Rama: “Drejtësia” ka nisur pastrimin e të korruptuarve

Kryeministri Rama ka kërkuar njohjen e Kosovës dhe integrimin e Ballkanit Perëndimor në BE gjatë fjalës së tij 25 minutëshe në samitin e OKB-së në New York. Rama e nisi fjalimin me arritjet e Shqipërisë në objektivat e saj globale, ndërsa bëri një deklaratë të fortë edhe për njohjen e Kosovës nga Serbia. Në lidhje me procesin e zgjerimit të familjes europiane me Ballkanin Perëndimor, Rama tha se kjo është e vetmja formë për të siguruar stabilitetin në rajon. “Stabiliteti, siguria, prosperiteti dhe demokracia e rajonit mund të garantohet vetëm nga perspektiva europiane. E për këtë arsye, dhënia e përgjigjes pozitive për Shqipërinë dhe Maqedoninë e Veriut për ambicien e tyre për të hapur bisedimet për anëtarësim, nuk do të jetë thjesht një shpërblim bazuar në meritën e tyre, por po kështu strategjikisht do të jetë vendimi më i mençur që BE do të merrte për BE-në.” tha Rama

Reforma në Drejtësi ishte një tjetër pikë ku u ndal Kryeministri Rama, një reformë mjaft e vlerësuar edhe nga ndërkombëtarët. Rama tha se falë kësaj reforme shumë gjyqtarë dhen prokurorë të korruptuar kanë dalë nga sistemi i drejtësisë , ndërsa Shqipëria është në rrugën e duhur për të luftuar korrupsionin.

“Megjithatë ka edhe një element tjetër që duhet përmendur, që është reforma e pashembullt në drejtësi e Shqipërisë, procesi i një pastrimi madhor duke hequr gjyqtarë dhe prokurorë të korruptuar nga sistemi, si dhe procesi i ngritjes së institucioneve të reja gjyqësore, të përshtatura për të luftuar korrupsionin dhe krimin e organizuar në nivelet më të larta, duke transformuar të gjithë fizionominë e vendit.

Korrupsioni në gjyqësor për dekada të tëra, jo vetëm parandaloi bërjen e drejtësisë, por gjithashtu u shndërrua në pengesë, për ta bërë drejtësinë normën e ekzistencës tonë të përditshme si shoqëri.

Ndërkohë që sistemi i ri i drejtësisë formësohet ngadalë, duke u bërë plotësisht funksional, ne shpresojmë që ai do të ulë në mënyrë të konsiderueshme të gjitha aktet e korrupsionit dhe të abuzimit me pushtetin dhe do të sigurojë më në fund, triumfin e drejtësisë, e shtetit të së drejtës në të gjithë vendin, një vend që e dua me shpirt dhe që e përfaqësoj me krenari këtu, sot.” tha Rama

Rama thekon se Shqipëria ka bërë progres në lidhje me barazinë gjinore, ku sumë gra janë pjesë e qeverisë apo në këshillat vendor e administratë publike. Gjatë fjalës në foltoren e OKB, Rama u shpreh se për këtë fakt është shumë krenar që ky ndryshim i madh ka ndodhur në qeverinë e tij.

“Përveç kësaj, ne kemi bërë progres të madh për sa i takon barazisë gjinore me më shumë gra, sesa kurrë ndonjëherë, të pranishme në qeveri, në Parlament, në këshillat vendore dhe në administratën publike dhe jam shumë krenar të them që në qeverinë time ka më shumë gra sesa burra, një shenjë mjaft e mirë për të qenë të suksesshëm.”

Në lidhje me pavarësinë e Kosovës, Rama tha se ky është një proces i pakthyeshëm dhe se ka ardhur koha që të dy vendet të bashkëpunojnë për të ecur përpara. Kryeministri Rama bëri thirrje që Kosova të lejohet të integrohet ne organizatat ndërkombëtare dhe qytetarët e saj të mos mbeten të izoluar.

