Taksa 100% ndaj Serbisë, Furxhi: Disa mallra futen në Kosovë pa taksë

Për analistin Aleksandër Furxhi, Kosova duhet të bëhet pjesë e tryezës së “Schengenit Ballkanik”, pasi kështu krijohet mundësia që ajo të propozojë kushtet e veta. “Zoti Kurti ka filluar të mbajë qëndrime të moderuara. Është krejt normale që njeriu kur merr përgjegjësi e moderon qëndrimin e vetë. Kur je kryetar qeverie je dhe kryetar i diplomacisë. Më e mira do të ishte pjesëmarrja në forum dhe ngritja e zërit, se sa mos shkuarja hiç”, tha Furxhi.

Në studion e “Real Story”, analisti Furxhi dha një lajm, sipas tij i konfirmuar nga burime, që aktualisht, ndonëse Kosova ka në fuqi taksën 100% për mallrat serbe, kryhen shkëmbime tregtare, madje pa paguar taksa fare. “Nga burime të besueshme, edhe sot që flasim, që Kosova i ka vendosur taksën 100% mallrave serbe, ka mallra që kalojnë pa taksë fare. Ambasadori mund ta konfirmojë”, tha Furxhi.

Shqipëria, Serbia dhe Maqedonia e Veriut hodhën hapin e parë për krijimin e krijimit të “Schengen Ballkanik”, një hapësirë rajonale që krijon mundësi për lëvizje të lirë për popujt dhe ekonominë e vendeve ballkanike. Megjithatë, në tryezën e takimit të parë për krijimin e kësaj “zone” mungonin vende si Mali i Zi, Kosova apo Bosnje Hercegovina.

I ftuar në studion e “Real Story”, i ngarkuari me Punë i Kosovës në Shqipëri, Sylë Ukshini, i pyetur nga gazetari Sokol Balla se çfarë qëndrimi do të mbajë Albin Kurti për këtë nismë, diplomati kosovar tha se kjo do të mbetet të shihet pas krijimit të qeverisë së re. “Duhet të krijohet programi zyrtar i koalicionit. Nuk mund të mbash pozicion, pasi pala tjetër nuk është dakord. Unë mendoj se pocioni i qartë i qeverisë së re, do të shihet vetëm pasi ajo të jetë votëbesuar”, tha Sylë Ukshini.

Eliot Engel mbron Kosovën: Taksa ndaj Serbisë është e drejta e saj

Kongresmeni amerikan, Eliot Engel i ka dalë në mbrojtje Kosovës në lidhje me taksën 100 % e vendosur ndaj produkteve serbe. Engel shprehu kritika dhe zemërim ndaj Serbisë se nuk po i përmbush premtimet e dhëna dhe po tenton të bllokojë Kosovën me çdo mënyrë.

“Unë e përkrah të drejtën e Kosovës për t’i vendosur këto tarifa, të drejtën e kryeministrit për t’i vendosur këto taksa, sepse nuk besoj që Serbia po i përmbush premtimet e saj që i ka bërë. Jam shumë i zemëruar me faktin se sa herë që Kosova po tenton të bëhet pjesë e organizatave ndërkombëtare, Serbia po tenton ta bllokojë. Kjo ndodhi me INTERPOL-in, dhe ndodhi edhe me organizatat tjera.” – tha Engel gjatë një interviste për mediat kosovare.

Kongresmeni Engel deklaroi se ai ka një dashuri të veçantë për popullin shqiptar dhe u shpreh i lumtur që Kosova më në fund kishte ushtrinë e saj, si çdo shtet tjetër në botë. Duke vënë re përparimet e Kosovës tha Engel mendoj se tashmë është koha që BE të liberalizojë vizat për qytetarët e Kosovës.

“Është koha për Bashkimin Evropian t’ua jap liberalizimin e vizave kosovarëve, duhet të ndodhë menjëherë, jo vitin e ardhshëm, jo në vitin 2020, duhet tani. Gjithmonë ua dedikojë dashurinë dhe energjinë njerëzve të Kosovës dhe të Shqipërisë. Shumë gjëra të mira kanë ndodhur këtë javë, me theks të veçantë në Kosovë. Pas disa vitesh, ata arritën ta krijojnë ushtrinë e tyre në Kosovë, mendoj se është një hap i rëndësishëm dhe shumë i mirë për të vazhduar përpara. Mendoj që secili shtet duhet ta ketë ushtrinë e vet dhe Kosova nuk është ndryshe nga vendet e tjera.” tha Engel

Ndryshon taksa për makinat: Sa më e fuqishme të jetë aq më shumë do paguani

Qeveria parashikon që të ndryshojë politikat e taksimit sa u takon automjeteve, sipas së cilës sa më të fuqishme ta keni makinën, aq më shumë do t’ju duhet të paguani.

