Mesazhet me Ramën, Soreca sonte në Real Story: Cila është e vërteta

Vetëm një ditë, pasi ambasadori i BE-së në Tiranë, Luigi Soreca i dorëzoi kryeministrit Rama progres-raportin për hapjen e negociatave, ai do të jetë i ftuari i Sokol Ballës në emisionin “Real Story” në Vizion Plus. Ambasadori i BE pritet të flasë për progres raportin dhe pritshmëritë nëse do të hapen negociatat për Shqipërinë këtë vit, por edhe për zhvillimet politike në vend.

Një ditë më parë, në konferencën e përbashkët për shtyp me kryeministrin Rama, ambasadori Soreca tha të mërkurën se Shqipëria ka arritur progres dhe se negociatat do të hapen pa asnjë kusht. Veçanërisht ambasadori Soreca vlerësoi reformën në drejtësi, si dhe operacionet e ndërmarra për goditjen e grupeve kriminale.

Soreca pritet të flasë sonte në emisionin real Story edhe për mesazhet e publikuara një ditë më parë, ku ai komunikonte me Kryeministrin Rama dhe me ministrin e Jashtëm Cakaj.

Mesazhet që Soreca ka shkëmbyer me Ramën u publikuan menjëherë pas konferencës për shtyp. Ambasadori i BE-së në Tiranë përveç kreut të qeverisë duket se komunikon edhe me ministrin e Jashtëm Gent Cakaj, Sekretarin e Kryeministrit, Engjëll Agaçin. Rama duket se i dërgon Sorecës një lloj Raporti në gjuhën angleze ku flitet për Lulzim Bashën dhe Fatmir Mediun. “…Basha do të humbiste mbështetjen e ndjekësve të tij më të fortë”. Më pas në tekstin anglisht përmendet edhe Fatmir Mediu, i cili ka shprehur idenë e shtyrjes së zgjedhjeve me 6 muaj. Soreca i përgjigjet italish me fjalën “Çmenduri”

Kadilli në Real Story: Edhe dhune, po të jetë e nevojshme

Zgjidhja e krizës politike në vend ishte kryefjala e emisionit të hënës në “Real Story” i Sokol Ballës në Vizion Plus, një çështje e cila çdo ditë po bëhet edhe më e nxehtë, teksa afron data 30 qershor, e dekretuar nga Presidenti për zgjedhjet vendore. Të ftuar në “Real Story” për të diskutuar mbi këtë çështje ishin Fatbardh Kadilli i PD, Petro Koçi i PS dhe dy analistët, Arian Vasjari dhe Arion Sulo.

Debati mes dy përfaqësuesve të opozitës dhe mazhorancës ka qenë me nota të larta, ku Kadilli deklaroi se nëse do të jetë e nevojshme për të plotësuar kërkesat e opozitës dhe për t’i dhënë zgjidhje krizës, do të organizojë edhe dhunë. Sipas tij, opozita vijon të tregojë vendosmëri në kauzën e saj. “Për ne nuk është fare çështje diskutimi data 30 Qershor. Është vetëm një afat për të zgjidhur krizën që të mos kalohet në një krizë tjetër më të madhe. Padyshim qe zgjidhja e kësaj krize do të jetë politike. Kemi pasur protestën e datës 11 maj, ku kemi treguar edhe forcën, siç kemi pasur dhe protestën e 13 majit apo 25 majit ku u tregua vendosmëria”, tha ish-deputeti i PD, Kadilli. Ai komentoi edhe çështjen e çeljes së negociatave, që sipas tij, do të ishte lajmi më i mirë për opozitën, sepse do kishte më shumë kontroll për qeverinë, por sinjalet janë për dështim të qeverisë për hapjen e negociatave. Ai vijoi të theksonte pikërisht qëndrimin e PD, ku zgjedhje nuk do të kishte pa dorëheqjen e Ramës. “Nuk e kemi rrezuar dot deri më tani, por do ta rrëzojmë me të gjitha mënyrat. Zgjidhjet politike evitojnë përplasjen me popullin. Nëse nuk e do zgjidhjen politike, përballu me popullin. Nuk kam turp unë që të them që e organizoj dhunën po të jetë puna”, deklaroi Kadilli, duke rënë ndesh edhe me deklarat e derisotme të ndërkombëtarëve.

