Pompeo thyen heshtjen për kërcënimet e pretenduara ndaj ambasadores Yovanovitch

Sekretari i Shtetit Mike Pompeo theu heshtjen gati 72 orëshe të premten lidhur me përgjimin e pretenduar dhe kërcënimet ndaj ish-ambasadores amerikane në Ukrainë, duke thënë se ai beson se akuzat do të vërtetohet të jenë të gabuara, por se ai kishte detyrimin të vlerësonte dhe hetonte çështjen.

Në intervista me drejtues konservatorë të radios, zoti Pompeo tha se ai nuk kishte njohuri për pretendimet deri në fillim të kësaj jave kur demokratët e Kongresit lëshuan dokumente nga një bashkëpunëtor i avokatit personal të Presidentit Donald Trump, duke sugjeruar se Marie Yovanovitch ishte përgjuar. Ai gjithashtu tha se nuk e dinte dhe nuk e kishte takuar kurrë Lev Parnasin, bashkëpunëtorin e Rudy Giuliani i cili ngre këto pretendime.

Pompeo, i cili po udhëtonte për në Kaliforni kur u publikuan dokumentet, ishte kritikuar ashpër nga ligjvënësit dhe diplomat aktualë dhe të shkuar për mos adresimin e çështjes. Dokumentet e siguruara nga Parnas sugjerojnë se mund të ketë pasur një kërcënim për ambasadoren Yovanovitch pak para se ajo të detyrohej të largohej papritur nga posti pranverën e kaluar.

“Ne do të bëjmë gjithçka që duhet të bëjmë për të vlerësuar nëse ka patur diçka që ndodhi atje,” tha ai në një intervistë në radio me Tony Katz, në Indianapolis. “Dyshoj se shumë nga ato që janë raportuar do të rezultojnë përfundimisht të gabuara, por detyrimi ynë, detyrimi im si Sekretar i Shtetit, është të sigurohemi që ne të vlerësojmë dhe hetojmë. Çdo herë që ka dikush që mendon se mund të ketë patur rrezik për një nga oficerët tanë, ne do ta shohim qartë çështjen”.

“Në Departamentin e Shtetit ne bëjmë gjithçka që mundemi për të siguruar që oficerët tanë, jo vetëm ambasadorët tanë, por gjithë ekipi ynë, kanë nivelin e duhur të sigurisë”, tha zoti Pompeo.

Deri tani, Departamenti i Shtetit kishte refuzuar kërkesa të përsëritura për të ofruar ndonjë mbrojtje publike për ish ambasadoren Yovanovitch, duke shkaktuar debate.

Akuzat, nëse janë të vërteta, janë thelbësore për hetimin e fajësimit ndaj presidentit Trump, i cili përballet me një akuzë se ai abuzoi me pushtetin e tij presidencial duke bërë presion mbi Ukrainën për të hetuar rivalin demokrat Joe Biden, duke përdorur si levë ndihmën ushtarake për vendin. Trump thotë se hetimi është një “mashtrim”.

Në atë kohë, aleatët e Trump po përpiqeshin që Yovanovitch, e cila shihej si pengesë për një hetimin ndaj Bidenit, të hiqej nga posti. Ajo u largua në fund të majit nga posti përpara përfundimit të mandatit të saj.

Ukraina nis hetimet

Autoritetet ukrainase thonë se kanë hapur një hetim për të zbuluar nëse Marie Yovanovitch, ish ambasadorja amerikane në Kiev, ishte përgjuar në mënyrë të paligjshme para se presidenti amerikan, Donald Trump, ta largonte atë papritur nga posti vitin e kaluar.

Lev Parnas, një biznesmen amerikan me origjinë ruse dhe bashkëpunëtor i ngushtë i avokatit personal të Presidentit Donald Trump, Rudy Giuliani, ka paraqitur disa dokumente të rëndësishme në procesin e akuzave ndaj Presidentit Trump dhe gjykimin e tij në Senat. Dokumentet befasuese përfshijnë letra dhe mesazhe me tekst që tregojnë Giulianin duke komunikuar në lidhje me ish-ambasadoren amerikane në Ukrainë Marie Yovanovitch, duke përfshirë edhe gjurmimin e lëvizjeve të saj në Kiev.

I pyetur në lidhje me pretendimet e Parnasit se Presidenti Trump u përpoq të bindte Ukrainën për të shpallur një hetim ndaj rivalit të tij demokrat, ish nënpresidentit Joe Biden, zoti Trump ka këmbëngulur vazhdimisht se nuk e njeh Parnasin.