Referuar një dokumenti zyrtar, parashikohet që në vijim të ketë një lehtësim në aspektin e taksave për automjetet hibride apo elektrike, si dhe për ato që janë të kategorisë Euro 4 apo 5. Kjo shihet si një mënyrë për të nxitur blerjen e mjeteve të reja, si dhe ato që emetojnë sa më pak ndotje në mjedis.

Konkretisht në dokument thuhet se do të bëhet “rishikimi i sistemit aktual të taksave të automjeteve në Shqipëri si: Aplikimi i taksës për të gjitha automjetet në mënyrë të pavarur nga mosha, por në mënyrë proporcionale në nivelin e teknologjisë dhe nivelin e shkarkime të vetë automjetit. Rritja e taksave në proporcion me cilindrat/ madhësinë e motorit. Gradualisht përjashtimi nga taksat i automjeteve të reja me ndotje të ulët (si Euro VI dhe V ose automjetet hibride / elektrike)” thuhet në dokument.

Sigurisht, kjo është sugjeruar si një masë që do të zërë vend në afatmesëm dhe që kërkon angazhimin e të paktën tre ministrive për të dalë në një politikë të unifikuar. Bëhet fjalë për Ministrinë e Mjedisit dhe Turizmit, atë të Infrastrukturës dhe Energjisë, si dhe Ministrinë e Financave dhe Ekonomisë.

Në funksion të nxitjes së automjeteve që emetojnë sa më pak gazra ndotës në mjedis është cilësuar si thelbësor edhe bashkëpunimi me njësitë vendore, ku bashkive do t’ju kërkohet që të angazhohen në instalimin e stacioneve të karikimit me energji elektrike për automjetet elektrike.

Po kështu do të kërkohet rinovim i flotës për kompanitë që kanë një të tillë dhe ofrojnë shërbime, për automjetet e transportit urban, ato të pastrimit të qytetit e disa kategori të tjera.

Për të dhënë ndikim në uljen e ndotjes së ajrit në dokument kërkohet që autoritetet të punojnë për të bërë lehtësimin në rritjen e shpërndarjes së stacioneve të mbushjes me ndikim të ulët (GLN dhe metan) . Po kështu të bëhet sigurimi i karburantit me përmbajtje të ulët të squfurit dhe me cilësi të lartë (në nivel me MS-të) të përdoret në të gjitha mjetet e transportit.

Kjo do të ecë paralel edhe me rritjen e kontrollit që bëhet në verifikimin e testimit të shkarkimeve të automjetit, autobusëve dhe flotës së automjeteve, për të kufizuar dhe për të reduktuar shkarkimet e grimcave dhe ndotësve të tjerë të ajrit./Monitor

Taksa 100%, Serbët në veri të Kosovës vijojnë protestat

Për të dytën ditë me radhë, në veriun e Kosovës të banuar më shumicë serbe, janë mbyllur të gjitha dyqanet e ushqimeve dhe në shenjë solidarizimi, nuk funksionojnë as veprimtaritë tjera afariste.

Mbyllja e dyqaneve është pjesë e protestës ndaj tarifave prej 100 për qind, që qeveria e Kosovës u vuri mallrave serbe në nëntor të vitit të kaluar, në shenjë kundërvënieje ndaj siç është thënë, fushatës agresive të Serbisë ndaj shtetësisë së Kosovës.

Autoritetet në Serbi dhe përfaqësuesit lokal serb në veriun e Kosovës, thonë se tarifat dhe operacionet e policisë së Kosovës për të mbyllur rrugët alternative përtej vendkalimeve kufitare ndërmjet Kosovës dhe Serbisë, kanë bërë që të mungojnë mallrat themelore siç janë mielli dhe prodhimet e qumështit dhe se veriu është në “prag të krizës humanitare”.

