Kreu i SPAK, Kraja: Kush shkel ligjin duhet të trembet

Kreu i sapozgjedhur i SPAK, Arben Kraja tha se të gjithë ata që shkelin ligjin duhet të tremben dhe se shqiptarët duhet të kenë besim tek SPAK për punën e drejtë që do të kryejnë. Gjatë një deklarate për mediat, Kraja tha se do të bashkëpunojë me ndërkombëtarët ku ka thënë se do të përpiqen të ndryshojnë edhe opinionet negative.

“Besoj se do të e çojmë bashkë me të gjithë të tjerët atë që kemi nisur. Pa diskutim si të gjithë të tjerët. Dosjet ata që janë do të zgjidhen të gjitha me radhë. Ka qenë një nga prioritete tona që kemi vendosur për të rakorduar dhe bashkëpunëtorët tanë ndërkombëtar për të rivlerësuar opinionin negativ për punën tonë. Sot shqiptarët duhet të besojnë se të gjithë ne si grup do të punojmë. I ashpër brenda ligjit kush shkel ligjin duhet të trembet” tha Kraja.

Arben Kraja u zgjodh si drejtuesi i Prokurorisë së Posaçme Anti-Korrupsion dhe Krimit të Organizuar me 6 vota pro nga anëtarët e Këshillit të Lartë të Prokurorisë.

Arben Kraja zgjidhet në krye të SPAK. Fiton garën me Dumanin favorit

Prokurori Arben Kraja është zyrtarisht drejtuesi i Prokurorisë së Posaçme Anti-Korrupsion dhe Krim i Organizuar. Ai u votua nga gjashtë anëtarë të Këshillit të Lartë të Prokurorisë, të cilët argumentuan se vota e tyre shkonte për Arben Krajën për shkak të eksperiencës së gjatë në drejtim. Ata që votuan ‘pro’ Krajës janë anëtarët e KLP; Beci, Staka, Beluri, Sheshi, Seiti dhe Balla

Ndërkohë, kandidati kryesor dhe rivali kryesor i Arben Krajës, Altin Dumani u skualifikua nga gara, pasi mori vetëm 4 nga 6 votat minimale që duheshin për të fituar. Anëtarët e KLP që e votuan ‘pro’ janë: Esmeralda Cani, Besnik Cani, Tartar Bazaj dhe Arben Dollapaj.

Kujtojmë se Altin Dumani ishte renditur i pari në listën e SPAK me shumë pikë se çdo kandidat tjetër. Ndërkohë, kandidati tjetër, Edvin Kondili, u votua vetëm nga kryetari i Këshillit të Lartë të Prokurorisë, Gent Ibrahimi.

Para se të niste mbledhja e Këshillit të Lartë të Prokurorisë, kandidati, tashmë kryetar i SPAK, Arben Kraja kërkoi nga KLP përjashtimin nga votimi të anëtarit Tartar Bazaj. Sipas kërkesës së Arben Krajës, Bazaj kishte konflikt interesi me të.

Votimi për përzgjedhjen e kryetarit të SPAK u bë me dyer të mbyllura në KLP, ndonëse një pjesë e anëtarëve kërkoi që mbledhja të zhvillohej me dyer të hapura. Paraditen e të enjtes 8 prokurorët që u emëruan nga KLP në SPAK, bën betimin te presidenti.

PD falenderon SHBA: SPAK, shans real për të luftuar zyrtarët e korruptuar

Partia Demokratike reagoi me një deklaratë për shtyp duke përshëndetur betimin e tetë prokurorëve të parë të SPAK. PD kërkon nga kjo strukturë fillimin menjëherë nga puna dhe ndëshkimi i korrupsionit dhe krimit të organizuar të bëhet në mënyrë të profesionale dhe të paanshme.

“Partia Demokratike përshendet fillimin e punës së SPAK-ut dhe mbështet funksionimin e pavarur të kësaj strukture. Fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur”, thuhet në deklartën e PD.