“Nuk kam nevojë për ndihmën e një njeriu që nuk e kam takuar kurrë më parë, përveç se të kem bërë ndonjjë fotografi në një fushatë fondesh”.

Ministria e brendshme ukrainase thotë se do të hetojë pretendimet e Parnasit; do të hetojë gjithashtu nëse janë shkelur të drejtat diplomatike të ambasadores dhe ligji ukrainas.

“Sipas mekanizmave ligjorë ndërkombëtarë, Ministri i Punëve të Brendshme, Arsen Avakov, sugjeroi që pala amerikane mund të marrë pjesë në hetim. Ukraina pret që Shtetet e Bashkuara të përgjigjen menjëherë dhe mezi pret bashkëpunimin”, thotë Denys Lenets, zyrtar i lartë në Ministrinë e Brendshme të Ukrainës.

Pezullimi i përkohshëm i ndihmës ushtarake për Ukrainën nga Presidenti Trump çoi në ngritjen e akuzave kundër tij nga Dhoma e Përfaqësuesve muajin e kaluar dhe procesi ka kaluar tani në Senat. Të dyja dhomat e Kongresit amerikan kishin miratuar fonde për Ukrainën, të përfshirë në një luftë me Rusinë në territorin e saj. Të enjten, një agjenci mbikëqyrëse e qeverisë federale,tha se vonimi i kësaj ndihme ishte shkelje e ligjit amerikan./VOA/

Pompeo: Vrasja e Solejmanit shmangu një sulm të pritshëm

Vrasja nga forcat amerikane e udhëheqësit të forcës elitë “Quds” të Iranit gjatë një sulmi ajror në Irak, ka nxitur thirrje nga për përmbatje, tek ato për hakmarrje. Ministri iranian i Punëve të Jashtme Mohammad Javad Zarif e quajti vrasjen e gjeneralit Qassem Soleimani “një akt terrorizmi shtetëror dhe shkelje të sovranitetit të Irakut”.

Sekretari amerikan i Shtetit, Mike Pompeo tha se vrasja e tij shmangu një “sulm që pritej të ndodhte nga momenti në moment” kundër interesave amerikane. Departamenti amerikan i Mbrojtjes shtoi se Soleimani “po hartonte në mënyrë vazhdueshme plane për të sulmuar diplomatët dhe anëtarët e shërbimit amerikan në Irak, si dhe në të gjithë rajonin”. Gjenerali ishte një nga strategët kryesorë ushtarakë të Iranit.

“Martirizimi i Soleimanit do ta bëjë Iranin më të vendosur t’i rezistojë ekspansionit amerikan si dhe të mbrojë vlerat tona islamike”, tha Presidenti iranian Hassan Rouhani në një deklaratë. “Pa dyshim që Irani dhe vendet e tjera që kërkojnë liri në rajon do të hakmerren”, shtoi ai.

Kryetarja e Dhomës së Përfaqësuesve të Kongresit amerikan, Nancy Pelosi tha se sulmi ishte kryer “pa u këshilluar” me Kongresin dhe se rrezikonte “të provokonte një përshkallëzim të mëtejshëm e të rrezikshëm të dhunës”. Ajo shtoi se “SHBA dhe bota nuk mund ta përballojnë përshkallëzimin e tensioneve deri në pikë që të mos ketë kthim pas”.

Ministri i jashtëm i Britanisë Dominic Raab u bëri thirrje të gjitha palëve për vetëpërmbatje. Një zëdhënës i grupit palestinez Hamas tha se vdekja e gjeneralit “hap dyert e rajonit për të gjitha zhvillimet e mundshme, përveç qetësisë e stabilitetit”. Bassem Naim tha se “përgjegjësia për këtë është e SHBA-së”.

Një zëdhënës i qeverisë kineze tha se Kina “e kundërshton përdorimin e forcës në marrëdhëniet ndërkombëtare”. Ai tha se Pekini “u bën thirrje të gjitha palëve përkatëse, veçanërisht SHBA-së për vetëpërmbatje si dhe për parandalim të përshkallëzimit të tensioneve”.

Senatori amerikan Jim Risch, kryetari republikan i komisionit të Marrëdhënieve me Jashtë në Senat shkruante në Twitter se “sot u dha drejtësi”, duke shtuar se siç kishte paralajmëruar edhe më parë qeverinë iraniane, ajo nuk duhet “ta merrte si dobësi përmbatjen e arsyeshme amerikane ndaj sulmeve të mëparshme të Teheranit”.

