Ndikimi rus e kinez, SHBA: Shqipëria foli qartë “Disa gjëra s’janë për shitje”

Shtetet e Bashkuara të Amerikës mirëpresin dhe vlerësojnë rolin e Shqipërisë në lidhje me ndikimet dhe makinacionet ruse dhe kineze në rajon. Përmes të dërguarës për punë të SHBA në Tiranë, Leyla Moses-Ones tha se Shqipëria foli qartë për të gjithë, sidomos për Rusinë dhe Kinën kur tha se “Disa gjëra s’janë për shitje dhe shqiptarët e kanë vendin në BE”.

Moses-Ones tha se është e lumtur dhe vlerëson faktin që Shqipëria ka refuzuar të hedh sytë nga Kina dhe Rusia, dhe pavarësisht zhgënjimit për mos hapjen e negociatave, vendi vijon të ketë si projekt të vetëm të së ardhmes atë të integrimit në BE. Këto deklarata Leyla Moses-Ones i bëri gjatë konferencës ‘Shtetet e Bashkuara të Amerikës në Ballkanin Perëndimor’ që po zhvillohet në Tiranë.

“Shqipëria është një vend kandidat, kjo nuk ka ndryshuar, puna që duhet të bëhet nuk ka ndryshuar. Shqipëria do të fitojë një vend në radhët e BE-së duke dyfishuar përpjekjet për luftën ndaj korrupsionit dhe krimit. Shqipëria jo vetëm që po punon shumë për reformën në drejtësi, por reforma zgjedhore është bërë projekt kombëtar. Drejtuesit e Shqipërisë kanë zgjedhur të bëjnë kompromis për hir të së mirës së përbashkët. Shqipëria ka përmbushur dhe respektuar angazhimet për Samitin e Uellsit, shqiptarët kanë dhënë jetën e tyre për mbrojtjen e përbashkët.

Për Rusinë, Kinën Ballkani është mjet që të shfrytëzohet dhe të flaket tej, ata duan të minojnë modelin perëndimor. Krimelini këmbëngul që të mos eksportojë asgjë përveç kaosit, Irani ka shfrytëzuar praninë në Tiranë për të shkatërruar kundërshtarët. Shqipëria ia ka bërë të qartë Kinës, se disa gjëra nuk janë në shitje dhe ka refuzuar makinacionet ruse. SHBA mirëpresin prioritetet nga Shqipëria. Disa gjëra në Shqipëri nuk janë për shitje” deklaroi Moses-Ones.

Spiunia ruse Maria Butina kthehet në Moskë

Spiunia ruse Maria Butina u kthye të shtunën në Moskë, pas lirimit të saj nga një burg amerikan. Butina pranoi në gjyqin e saj në Uashington vitin e kaluar se ajo kishte punuar me një zyrtar të lartë rus dhe dy amerikanë të tjerë për të depërtuar në grupet konservatore amerikane dhe Partinë Republikane për përfitim të Rusisë.

“Unë nuk u dorëzova vetëm sepse e dija që thjesht nuk kisha të drejtë, thjesht nuk mundesha pasi kisha aq shumë njerëz që më mbështesnin. Faleminderit shumë! Ju e dini, siç e thashë një herë në një nga videot e mia, rusët nuk dorëzohen”.

Në një eveniment në vitin 2015, ajo madje arriti të pyeste Presidentin Donald Trump, atëherë kandidat presidencial, në lidhje me marrëdhëniet amerikano-ruse, duke e bërë atë të thoshte se mendonte se “do të shkonte shumë mirë” me Presidentin rus Vladimir Putin.

“Ajo nuk bëri asgjë të keqe, absolutisht asgjë të keqe. Ajo nuk ishte fajtore për asgjë dhe nuk bëri asnjë shkelje. Me të vërtetë nuk i bëri dëm askujt. Ajo nuk përbën një kërcënim. Është vetëm një vajzë, një e re. Ajo u përpoq të investojë rininë e saj, talentin e saj, në kontakte me njerëzit. Kjo është në të vërtetë normale. Është shumë normale”, thotë Maria Zakharova, zëdhënëse e ministrisë së Jashtme ruse.

