“Pas tre tërmetesh, politika të ndryshojë lëkurë”

Ministri i Diasporës Pandeli Majko i bëri thirrje klasës politike të jetë më e përgjegjshme, në një kohë që Shqipëria është goditur nga tre tërmete të fuqishme brenda një viti. Majko u shpreh koshient se ajo që po bën qeveria nuk është gjëja më e zgjuar që mund të bëhet në këto momente, por sipas tij, qeveria po bën atë që mundet.

“Nuk mendoj të them që ajo që po bën qeveria është gjëja më e zgjuar që mund të bëhet në këto momente, por një gjë e them me bindje, qeveria po bën atë që mundet”, tha Majko. Këto deklarata, Majko i bëri pas konferencës “Itali dhe Shqipëri, një portë e hapur në Ballkan”, e cila nisi me një minutë heshjte në nderim të viktimave të tërmetit të 26 nëntorit. Majko u shpreh gjithashtu se politika duhet të “ndryshojë lëkurë”, pasi sipas tij historia e pasojave të tërmetit nuk do të mbyllet brenda disa muajve.

“Nuk bëhet thjesht për të realizuar një fotografi. Është shumë e rëndësishme edhe për njerëzit e traumatizuar që të gjitha palët sipas parimit shumë mendje janë më shumë sesa disa mendje. Prandaj në këto kushte kur Shqipërinë e kanë goditur tre tërmete brenda një viti është e nevojshme që politika të ndryshojë pak lëkurë nëse ka mundësi. Nuk bëhet fjalë për një histori që do mbyllet brenda disa muajve do të duhet një kohë relativisht e gjatë. Do të duhen shpenzime shumë të mëdha për të tejkaluar dëmet e tre tërmeteve”, u shpreh Majko.

Rama drejt New Yorkut për Trump: Tërmetet “fake” në media, synojnë kaos

Kryeministri Edi Rama i është rikthyer jetës normale pas lëkundjeve të tërmetit dhe të njëjtën thirrje bën për të gjithë duke kujtuar se tërmetet janë të paparashikueshme dhe frika ndaj tyre s’mund ta mbajë vendin pezull. Por të gjithë duhet t’i kthehen përditshmërisë. Ndaj dhe kryeministri është nisur drejt New Yorkut ku do të takohet me presidentin Trump dhe ku do të flasë në samitin e OKB-së për Shqipërinë. Dy ditë me herët sapo u njoftua për tërmetin e datës 21 shtator, kryeministri ndodhej në Frankfurt, rrugës për në New York por e ndërpreu menjëherë udhëtimin e tij dhe u kthye në Shqipëri ku drejtoi institucionet qeverisëse për të përballuar emergjencat që lindën nga tërmeti. Por siç thotë dhe Rama, qëndrimi i tij nuk i ndalon lëkundjet e tërmetit, ndaj dhe puna duhet të nisë si normalisht.

“Sot për Shqipërinë nis një ditë e zakonshme si të gjitha të tjerat dhe prandaj edhe unë, vendosa të rimarr udhëtimin e punës për në Nju Jork, ku do të takohem me Presidentin e Shteteve të Bashkuara e me të tjerë kryetarë shtetesh e qeverish apo personalitete me rëndësi, si edhe do të flas në emër të Shqipërisë në Kombet e Bashkuara.

Duke e ndërprerë udhëtimin dy ditë më parë dhe duke u kthyer me urgjencë në Tiranë, unë as do të parandaloja ndonjë tërmet e as do të bëja ndonjë çudi që pa mua nuk bëhej dot. Por plotësova boshllëkun e një mungese, e cila në planin njerëzor do të ishte e pajustifikueshme në raportin e zemrës me njerëzit që më kanë besuar detyrën e lartë. Tanimë është momenti, që secili të jetë aty ku është më i vlefshëm gjatë ditës së saponisur dhe teknologjia, vërtetë s’na ka dhënë ende asnjë shans të parashikojmë tërmetet, por na ka dhënë mundësinë fantastike që edhe mijëra kilometra lart në ajër apo matanë oqeanit, të jemi vetëm një klik larg zyrave ku drejtohen punët e vendit.

Kështu që nga zyra ime online në mrrokllën e zezë, për momentin në aeroportin e Stambollit, ku sapo po nisem për Nju Jork pasi erdha mbrëmë vonë me Air Albania-n, po ju le këtu këtë shënim përpara “Mirëmëngjesit” tradicional të orës 08.00”, shkruan Rama.