Ish-deputetit të PD iu kundërpërgjigj përfaqësuesi i PS, Petro Koçi, duke deklaruar se Basha ka bërë disa veprime të papranueshme edhe brenda partisë së tij. “Nëse strategjitë e PD do të ishin ndryshe, edhe mundësitë për dialog do të ishin më të lehta”, deklaroi Koçi, duke shtuar se shkaku i krizës është mospërputhja e ambicies së Bashës me realitetin elektoral. Madje, duke iu përgjigjur Kadillit për deklaratat mbi organizimin e dhunës, Petro Koçiu shpreh se “Mentaliteti anti-shtet i PD, shfaqet disa herë gjate këtyre muajve dhe synon vendosjen e pushtetit në tavolinë.

Kurse analisti Vasjari e shikon zgjidhjen të vështirë dhe sipas tij nuk mund të shkohet në zgjedhje me këtë situatë. “Sistemi është me një këmbë dhe nuk mund të shkohet në zgjedhje me një këmbë”, deklaroi Vasjari.

Nga ana tjetër, për këtë situatë, gazetari Arion Sulo e shikon kryeministrin Rama në pozitë shumë të vështirë. “30 Qershori nuk është diskutuar asnjëherë nga Edi Rama. E ka thënë, data e zgjedhjeve nuk preket. Pas 30 Qershorit do të jetë i vetëm dhe pa opozitën”, deklaroi Sulo.

Zgjedhjet europiane dhe ankthi shqiptar!

“A do të ndikojnë zgjedhjet europiane në procesin e integrimit të Shqipërisë?’, ishte tema në emisionit e sotëm në “Real Story” i gazetarit Sokol Balla në Vizion Plus. Paneli i të ftuarëve të sotëm përbëhej nga Teuta Vodo, Gerti Bogdani, Arben Malaj, Henri Çili dhe Skënder Minxhozi, ndërsa në lidhje direkte nga Greqia ka folur kandidatja shqiptare e PASOK-ut për Parlamentin Europian, Ed Gemi.

Analisti Skënder Minxhozi gjatë fjalës së tij theksoi se zgjedhjet, që do të mbahen të dielën, nuk janë të ngjashme me ato të kaluarat në Bashkimin Europian. “Këto janë zgjedhje që nuk i ngjajnë zgjedhjeve të mëparshme të Bashkimit Europian”, tha Minxhozi, teksa shtoi se Shqipëria ende nuk është gati për anëtarsim në union. “Shqipëria nuk është gati për të qenë vend i BE-së. Përgjegjëse është e gjithë klasa politike ndër vite”.

Në këtë linjë qëndron dhe analisti tjetër Henri Çili, i cili u shpreh se vendi ynë ka vite që nuk bën progres për anëtarsim drejt BE-së. “Shqipëria këto 6 vite nuk ka bërë asnjë avancim drejt Bashkimit Europian. Shqipëria dhe shqiptarët i kanë provat që jane pro europian. Duhet të rishikohen marrëveshjet tregëtare. Ne e hapëm ekonomine prej rrugë drejt BE. ”, tha Çili.

Duke folur rreth zgjedhjeve në BE, Gerti Bogdani u shpreh se ekstremistët janë duke e shfrytëzuar fushatën për zgjedhjet paralmentare të BE-së. “Ekstremistët po shfrytëzojnë fushatën për tu fuqizuar përmes deklaratave radikale. Ata mund të marrin 80 vota në Parlamentin Europian”, tha Bogdani, ndërsa shtoi se shumë vende në BE po shprehen kundër Shqipërisë: “Reklama Sllovene? Nuk qëndron. Por realiteti shqiptar është problem. Vende të BE-së po shprehen kundër Shqipërisë”, tha ndër të tjera Bogdani.

Ndërkohë, Sekretarja për Marrëdhëniet me Jashtë në PS, Teuta Vodo u shpreh se Liberalët pritet të triumfojnë në zgjedhjet Parlamentare Europiane. “Sot janë dy grupime që rrezikojnë shumë. Liberalët pritet të triumfojnë në zgjedhjet e PE-së”, tha Vodo, ndërsa duke komentuar situatën politike në vend, ajo tha: “PD duhet të dilte me propozime konkrete në formë alternative dhe jo të aplikonte politika bllokuese” .

Arben Malaj u shpreh e Bashkimi Europian është në “borxh” me rajonin e Ballkanit: “BE-ja është në borxh me rajonin e Ballkanit. Ne do bëhemi gradualisht pjesë e saj. Ka tre fusha ku BE-ja e godet Ballkanin; Arsimi, Tregtia dhe Kohezioni Social”, tha Malaj.