas Vllaznisë, që arriti të kualifikohet si vendi i parë në grupin 10, ka qenë skuadra e femrave të Mitrovicës në Kosovë, që është kualifikuar si ekipi i parë në grupin 2.

Skuadra e Mitrovicës i ka mbyllur garat e këtij grupi me tri fitore në po aq ndeshje të zhvilluara. Në ndeshjen e fundit dhe përcaktuese për vendin e parë, mitrovicaset kanë shënuar fitore në duel me kampionet e Malit të Zi, Breznica Pljevlje, me rezultat 1:0.

Ndonëse për kampionet kosovare në këtë ndeshje mjaftonte edhe barazimi, ato, megjithatë arritën që t’i gëzohen fitores me golin e shënuar nga Kaltrina Biqkaj, në minutën e 90-të nga pika e penalltisë.

Më herët, Mitrovica kishte mposhtur edhe Olimpia Cluj dhe NSA Sofia. Kësisoj, për herë të parë në historinë e re të futbollit kosovar, një klub do të marrë pjesë në rrethin e grupet e Champions League për femra, ku janë të përfshira 32 ekipe. Shorti për rrethin e dytë do të tërhiqet më 16 gusht në Nion.

Përleshjet në Mitrovicë, KFOR: Nuk ndërhyjmë

E ndërsa Serbia ka vënë ushtrinë në gatishmëri dhe ka kërkuar ndihmë nga ndërkombëtarët për arrestimet e bëra gjatë të martës në Mitrovicë, KFOR është shprehur se këto veprime nuk drejtohet kundër serbëve, por janë në kuadër të luftës kundër krimit dhe korrupsionit.

Zëdhënësi i KFOR, Vincenzo Grasso ka thënë se janë duke monitoruar situatën dhe janë në komunikim të vazhdueshëm si me autoritetet kosovare ashtu edhe ma ato serbe.

“Operacioni i policisë së Kosovës po kryhet me urdhër të prokurorit anembanë Kosovës, jo vetëm në veri dhe nuk drejtohet kundër serbëve, por kundër atyre që akuzohen për korrupsion dhe krime”, tha zëdhënësi i KFOR Vincenzo Grasso për Tanjug.

“Tani po e monitorojmë situatën, ne jemi në kontakt me autoritetet në Prishtinë, por komunikimet me Serbinë janë gjithashtu të hapura,” tha Grasso.

Sipas tij, ky është një veprim policor, kështu që KFOR “vetëm monitoron situatën”.

Ai gjithashtu komentoi qëndrimin e zyrtarëve serbë se KFOR-i duhet të bëjë diçka për veprimin e forcave speciale të Kosovës. “Kjo është diskutuar më herët, ne nuk ndërhyjmë me veprimet e policisë, derisa nuk na kërkohet të ndërhyjmë”, tha Grasso.

Mitrovica në zgjedhje të jashtëzakonshme

Presidenti Hashim Thaçi ka shpallur mbajtjen e zgjedhjeve të jashtëzakonshme për kryetar në 4 komunat veriore të Kosovës. Lajmi është bërë i ditur nga vetë zyrat e presidentit të Kosovës, ku njoftohet se më 19 maj do të mbahen zgjedhjet për kryetar të komunave Mitrovicë e Veriut, Zubin Potok, Leposaviq dhe Zveçan.

“Presidenti i Republikës së Kosovës, Hashim Thaçi, në mbështetje të kompetencave kushtetuese dhe ligjore, duke marrë parasysh shkresën e Ministrisë së Administrimit të Pushtetit Lokal dhe pas një procesi të konsultimeve përkatëse me partitë politike dhe Komisionin Qendror të Zgjedhjeve, sot ka nxjerr vendimin për caktimin dhe shpalljen e datës së zgjedhjeve të jashtëzakonshme për kryetar në komunat: Mitrovica e Veriut, Zubin Potok, Leposaviq dhe Zveçan. Në pajtim me këtë vendim, zgjedhjet e jashtëzakonshme për kryetarë në këto katër komuna të Republikës së Kosovës do të mbahen më 19 maj 2019.” – thuhet në njoftimin e presidencës.

Kryetarët e këtyre komunave, që kanë një shumicë të konsiderueshme të popullsisë serbe, dhanë dorëheqjen pas vendosjes së taksës 100% ndaj produkteve të importuara nga Serbia.