“E dashur Serbi, Kosova e pavarur është e pakthyeshme, mos jetoni më me historinë por bëni historinë për eten tuaj dhe për botën duke ardhur në realitet. E rëndësishme që Kosova t’i jepet mundësia të bëhet pjesë e organizatave ndërkombëtare ku çdo vend sovran ka të drejtë të marrë pjesë. Shpresa ime e sinqertë që Ballkani Perëndimor do të arrijë të shkëputet nga e kaluara dhe të ofrojë një të ardhme të pavarur. E pajustifikueshme që Kosova me 2 mln banorë mbetet vendi i vetëm ku populli është ende i izoluar. Nga 2014 më shumë e100 mln njerëz janë shtuar asaj bashkësie që mund të hyjnë ne BE pa viza, si është e mundur që BE të mbajë peng 2 mln njerëz. E dashur BE ndaloje këtë gjë të pakuptimtë“, tha Rama në OKB

Gjatë thirrjes për njohjen e pavarësisë së Kosovës, mediat janë fokusuar edhe në reagimin e përfaqësueses së Serbisë, e cila pati një buzëqeshje ironike në fytyrë.

Vuçiç kritika ndërkombëtarëve: Mendoni dhe për ne, jo vetëm Kosovën

Aleksandër Vuçiç, presidenti i Serbisë, tha se problemi me Kosovën duhet të zgjidhet në mënyrë të përhershme, ndërsa ka kritikuar ndërkombëtarët të mos mbajnë vetëm anës e saj, por të kuptojnë edhe qëndrimet e serbëve. Gjatë fjalës së tij në samitin e OKB-së, Vuçiç deklaroi se pavarësisht veprimeve të njëanshme të Kosovës, Serbia ka reaguar në mënyrë të moderuar.

“Për problemin e Kosovës duhet zgjidhje e përhershme, e cila duhet të arrihet në atë mënyrë që asnjëra palë të mos fitojë gjithçka, por mjaftueshëm. Kemi filluar të luftojmë për një zgjidhje të përhershme dhe presim që bota t’i kuptojë qëndrimet dhe argumentet tona dhe të mos e mbështesë palën e kundërt, siç ka bërë nga viti 1999 deri më 2008. Në gjithë këtë kohë, Serbia ka reaguar në mënyrë të moderuar dhe me përgjegjësi ndaj veprimeve të njëanshme të Prishtinës, duke mos vendosur kundërmasa dhe duke bërë përpjekje të qetësojë situatën”, tha Vuçiç i cili iu referua edhe taksës 100 % ndaj produkteve serbe nga qeveria e Kosovës. Vuçiç tha se si pasojë e kësaj takse Serbia ka humbur 350 milionë euro si dhe ka vënë në rrezik jetën normale dhe të dinjitetshme të serbëve në Kosovë.

Pavarësisht thirrjeve të BE dhe SHBA për të hequr apo edhe pezulluar taksën, Ramush Haradinaj duket i palëkundur për ta hequr atë deri në njohjen reciproke nga Serbia.

Cakaj: Samiti i OKB, mundësi për aspiratat e Shqipërisë

Ministri i Jashtëm në detyrë Gent Cakaj, i cili ka marrë pjesë në punimet e sesionit të 74 të Asamblesë së Përgjithshme të Kombeve të Bashkuara, deklaroi se Shqipëria ka ambicie të mëdha në fushën e politikës së jashtme dhe po punon ngushtë me vendet e rajonit dhe atyre të BE-së në mënyrë që të marrë një mbështetje sa më të gjerë në aspirata e saj si integrimi i vendit, kryesimi i OSBE në 2020 apo edhe sigurimi i një vendi jopermanent në Këshillin e Sigurimit në 2022.

Cakaj tha se Shqipëria ka interes të madh që të sigurojë kontaktet e duhura politike dhe diplomatike që të mbështesin kandidaturën e saj për Këshillin e Sigurimit në vitin 2022. Gjithashtu ministri i jashtëm theksoi rëndësinë e bashkëpunimit dhe pjesëmarrjes aktive të Shqipërisë në platforma efektive multilaterale që përfshihen që nga zhbërja e varfërisë ekstreme deri tek diskutimet mbi ndryshimet klimaterike.