Më tej, Selia Blu thotë se nuk paragjykon asnjë nga prokurorët në përbërje të SPAK, pavarësisht, theksohet në deklaratë, vendimeve që ata kanë dhënë në të shkuarën e tyre. Megjithatë, Partia Demokratike kërkon që prokurorët të ngrihen në lartësinë e detyrës, për t`i dhënë fund pandëshkueshmërisë së krimit të organizuar dhe zyrtarëve të korruptuar.

“Partia Demokratike, e cila ka miratuar ligjin për ngritjen e SPAK dhe të Byrosë Kombëtare të Hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture, pavarësisht vendimeve të disa prej tyre, në të shkuarën”.

“Është koha që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t’i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar”, shtohet në deklaratë.

Për Partinë Demokratike krijimi i SPAK është një shans i ri dhe real për luftën ndaj krimit, ndërsa për krijimin e këaj strukture, PD falënderon Shtetet e bashkuara të Amerikës. “Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë”.

“Partia Demokratike falenderon Shtetet e Bashkuara të Amerikës për ndihmën e dhënë deri më tani për bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK”, përfundon deklarata e PD.

SHBA-BE: SPAK do të çojë përpara drejtësisë zyrtarët e korruptuar

Vetëm pak minuta pasi 8 prokurorët e parë të emëruar në SPAK kryen betimin te Presidenti, reagoi Ambasada e Shteteve të Bashkuara të Amerikës. Në reagimin e ambasadës së SHBA, shprehet urimi për betimin e tetë prokurorëve të SPAK, duke e konsideruar këtë një akt të rëndësishëm të themelimit të Strukturës së Posaçme Anti-Korrupsion dhe Krim i Organizuar.

“Shtetet e Bashkuara përgëzojnë tetë prokurorët të cilët u betuan këtë mëngjes si anëtarët e parë të Zyrës së Prokurorisë së Posaçme, duke shënuar një hap të rëndësishëm në themelimin e Strukturës së Posaçme Anti-Korrupsion dhe Krim i Organizuar (SPAK). Nga dita e sotme, Shqipëria ka një organ prokurorësh të angazhuar për të identifikuar, hetuar dhe vënë përpara drejtësisë zyrtarë të kaluar apo aktualë dhe bosë të krimit – individë që në kohët e vjetra janë konsideruar si të paprekshëm”, thuhet ndër të tjera në reagimin e SHBA.

Më tej, Shtetet e Bashkuara të Amerikës theksojnë se me krijimin e SPAK, Shqipëria po hyn në një fazë të re të zhvillimit demokratik. Gjithashtu, SHBA thotë se do të mbetet një partner i palëkundur në mbështetjen e SPAK. “Ndërsa Shqipëria nis një fazë të re të zhvillimit të saj demokratik dhe ligjor, Shtetet e Bashkuara do të mbeten një partner i palëkundur në mbështetje të SPAK dhe të të gjithë atyre që kërkojnë ti japin fund pandëshkueshmërisë dhe të sjellin drejtësi për popullin shqiptar”, thotë SHBA.

Edhe Ambasadori i Delegacionit të BE në Shqipëri, Luigi Soreca reagoi për betimin e 8 prokurorëve të SAPK. Soreca shprehet se mirëpret këtë akt, ndërsa thekson se ata janë gati për të filluar punën. “Ne mirëporesim betimin e 8 prokurorëve të parë të SPAK para Presidentit. Tani ata janë gati për të filluar punën. Një tjetër moment i rëndësishëm për zbatimin e reformës në drejtësi. Lufta kundër korrupsionit dhe krimit të organizuar është përparësia kryesore e Shqipërisë në rrugën e anëtarësimit në BE”, thotë Soreca. /Realstory.al/

“Hetim pasuror grupeve kriminale”, Kondili tregon platformën për drejtimin e SPAK

I fundit që u intervistua nga KLP për kreun e SPAK, ishte prokurori Edvin Kondili. Duke shpalosur platformën e tij për drejtimin e Prokurorisë së Posaçme, Kondili u shpreh se hetimi pasuror është një nga mjetet për të çrrënjosur grupet kriminale. “Hetimi pasuror nuk duhet të jenë hetime të dorës së dytë. Hetimi pasuror çrrënjos strukturat e grupet kriminale duke i goditur asetet. Puna në grup, një qëllim i përbashkët e gjithë SPAK-ut”.