Sipas dokumenteve të gjykatës amerikane, përpjekjet e Butinës, të cilat përfshinin pjesëmarrjen në ngjarje të organizuara nga Shoqata Kombëtare e armëve dhe të ashtuquajturat “darka miqësore”, u drejtuan nga Alexander Torshin, zëvendës guvernator i bankës qendrore të Rusisë me lidhje të ngushta me Presidentin Rus Vladimir Putin./VOA/

KLP drejt ngritjes së SPAK. SHBA monitoron mbledhjen

Këshilli i Lartë i Prokurorisë do të mblidhet këtë të premte për të diskutuar ngritjen e Prokurorisë Speciale, SPAK. Pas dështimit të mbledhjes të disa ditëve më parë, për shkak se anëtari Besnik Cani nuk ishte njohur me materialet e mbledhjes, KLP diskuton hapat e mëtejshme për ngritjen e Prokurorisë së Posaçme. Ndryshe nga herën e fundit, në axhendën e publikuar nga KLP, në mbledhjen e të premtes, do të jenë të pranishëm përfaqësues të Ministrisë së Drejtësisë, EURALIUS dhe OPDAT.

Prania e këtyre vëzhguesve vjen fill pas dështimit të mbledhjes të së hënës, ku KLP do të diskutonte nëse SPAK mund të ngrihet me 8 prokurorë që kanë kaluar Vettingun, dhe dy të tjerë që kanë kaluar vetëm shkallën e parë të rivlerësimit.

Por, ajo mbledhje dështoi pasi anëtari i KLP-së Besnik Cani kërkoi shtyrjen e saj. Një ditë pas asaj mbledhje, një përfaqësues i lartë i Shteteve të Bashkuara të Amerikës zhvilloi një takim me kryetarin e Këshillit të Lartë të Prokurorisë Gent Ibrahimi, të cilit i shprehu mbështetjen e SHBA për SPAK.

Gjatë takimit që pati me kryetarin e KLP-së, Gent Ibrahimi, zv. Ndihmës Sekretari i Shtetit, Jorgan K. Andrews u shpreh se “SHBA është e ndërgjegjshme për presionin me të cilin po përballet KLP”, ndërsa theksoi se “Amerika është e vendosur të ofrojë mbështetje për mbrojtjen e prokurorëve të SPAK”, mësohet të ketë thënë zyrtari amerikan gjatë takimit me Gent Ibrahimin. Ndaj, këtë të premte, SHBA dhe përfaqësues të tjerë që hartuan Reformën në Drejtësi, do të vëzhgojnë mbledhjen e KLP-së, ku pritet të hidhet hapi i rëndësishëm për ngritjen e SPAK. /Realstory.al/

SHBA ofron mbrojtje: E dimë kush po e pengon SPAK

Zvarritja e ngritjes së SPAK është një çështje që shqetëson Shtetet e Bashkuara të Amerikës. Gjatë një takimi që pati me kryetarin e KLP-së, Gent Ibrahimi, zv. Ndihmës Sekretari i Shtetit, Jorgan K. Andrews u shpreh se “SHBA është e ndërgjegjshme për presionin me të cilin po përballet KLP”, ndërsa thekson se “Amerika është e vendosur të ofrojë mbështetje për mbrojtjen e prokurorëve të SPAK”, mësohet të ketë thënë zyrtari amerikan gjatë takimit me Gent Ibrahimin. Një mesazh i fortë ky që vjen nga SHBA, vetëm një ditë pasi dështoi mbledhja e KLP-së ku do të diskutohej për ngritjen e Prokurorisë Speciale me tetë anëtar.

