I dhunshëm si i zoti, krokodili i Fidel Castros kafshon një person

Një burrë është shtruar në spital pasi është kafshuar nga një krokodil që dikur i përkiste liderit të ndjerë Kuban, Fidel Castro. I plagosuri po ndiqte një festë tradicionale suedeze në Akuariumin e Stokholmit, kur u kafshua në krah nga një krokodil.

Burri po mbante një fjalim në një podium qelqi dy metra të lartë dhe krahët e tij ishin brenda mbrojtëses. Sulmi i krokodilit ishte i papritur për të gjithë pasi ai thjesht e pa, kërceu mbi xhamin e lartë dhe i kapi krahun.

Fatmirësisht në vendngjarje kishte 3 mjekë që ndërhynë në kohë dhe e dërguan në spital. I plagosur pësoi lëndime në krahë por pa rrezik për jetën.

Ky krokodil është një nga dy krokodilët kubanë që i përkisnin Fidel Castros në vitet 1970. Ato iu dhanë Akuariumit të Stokholmit në 1981, të cilët kujdesen në shumimin e tyre pasi krokodili kuban është një specie e rrezikuar drejt zhdukjes.

Plagosën kushëririn e Vis Martinit në Laç, zbardhen detajet

Policia e shtetit ka zbardhur detaje të reja në lidhje me plagosjen me armë zjarri të kushëririt të Ervis Martinit, në qytetin e Laçit. Dy autorët të identifikuara si G.R, 21 vjeç dhe A. M., 25 vjeç, janë shpallur në kërkim. Ngjarja ka nisur disa javë pas një konflikti për motive të dobëta mes këtyre 2 personave dhe të plagosurit, që përshkallëzoi deri në përdorimin e armëve dhe plagosjen e 19-vjeçarit.

Aktualisht policia është në kërkim të autorit të 21-vjeçarit si autor i plagosjes së Edon Martini,19 vjeç, dhe bashkëpunëtorit të tij 25-vjeçar, i cili akuzohet për armëmbajtje dhe moskallëzim krimi. Autorët dyshohet se pas ngjarjes dogjën makinën në Borizanë të Krujës për të humbur gjurmët.

Ngjarja ka ndodhur paditen e të shtunës, ku 19-vjeçari u gjet i plagosur nga kalimtarët në anë të rrugës në lagjen nr. 1 të qytetit të Laçit dhe është transportuar për mjekim të specializuar në spitalin e Traumës në Tiranë. 19-vjeçari ka disa plagë në trup dhe gjendja e tij paraqitet e rëndë.

Edon Martini është kushëriri i parë (djali i xhaxhait) të Ervis Martinit, i cili ishte protagonist i një përplasje me armë disa muaj më parë në zonën e ish-bllokut në tetor të vitit të kaluar, ku mbeti një i vdekur. Martini mbeti i plagosur nga ngjarja, ndërsa pas 7 muajsh në burg u lirua në maj të këtij viti kundrejt garancisë pasurore në vlerën e 5 milionë lekësh të rinj.

PLAGOSET ME ARMË NË LAÇ KUSHËRIRI I VIS MARTINIT, GJENDET I GJAKOSUR NË RRUGË

Shpërthimi te Blloku, “Gabim njerëzor”

Shpërthimi në zonën e ish bllokut, ku mbetën të plagosur 5 persona, ka ndodhur si pasojë e një pakujdesie apo gabimi njerëzor. Ky ishte rezultati i hetimit paraprak të kryer nga Inspektorati Shtetëror Teknik Industrial (ISHTI) , në të cilin thuhet se gabimi njerëzor ose pakujdesia çoi në shpërthimin e fuqishëm që alarmoi banorët e zonës. Nga këqyrja e vendit të ngjarjes, rezulton se biznesi i argjendarisë zhvillonte aktivitet edhe në katin përdhe bodrum, nga ku u nxorën edhe dy bombola të tjera nga forcat zjarrfikëse.

“Nisur nga ambienti, vendi i instalimit të bombolës, në katin nën tokë (bodrum), gjendja teknike e bombolës etj, rezulton se rrjedhja e mundshme e gazit mund të ketë ardhur si pasojë e instalimi i bombolës me pajisjen e shkrirjes së arit nëpërmjet tubit të gomës dhe krijimit të përzierjes eksploduese në kufijtë kritik. Rrjedhja e këtij gazi në ajër, sjell shpërthim të tij sapo vihet në kontakt me faktorë të jashtëm si shkëndijë elektrike, çelësi elektrik apo kyçje – s’kyçje e pajisjeve elektrike, ose ndezja e një shkrepëse. Nga veprimi i gabuar i përdoruesit që mund të jetë :

– lënia hapur e linjës së gazit, ventilit të pajisjes së saldimit (apo të shkrirjes)

– përdorimi i mjeteve ndezëse shkrepëse apo cigare.

Mbi bazën e informacioneve të grumbulluara për momentin dhe nga këqyrja e dy bombolave paraprakisht rezulton se ngjarja ka ardhur si rezultat i një pakujdesie ose gabimi njerëzor.” – thuhet në deklaratën e inspektoratit teknik

Nga shpërthimin mbetën të plagosur 5 persona, fatmirësisht jashtë rreziku për jetën. Dy prej të plagosurve ishin kalimtarë të rastit, një ishte punonjëse në argjendari dhe dy të plagosurit e tjerë ishin pronarët e biznesit.