Ai dënon ashpër të gjitha lajmet e rreme që u shpërndanë gjatë mbrëmjes së të dielës nëpër rrjete sociale dhe më pas në portale, duke i cilësuar çnjerëzore përpjekjet për të përhapur panik te banorët e Tiranës, shumica e të cilëve ranë pre e gënjeshtrave dhe dolën në shesh, apo në rrugë. Rama shkruan se autorët do të mbajnë përgjegjësi penale.

“Jam thellësisht i revoltuar, që një idiot apo disa syresh së bashku, përhapën një Fakeneës kriminal për ardhjen e një tërmeti shkatërrues dhe kallën mbrëmë panikun në shpirtin e shumëkujt prej jush! Po njëkohësisht, jam thellësisht i keqardhur, që shumë prej jush, ranë pre e asaj ligësie të pashoqe, të prodhuar e shpërndarë me shpejtësi, nga marrëzia e kujt verbërisht kërkon sherr, rrëmujë, kaos mundësisht, për arsyet e panjerëzishme të Mosarsyes.

Tërmeti që ra mbi Shqipërinë, tronditi qindramijëra familje, por fatlumësisht nuk mori asnjë jetë dhe dëmet e tij, që krahasuar me të tjera vende përreth, për të njëjtën shkallë Rihter e të njëjtat ballë në epiqendrën fare pranë Durrësit, mund të kishin qenë katastrofike, ishin të thuash pak, minimale. Lekundjet e mëpastajme, me të cilat u arrit deri në spekullimin çnjerëzor të mbrëmjes së djeshme, ishin sipas të gjithë ekspertëve, krejt brenda normës së procesit të stabilizimit të pllakave tektonike.

E përsëris, dëmet janë minimale dhe pa lidhje me panikun maksimal që krijoi goditja dhe ushqeu më pas, papërgjegjshmëria haluçinante e një sërë burimesh (diz)informacioni.

Gjithçka ka kaluar si s’ka më mirë, në krahasim me ç’mund të kishte qenë dhe jeta vazhdon po njësoj; askush s’e di çfarë na rezervon fati apo natyra, sepse siç nuk ka mundur të parashikojë dot tërmetet, dija njerëzore s’ka mundur ende të parashikojë kohëzgjatjen e jetës sonë. Por ne çohemi çdo mëngjes e vazhdojmë rrugën e jetës, pa menduar se atë ditë mund të na ndalë zemra dhe biem të flemë çdo natë, pa menduar se mund të mos e shohim ditën tjetër. E pra, po aq absurde sa mund të duket të jetosh nga mëngjesi në mbrëmje me idenë e fundit të jetës, është edhe frika se nga momenti në moment, mund të bjerë tërmet.

Padiskutim, s’ka asgjë jonjerëzore në absurdin e frikës që pason përvojën traumatike të një goditjeje sizmike, prandaj edhe pjesa më e rëndësishme e rekuperimit të dëmeve, nis pikërisht nga solidariteti njerëzor me ata që janë prekur më shumë jo thjesht materialisht, po në radhë të parë psikologjikisht; pikërisht ky aspekt e ka bërë njerëzimin që ta kthejë globalisht në ndëshkim penal, kafshërinë e përhapjes së panikut në popull”, shkruan Kryeministri.

Gjatë mbrëmjes së të dielës policia ka shoqëruar dy gazetarë për përhapjen e lajmeve fake se në Tiranë dhe në Durrës do të binte sërish tërmet në orën 23.30. Kështu policia gazetarin e portalit “SYRI.net”, Aurel Rakipllari dhe gazetaren Daniela Grica e “Shekullit”./Reasltory.al

Tërmetet në Korçë, Ervin Salianji kërkon shpalljen e gjendjes së jashtëzakonshme

Ish deputeti demokrat Ervin Salianji, duke e cilësuar emergjente situatën në qytetin e Korçës, ka kërkuar shpalljen e gjendjes së jashtëzakonshme dhe përqendrimin e të gjitha burimeve në këtë bashki për t’u ardhur në ndihmë banorëve.

Në një postim në facebook, Salianji akuzon qeverinë që i ka lënë, sipas tij banorët, nëpër çadra pa asnjë kusht, ndërsa shton se kjo situatë nuk zgjidhet me foto në facebook.

“Situatë më emergjente se çdo emergjencë, shpallja e gjendjes se jashtëzakonshme, dëmshpërblimi për çdo pronë të dëmtuar dhe përqëndrimi i gjithë burimeve në bashkitë Korçë, Devoll dhe Kolonjë, kryesisht në Floq, Qafzez dhe Vidohovë në zonat e shkatërruara nga tërmeti!