“Aplikimi i hetimeve proaktive për hetime pasurore. Opinion public pret rezultate konkrete dhe është detyra jonë parësore të vijmë në pritshmërinë e tij. Bashkëpunimi me agjensitë të tjera ligjzbatuese me rëndësi të veçantë: efektiv, në kohë sa më të shkurtër dhe me mjetet të përshtatshme për çdo çështje. Marrëshënia me publikun është shumë e rëndësishme dhe bashkëpunuese siguriasht pa cënuar sekretin hetimor”, tha Kondili.

Si në rastin e dy kandidatëve të tjerë, edhe Kondili vuri në dukje krijimin e BKH si një institucion i rëndësishëm që ndihmon punën e Prokurorisë së Posaçme. “Do të jap kontribut për krijimin sa më shpejt të BKH, është pjesë e pandashme e SPAK. Vetëm duke u krijuar sa më shpejt kjo, atëherë SPAK do të ketë mundësi të funksionojë në mënyrë totale dhe të realizojë pritshmëritë”, tha ai. Ndërkohë, Edvin Kodni u shpreh se objektiv është garantimi i pavarësisë së prokurorit, duke shtruar dhe nevojë për ndryshimin e mentalitetit të tyre.

“Një tjetër objektiv është garantimi total i pavarësisë së prokurorëve. Duhet të ndryshojmë mentalitetin e prokurorit. Objekt tjetër është shpejtësia në hetime. Një drejtësi e vonuar është drejtësi e mohuar. Hetimet do të bëhen me plane të qarta e afate. Uniteti puna në skuadër dhe harmonia mes hetuesve objektiv i imi. Hetimet proaktive duhet të kenë përparësi. Publiku pret rezultate nga ne. Hetimet financiare e pasurore do te kenë përparësi”, tha ai ndër të tjera.

“SPAK, hetim zyrtarëve të korruptuar”, Kraja: Do jem agresiv

Kandidati Arben Kraja, që synon të bëhet drejtues i Prokurorisë Speciale, tha se ai do të jetë më agresiv. Duke folur për strukturën hetimore të SPAK, Kraja tha se ai do të krijojë dy seksione, atë të hetimit të korrupsionit të zyrtarëve të lartë dhe të krimit të organizuar. “Duhet të kemi dy seksione, krimit të organizuar dhe korrupsionit të zyrtarëve të lartë. Në raport me sjelljen do të mundohem që të jem më agresiv”, tha Kraja.

Prokuroria Speciale pritet të përballet edhe me presione. Por si do ti përballojë këto presione Arben Kraja? “Ne jetojmë në një vend ku të gjithë i njohin të gjithë. Unë kam garancitë ligjore në vendimmarrje, e dyta përzgjedhja nga ana juaj e një grupi që ka plotësuar kushtet, dhe e treta vullneti për të zbatuar ligjin me korrektësi. Asnjëri nga ne nuk i ka borxh askujt”, tha ai.

Kraja foli dhe për marrëdhëniet me median dhe krijimin e BKH. Për këtë institucion, Byronë Kombëtare të Hetimit, Kraja i bëri thirrje BE dhe SHBA të sjellin sa më shpejt ekspertët për të ngritur BKH-në. “Do të nge sektorin e bashkëpunimit me ndërkombëtarët. Duhen rinovuar marrëveshjet me homologët, duhet vlerësuar nevoja edhe për kontakte të reja. Duhet të jemi serioz, profesional dhe të besueshëm, prokurorët i kanë këto cilësi. Reforma nuk do të ishte realizuar pa kontributin e ndërkombëtarëve. I bëj thirrje misionit të drejtësisë së BE dhe SHBA të sjellin sa më shpejt ekspertë për të ngritur BKH-në”, tha Kraja.