Qeveria e Kosovës shpërndau kamionë me mallra në veri për të mbushur boshllëkun e krijuar nga protesta. Por, tash për tash duket se blerësit janë të paktë, meqë udhëheqësit organizatës së “afaristëve serbë në veri” kanë bërë thirrje që askush të mos blejë në dyqanet në pjesën jugore të Mitrovicës të banuar me shumicë shqiptare, e madje as në lagjen e boshnjakëve që është me popullsi të përzier në veri e ku dyqanet janë plot.

Kryeministri i Kosovës, Ramush Haradinaj tha të martën se qeveria do të mbështesë dhe mbrojë qytetarët e saj në veri.

Kosova do të mbështesë dhe mbrojë qytetarët e saj në veri!Në takim pune me ambasadorët e shteteve të QUINT-it dhe…
Gepostet von Ramush Haradinaj am Dienstag, 2. Juli 2019

Ai është takuar me ambasadorët e shteteve kryesore euro-perëndimore dhe shefen e zyrës së Bashkimit Evropian në Prishtinë, Nataliya Apostolova, sic tha për t’i informuar për angazhimin e qeverisë për sundim të ligjit dhe rendit në veri, si dhe për veprimet e ndërmarra për furnizim të qytetarëve të asaj ane me artikuj të nevojshëm”.

Në një postim në rrjetin tëiter ai i bëri thirrje presidentit të Serbisë, Aleksandër Vuçiç, që “të mos e zbatojë skenarin mashtrues për të destabilizuar veriun e Kosovës. Kriza e rreme ‘humanitare’, nuk do të shërbejë kurrë si mburojë për qëllimet tuaja të destabilizimit, dhe ju do të mbaheni përgjegjës”, shkroi ai.

Para tarifave, Serbia eksportonte në Kosovë rreth 500 milionë euro në vit dhe autoritetet në Serbi janë ankuar për humbje të mëdha të kompanive serbe që nga nëntori i vitit të kaluar.

Beogradi akuzon Prishtinën se ka bllokuar procesin e bisedimeve për normalizimin e marrëdhënieve me tarifat duke kërkuar heqjen e menjëhershme të tyre, ndërsa Prishtina akuzon Beogradin për kushtëzim bisedimesh.

Qëndrimet e pandryshuara të palëve bënë që të dështojë edhe një nismë e kancelares gjermane Angela Merkel dhe presidentit francez Emanuel Macron, për një takim në Paris që ishte për planifikuar për dje më 1 korrik./Zëri Amerikës/

Haradinaj gati të pezullojë taksën për mallrat serbe

Kryeministri i Kosovës, Ramush Haradinaj, tha të premten në Prishtinë pas kthimit nga Berlini, se Kosova është e gatshme të shqyrtojë mundësinë e pezullimit të tarifave ndaj mallrave serbe, për një kohë të caktuar, por për këtë duhet të ketë qartësi të procesit të bisedimeve.

Kryeministri, qëndroi për dy ditë në Gjermani ku pati takime me kancelaren gjermane, Angela Merkel dhe zyrtarë të tjerë në Berlin, me të cilët pas dyerve të mbyllura, ka diskutuar zhvillimet në Kosovë, mundësitë e ripërtëritjes së bisedimeve me Serbinë dhe përgatitjet për takimin e Parisit me 1 korrik, të organizuar nga kancelarja Merkel dhe presidenti francez, Emmanuel Macron.

I pyetur nga gazetarët për mundësinë e dështimit të këtij takimi, ai tha se për këtë askush nuk do të mund të fajësonte Kosovën.

@VOA

Trump si Haradinaj, kërcënon Meksikën me taksë për produktet e saj

Presidenti i SHBA-ve, Donald Trump ka kërcënuar Meksikën për vendosjen e taksës për të gjitha produktet që importohen nga ky vend, nëse nuk ndalon emigrimin e paligjshëm. Pas publikimit të një video disa ditë më parë ku me qindra emigrantë kaloni kufirin ilegalisht, Trump duket se e ka rritur më shumë presionin e tij ndaj Meksikës.

I menjëhershëm ka qenë reagimi i presidentit meksikan, Andres Manuel Lopez Obrador, i cili tha se është i hapur për negociata dhe pret që të arrijë një marrëveshje me Trump gjatë bisedimeve të planifikuara në Washington javën e ardhshme. Obrador tha se qeveria meksikane ka marrë masa për emigracionin dhe se nuk ka në plan të futet në një luftë tregtare me SHBA-të.