Duke shprehur mbështetjen për zbatimin e reformës në drejtësi, zyrtari amerikan është shprehur se “SHBA do të asistojë punën e KLP”, për të vijuar procesin e nisur. Zëvendësndihmës Sekretari i Shtetit, Jorgan K. Andrews, është shprehur gjithashtu se “baza ligjore e ngritur për institucionet e reja të drejtësisë është e fortë” dhe “e aftë të mbajë larg korrupsioni dhe presioni i politikës mbi këto struktura”-tha ai. Ai gjithashtu u shpreh se në Shqipëri “duhet ndryshuar mentaliteti për të luftuar korrupsionin dhe krimin e organizuar sepse tani keni instrumentet e duhura”.

Ndërkohë, kreu i KLP-së, Gent Ibrahimi, duke treguar se procesi për zgjedhjen e Prokurorit të Përgjithshëm dhe ngritjen e SPAK është në hapat e fundit, i tha zyrtarit amerikan se: “Këshilli po shikon hapësirat ligjore për ngritjen e SPAK me 8 prokurorë tashmë të vetuar dhe 2 prokurorë te komanduar nga lista e kandidateve të kualifikuar për SPAK, të cilët kanë kaluar vetting-un me vendim të formës së prerë”, u shpreh Ibrahimi. E pranishme në takim ishte dhe e ngarkuara me punë e SHBA në Shqipëri Leyla Moses-Ones. Jorgan K. Andrews është caktuar në Byronë Ndërkombëtare të Narkotikëve dhe Çështjeve të Zbatimit të Ligjit, ku mbikëqyr programet e kësaj byroje në Europë dhe Azi.

Basha në SHBA, vizitë apo shpjegime në FBI për paratë ruse?

Kryetari i Partisë Demokratike, Lulzim Basha nisi një udhëtim 3 ditor në Shtetet e Bashkuara të Amerikës. PD nuk ka publikuar ende asnjë axhendë zyrtare, ndërsa udhëtimi i Bashës në Washington ka nisur të dielën dhe pritet të qëndrojë deri më 23 tetor.

Kryedemokrati Basha pritet të zhvillojë takime në Departamentin amerikan të Shtetit dhe me faktor të tjerë politik, ku besohet se do t’u parashtrojë platformën me 5 pika të opozitës për të dalë nga kriza.

Gjatë këtij udhëtimi Basha do të shoqërohet nga Sekretari për Marrëdhëniet Ndërkombëtare Arben Kashahu.

Megjithatë sipas gazetës Tema është ende e paqartë nëse Basha do të shkojë në Washington thjeshtë për të konfirmuar se ai ende gëzon mbështetjen amerikane, edhe pasi ato i kanë tërhequr veshin disa herë me protestat e dhunshme të opozitës, apo për të dhënë shpjegime para FBI-së në lidhje me financimet ruse për të lobuar për të për një foto me Donald Trump. FBI, ka nisur ndaj Bashës një hetim në lidhje me përfshirjen e tij në lobime me para ruse në SHBA.

Lotaria, SHBA tregon si të aplikoni

Prej datës 2 tetor vijon të jetë i hapur aplikimi për Lotarinë Amerikane. Shumë shtetas shqiptarë, ashtu si miliona të tjerë në mbarë botë, provojnë fatin e tyre duke aplikuar për programin e vizave drejt SHBA, me shpresën se do të përzgjidhen për “ëndrrën amerikane”.

Ambasada e Shteteve të Bashkuara të Amerikës, publikoi një video mëngjesin e të dielës me informacione të detajuara për procedurën e aplikimit.

Ambasada tregon disa nga kriteretet kyçe të aplikimit, që nisin me arsimin, ku çdo aplikant duhet të ketë së paku arsimin e mesëm të përfunduar me kohë të rregullt, të dhënat prsonale të aplikantit dhe një përvojë pune që kualifikohet sipas O`Net OnLin.

Për më tepër ndiqni videon e ambasadës së SHBA në Tiranë, për të mësuar të gjitha procedurat e aplikimit për programin e Lotarisë Amerikane.