Fëmijë të vegjēl, gra, të moshuar dhe burra të gjunjëzuar dhe me lot dhimbje për mundin e gjithë jetës te shkuar dëm dhe për pamundësinë për të ndihmuar familjet që flejnë me keq se bagëtitë në kasolle apo çadra skandaloze pa asnjë kusht.

Nuk është kërkesë për përfitim politik, ështē kerkese njerëzore përcveçse detyrim ligjor për të ndihmuar qindra familje që vuajnë në mes të rrugëve! Nuk zgjidhet situata me facebook dhe me parada por me përqëndrim të çdo burimi në zonë, ka nevojë emergjente për ushqime, ilaće, batanije dhe më shumë se keto kanë nevojën të sigurohen që prona dhe jeta e tyre do të rindërtohen!

Turpi i mbuloftë gjithë ata punonjës administrate që e ndajnë për të majte dhe jo për votuesit e PD dhe pakon e makaronave që nevojitet për të mbajtur frymen e banorëve!”, shkruan Salianji.

Prej disa ditësh, Emergjencat Civile, ministria e Mbrojtjes dhe ajo e Shëndetësisë janë angazhuar në qarkun e Korçës për t’u ardhur në ndihmë banorëve të prekur nga tërmetet duke i siguruar atyre, fjetje, ushqim dhe shërbim shëndetësor gjatë 24 orëve.

Situatë më emergjente se çdo emergjencë, shpallja e gjendjes se jashtëzakonshme, dëmshpërblimi për çdo pronë të dëmtuar…
Gepostet von Ervin Salianji am Dienstag, 4. Juni 2019

100 tërmete brenda 3 ditësh në Korçë. Sigurohet ushqim dhe fjetje për banorët

Drejtoria e Përgjithshme e Emergjencave Civile njofton se janë regjistruar gjithsej 100 lëkundje sizmike në qarkun e Korçës brenda 3 ditëve të fundit.

Nga verifikimi i bërë nga Emergjencat Civile, në 3 fshatrat e prekur më shumë nga tërmetet, rezultojnë 184 banesa të dëmtuara, prej të cilave 95 të dëmtuara rëndë, pjesa më e madhe e tyre banesa të pabanueshme prej vitesh.

Ndërkohë që një sërë masash janë marrë për t’u ardhur në ndihmë banorëve që janë prekur nga tërmeti.

Kështu në fshatin Floq janë sistemuar 160 banorë në 13 çadra me kapacitet deri në 20 vende.

Në fshatin Vidohovë janë ngritur 4 çadra, sipas nevojave të banorëve. Janë sistemuar 40 persona dhe nga këta 20 persona në kishën e fshatit dhe 20 në të afërmit e tyre.

Në fshatin Qafëzez janë sistemuar 30 persona në 5 çadra të ngritura nga 10 që janë dërguar. Në këto dy fshatra, disa prej banorëve kanë kërkuar që të strehohen pranë të afërmve të tyre.

Janë dërguar 240 pako ushqimore, 100 thasë me miell, 100 detergjente. Nga këto 100 pako janë dërguar nga organizata joqeveritare, 100 pako ushqimore nga Drejtoria e Rezervave Materiale të Shtetit për të tre fshatrat dhe 40 pako nga Kryqi i Kuq për tre fshatra.

Për furnizimin me ujë të pijshëm në fshatin Floq është vënë në dispozicion 1 bot i Detashmentit të Mbështetjes Rajonale, si dhe bidonë me ujë të pijshëm nga TAP. Nga TAP është siguruar ushqim ditor për 160 banorë të fshatit Floq.

Shërbimi shëndetësor ka qenë dhe është prezent pranë familjeve të evakuuar dhe ka kryer ndërhyrje për çdo rast problematik kur është paraqitur. Në fshatin Floq është ngritur 1 qendër shëndetësore.

Janë angazhuar në total 15 mjete nga të cilat Prefektura 2, Detashmenti i Mbështetjes Rajonale 3, Policia 2, Spitali Korçë 1, Bashkitë 6, Kryqi i Kuq 1, si dhe grupi vullnetar i Bashkisë Tiranë 1.

Nga strukturat e FA të Ministrisë së Mbrojtjes në këto 2 ditë janë angazhuar gjithsej në ndihmë të banorëve të zonës 47 forca, 4 mjete dhe 2 zjarrfikëse.