“Gjëja kryesore është të informojmë për atë që po bëjmë tashmë për çështjen e migracionit dhe nëse është e nevojshme të përforcohen këto masa pa shkelur të drejtat e njeriut. Ne po bëjmë gjithçka që mundemi për të arritur një marrëveshje përmes dialogut. Ne nuk do të hyjmë në një luftë tregtare, një luftë tarifash dhe taksash.” -tha presidenti meksikan.

“Taksa hiqet vetëm pas njohjes”

Në një intervistë ekskluzive për gazetarin Thimi Samarxhiu, kryeministri i Kosovës ka folur lidhur me përplasjet me kryeministrin Rama dhe presidenti Thaçi, akuzat e bëra ndaj tyre dhe se çfarë ndodhi në samitin e Berlinit. Gjatë intervistë Haradinaj foli edhe për taksën e vendosur për produktet serbe që ka çuar edhe në ngecjen e negociatave me Serbinë. Haradinaj tha se taksa do të hiqet vetëm kur Serbia të njoh Kosovën dhe se kërkoi që qeveria Shqiptare të mbështes Kosovën dhe ta besojë në vendimet që merr.

Gazetari: A mendoni që Shqipëria duhet të hyjë kaq shumë në interesin e Taksës?

Haradinaj: Unë nuk mendoj që Shqipëria duhet të mbetet indiferente në çështjet e interesit nacional, as në Kosovë e as në ndonjë vend që ka shqiptarë. por duhet gjithashtu të respektojë qëndrimet e përfaqësuesve të atij vendi. Nëse unë duhet të mbaj një qëndrim për shqiptarët, duhet të kem në konsideratë qëndrimet e atyre që janë në terren. Kur ishte rasti I taksës, amerikanët thanë me pezull taksën. Unë thash që jam ushtar në frontin e parë të Amerikës kundër rusit. Vija mes Kosovës e Serbisë është vija mes Amerikës e Rusit. Unë thash që jam në vijë të parë e ti je eprori im, ti po më thua dorëzohu te armiku. unë me kushtetutë të Amerikës kam të drejtë të them jo. Shqipëria ka te drejtë të interesohet, por gjithashtu duhet të respektohet integriteti I atij që mban vijën e frontit. pra nuk më pengon kurrë interesimi I çdo bashkëkombësi tim, qoftë edhe pa detyre zyrtare për çështjet e interesit kombëtar. Përkundrazi e marr pozitivisht. por nëse jam ne vijë të frontit, e di unë çfarë drejtimi mbaj, jo ai që rri atje larg. Sepse në raste të caktuara ata nuk i kuptojnë proceset.

Gazetari: Po flisni këtu për kryeministrin Edi Rama?

Jo, por ka raste që ata që bëjnë politikat nga larg, nuk e kuptojnë gjendjen reale. Si mund dikush në Tiranë të më tregojë sa e kontrolloj unë Veriun? Unë s’mundem të vij dhe të tregoj ty si e kontrollon ti një gjë Shqipëri. Jo sepse ti që je aty e di më mirë. Ne nuk jetojmë të gjithë në parametra të njëjtë. Vijmë të gjithë nga përvoja të ndryshme. Unë nuk kam kryer akademinë apo shkollën e arteve. Por kam kryer një shkollë të vështirë jetësore. që fëmijë jam përball të mbroj familjen, jetën e familjes prej një pushuesi shumë të egër. Unë çdo dy tre ditë jam në përvjetor të masakrave. Le të vijnë udhëheqësit e Shqipërisë të tre, edhe presidenti Meta dhe zoti Ruci edhe Zoti Rama, e ti përjetojnë një javë këto masakra, pas një jave ata do të jenë shumë më të ndryshëm. Kjo është ajo që dua unë të shpjegoj, lërja atij që po përballet të veprojë.

Gazetari: Kur do te hiqet taksa?

Haradinaj: Kur të na njohë Serbia. kjo është e vërteta. Kur të na njohë Serbia do hiqet taksa.

Gazetari: Një mesazh për klasën politike në Shqipëri kur Kosova është në presion të madh nga gjithë palët për të hequr taksën?

Haradinaj: Shumicën e angazhimit Shqipëria e ka të mirë për Kosovën, por duhet të na besojnë edhe kur mendojnë se ne e kemi gabim ndonjëherë. Duhet të bëjmë kujdes që kur marrim qëndrim për çështje të interesit të Kosovës, është me rëndësi të kuptojnë që duhet të bëjnë kujdes.