Si të aplikoni për Lotarinë Amerikane 2021
🇦🇱️ | Po mendoni të aplikoni për Lotarinë Amerikane 2021? Pëprara se të aplikoni, shihni këtë video në shqip që ju tregon të gjitha hapat.🇺🇸️ | Are you planning to apply for #DV2021? Before you do, watch this video in Albanian explaining all steps.
Gepostet von U.S. Embassy-Tirana am Freitag, 18. Oktober 2019

SHBA tërheqin të gjitha trupat e mbetura nga Siria veriore

Shtetet e Bashkuara po tërheqin të gjitha trupat e mbetura nga Siria veriore, pasi Presidenti Donald Trump tha të dielën se ishte një veprim “shumë i zgjuar … ndryshe nga e kaluara” për të mos u përfshirë në luftimet e nisura nga sulmi i Turqisë kundër aleatëve për një kohë të gjatë të Amerikës, luftëtarëve kurdë.

Presidenti Trump tha se ishte duke punuar me drejtuesit e Kongresit, përfshirë demokratët e opozitës, për të vendosur sanksione ekonomike “të fuqishme” kundër Turqisë për sulmet e saj ndërkufitare, edhe pse Ankaraja ka shprehur paraprakisht kundërshtime. Ai tha në Twitter se ka “konsensus të madh” për të vepruar kundër Turqisë, një anëtar i NATO-s përkrah Shteteve të Bashkuara.

Sekretari amerikan i Mbrojtjes Mark Esper tha për kanalin Fox News të dielën se presidenti Trump urdhëroi të shtunën në mbrëmje “tërheqjen e qëllimshme” të 1000 trupave të mbetura amerikane nga veriu i Sirisë. Zoti Esper tha se zyrtarët amerikanë, kishin frikë se trupat amerikane do të goditeshin në përparimin e Turqisë kundër luftëtarëve kurdë, të cilët Turqia i sheh si terroristë, por që shumica e Perëndimit i shikon si partnerë kryesorë në luftën kundër militantëve të Shtetit Islamik.

Esper hodhi poshtë polemikën nga kritikët në Kongres, përfshirë kolegët republikanë të Trump-it, se Shtetet e Bashkuara kanë braktisur kurdët. “Ne e kundërshtuam Turqinë të mos e bënte këtë operacion,” tha zoti Esper. Por ai tha se Turqia ishte “plotësisht e angazhuar për ta bërë këtë pa marrë parasysh se çfarë do të bënim ne.” Megjithatë, shtoi sekretari Esper, “Ne po bëjmë gjithçka mundemi për ta bërë Turqinë të ndalë këtë sjellje skandaloze”.

Ai pranoi se luftëtarët kurdë dhe civilët po vriten në sulmet turke. “Është e tmerrshme,” tha ai. “Situata përkeqësohet për çdo orë.” “Kjo është pjesë e situatës së tmerrshme ku na ka futur Turqia”, tha shefi i Pentagonit. Por ai tha se Shtetet e Bashkuara “nuk janë gati për të luftuar Turqinë, një aleat i vjetër, në emër të kurdëve”. Ai tha se konflikti turko-kurd “është 200 vjeçar”.

Megjithatë, sekretari Esper dënoi inkursionin e Turqisë dhe vendimet e tjera, përfshirë blerjen e një sistemi mbrojtës raketor rus kundër dëshirave të Shteteve të Bashkuara dhe vendeve të tjera. “Sjellja e tyre gjatë viteve të fundit ka qenë e tmerrshme,” tha sekretari Esper, duke shtuar se Turqia “po dilte nga orbita jonë”.

Një kritik i presidentit Trump, senatori demokrat Chris Van Hollen, tha në të njëjtin emision të Fox News: “Njerëzit po vriten tani”. Ai tha se administrata Trump ” tani duket qesharake. Ata nuk po bëjnë gjë tjetër veçse po flasin”. Por presidenti Trump tha se kritikët që kanë kundërshtuar tërheqjen e trupave të tij nga Siria veriore po nxisin “luftëra të pafundme” për Shtetet e Bashkuara në Lindjen e Mesme.

“Ata që gabimisht na futën në Luftërat e Lindjes së Mesme ende po bëjnë presion për të luftuar”, tha presidenti Trump në Tweeter. “Ata nuk e kanë idenë se çfarë vendimi të keq kanë marrë. Pse nuk kërkojnë një Deklaratë të Luftës?