Ndërsa për median, ai shtoi se më parë marrëdhëniet nuk kanë qenë aty ku duhet, ndërsa tha se ky raport do të ndryshojë. “Në raport me median. Roli me median është i rëndësishëm. Media ka detyrë të informojë publikun për cilësinë e produktit. Janë edhe burim informacioni për nisjen e hetimeve. Marrëdhëniet e mëparshme nuk kanë aty ku duhet, ka pasur ngurrim apo rrjedhje. Kjo ka ardhur nga një sjellje jo profesionale. Do të ketë një koordinator për raportin me median. E rëndësishme është që publiku duhet të informohet në kohë, aq sa lejohet nga sekreti hetimor, por edhe në fund të hetimeve”, tha Kraja.

Kreu i SPAK, sot intervista me 3 kandidatët në KLP

Këshilli i Lartë i Prokurorisë do të intervistojë të mërkurën (18 dhjetor 2019) tre kandidatët që synojnë të marrin kreun e Prokurorisë Speciale. Edvin Kondili, Altin Dumani dhe Arben Kraja janë tre kandidatët që do të synojnë drejtimin e SPAK.

Pasi u emëruan nga KLP si anëtar të këtij institucioni, Kondili, Kraja dhe Dumani shprehën interesin për të drejtuar një nga organet më të rëndësishme të reformës në drejtësi, atë që do të hetojë krimin e organizuar dhe korrupsionin në nivele të larta.

Intervistat me Dumanin, Krajën dhe Kondilin do të zhvillohen me të njëjtën procedurë si në rastin e zgjedhjes së Prokurorit të Përgjithshëm. Pra, gjithçka do të transmetohet në media edhe për qytetarët.

I pari që del përpara Këshillit të Lartë të Prokurorisë është Altin Dumani. Ai u rendit i pari dhe në listën e 8 prokurorëve që morën detyrën në SPAK. Më pas është prokurori Arben Kraja, ndërsa i fundit është Edvin Kondili.

Disa ditë më parë, kreu i KLP, Gent Ibrahimi u shpreh në media se kandidatët për kreun e SPAK do të vlerësohen në disa aspekte. Një ditë më pas, 8 prokurorët e parë të SPAK do të bëjnë betimin te Presidenti i Republikës, duke nisur zyrtarisht punën në institucionin që zëvendëson Prokurorinë e Krimeve të Rënda.

Hetimi për ndërtimet abuzive, SHBA: Do mbështesim punën e SPAK

E ngarkuara me punë e SHBA në Shqipëri, Leyla Moses-Ones ishte në qytetin e Durrësit të hënën, ku pa nga afër dëmet e shkaktuara nga tërmeti. Diplomatja amerikane shoqëroi grupin e inxhinierëve të ardhur nga SHBA, që do të bëjnë vlerësimin e dëmeve të shkaktuara nga tërmeti. Gjatë fjalës për mediat, Moses-Ones u shpreh se SHBA do të ndihmojë Shqipërinë në disa mënyra për të kaluar këtë fatkeqësi natyrore.

“Do të ndihmojë edhe UNICEF, pasi do të mbështesë 9 mijë fëmijë të prekur nga tërmeti. Do të mundësohet një vlerësim për banesat e shkatërruara. I kemi dhënë një grant Kryqit të Kuq që do të merret me ndihma e menjëherësahme humanitare”, është shprehur Moses-Ones.

Ndërkohë, të hënën u lajmërua se Prokuroria në Durrës, Tiranë dhe Krujë nisi hetimet për shkaqet e dëmtimit të shumë objekteve. E pyetur nga gazetarët nëse SHBA do ta mbështesë SPAK të hetojë këtë tragjedi, Leyla Moses-Ones është shperhur se nuk kishte informacion për dosjet që do t`i dërgohen SPAK, por do të ketë mbështetje 100%.

Ngritja e SPAK, Balla: Reforma në drejtësi nuk mund të pengohet

Struktura e Posaçme Antikorrupsion, një nga strukturat e drejtësisë së re, emëroi të hënën 8 prokurorët e parë që do të hetojnë dosjet e korrupsionit dhe krimit të organizuar në nivele të larta qeverisëse. SPAK lindi si pjesë Reformës në Drejtësi duke treguar se ajo po funksionon dhe se “peshqit e mëdhenj” i kanë orët e numëruara. Emërimi i këtyre prokurorëve u përshëndet edhe nga kreu i Grupit Parlamentar të PS-së, Taulant Balla, i cili u dërgoi një mesazh të gjithë atyre që mendonin se Reforma në Drejtësi mund të pengohej apo të dështonte.