“Ky është një akt i fortë përshkallëzues në një rajon tashmë të rrezikshëm”, tha ish-nënpresidenti Joe Biden, një nga kandidatët demokratë për garën presidenciale. Presidenti amerikan Donald Trump tha se zoti Biden “duhet t’i japë popullit amerikan një shpjegim mbi strategjinë dhe planet për të garantuar sigurinë për trupat dhe personelin e ambasadës, amerikanët dhe interest amerikane si brenda dhe jashtë vendit si dhe për partnerët tanë në të gjithë rajonin e më gjerë”. Moshen Rezaei, ish-komandanti i Gardës Revolucionare të Iranit tha se “Teherani do të hakmarret fuqishëm ndaj SHBA-së”./VOA/

Dako, Llalla e Doshi “non grata”, Pompeo mesazh zyrtarëve të korruptuar

Sekretari Amerikan i Shtetit, Mike Pompeo bëri një deklaratë në ditën ndërkombëtare kundër korrupsionit. Pompeo shprehet se Shtetet e Bashkuara të Amerikës riafirmojnë angazhimin për të parandaluar dhe luftuar korrupsionin globalisht.

“Korrupsioni pengon rritjen dhe zhvillimin ekonomik, lehtëson krimin transnacional dhe ushqen terrorizmin. Korrupsioni mundëson dhe mban udhëheqësit autokratikë, dobëson besimin në sistemet demokratike, krijon mundësi që aktorët grabitqarë të përfitojnë nga partnerët tanë. Krijon gjithashtu kriza politike dhe sfida qeverisjeje që rrezikojnë sigurinë tonë kombëtare”, thotë Pompeo.

Më tej, në deklaratën e tij, Sekretari Pompeo shprehet se DASH gjatë këtij viti u ndaloi hyrjen në SHBA të paktën 40 zyrtarëve publikë dhe pjesëtarëve të familjeve të tyre, për shkak të përfshirjes në korrupsion të konsiderueshëm. “Ne do të vazhdojmë të përdorim autoritet globalisht për të parandaluar zyrtarët e korruptuar të qeverive të huaja dhe anëtarët e familjeve të tyre të udhëtojnë dhe të shpenzojnë fitimet e tyre në Shtetet e Bashkuara”, thotë Sekretari Amerikan i Shtetit.

Në listën e gjatë të DASH, janë dhe 3 ish zyrtarë të lartë të shtetit shqiptar. Bëhet fjalë për deputetin Tom Doshi, ish-Prokurorin e Përgjithshëm Adriatik Llalla dhe ish-kryebashkiakun e Durrësit, Vangjush Dako. Së bashku me këta 3 ish-zyrtarë, u ndalohet hyrja në Amerikë edhe familjarëve të tyre të ngushtë.

Pompeo: NATO të ndryshojë, ndryshe rrezikon të vjetërohet

Sekretari amerikan i Shtetit Mike Pompeo tha të premten se NATO-ja duhet të rritet dhe të ndryshojë përndryshe rrezikon të vjetërohet. Komentet e tij vijnë një ditë pas deklaratës së presidentit francez Emmanuel Macron dhënë revistës The Economist se aleanca është në vdekje klinike, komente që u hodhën poshtë nga kancelarja gjermane Angela Merkel.

Zoti Pompeo tha se aleanca është ndoshta një nga më të rëndësishmet “në të gjithë historinë e derisotme”. Pas fjalimit në Berlin, sekretari Pompeo iu përgjigj pyetjes nëse NATO-ja është e vjetëruar ose klinikisht e vdekur. Ai u përgjigj se pas 70 vjetësh, aleanca duhet të rritet dhe të ndryshojë, duhet të përballet me realitetet dhe sfidat e sotme.

“Nëse vendet e ndryshme besojnë se mund të marrin përfitimet që sjell siguria pa i siguruar NATO-s burimet që i duhen, nëse ato nuk i respektojnë angazhimet e tyre, ekziston rreziku që NATO-ja të bëhet e paefektshme ose e vjetëruar,” tha ai.