Zyrtarët kurdë sirianë ndërkohë thonë se qindra mbështetës të dyshuar të Shtetit Islamik dhe familjarë kanë shpëtuar nga një kamp në veri të Sirisë, ndërsa Turqia vazhdon operacionin e saj ushtarak në zonë.

Jelal Ayaf, zyrtar i kampit Ayn Issa, vlerësoi se 850 të huaj të lidhur me ISIS-in shpëtuan dhe kishin ndihmë nga celulat e fjetura që depërtuan në një pjesë të kampit. Pjesëtarët dhe përkrahësit e familjeve të shpëtuara të ISIS-it mendohet se janë nga Britania, Irlanda, Rusia, Pakistani, Bangladeshi dhe Indonezia.

Turqia nisi operacionin e saj të planifikuar ushtarak të mërkurën e kaluar që synon të largojë forcat kurde në veri të Sirisë që i sheh si terroristë, por që shumica e Perëndimit i shikon si partnerë kryesorë në luftën kundër militantëve të Shtetit Islamik. Operacioni ushtarak filloi disa ditë pas një njoftimi të befasishëm dhe që u kritikua gjerësisht se forcat amerikane do të tërhiqeshin nga rajoni./VOA/

SHBA, Serbisë: Prano Kosovën

I dërguari i posaçëm i SHBA për bisedimet Serbi-Kosovë, duket se i ka dhënë Serbisë një mesazh të qartë dhe të prerë në lidhje me njohjen e Kosovës. Sipas mediave serbe thuhet se i dërguari i SHBA-ve Richard Grenell i ka kërkuar presidentit serb Vuçiç të pranojë Kosovën

“Beogradit duhet të bëjë hapa para dhe të pranojnë realitetin se Kosova është tashmë shtet i pavarur” citohet të ketë thënë Grenell sipas mediave serbe, gjë që ka lënë të pa fjalë Vuçiçin.

Kjo deklaratë e të dërguarit special për dialogun është konsideruar si e çuditshme dhe e papranueshme nga ana e Serbisë, të paktën sipas citimeve të bëra nga “Kurir”, që citon disa burime diplomatike.

Vuçiç ka dhënë të premten disa detaje sa i përket takimit që ka pasur me Richard Grenell, duke thënë se ka qenë një bisedë e vështirë. Presidenti serb ka shtuar se nuk do të ketë ndarje të Kosovës dhe i ka bërë me dije popullit serb e Serbia nuk do të marrë asgjë, pasi askush nuk ofron asgjë.

Turqia nis operacionin në veri të Sirisë

Turqia nisi një operacion ushtarak të planifikuar për një kohë të gjatë në veriun e Sirisë për të nxjerrë forcat kurde të etiketuara nga Ankaraja si terroristë, por që shihen nga shumica e Perëndimit si partnerë kryesorë në luftën kundër Shtetit Islamik.

Presidenti turk Rexhep Tajip Erdogan njoftoi fillimin e operacionit, të quajtur “Pranvera e Paqes” dhe tha se ai kishte për qëllim zhdukjen e “kërcënimit të terrorit” kundër Turqisë. Forcat Demokratike Siriane të udhëhequra nga kurdët (FDS) thanë që avionët luftarak turq po godasin zona civile, duke shkaktuar panik të madh.

Operacioni ushtarak filloi disa ditë pas një njoftimi të befasishëm të Shtëpisë së Bardhë se forcat amerikane do të tërhiqeshin nga rajoni, duke i hapur rrugën operacionit ushtarak turk. Presidenti Donald Trump po vazhdon të mbrojë vendimin e tij, mes kritikave të gjera në Uashington, duke thënë se “luftërat e kota të pafundme për ne po mbarojnë!”

“Luftimet mes grupeve të ndryshme kanë vazhduar për qindra vjet. Shtetet e Bashkuara nuk duhet të kishte qenë kurrë në Lindjen e Mesme. Lëvizëm 50 ushtarët tanë! Turqia DUHET të marrë përsipër luftëtarët e kapur të ISIS-it që Evropa nuk pranoi të ktheheshin. Luftërat e kota, pa fund, për ne, po mbarojnë! ”, tha Presidenti Trump të mërkurën, në një seri postimesh në Twitter për këtë çështje.