“Kush thotë që Reforma në Drejtësi po ecën ngadalë, apo për disa syresh që ende shpresojnë se Reforma mund të pengohet apo të dështojë, sot morën edhe një përgjigje tjetër të fortë. Këshilli i Lartë i Prokurorisë emëroi tetë prokurorët e SPAK. Punë të mbarë prokurorëve specialë në luftën kundër korrupsionit dhe çdo lloj forme KÇK”, shkruan Balla.

SPAK pritet të nis punën pas 19 dhjetorit, ku prokurorët do të kryejnë betimin te Presidenti dhe më pas dosjet e prokurorisë së Krimeve të Rënda do të kalojnë në ngarkim të tyre për hetim. Kjo strukturë që perceptohet si “bërthama” e drejtësisë së re se bashku me BKH pritet që të vendos pas hekurave njerëz të pushtetshëm të korruptuar.

Sot prezantohen “Fauda” e SPAK. Vjen ora e “peshqve të mëdhenj”

Të hënënprezantohet ligji i “Fauda” shqiptare, apo e njohur nga Kryeministri Edi Rama si; Paketa Speciale Anti-KÇK. Paketa është hartuar në bashkëpunim me partnerët strategjikë të Shqipërisë, lajm të cilin e dha Kryeministri Rama pasditen e të dielës në Twitter. Ai shkroi se ky ligj po përgatitet në një kohë kur miqtë e Shqipërisë janë vënë në shënjestër të politikës mjerane, ndërsa thekson se këta partnerë do të tregojnë se sa të rëndësishëm janë në luftën e Shqipërisë për progres e drejtësi.

“Sot kur partnerët strategjikë të Shqipërisë e ambasadat e tyre janë vënë në shënjestrën e politikës mjerane të të çmendurve nga frika e drejtësisë, Paketa Speciale Anti-KÇK do të provojë përsëri se sa të paçmueshëm janë këta partnerë në luftën e Shqipërisë për progres e drejtësi. Pa mbështetjen e SHBA/BE e ndihmën e përfaqësuesve të tyre në Shqipëri, s’do kishte nisur kurrë pastrimi i llumit të madh të (pa)drejtësisë e s’do ishte hapur dot kurrë perspektiva e barazisë së vërtetë para ligjit! Edhe Paketa Speciale AntiKÇK s’do bëhej dot pa ndihmën e tyre”, përfundon Kryeministrit.

Po çfarështë “Fauda” që do të prezantohet të hënën?

Realsotyr.al njoftoi disa javë më parë se së shpejti në Shqipëri do të krijohet “Fauda”, një njësi speciale policore, e cila do të ketë në fukos të saj goditjen e grupeve kriminale, të njohur si të “fortët” apo të “paprekshmit”. Disa dhjetëra oficerë janë përzgjedhur dhe trajnuar dhe presin vetëm që paketa ligjore të kalohet në Kuvend. Modeli është i bazuar mbi “Fauda” izraelite. Madje, krerët e kësaj force, kanë trajnuar prej muajsh në Shqipëri, efektivët e “Fauda” shqiptare.

Në fakt, duket rastësi, por “Fauda” do të prezantohet në të njëjtën ditë kur Këshilli i Lartë i Prokurorisë do të emërojë 8 prokurorët e parë të SPAK. Prokuroria Speciale Anti-Korrupsion dhe Anti-Krimit të Organizuar do të marrë jetë pikërisht më 25 nëntor me emërimin e 8 anëtarëve të parë të saj, ndërsa në fillim të vitit të ri, SPAK pritet të jetë gati për të nisur punën me dosje të bujshme. Në të njëjtën kohë po merr jetë dhe Byroja Kombëtare e Hetimit, apo “FBI” shqiptare. Të dyja këto njësi po krijohen nën vëzhgimin dhe ndihmën e pakursyer të Shteteve të Bashkuara të Amerikës, që vetëm pak ditë më parë dhuroi 5 poligrafë për BKH-në. /Realstory.al/