Në fjalim, zoti Pompeo kritikoi trajtimin e Rusisë ndaj kundërshtarëve politikë dhe tha se taktikat e Kinës duhet të jenë mjaft të njohura për njerëzit e ish-Gjermanisë Lindore. Ai tha se vendet e lira janë në konkurrencë vlerash me vendet më pak të lira. Zoti Pompeo ndodhet në Gjermani në prag të 30 vjetorit të rënies së Murit të Berlinit.

Duke reflektuar mbi mësimet e nxjerra nga rënia e Muri në vitin 1989, zoti Pompeo tha se “Perëndimi dhe të gjithë ne humbëm rrugën në muzgun që ra pas atij momenti krenar”. “Ne menduam se mund t’i zhvendosnim burimet tona larg aleancave dhe ushtrive tona, por e kishim gabim,” tha ai.

“Sot, Rusia udhëhiqet nga një ish oficer i KGB-së, dikur i stacionuar në Dresden. Ajo pushton fqinjët dhe vret kundërshtarët politikë”. “Ne nuk duam që furnizimet me energji të Evropës të varen nga Vladimir Putini,” shtoi ai, duke iu referuar tubacionit të gazit Nord Stream 2 i cili do të transportojë gaz natyror nga Rusia në Gjermani.

Zoti Pompeo tha se Partia Komuniste Kineze po “formon një vizion të autoritarizmit” dhe paralajmëroi Gjermaninë që të mos përdorë pajisjet e firmës kineze Huawei Technologies për ndërtimin e rrjetit 5G të të dhënave. “Shefi juaj i inteligjencës ka thënë se Huawei nuk mund të besohet plotësisht”, tha ai.

Në Pekin, Ministria e Jashtme e Kinës e kritikoi zotin Pompeo për komentet e tij të mëparshme në adresë të Partisë Komuniste Kineze, duke thënë se komentet ishin “jashtëzakonisht të rrezikshme” dhe kishin nxjerrë në pah “qëllimet e tij të errëta” siç i cilësoi ajo./VOA/

Pompeo mbron qasjen e Trump ndaj Ukrainës

Sekretari amerikan i Shtetit Mike Pompeo mbrojti qasjen e administratës Trump ndaj Ukrainës që është në qendër të një hetimi të Kongresit për shkarkimin e presidentit.

Ai hodhi poshtë akuzat se ishte një sjellje e papërshtatshme ose në rastin më të keq një abuzim i paligjshëm i pushtetit për të cilin Kongresi kërkon largimin e Presidentit Trump nga detyra.

Sekretari Pompeo e kritikoi hetimin e Kongresit si “qartësisht politik” dhe tha se veprimet e Departamentit të Shtetit synonin thjesht përmirësimin e marrëdhënieve me qeverinë e re të Ukrainës që filloi detyrën në pranverë. Ai tha gjithashtu se puna e ish të dërguarit të posaçëm në Ukrainë, Kurt Volker, bazohej në direktivat e presidentit.

Sekretari Pompeo tha se Departamenti i Shtetit “do të bëjë” të gjitha detyrimet e kërkuara me ligj” në përgjigje të një kërkese të Kongresit për dokumentet në lidhje me Ukrainën.

Demokratët kërkojnë dokumentat nga Shtëpia e Bardhë

Demokratët në Dhomën e Përfaqësuesve kanë dërguar një kërkesë ligjore në Shtëpinë e Bardhë për dokumente që lidhen me hetimin e tyre për të nisur procedurat për shkarkimin e Presidentit Donald Trump.

Krerët e tre komisioneve të Dhomës së Përfaqësuesve thanë në një deklaratë të premten se kërkesa ligjore është e domosdoshme pasi Shtëpia e Bardhë “refuzoi të angazhohej – ose t’i përgjigjej – kërkesave të shumta për dokumente nga komisionet tona në baza vullnetare.”

Ligjvënësit e Dhomës së Përfaqësuesve gjithashtu i dërguan një kërkesë të veçantë për dokumente nënpresidentit Mike Pence në lidhje me kontaktet e tij me Ukrainën, duke përmendur njoftimet se një ndihmës i zotit Pence mund të ketë dëgjuar thirrjen telefonike të korrikut mes Presidentit Trump dhe Presidentit të Ukrainës Volodymyr Zelenskiy që është në qendër të hetimit.

Më herët të premten, Presidenti Trump pohoi se ai ka detyrën kushtetuese për të luftuar korrupsionin, duke u munduar të shpjegojë kërkesat e tij drejtuar qeverive të huaja për të hetuar kundërshtarët e tij politikë./VOA/