Si ligjvënësit demokratë edhe ata republikanë kanë kritikuar ashpër tërheqjen amerikane nga Siria veriore, duke thënë se Shtetet e Bashkuara po braktisnin kurdët sirianë që kishin luftuar grupin terrorist Shteti Islamik së bashku me trupat amerikane.

“Nëse e dëgjoj presidentin të thotë edhe një herë,” bëra një premtim fushate për të dalë nga Siria, “do më turbullohet stomaku”, tha senatori republikan Lindsay Graham për Axios. “Ai bëri një betim për të mbrojtur kombin kundër të gjithë armiqve, të huaj dhe vendas. Nuk ka asnjë armik më të madh për kombin tonë se ISIS. Dhe nuk ka asnjë mënyrë që ta mbrojmë vendin nga Islami radikal pa partnerë si kurdët.”

Përpara sulmit turk, Forcat Demokratike Siriane lëshoi thirrjen e vet për vendet e përfshira në koalicionin për të mposhtur ISIS-in dhe për të shmangur një katastrofë humanitare në veri të Sirisë.

“Të gjithë treguesit, informacionet në terren dhe grumbullimet ushtarake në anën turke të kufirit tregojnë se zonat tona kufitare do të sulmohen nga Turqia, në bashkëpunim me opozitën siriane të lidhur me Turqinë,” tha FDS. “Ky sulm do të sjell viktima në radhët e mijëra civilëve të pafajshëm sepse zonat tona kufitare janë të mbingarkuara.”

Presidenti Trump ka këmbëngulur se nuk po braktis kurdët që luftuan me Shtetet e Bashkuara dhe partnerët e koalicionit kundër ISIS-it. Në të njëjtën kohë, ai ka lavdëruar edhe Turqinë, duke e ftuar Presidentin Erdogan të vizitojë Shtëpinë e Bardhë muajin tjetër (13 nëntor), ndërsa e quajti Ankaranë një “partner të madh tregtar” dhe i atribuojë qeverisë turke “ndihmën për të shpëtuar shumë jetë njerëzish në provincën Idlib”.

Zyrtarët ushtarakë amerikanë konfirmuan se kanë ripozicionuar rreth 50 anëtarë të forcës speciale amerikane, të cilët kishin vepruar përgjatë kufirit Turqi-Siri, për shkak të rreziqeve të sigurisë.

“Fatkeqësisht, Turqia ka zgjedhur të veprojë në mënyrë të njëanshme,” tha zëdhënësi i Pentagonit Jonathan Rath Hoffman në një deklaratë, të martën. “Si rezultat, ne kemi zhvendosur forcat amerikane në veriun e Sirisë larg nga rruga e inkursionit të mundshëm turk për të ruajtur sigurinë e tyre,” shtoi ai. “Deri tani nuk kemi bërë asnjë ndryshim në praninë tonë ushtarake në Siri.”/VOA/

Sulm me armë në lokal, 4 të vdekur, 5 të plagosur

4 të vdekur dhe 5 të plagosur është bilanci i një sulmi me armë në një bar në Kansas të SHBA-së.

Polica gjeti në vendngjarje 4 viktima dhe 5 të plagosur, të cilët janë transportuar në spital, por ende nuk dihet gjendja e tyre shëndetësore apo identiteti.

Sipas detektivit të qytetit Thomas Tomasic, ende nuk dihet kush asgjë për autorin apo autorët.

“Ne nuk kemi ende një përshkrim të mjaftueshëm të mirë, për të hedhur poshtë asgjë për të dyshuarin, ose të dyshuarit, ne as nuk dimë ende sa janë.”, tha Tomasic.

Policia u njoftua në lidhej me sulmin në orën 1:27 të mëngjesit me orën lokale dhe vijon hetimet për zbardhjen e ngjarjes.