“Shqipëria gjatë gjithë këtyre viteve është karakterizuar nga një pjesëmarrje më aktive e më dinamike në organizatat ndërkombëtare dhe platformat multilaterale, duke filluar nga angazhimet e shtuara në NATO, duke u koncentruar veçanërisht në Kryesinë Shqiptare të OSBE-së të vitit 2020 dhe duke theksuar në mënyrë të posaçme faktin se Shqipëria aspiron që të marrë një vend të anëtarit jo permanent të Këshillit të Sigurimit në vitin 2022. Në të njëjtën kohë, kjo përbën interesin kryesor të angazhimeve të Shqipërisë në këtë sesion të punimeve të Asamblesë së Përgjithshme. Ne do të zhvillojmë një numër të konsiderueshëm të takimeve, me një varg shtetesh anëtare të Bashkimit Evropian, në shërbim të çeljes së negociatave për anëtarësim në tetor dhe po ashtu po kryejmë detyrat tona në kuadër të udhëheqjes së Kartës së Adriatikut, që Shqipëria ka për këtë vit.

Prandaj, në bashkëpunim me Shtetet e Bashkuara të Amerikës dhe të gjitha vendet pjesëmarrëse të rajonit, ne do të organizojmë takimin e Kartës së Adriatikut, për të konsoliduar më tutje bashkëpunimin rajonal në çështjet e sigurisë. Me një fjalë, Shqipëria do të artikulojë një numër të konsiderueshëm të interesave të saj të politikës së jashtme, në kuadër të platformës së Asamblesë së Përgjithshme të Kombeve të Bashkuara kësaj radhe. Duke filluar nga rajoni, procesi i integrimit evropian, kryesia shqiptare e OSBE-së e vitit 2020 dhe, natyrisht, duke nënvijëzuar në mënyrë të veçantë aspiratën tonë për të siguruar vendin e anëtarit jopermanent në Këshillin e Sigurimit të vitit 2022.” tha Cakaj

“Torturohet psikologjikisht prej vitesh”, OKB mbron Assange

Themeluesit të Wikileaks, Julian Assange i është ushtruar torturë psikologjike për vite me radhë. Të paktën kështu është shprehur Raportuesi i posaçëm i Kombeve të Bashkuara për torturë, Nils Melzer, pas vizitës që Assange iu bë në qelinë ku ndodhet.

Julian Assange ka vuajtur “ekspozim të zgjatur ndaj torturës psikologjike” tha Melzer dhe i kërkoi Britanisë të mos e ekstradojë atë, duke paralajmëruar se të drejtat e tij njerëzore do të shkelen dhe se ai nuk është i aftë për t’u gjykuar.

Assange, 47 vjeç, po lufton kundër ekstradimit në SHBA lidhur me akuzat që lidhen me publikimin e informacione të klasifikuara. Ai kërkoi azil politik në ambasadën e Ekuadorit në Londër në vitin 2012, ku qëndroi deri në arrestimin e tij më 11 prill të 2019.

“Assange ka qenë subjekt i persekutimit të vazhdueshëm kolektiv duke përfshirë kërcënime ndaj deklaratave dhe nxitjen e dhunës kundër tij. Unë kam punuar në shumë fusha të torturës në jetën time, në situata të dhunës dhe kam biseduar me viktimat e persekutimit në mbarë botën dhe kam parë mizori shumë serioze. Por ajo që kurrë nuk kam parë është se një person i vetëm është izoluar qëllimisht dhe persekutuar nga disa shtete demokratike në një përpjekje të bashkërenduar që përfundimisht ta thyejnë vullnetin e tij” tha Melzer për BBC.

Melzer shtoi se ai beson se Assange “ka një frikë shumë të arsyeshme, që nëse ekstradohet në Shtetet e Bashkuara ai nuk ka asnjë shans për të marrë një gjykim të drejtë me nivelin e paragjykimeve publike dhe zyrtare që ekzistojnë atje për të”.

Aktualisht Assange ndodhet në një burg në Britani.