Spitali i Traumës raporton gjendjen e 5 të plagosurve nga shpërthimi

Shpërthimi i fuqishëm në zonën e ish-bllokut paraditen e së hënës la të plagosur 5 persona, dy prej të cilëve ndodhen në gjendje të rëndë. Në një reagim për mediat drejtoria e Spitalit Universitar të Traumës ka informuar në lidhje me gjendjen shëndetësore të të plagosurve.

Spitali i Traumës raporton se 5 persona me plagë të ndryshme janë paraqitur pranë kësaj qendre shëndetësore, ku disa prej tyre u dërguan në repartin e djegieve në QSUT.

Të plagosurit Eneda Nura, 18 vjeçe, punonjëse në argjendari, Ardanoel Serani, 23 vjeç, kalimtar i rastësishëm dhe një kalimtar me iniciale A.R, 24 vjeç janë shtruar në spitalin e Traumës. Dy kalimtarët e rastit pasi kanë marrë mjekimin e nevojshëm janë larguar nga spitali. Ndërsa punonjësja Eneda Nura ndodhet ende nën kujdesin e mjekëve por jashtë rreziku për jetën.

Gjendja paraqitet e rëndë për dy pronarët e argjendarisë, Alma dhe Sokol Pira, të cilët ndodhen në Qendrën Spitalore Universitare “Nënë Tereza” në repartin e djegieve.

Shpërthimi ka ndodhur në rrugën “Vaso Pasha” duke shkaktuar një tym të madh dhe alarmuar banorët e zonës. Policia evakuoi të gjithë banorët e pallatit pasi kishte rrezik të një shpërthimi të dytë për shkak të pranisë së disa bombolave të tjera.

Kukës, aksidentohet kamioni dhe ndahet në dysh, një i plagosur

Një aksident i rëndë ka ndodhet në rrugën e Kombit, ku një kamion është ndarë në dysh pasi është përplasur me trafik-ndarësen. Përplasja ka qenë e fortë duke gjykuara nga shkatërrimi i mjetit, ndërsa fatmirësisht drejtuesi i saj ka shpëtuar.

51-vjeçari kosovar me iniciale I.I., ka humbur kontrollin e mjetit dhe është përplasur me trafik-ndarësen, ndërsa dyshohet se shkak mund të jetë bërë lagështia në rrugë për shkak të shirave.

I plagosuri ka marrë ndihmën mjekësore dhe ndodhet jashtë rreziku për jetën.

Tiranë, përplaset nga ambulanca, humb jetën e moshuara

Një aksident ka ndodhur paraditen e së dielës në Unazë, pranë ish-restorant ‘Durrësit’, në Tiranë. Një ambulancë ka përplasur një këmbësore, e cila po tentonte të kalonte rrugën. Ajo është transportuar me urgjencë në spital, nga vet ambulanca që e përplasi, për shkak të plagëve të mëdha që mori.

E moshuara me inicialet F.S., 70 vjeç, ka humbur jetën në spital, duke mos u mbijetuar dot plagëve të marra.

Tiranë, makina përplas këmbësorin, i plagosuri në gjendje të rëndë

Një automjet tip Golf 5 ka përplasur një këmbësor në zonën e Unazës, pranë shkollës “Harry Fultz” në Tiranë. I plagosuri, rreth moshës 50 vjeç, është transportuar në spital në gjendje të rëndë.

Drejtuesi i makinës, një i ri rreth të 25-ve, është marrë nga policia , ndërsa po hetohet për zbardhjen e plotë të rrethanave të aksidentit. Në zonë është krijuar një trafik i rënduar, si pasojë e aksidentit.

Aksident te rruga e Kavajës, makina plagos 4 persona

Një aksident me pasojë plagosjen e 4 personave ka ndodhur në rrugën e Kavajës në Tiranë.

Në aksident është përfshirë një makinë me targa franceze, që ka përplasur 4 kalimtarë, të cilët kanë marrë plagë të lehta.

Policia ka nisur hetimet për zbardhjen e plotë të ngjarjes.

Plagosi kunatin me thikë, 18-vjeçarja: Donte të më vriste

Pavarësisht ashpërsimit të ligjit në lidhje me masat për dhunën e ushtruar në familje, raste të tilla vijojnë të ndodhin. Një 18-vjeçare ka plagosur me thikë kunatin e saj pas një sherri momental në familje. Ngjarja ka ndodhur në Tiranë, në zonën e Kamzës, ndërsa 18-vjeçarja ka deklaruar në polici se kunati i saj, nën efektin e alkooli, ka nisur ta kërcënojë me thikë se do e vrasë.

Sipas saj plagosja ka ndodhur në konflikt e sipër, ndërsa shtetasi me iniciale A.M., 40 vjeç ndodhet në spital jashtë rreziku për jetën.

Polica ka vendosur që 18-vjeçarja të ndiqet në gjendje të lirë në lidhje me rastin edhe për shkak se ka një fëmijë të vogël.